Cinema: Box-office Battle on Independence Day

- ఆంధ్రజ్యోతి డైలీ, 3 జూలై 2014

Surya's straight Telugu film in 2014

సూర్య సరసన హన్సిక

సూర్య, అనుష్క జంటగా నటించిన 'సింగమ్' ఘన విజయం సాధించింది. ఈ సినిమా తెలుగులో 'యముడు' పేరుతో విడుదలై ఇక్కడా సక్సెసయింది. ఇప్పుడు ఈ చిత్రానికి సీక్వెల్ తీసే పనిలో పడ్డాడు దర్శకుడు హరి. ఈ సినిమాలో సూర్య సరసన నాయికగా అందాల తార హన్సిక ఎంపికైంది. తమిళంలో 'చిన్న కుష్బూ'గా పేరుపొందిన హన్సిక ఈ సినిమాలో కాలేజ్ గర్ల్‌గా కనిపించన్నుది. సూపర్‌హిట్ తెలుగు సినిమా 'దేశముదురు'తో హీరోయిన్‌గా పరిచయమైన హన్సిక తెలుగులో కంటే తమిళంలోనే బాగా పాపులర్ అవడం గమనార్హం. 'మాప్పిళ్లై', 'ఎంగేయుమ్ కాదల్', 'వేలాయుధం', 'ఒరు కల్ ఒరు కన్నాడి' సినిమాలతో ఆమె తమిళంలో టాప్ హీరోయిన్ ఇమేజ్ సంపాదించింది. 'సింగమ్ 2' సినిమా తన పాపులారిటీని మరింత పెంచుతుందనే నమ్మకాన్ని వ్యక్తం చేస్తోంది ఈ సుందరి. కాగా ఒరిజినల్‌కి సంగీతం సమకూర్చిన దేవిశ్రీ ప్రసాద్ ఈ సినిమాకీ బాణీలు కూర్చబోతున్నాడు.

