డైరెక్ట్ చేసిన తొలి సినిమా 'డాలర్ డ్రీమ్స్‌తోటే ఉత్తమ తొలి చిత్ర దర్శకుడిగా జాతీయ అవార్డును సొంతం చేసుకున్న శేఖర్ కమ్ముల కొంత కాలంగా 'లైఫ్ ఈజ్ బ్యూటిఫుల్' అనే ప్రాజెక్టులో నిమగ్నమై ఉన్నాడు. తనకి ఎంతో పేరు తీసుకు రావడంతో పాటు బాక్సాఫీసు వద్ద సూపర్‌హిట్టయిన 'హ్యాపీడేస్' తరహాలోనే ఈ సినిమా ద్వారా కొత్తవాళ్లని పరిచయం చేసేందుకు సిద్ధమవుతున్నాడు. ఇప్పటికే టేలంట్ హంట్ ద్వారా వచ్చిన వారిలోంచి కొంతమందిని ఎంపిక చేసి, వారికి ఆడిషన్ నిర్వహిస్తున్నారు. 'హ్యాపీడేస్'లో నలుగురబ్బాయిలు, నలుగురమ్మాయిలు ప్రధాన పాత్రధారులు కాగా, 'లైఫ్ ఈజ్ బ్యూటిఫుల్'లో ముగ్గురు హీరోలు, ముగ్గురు హీరోయిన్లు ఉంటారు. కాలేజీ అనంతర జీవితాన్ని స్పృశించే కథతో ఈ సినిమాని తీయబోతున్నాడు శేఖర్. ఈమధ్యే ప్రతిష్ఠాత్మక కేన్స్ ఫిల్మ్ ఫెస్టివల్లోని ఇండియన్ పెవిలియన్‌లో పాల్గొని, ఆ ఘనత పొందిన ఏకైక తెలుగు దర్శకుడిగా పేరు తెచ్చుకున్న ఆయన చాలా దీక్షతో ఈ ప్రాజెక్టుపై పనిచేస్తున్నాడు. కారణం, తానెంతో ఆశలు పెట్టుకున్న 'లీడర్' సినిమా ఆశించిన రీతిలో విజయాన్ని సాధించక పోవడం. 'హ్యాపీడేస్' శతదినోత్సవ సభలో తన సినిమా ఫెయిలైతే అప్పట్నించీ సినిమాలు తియ్యడం ఆపేస్తానని ఆయన ప్రకటించాడు. అది అతి విశ్వాసంతోనో, అహంకారంతోనో చెప్పిన మాటలు కావు. తన మీదా, తన సామర్థ్యం మీదా ఉన్న నమ్మకంతో చెప్పినవి. అందుకే చాలామందికి మల్లే హడావుడిగా ఏదో ఒకటి తీయడం ఆయనకు తెలీదు. తెలిసిందల్లా తను నమ్మిన దాన్ని నిబద్ధతతో తీయడం. ఈ సంగతి ఆయన్ని ఎరిగిన వాళ్లకి బాగా తెలుసు. 'లైఫ్ ఈజ్ బ్యూటిఫుల్' ప్రాజెక్టుకి ఆయన తీసుకుంటున్న సమయం ఎక్కువైనా, అంతిమంగా ఆ సినిమాతో ఆయన మరోసారి వార్తల్లో నిలవడం ఖాయం.
No comments:
Post a Comment