రివ్యూ: సెవెన్త్ సెన్స్

ఒక కాంబినేషన్ రిపీట్ అవుతుందంటే అంతకుముందు ఆ కాంబినేషన్‌లో వచ్చిన గొప్ప సినిమాతో పోలిక తేవటం చాలా సహజం. అదే పని ఇప్పుడు 'సెవెన్త్ సెన్స్' విషయంలో జరుగుతోంది. సూర్య, ఎ.ఆర్. మురుగదాస్ కాంబినేషన్‌లో వచ్చిన మునుపటి సినిమా 'గజిని'తో 'సెవెన్త్ సెన్స్'ని పోల్చి గట్టిగా పెదవి విరుస్తున్నారు ఇటు ప్రేక్షకులూ, అటు విమర్శకులూ. ఓ ప్రేమకథకి ప్రతీకారం అనే అంశాన్ని జోడించి అప్పటివరకు భారతీయ తెరపై రానివిధంగా మురుగదాస్ ప్రెజేంట్ చేసిన 'గజిని' సినిమా ప్రేక్షకుల్ని సమ్మోహితుల్ని చేసింది. అందులో సూర్య, అసిన్ ప్రదర్శించిన అభినయాలు మన కళ్ల ముందు ఇంకా సజీవంగానే ఉన్నాయి. అదే సూర్య ఇప్పుడు 'సెవెన్త్ సెన్స్'లోనూ చాలా బాగా నటించాడు. కానీ ఆ నటనకి ప్రయోజనం అంతగా లేకుండా పోయింది. కారణం మురుగదాస్ ఫ్లాట్ అండ్ బోరింగ్ స్క్రిప్ట్. 'గజిని' హిట్టవటంలో ఎంటర్‌టైన్‌మెంట్ పాత్ర ఎంతో ఉంది. 'సెవెన్త్ సెన్స్'లో లోపించింది అదే. 
క్రీ.శ. 6వ శతాబ్దం నాటి సన్నివేశాల్ని ప్రశంసనీయంగా చిత్రించిన మురుగదాస్ వర్తమాన కాలానికి వచ్చేసరికి స్క్రిప్టుపై పట్టు కోల్పోయాడు. యుద్ధ కళల్లోనే కాక ప్రకృతి వైద్యంలోనూ అసామాన్యుడైన బోధిధర్ముడు (సూర్య) చీనా దేశంవెళ్లి అక్కడ విపత్తులో ఉన్న ఓ గ్రామ ప్రజల్ని ఓ ప్రాణాంతక అంటువ్యాధి నుంచి రక్షించడమే గాక, వారికి ఆత్మరక్షణ కోసం యుద్ధ కళల్నీ నేర్పుతాడు. వారికి దేవుడిగా మారతాడు. కొన్నేళ్ల తర్వాత భారతదేశానికి తిరిగి రావాలని అతడనుకుంటే, అక్కడి పెద్దలు మరో రకంగా తలుస్తారు. అతడి దేహం అక్కడే ఉంటే ఎలాంటి వ్యాధులూ వారి దరిచేరవని భావించిన వాళ్లు అతడికి ఆహారంలో విషమిస్తారు. అది తెలిసి కూడా వాళ్ల కోరిక మన్నించి, ఆ ఆహారాన్ని భుజించి తనువు చాలిస్తాడు బోధిధర్ముడు. అప్పటివరకు ఆ సన్నివేశాల్ని చక్కగా తీసి, మనల్ని ఆ కాలానికి తీసుకుపోయాడు దర్శకుడు. ఆ తర్వాత కథ వర్తమానానికి వస్తుంది. ప్రఖ్యాతి చెందిన బాంబే సర్కస్‌లో అరవింద్ (సూర్య) ఓ కళాకారుడు. అతడిని వెతుక్కుంటూ శుభా శ్రీనివాస్ (శ్రుతిహాసన్) అనే ఓ జెనటిక్ స్టూడెంట్ అక్కడికి వచ్చి, అరవింద్‌తో పరిచయం పెంచుకుంటుంది. అరవింద్ ఆమె ప్రేమలో పడతాడు. అయితే ఆమె తనవద్దకు వచ్చింది తనమీద పరిశోధనలు చేయడానికి అని తెలిసి కుమిలిపోతాడు. శుభ అతడికి తన పరిశోధనలోని ప్రయోజనాన్ని అతడికి తెలియజేస్తుంది. 6వ శతాబ్దం నాటి బోధిధర్ముడి డీఎన్ఏని దానితో సరిపోలే అతడి వంశానికే చెందిన వ్యక్తి డీఎన్ఏతో కలిపితే మరో బోధిధర్ముడు తయారవుతాడనీ, అంతుచిక్కని ఎన్నో వ్యాధుల్ని అప్పుడు నయం చేసి, ఆరోగ్యవంతమైన భారతావనిని సృష్టించవచ్చనీ చెబుతుంది. అతడి డీఎన్ఏ బోధిదర్ముడి డీఎన్ఏతో మ్యాచ్ అవుతునందనే సంగతీ చెబుతుంది. మరోవైపు చైనా ప్రభుత్వం ఇండియా మీద 'ఆపరేషన్ రెడ్' అనే ప్రయోగాన్ని చేసేందుకు డాంగ్‌లీ అనే మార్షల్ ఆర్ట్స్ నిపుణుణ్ణి నియమిస్తుంది. 6వ శతాబ్దంలో బోధిధర్ముడు ఏ ప్రాణాంతక వ్యాధిని నయంచేశాడో, ఆ వ్యాధి వైరస్‌తో భారతదేశాన్ని ఛిన్నాభిన్నంచేసి, దాని మందుని తామే భారతదేశానికి అందజేసి, తద్వారా ఈ దేశాన్ని లొంగదీసుకోవాలనేది దాని ప్లాన్. అందుకు శుభ చేసే పరిశోధన వారికి అడ్డుగా నిలుస్తుంది. ఆమె వల్ల బోధిధర్ముడి శక్తిసామర్థ్యాలు మళ్లీ వస్తే తమ కష్టమంతా వేస్టవుతుందని ఆమెనీ, అరవింద్‌నీ కూడా చంపమని డాంగ్‌లీని ఆదేశిస్తుంది చైనా ప్రభుత్వం. ఇండియాలోని ఆంధ్రప్రదేశ్‌కి వచ్చి ఓ వీధికుక్కలో ప్రాణాంతక వైరస్‌ని ప్రవేశపెడతాడు డాంగ్‌లీ. శుభని వెంటాడతాడు. ఎన్నో హత్యలు చేస్తాడు. బోధిధర్ముడు ఒకప్పుడు మంచి కోసం వినియోగించిన వశీకరణ విద్యని చెడుకోసం ఉపయోగిస్తాడు. చిత్రంగా అతడు ఎంతమందిని చంపినా మీడియాకి గానీ, ప్రభుత్వానికి గానీ అదేమీ పట్టనట్లే కనిపిస్తుంది సినిమాలో. సినిమాలో ఇది కొట్టొచ్చినట్లు కనిపించే లోపం. ఇవాళ ఎక్కడ ఎంత చిన్న సంఘటన జరిగినా మీడియాలో అది ఎంత త్వరగా వచ్చేస్తుందో తెలిసిందే. అట్లాంటిది డాంగ్‌లీ విచక్షణా రహితంగా వరుసపెట్టి పదుల సంఖ్యలో మనుషుల్నీ, పోలీసుల్నీ చంపుకు పోతుంటే మనకి ఓ మీడియా ఉన్నట్లు కానీ, ఓ రాజకీయ వ్యవస్థ ఉన్నట్లు కానీ, ఆ వ్యవస్థలు ఈ హత్యలపై గగ్గోలు పెడుతున్నట్లు కానీ ఎక్కడా ఈ సినిమాలో కనిపించదు. 
ఈ సంగతలా ఉంచితే డాంగ్‌లీ ప్రవేశపెట్టిన వైరస్ ద్వారా వ్యాప్తి చెందిన భయంకరమైన వ్యాధిని అదుపుచేసి, డాంగ్‌లీని అంతం చేయడానికి అరవింద్‌కి బోధిధర్ముడి డీఎన్ఏని కలపడానికి శుభ చేసే ప్రయత్నం ఫలించిందా? డాంగ్‌లీ ఆ ప్రయోగాన్ని అడ్డుకోలేదా? అనేది క్లైమాక్స్. 
'గజిని' కంటే 'సెవెన్త్ సెన్స్' నాలుగురెట్లు బెటర్‌గా ఉంటుందని స్వయంగా సినిమా విడుదలకు ముందు మురుగదాస్ ఊదరగొట్టడంతో ఈ సినిమాపై అంచనాలు అసాధారణమై పోయాయి. అందుకు తగ్గట్లు సినిమా ఉంటే ఫర్వాలేదు. కానీ అలా లేకపోవడమే ఈ సినిమా కొంపముంచింది. సినిమాలో వినోదం పాలు దాదాపు మృగ్యం కావడంతో సగటు ప్రేక్షకుడు ఈ సినిమాని ఎంజాయ్ చేయడం కష్టం. సర్కస్ కంపెనీలో అరవింద్ మిత్రుడైన మరగుజ్జు నటుడి పాత్ర మరీ చిన్నదైపోవడం, సెకండాఫ్‌లో అతడి పాత్రని ఉన్నట్లుండి విరమించడం సినిమాలో ఎంటర్‌టైన్‌మెంట్‌ని దెబ్బతీసింది. 
సినిమా మొత్తంలో ఆకట్టుకునేది తొలి 15 నిమిషాలు, చివరి 40 నిమిషాల ఆట మాత్రమే. మిగతా సినిమా అంతా బోరింగే అని చెప్పాలి. స్వతహాగా హారిస్ జయరాజ్ మ్యూజిక్ బాగుంటుందనే నమ్మకాన్ని ఈ సినిమాలోని పాటలు పోగొట్టాయి. ఏ ఒక్క పాటా ఆకట్టుకునే రీతిలో లేదు. మరీ ముఖ్యంగా శుభ తనని ప్రేమించడంలేదనీ, ఆమె పరిశోధన కోసం తనని పావులా వాడుకున్నదనీ తెలిశాక అరవింద్ పాడే విషాదపు పాట చికాకు కలిగిస్తుంది. ఆ పాటని తీసేస్తే ప్రేక్షకుల పరిస్థితి కొంత మెరుగవుతుంది. నేపథ్య సంగీతం మాత్రం బాగీ చేశాడు హారిస్. ఇప్పటికే బ్రూస్‌లీ, జాకీ చాన్, జెట్‌లీ, టొనీ జా వంటి సుప్రసిద్ధ మార్షల్ ఆర్ట్స్ నటులు చేసిన మెరుపు వేగపు మార్షల్ ఆర్ట్స్ ఫైట్లు చూసిన మనకు ఇందులో పీటర్ హెయిన్స్ కంపోజ్ చేసిన ఫైట్లు ఏమంత గొప్పగా అనిపించలేదు. కుంగ్‌ఫు ఫైట్లు చేయడానికి సూర్య ఎంతో కష్టపడ్డట్లు తెలుస్తున్నది కానీ అవి అంతగా అకట్టుకోలేదు. ఇక డాంగ్‌లీ పాత్రలో హాంగ్‌కాంగ్ ఫైట్‌మాస్టర్ జానీ ట్రీ గుయెన్ బాగున్నాడు కానీ అతని మేనరిజమ్స్ 'టెర్మినేటర్'లోని విలన్ పాత్రని గుర్తుకు తెచ్చింది. బోధిధర్మునిగా, అరవింద్‌గా సూర్య తనదైన శైలిలో చక్కగా పోషించాడు. అతని హావభావాలు అతనెంతటి ప్రతిభావంతుడైన నటుడో చెబుతాయి. శుభ పాత్రలో శ్రుతిహాసన్ పెద్దగా ఆకట్టుకోలేకపోయింది. సూర్య, శ్రుతి మధ్య రొమాంటిక్ యాంగిల్ ఆకట్టుకోలేకపోయింది. సినిమాలో చెప్పుకోదగ్గది రవిచంద్రన్ సినిమాటోగ్రఫీ. ఆద్యంతం తన కెమెరా పనితనాన్ని అతను ప్రదర్శించాడు. మన ప్రాచీన అంశాల్లో ఎంతో సైన్స్ ఉన్నదనీ, వాటిని సైన్స్‌గా బోధించకపోవడం వల్ల వాటిని కేవలం మూఢనమ్మకాలుగా భావించే పరిస్థితి ఉన్నదనీ, ఇది పోవాలనీ ఈ సినిమా ద్వారా చెప్పే యత్నం చేశాడు 

న్యూస్: సంచలనాలకి సిద్ధం 'సెవెన్త్ సెన్స్'!

సూర్య, మురుగదాస్ కాంబినేషన్‌లో మరో సినిమా అంటే ఎక్స్‌పెక్టేషన్స్ ఎలా ఉంటాయి? అసాధారణంగా! ఇప్పుడు ''సెవెన్త్ సెన్స్' విషయంలో అలాంటి అంచనాలే నెలకొన్నాయి. ఇదివరకు ఆ ఇద్దరి కాంబినేషన్‌లో వచ్చిన 'గజిని' సినిమా ఎలాంటి సంచలనం సృష్టించిందో మనందరికీ తెలుసు. మొదట తమిళంలో, తర్వాత తెలుగులో ఘన విజయం సాధించిన ఆ సినిమా ఆ తర్వాత అమీర్‌ఖాన్ హీరోగా హిందీలో రీమెక్ అయ్యి బాక్సాఫీస్ రికార్డులు సృష్టించింది. ఇప్పుడు సూర్య, మురుగదాస్ కలిసి 'సెవెన్త్ సెన్స్'ని సృష్టించారు. తమిళంలో ఈ సినిమా పేరు '7ఆం అరివు'. శ్రుతి హాసన్ కథానాయికగా నటిస్తున్న ఈ సినిమాలో సూర్య మూడు భిన్న గెటప్పుల్లో కనిపించనున్నాడు. తెలుగు వెర్షన్‌కి 'చూడని అవతారం' అనే ట్యాగ్‌లైన్‌ని ఉపయోగిస్తున్నారు. తెలుగులో ఈ సినిమాని లక్ష్మీగణపతి ఫిలింస్ సంస్థ అధినేత బి. సుబ్రమణ్యం అందిస్తున్నాడు. సూర్య కెరీర్‌లోనే అత్యధిక బడ్జెట్ అంటే సుమారు 80 కోట్ల రూపాయల భారీ బడ్జెట్‌తో ఈ సినిమా నిర్మాణమవుతోంది.
"ఎనిమిది నెలలు రిసెర్చ్ చేసి ఈ చిత్రకథ తయారుచేశాను. 'గజని' కంటే నాలుగైదు రెట్లు బాగుంటుంది. సినిమాలో ప్రారంభంలో వచ్చే పది నిముషాల కోసం పది కోట్ల రూపాయలు ఖర్చు చేశాం" అని మురుగదాస్ తెలిపాడు. ఇండియన్ స్క్రీన్ మీద ఇలాంటి స్క్రిప్ట్‌తో ఇంతవరకు సినిమా రాలేదనీ, 'గజిని' తర్వాత అంతకంటే బెటర్ స్క్రిప్ట్ కోసం మురుగదాస్ శ్రమించి 'సెవెన్త్ సెన్స్'ని తయారుచేశాడనీ సూర్య చెప్పాడు. ఈ చిత్రానికి సంబంధించిన మరో విశేషం.. 'గజిని'కి మ్యూజిక్ అందించిన హారిస్ జయరాజ్ ఈ సినిమాకీ సంగీత బాణీలు సమకూర్చాడు. అటు తమిళ్, ఇటు తెలుగులో సినిమాని దీపావళికి రిలీజ్ చేయాలని సంకల్పించారు.
జానీ ట్రి గుయేన్, అభినయ, అవినాశ్, గిన్నిస్ పక్రు, అశ్విన్ కాకుమాను, ధన్య బాలకృష్ణ నటిస్తున్న ఈ సినిమాకి పీటర్ హెయిన్స్ కంపోజ్ చేసిన యాక్షన్ ఎపిసోడ్స్ చాలా గొప్పగా వుంటాయని యూనిట్ సభ్యులు చెబుతున్నారు. ఏదేమైనా ఈ సినిమా ఓపెనింగ్స్ దక్షిణాదిలో 'రోబో' ఓపెనింగ్స్‌ని మించి ఉంటాయని విశ్లేషకులు అభిప్రాయపడుతున్నారు. మొత్తంగా ఆ సినిమా బాక్సాఫీసు రికార్డుల్ని అధిగమించే అవకాశం ఈ సినిమాకి ఉటాయని చాలామంది నమ్ముతున్నారు.

న్యూస్: తమిళ హీరోల బాటలో...

రజనీకాంత్, కమల్ హాసన్ తెలుగు ప్రేక్షకుల హృదయాల్లో సుస్థిర స్థానం పొందాక తర్వాతి తరం నటులైన విక్రం, సూర్య, విశాల్, కార్తీ, ఇప్పుడు జీవా వంటివాళ్లు సైతం తెలుగునాట అనూహ్యమైన మార్కెట్‌ని సంపాదించారు. ఇప్పుడు వాళ్ల సినిమాలు తెలుగు మార్కెట్‌ని కూడా దృష్టిలో పెట్టుకుని తయారవుతున్నాయి. ఇది చూసి తాము కూడా టాలీవుడ్‌లో పాగా వెయ్యాలనే ఆలోచన కన్నడ హీరోలకు కలిగింది. అయితే ఇప్పటివరకు ఏ కన్నడ హీరో కూడా తెలుగులో మార్కెట్ సంపాదించలేక పోయాడు. నిన్నటికి నిన్న కన్నడ కంఠీరవ దివంగత రాజ్‌కుమార్ చిన్న కొడుకు పునీత్ రాజ్‌కుమార్ 'జాకీ'గా తెలుగు ప్రేక్షకుల మధ్యకు వచ్చాడు. అయితే మనవాళ్లు అతన్నేమాత్రమూ పట్టించుకోలేదు. విశేషమేమంటే 'జాకీ' సినిమాని పునీత్ కుటుంబమే స్వయంగా తెలుగులో విడుదల చేసింది. దాన్నిబట్టే పునీత్‌ని తెలుగువాళ్ల చేత ఆమోదింపజేయడానికి వాళ్లు గట్టిగా ప్రయత్నించారని అర్థమవుతుంది. అలాగే ఇటీవలే రాజ్ అనే నటుడు 'తిరుగుబోతు' పేరుతో తన జాతకాన్ని పరీక్షించుకున్నాడు. విలన్ పాత్రలతో కన్నడ ప్రేక్షకుల్ని ఓ మోస్తరుగా మెప్పించిన అతను హీరోగా 'సంచారి' అనే సినిమా చేసి హిట్‌కొట్టాడు. అదే సినిమాని తెలుగులో తనే స్వయంగా 'తిరుగుబోతు'గా తెచ్చాడు. ఇందుకోసం అతను మరో కన్నడ సినిమా ఏదీ చేయకుండా హైదరాబాద్‌లోనే ఎక్కువ సమయం వెచ్చించాడు. గమనించాల్సిందేమంటే 'తిరుగుబోతు' హిట్టు కాకపోయినా 'జాకీ' కంటే బెటర్‌గా ఆడింది. అంతేకాదు.. ఈ సినిమా పాటలు ఓ మోస్తరుగానైనా ఆదరణ పొందాయి. రాజ్ ఇప్పుడు స్ట్రెయిట్ తెలుగు సినిమాలో నటించేందుకు యత్నిస్తున్నాడు. ఇప్పటికే పూరి జగన్నాథ్ శిష్యుడు నాగిరెడ్డి డైరెక్షన్‌లో నటించేందుకు అంగీకారం తెలిపాడు. త్వరలోనే ఈ సినిమా సెట్స్ మీదకు వెళ్లే అవకాశాలు కనిపిస్తున్నాయి. తెలుగు సినిమాలన్నా, తెలుగు హీరోలన్నా విపరీతమైన అభిమానం కనపరిచే రాజ్ తెలుగులో రాణిస్తాడా?

న్యూస్: బాలీవుడ్‌లో కాజల్ జిగేల్‌మంటుందా?

తెలుగులో టాప్ హీరోయిన్‌గా వెలిగిపోతున్న ముంబై భామ కాజల్ అగర్వాల్ తన మాతృభూమిలో అలాంటి మ్యాజిక్‌ని చూపిస్తుందా? ఇప్పుడందరూ ఈ విషయంపై ఆసక్తి ప్రదర్శిస్తున్నారు. ఆమె నాయికగా నటించిన తొలి బాలీవుడ్ ఫిల్మ్ 'సింఘం' జూలై 22న విడుదలవుతుండటమే దీనికి కారణం. ఇందులో ఆమె అజయ్ దేవగణ్ సరసన కనిపించబోతోంది. సూర్య, అనుష్క జంటగా నటించిన తమిళ హిట్ మూవీ 'సింగం' (తెలుగులో 'యముడు')కి ఇది రీమేక్. ఇందులో ఎస్సై బాజీరావ్ సింఘంగా అజయ్ నటిస్తే, అతని ప్రేయసి కావ్యగా కాజల్ నటించింది. మొదట ఈ పాత్రకి అసిన్‌నీ, తర్వాత ఒరిజినల్‌లో చేసిన అనుష్కనీ తీసుకోవాలని దర్శకుడు రోహిత్‌శెట్టి అనుకున్నాడు. అయితే అనుష్క బాలీవుడ్‌లో అడుగుపెట్టడానికి ఆసక్తి చూపక పోవడంతో అనుకోకుండా ఆ ఛాన్స్ కాజల్ దక్కించుకుంది. వచ్చిన అవకాశాన్ని ఆమె చక్కగా ఉపయోగించుకున్నదనేది సమాచారం. నిజానికి ఈమెకి బాలీవుడ్‌లో ఇదే తొలి సినిమా కాదు. అసలామె తెరంగేట్రమే బాలీవుడ్‌లో జరిగింది. 2004లో వచ్చిన 'క్యూన్.. హో గయా నా' సినిమాలో హీరోయిన్ ఐశ్వర్యారాయ్ ఫ్రెండ్ పాత్రని తొలిగా చేసింది. ఆ సినిమా ఫ్లాపవడంతో ఎవరి దృష్టినీ ఆకర్షించలేక పోయింది కాజల్. దాంతో దక్షిణాదికి వచ్చిన ఆమె తన అందచందాలు, అభినయంతో టాలీవుడ్‌లో టాప్ రేంజికి ఎదిగింది. ఇన్నాళ్లకి హీరోయిన్‌గా తన భాషా చిత్రసీమలో ఆమెకి తొలి అవకాశం వచ్చింది. ఈ సినిమాతో తెలుగులో మాదిరిగానే అక్కడ కూడా ఆమె జిగేల్‌మంటుందో, లేదో...

ఫోకస్: 2010 ముగింపైనా సంతోషాన్నిస్తుందా? (చివరి భాగం)

భయపెట్టనున్న 'చంద్రముఖి-2'
డిసెంబరులో రాబోతోన్న మరో సీనియర్ టాప్ హీరో సినిమా 'నాగవల్లి'. వెంకటేశ్ కథానాయకుడు. 'చంద్రముఖి-2'గా ప్రచారం పొందుతోన్న ఈ సినిమా కన్నడ హిట్ ఫిల్మ్ 'ఆప్త రక్షక'కి రీమేక్. ఆ సినిమాని డైరెక్ట్ చేసిన సీనియర్ తమిళ డైరెక్టర్ పి. వాసు తెలుగు చిత్రాన్నీ రూపొందిస్తున్నారు. బెల్లంకొండ సురేశ్ నిర్మిస్తోన్న ఈ చిత్రంలో అనుష్క, రిచా గంగోపాధ్యాయ్, కమలినీ ముఖర్జీ, శ్రద్ధాదాస్ వంటి తారలు కనిపించనుండటం విశేషం. వెంకటేశ్ మునుపటి చిత్రాలు 'నమో వెంకటేశ', 'ఈనాడు' ప్రేక్షకుల్ని అలరించడంలో విఫలమైన నేపథ్యంలో 'నాగవల్లి' సినిమా ఫలితంపై ఆసక్తి నెలకొంది. సస్పెన్స్, మిస్టరీకి వినోదాన్ని జోడించిన ఈ చిత్రం డిసెంబర్ తొలివారంలో విడుదలయ్యే అవకాశాలు కనిపిస్తున్నాయి.

'రక్త చరిత్ర-2' వస్తోంది
'రక్త చరిత్ర' ఘన విజయం సాధించడంతో ఇప్పుడు అందరి దృష్టీ దాని సీక్వెల్ 'రక్త చరిత్ర-2' మీదపడుతోంది. తొలి సినిమా విడుదలైన నెలరోజుల్లోపలే నవంబర్ 26న ఈ సినిమాని విడుదల చేస్తున్నట్లు వర్మ ప్రకటించడం క్యూరియాసిటీని మరింత పెంచింది. తొలి భాగంలో కనిపించని మద్దెలచెరువు సూరి పాత్ర రెండో భాగంలో కనిపించనుండటం, ఆ పాత్రని తమిళ స్టార్ నటుడు సూర్య చేయడం ఆ సినిమా విలువని అమాంతం పెంచేసింది. సూర్య భార్య పాత్రలో ప్రియమణి నటించిన ఈ సినిమాలో పరిటాల రవి, మద్దెలచెరువు సూరి మధ్య ఘర్షణ ప్రధానం. రవి పాత్రలో ఇప్పటికే వివేక్ ఓబరాయ్ అందరి ప్రశంసలూ పొందిన సంగతి తెలిసిందే. తొలి భాగంకంటే ఈ రెండో భాగం మరింత విజయాన్ని సాధించే అవకాశాలు ప్రస్ఫుటంగా కనిపిస్తున్నాయి. అదే జరిగితే సీక్వెల్స్ నిర్మాణం వేగం పుంజుకోవడం ఖాయం.

వివాదాల 'కత్తి'
ఇటీవల 'కత్తి' టైటిల్ పై వివాదం చెలరేగడం గుర్తుండే వుంటుంది. 'కత్తి' అనే టైటిల్ని ఫిలింఛాంబర్ వద్ద డైరెక్టర్ గుణశేఖర్ రిజిస్టర్ చేయించాడు. రవితేజ హీరోగా ఆ పేరుతో సినిమా రూపొందించేందుకు ఆయన సంకల్పించాడు. ఈ టైటిల్ రిజిస్టర్ అయ్యింది మాత్రం వైవీఎస్ చౌదరికి చెందిన బొమ్మరిల్లు బ్యానరులో. అంటే ఈ సినిమాకి నిర్మాత చౌదరే. కానీ 'కత్తి' పేరుతో మరో రెండు సినిమాలు ఇప్పటికే నిర్మాణంలో ఉన్నాయి. వాటిలో ఒకటి అల్లరి నరేశ్ హీరోగా ఈవీవీ సత్యనారాయణ రూపొందిస్తోన్న 'కత్తి కాంతారావు' కాగా, మరొకటి 'కల్యాణ్ రామ్ కత్తి'. వీటిలో రెండో సినిమా టైటిల్ పైనే గుణశేఖర్ అభ్యంతరం వ్యక్తంచేశారు. కారణం టైటిలులో 'కల్యాణ్ రామ్' అన్న పేరుని ఇంగ్లీషులో చిన్న అక్షరాలతో ఉంచి, 'కత్తి'ని పెద్దక్షరాలతో డిజైన్ చేయించడం. గుణశేఖర్ అభ్యంతరాల్ని ఏమాత్రం ఖాతరుచేయని కల్యాణ్ రామ్ ఆ టైటిలునే ఖాయం చేసుకున్నాడు. సొంత బేనర్ యన్.టి.ఆర్. ఆర్ట్స్ పై మల్లికార్జున్ డైరెక్షనులో హీరోగా నటిస్తూ ఈ చిత్రాన్ని ఆయన నిర్మించాడు. సనాఖాన్ నాయికగా నటించిన ఈ చిత్రం నవంబర్ ప్రథమార్ధంలో ప్రేక్షకుల ముందుకు వస్తోంది. 'కత్తి' వివాదాన్ని ఇంకా జనం మరచిపోకముందే వస్తున్నందున ఈ సినిమా బాక్సాఫీసు వద్ద ఎలాంటి ఫలితాన్ని నమోదు చేస్తుందనే ఆసక్తి సినీ వర్గాల్లో నెలకొంది. పైగా 'అతనొక్కడే' తర్వాత కల్యాణ్ రామ్ కి చెప్పుకోదగ్గ సినిమా ఇంతదాకా రాలేదు. అందుకే ఎంతో కసితో అతను ఈ సినిమా చేశాడు.
'బ్రోకర్'పైనా ఆసక్తి
స్టార్ హీరోలు లేకపోయినా, స్టార్ డైరెక్టర్ తీయకపోయినా కుతూహలాన్ని రేపుతున్న మరో సినిమా 'బ్రోకర్'. నవంబర్ లేదా డిసెంబరులో రిలీజ్ కానున్న ఈ చిత్రంలో టైటిల్ పాత్రని సంగీత దర్శకుడు ఆర్పీ పట్నాయక్ పోషించాడు. అంతే కాదు, ఈ చిత్రానికి దర్శకుడు కూడా అతనే. నేటి సమాజంలో 'బ్రోకర్' అనేవాడు లేకుండా ఏ పనీ జరగడం లేదనే సంగతిని వ్యంగ్యంగా చిత్రిస్తూ రూపొందిస్తోన్న ఈ చిత్రంలో అర్పీ నెగటివ్ రోలులో కనిపించబోతున్నాడు. శ్రీహరి సైతం ఓ కీలక పాత్రలో నటించిన ఈ చిత్రాన్ని డైరెక్టర్స్ సినిమా పతాకంపై స్వయంగా  డైరెక్టర్ అయిన మద్దినేని రమేశ్ నిర్మిస్తున్నారు.
వీటితో పాటు మరికొన్ని సినిమాలు కూడా ఈ రెండు నెలల్లో రాబోతున్నాయి. వీటిలో మూడు నాలుగు సినిమాలైనా సక్సెసయితే 2010ని చిత్రసీమ హ్యాపీగా ముగించినట్లవుతుంది. అలా జరుగుతుందా? చూద్దాం.                          

సినిమా: ఎన్టీఆర్ పాత్రలో షాట్ గన్

షాట్‌గన్‌గా అభిమానులు పిలుచుకునే బాలీవుడ్ నటుడు శత్రుఘ్న సిన్హా తొలిసారి మీసం లేకుండా వెండి తెరపై కనిపించబోతున్నారు. అదీ రాంగోపాల్ వర్మ రూపొందించిన 'రక్త చరిత్ర' చిత్రంలో. ఈ సినిమాలో ఆయన ఆంధ్రప్రదేశ్ మాజీ ముఖ్యమంత్రి దివంగత ఎన్టీ రామారావు పాత్రని పోషించారు.
పరిటాల రవి జీవితం ఆధారంగా వర్మ రూపొందించిన ఈ సినిమా తన కెరీర్‌లోనే ఉత్తమ చిత్రమనీ, నటునిగా ఈ సినిమా తనకు చాలా మంచి పేరు తీసుకొస్తుందని సిన్హా అంటున్నారు. 'రక్త చరిత్ర' తెలుగు, తమిళ, హిందీ భాషల్లో ఏక కాలంలో ఈ నెల ద్వితీయార్థంలో విడుదలకు సిద్ధమవుతోంది.
ఇందులో పరిటాల రవిగా వివేక్ ఓబరాయ్, మద్దెలచెరువు సూరిగా సూర్య నటించారు. సిన్హా ఈ మూడు భాషల్లోనూ దర్శనమివ్వనున్నారు. దీనికోసం ఆయన తెలుగు, తమిళ భాషల్లో సంభాషణల్ని అర్థం చేసుకుని మరీ నటించారు. "ఈ సినిమా కోసం నిజంగా కష్టపడ్డా. నేను బాగా నటించిన సినిమాల్లో ఇదొకటి.
సినిమా మొత్తం చాలా గ్రిప్పింగ్‌గా ఉంటుంది. ఆర్.జి.వి. (వర్మ) చాలా బాగా ఈ సినిమాని రూపొందించారు'' అని చెప్పారు సిన్హా. ఎన్టీఆర్ పాత్ర కోసం మీసాలు తీయడానికి మొదట ఆయన వెనుకాడారు. అయితే స్క్రిప్టు డిమాండ్ చేయడం వల్లా, వర్మ విజ్ఞప్తి మేరకు ఆయన మీసం తీసి నటించారు. సిన్హా బి.జె.పి.కి చెందిన పార్లమెంట్ సభ్యులనే సంగతి తెలిసిందే.

సినిమా: ఇక 'బెజవాడ రౌడీల' మీద రాంగోపాల్ వర్మ చూపు

ఏం చేసినా సంచలనం కోసమే చేస్తానని చెప్పే డైరెక్టర్ రాంగోపాల్ వర్మ మరోసారి అదే పని చేశారు. రాయలసీమ ఫ్యాక్షనిజాన్ని 'రక్త చరిత్ర'లో బంధించిన ఆయన ఇక 'బెజవాడ రౌడీలు' ఎలాంటి వాళ్లో, వాళ్లకి ఎంత భీకరమైన ఇమేజ్ ఉందో చెప్పడానికి ఉవ్విళ్లూరుతున్నారు. 'రక్త చరిత్ర' తర్వాత 'బెజవాడ రౌడీలు' సినిమా తీస్తానని ఆయన ప్రకటించగానే సంచలనం చెలరేగింది. విజయవాడకు చెందిన అనేకమంది రాజకీయ నాయకులు వర్మ ఆలోచనని ఖండించి, ఆయనపై తీవ్ర విమర్శలు చేశారు. 'అదుర్స్' నిర్మాత, తెలుగుదేశం పార్టీ నాయకుడు వల్లభనేని వంశీమోహన్ అయితే వర్మకి పిచ్చికుక్క కరిచి వుంటుందనీ, అందుకే ఇలాంటి సినిమాలు తీస్తానంటున్నాడనీ తీవ్రంగా విమర్శించారు. అయితే సాధారణ ప్రజానీకం నుంచి దీనిపై అంతగా స్పందన రాకపోవడం గమనార్హం.                        
తను తీసే ప్రతి సినిమాతోనూ వార్తల్లోకెక్కే వర్మ 'రక్త చరిత్ర'తో ఓవైపు సంచలనాన్ని సృష్టిస్తూనే, మరోవైపు వివాదాలకీ కేంద్ర బిందువయ్యారు. అనంతపురం జిల్లాకు చెందిన దివంగత తెలుగుదేశం నాయకుడు పరిటాల రవి జీవితం ఆధారంగా ఆయనకూ, మద్దెలచెరువు సూరికీ మధ్య జరిగిన ఆధిపత్య పోరును చిత్రిస్తూ ఆయన 'రక్త చరిత్ర' తీశారు. రవి పాత్రను బాలీవుడ్ నటుడు వివేక్ ఓబరాయ్ చేస్తే, సూరిగా తమిళ హీరో సూర్య నటించారు.
ఇటీవలే ఆడియో రిలీజైన ఈ సినిమా ఈ నెల 22న ప్రేక్షకుల ముందుకు రాబోతోంది. అనంతపురం ఫ్యాక్షన్ కక్షలకు అద్దంపట్టే ఈ సినిమా విడుదలకు ముందే సంచలనాన్ని సృష్టించడంతో పాటు వివాదాలకీ తెరతీసింది. ఆ సినిమాలో ఓబుల్ రెడ్డిని దుర్మార్గుడిగా చూపించారంటూ ఆయన వర్గీయులు ఆందోళన చేయడం, ఓబుల్ రెడ్డి స్వయంగా దెయ్యమై వచ్చినా తాను భయపడేది లేదని వర్మ ప్రకటించడం తెలిసిందే.
ఈ నేపథ్యంలో 'బెజవాడ రౌడీలు' తీయబోతున్నట్లు వర్మ ప్రకటించడం సంచలనం రేకెత్తించింది. బెజవాడ సిద్దార్థ ఇంజనీరింగ్ కాలేజీలో చదువుకునే రోజుల్లోనే అక్కడి రౌడీయిజాన్నీ, దాని వెనకాల కారణాల్నీ క్షుణ్ణంగా పరిశీలించేవాణ్ణనీ చెప్పుకున్న వర్మ తన తొలి చిత్రం 'శివ'లో చూపించిన రౌడీయిజం బెజవాడ రౌడీయిజంతో పోలిస్తే సముద్రంలో ఒక నీటి చుక్క మాత్రమేనని తేల్చారు. 'వేరెక్కడా లేని ఒక మహా ప్రత్యేకమైన ప్రత్యేకత బెజవాడ రౌడీకి ఉన్నద'ని చెప్పిన ఆయన తన మైండులో 30 యేళ్లుగా ఆ సినిమా స్క్రిప్టు నలుగుతున్నదన్నారు. ఇప్పటికి ఆ స్క్రిప్టు పూర్తికావచ్చిందనీ, 'వీలైనంత తొందరలో బెజవాడకి కెమెరాని తీసుకెళ్లి అక్కడి రౌడీలని దానిలో బంధించి 70 ఎంఎం స్టీరియోఫోనిక్ సౌండులో అందరికీ చూపెట్టడానికి శరవేగంతో సన్నాహాలు జరుగుతున్నాయి' అని చెప్పారు వర్మ.
ఒకప్పటి బెజవాడ రౌడీ రాజకీయాలు, రౌడీ గ్రూపుల మధ్య ఆధిపత్య పోరు సంగతి జగమంతా తెలిసిందే కాబట్టి ఎవర్ని ఎలా 'బెజవాడ రౌడీలు'లో వర్మ చూపించబోతున్నాడనేది ఆసక్తికరమైన అంశం. అదే ఇప్పుడు సంచలనాన్ని సృష్టిస్తోంది. రానున్న రోజుల్లో మరిన్ని వివాదాలకీ నెలవు కాబోతోంది.

సినిమా: టాలీవుడ్ పై డబ్బింగ్ దండయాత్ర

Movies: Ram Gopal Varma's Counter Warning

"ఓబుల్ రెడ్డికి సంబంధించిన మనుషులు అతన్ని దుర్మార్గుడిగా చూపిస్తే ఊరుకునేది లేదని నాకు ఒక నోటీసు పంపారు. ఒకవేళ అలా చూపిస్తే, కోర్టు తీర్పు కోసం ఆగకుండా తమదైన పద్ధతిలో చంపుతామని రకరకాల వర్గాల ద్వారా వార్నింగులు పంపారు. నేను సినిమాలో ఏం చూపించానో అది సినిమా చూసే వరకూ ఎవరికీ తెలిసే అవకాశమే లేదు. సినిమాలో ఉన్నవీ, లేనివీ వాళ్లకి వాళ్లు ఊహించుకుని నన్ను భయపెట్టే ప్రయత్నాలు చేస్తున్న వాళ్లకి నేను ఇచ్చే వార్నింగ్ ఒక్కటే. నేను ఓబుల్ రెడ్డి మనుషులకి కాదు కదా..! చచ్చిపోయిన ఓబుల్ రెడ్డి దెయ్యమై తిరిగొచ్చినా కూడా భయపడను.
ఇది నా కౌంటర్ వార్నింగ్
-రాంగోపాల్ వర్మ"
ఇదీ రాంగోపాల్ వర్మ మార్కు రిటార్ట్. తెలుగుదేశం పార్టీకి చెందిన దివంగత ఎమ్మెల్యే పరిటాల రవి జీవిత కథ ఆధారంగా వర్మ 'రక్తచరిత్ర' తీస్తున్న సంగతి తెలిసిందే. త్వరలో ఈ సినిమా తొలి పార్ట్ రిలీజ్ కాబోతోంది.
ఈ నేపథ్యంలో ఓబుల్ రెడ్డి అనుయాయులుగా భావిస్తున్న వాళ్లు సినిమాలో ఓబుల్ రెడ్డిని విలన్ గా చూపించినట్లు తెలిసిందని, వెంటనే అలాంటి సన్నివేశాలు తొలగించాలని, లేనిపక్షంలో వర్మని చంపుతామని వర్మ ముంబై ఆఫీసుకి బెదిరింపు ఉత్తరాలు పంపారు. ఫోన్ కాల్స్ చేశారు. మరోవైపు ఓబుల్ రెడ్డి సోదరి ఉమాదేవి కూడా వర్మకు లీగల్ నోటీసు పంపింది. వీటిని దృష్టిలో పెట్టుకుని ఈరోజు వర్మ ఘాటుగా సమాధానమిచ్చారు.
పరిటాల రవి, ఓబుల్ రెడ్డి మధ్య పచ్చగడ్డి వేస్తే భగ్గుమంటుందనే సంగతి అందరికీ తెలిసిందే. మరణించిన ఓబుల్ రెడ్డిపై పలు రేప్, మర్డర్ కేసులు పెండింగులో ఉన్నాయి.
మరోవైపు ఈ బెదిరింపు ఫోన్ల వెనుక మద్దెలచెరువు సూరి ఉన్నాడనే ప్రచారం కూఢా జరిగింది. ఓబుల్ రెడ్డికి సూరి సన్నిహితుడు. అయితే ఆ ఫోన్లకీ, తనకీ ఎలాంటి సంబంధమూ లేదనీ, వాటిని నమ్మవద్దనీ వర్మకి సూరి తెలిపినట్లు సమాచారం.
'రక్త చరిత్ర'లో పరిటాల రవిగా వివేక్ ఓబరాయ్, అతని భార్య సునీతగా రాధికా ఆప్టే, సూరిగా సూర్య, అతని భార్య భానుమతిగా ప్రియమణి, నాగమునిరెడ్డిగా కోట శ్రీనివాసరావు, ఎన్టీఆర్ గా శతృఘ్న సిన్హా నటించారు.

'Dubbing' Stroke To Tollywood

తెలుగు సినిమాకి ప్రధాన శత్రువులేమిటి? వీడియో పైరసీ, డబ్బింగ్ సినిమాలు. అవును. తామరతంపరగా వస్తున్న అనువాద చిత్రాలు నేడు స్ట్రయిట్ తెలుగు సినిమాల పాలిట విలన్లు. తెలుగు చలనచిత్ర పరిశ్రమకు దాదాపు పారలల్ గా అనువాద చిత్ర పరిశ్రమ 'వర్థిల్లుతోంది'. 2009లో విడుదలైన స్ట్రయిట్ సినిమాలకు కాస్త అటుఇటుగా అంతే సంఖ్యలో డబ్బింగ్ ఫిలిమ్స్ రిలీజయ్యాయి. దానికి రిజల్ట్.. స్ట్రయిట్ సినిమాల కలెక్షన్లకు భారీ గండి. ఈ ఏడాది పరిస్థితిలోనూ పెద్ద మార్పు లేదు. కాకపోతే పోయిన సంవత్సరం స్థాయిలో డబ్బింగ్ సినిమాలు విడుదల కాకపోవచ్చు. ఆ రకంగా చూస్తే ఈ ఏడు నేరుగా తెలుగులో నిర్మాణమై, విడుదలైన సినిమాలు కూడా తక్కువయ్యాయి. ఫిల్మ్ ఛాంబర్ అందించిన సమాచారం ప్రకారం జనవరి నుంచి జూన్ వరకు ఆరు నెలల్లో రిలీజైన స్ట్రయిట్ సినిమాలు 58 అయితే, డబ్బింగ్ సినిమాలు సరిగ్గా 50. వాటిలో బాగా కలెక్షన్లు రాబట్టిన సినిమాలు స్ట్రయిట్ సినిమాల మాదిరే బాగా తక్కువ. 'యుగానికి ఒక్కడు', 'ది ఉల్ఫ్ మ్యాన్', 'మదనుడు.. మృగమైతే', 'ఐరన్ మ్యాన్-2', 'ఆవారా', 'ప్రిన్స్ ఆఫ్ పర్షియా', 'యముడు', 'ద కరాటే కిడ్' వంటివి కొద్దో గొప్పో కలెక్షన్లు రాబట్టాయి. మిగతావేవీ ఆడలేదు. వాటిలో 'విలన్', 'క్లాష్ ఆఫ్ ద టైటాన్స్', 'ఆవహం', 'సూపర్ కౌబాయ్', 'కైట్స్', 'ప్రిన్స్' వంటి డిజాస్టర్స్ వున్నాయి.
తక్కువ కష్టం, నష్టం
అసలు నిర్మాతలు స్ట్రయిట్ సినిమాల కంటే డబ్బింగ్ సినిమాల మీదే ఎందుకు ఆసక్తి చూపిస్తున్నట్లు? సమాధానం సులువైనదే. స్ట్రయిట్ సినిమాల ప్రొడక్షన్లో సవాలక్ష కష్టాలు వుంటాయి. ఇండస్ట్రీలోని 24 క్రాఫ్టులతో పని వుంటుంది. రోజువారీ షూటింగంటే ఒక యుద్ధం చేసినంత పని. ఎన్ని రోజులు షూటింగుంటే అన్ని రోజులూ నిర్మాతలకి ఊపిరి సలపనంత పని. ఏదైనా అవాంతరంతో ఒక్క రోజు షూటింగ్ కాన్సిలయినా, ఆ రోజు కాల్షీట్లు ఇచ్చిన యాక్టర్ల కాంబినేషన్లో తిరిగి షూటింగ్ చేయడానికి నానా పాట్లూ పడాలి. టైమ్ వేస్ట్, మనీ లాస్. 24 క్రాఫ్టులవారినీ సమన్వయంతో పనిచేయించుకోడం అంత ఈజీ కాదు. ఇన్ని బాధలు పడి సినిమా తీసినా ఆ సినిమా హిట్టవుతుందనే గ్యారంటీ ఏ కోశానా వుండదు. పెట్టిన డబ్బు వస్తుందనే నమ్మకం కనిపించదు. ఆ బాధలన్నీ ఎందుకనే ఉద్దేశంతోటే చాలామంది డబ్బింగ్ సినిమాల వైపు మొగ్గు చూపుతున్నారు. ఈ సినిమాలకైతే కొత్తగా షూటింగ్ చేయాల్సిన పనిలేదు. 24 క్రాఫ్టుల్లో రెండు, మూడు క్రాఫ్టులు మినహా మిగతా వారితో పనివుండదు. డబ్బింగ్ స్పెషలిస్టులైన రచయితలతో మాటలు, పాటలు రాయించి, డబ్బింగ్ కళాకారులతో వాయిస్ ఇప్పిస్తే సరిపోతుంది. అవసరమైతే ఎడిటింగ్ మార్పులు వుంటాయి. అంతకుమించి మిగతా డిపార్టుమెంట్ల వారితో అవసరం వుండదు. ల్యాబులో డైలాగ్స్, సాంగ్స్ మిక్సింగ్ చేయిస్తే చాలు.. సినిమా రెడీ! అందుకే అతి తక్కువ కష్టం, నష్టం వుండే డబ్బింగ్ సినిమాలకి నిర్మాతలు ఓటు వేయడం.
పెద్ద సంస్థలదీ అదే బాట
మనదేశంలో బాలీవుడ్ తర్వాత అతిపెద్ద సినీ పరిశ్రమ టాలీవుడ్డే. అందువల్లే ఇక్కడి డబ్బు కొల్లగొట్టుకు పోవడానికి తమిళ, హిందీ, ఇంగ్లీషు సినిమాల డబ్బింగ్ రూపాలు వెల్లువలా వస్తున్నాయి. తెలుగులో అవి భారీ విజయాలు సాధించకపోవచ్చు. కానీ ఏడాది మొత్తం మీద డబ్బింగ్ సినిమాల మీద తెలుగు ప్రేక్షకులు వెచ్చిస్తున్న డబ్బు యాభై కోట్ల రూపాయల పైమాటే. అంటే ఆమేరకు మన తెలుగు సినిమాలు నష్టపోతున్నాయన్నమాట. ఇంగ్లీషు భాషలో వుండే హాలీవుడ్ సినిమాలు నగరాలకే పరిమితమవుతున్నందున, విలేజ్ మార్కెట్టుని కూడా అందుకోవాలంటే తెలుగులో వాటిని డబ్ చేయడమొక్కటే మార్గం. కాబట్టే.. వార్నర్ బ్రదర్స్ పిక్చర్స్, పారామౌంట్ ఫిలిమ్స్, ఇండో ఓవర్సీస్ ఫిలిమ్స్, వాల్ట్ డిస్నీ పిక్చర్స్, కొలంబియా పిక్చర్స్ వంటి గొప్ప గొప్ప హాలీవుడ్ నిర్మాణ సంస్థలు తమ సినిమాల్ని తెలుగు వంటి ప్రాంతీయ భాషల్లో డబ్ చేయడానికి ఉత్సాహం చూపుతున్నాయి.
ఈ ఏడాది వార్నర్ బ్రదర్స్ పిక్చర్స్ సినిమాలు 'ఫైనల్ డెస్టినేషన్', 'క్లాష్ ఆఫ్ ద టైటాన్స్', పారామౌంట్ ఫిలిమ్స్ ప్రొడ్యూస్ చేసిన 'ది ఉల్ఫ్ మ్యాన్', 'ఐరన్ మ్యాన్-2', ఇండో ఓవర్సీస్ ఫిలిమ్స్ 'లేడీ టెర్మినేటర్', వాల్ట్ డిస్నీ పిక్చర్స్ నిర్మించిన 'ప్రిన్స్ ఆఫ్ పర్షియా' సినిమాలు తెలుగులో రిలీజయ్యాయి. అలాగే బాలీవుడ్డులో భారీ వ్యయంతో తయారైన వివేక్ ఓబరాయ్ సినిమా 'ప్రిన్స్', సాజిద్ నదియడ్ వాలా సినిమా 'హౌస్ ఫుల్', హృతిక్ రోషన్ మూవీ 'కైట్స్' సినిమాలు తెలుగులో విడుదలయ్యాయి. రాంగోపాల్ వర్మ బాలీవుడ్డులో నిర్మించిన 'ఫూంక్-2' చిత్రం 'ఆవహం' పేరుతో వచ్చింది. వీటిలో బాలీవుడ్ నుంచి వచ్చిన సినిమాలన్నీ ఫెయిలవడం గమనార్హం.
థియేటర్ల కొరత
స్ట్రయిట్ సినిమాలతో సమాన సంఖ్యలో డబ్బింగ్ సినిమాలు విడుదలవడం వల్ల తెలుగు నిర్మాతలకు తమ సినిమాల్ని విడుదల చేసుకోడానికి థియేటర్ల కొరత ఏర్పడుతోంది. తమిళ హీరోలు రజనీకాంత్, కమల్ హాసన్, విక్రమ్, సూర్య, కార్తీ వంటివాళ్ల సినిమాలకు మన రాష్ట్రంలో మంచి మార్కెట్ వుంది. వాళ్ల సినిమాలు తెలుగులోని పెద్ద హీరోల సినిమాల స్థాయిలో ఎక్కువ ప్రింట్లతో విడుదలవుతున్నాయి. ఈ ఏడాది కొత్తగా సూర్య తమ్ముడు కార్తీ తెలుగులోనూ చెప్పుకోదగ్గ మార్కెట్ సంపాదించాడు. 'యుగానికి ఒక్కడు'తో అతను తెలుగువాళ్లకి పరిచయమయ్యాడు. పబ్లిసిటీ వల్లనైతేనేమి, సినిమాలోని విషయం వల్లనైతేనేమి అది పెద్ద హిట్టయ్యింది. తమిళ వెర్షన్ కంటే తెలుగు డబ్బింగ్ వెర్షనుకే ఆ సినిమా నిర్మాతకి ఎక్కువ లాభాలు రావడం ఇక్కడ గమనించదగ్గ అంశం. ఈ ఒక్క సినిమాతో కార్తీ తెలుగువాళ్లకి సన్నిహితమైపోయాడు. అది హిట్టవడంతో అతని మరో సినిమా 'ఆవారా'కు ఎక్కడలేని డిమాండూ వొచ్చింది. అందుకు తగ్గట్లే సుమారు 125 ప్రింట్లతో విడుదలైన ఆ సినిమాకి తెలుగులోని పెద్ద హీరో సినిమాల స్థాయిలో ఓపెనింగ్స్ వొచ్చాయి. ఇలా అతని రెండు సినిమాలూ తెలుగులో విజయాన్ని సాధించడం వల్ల కార్తీ మినిమం గ్యారంటీ డబ్బింగ్ సినిమాల హీరోగా మారాడు. భవిష్యత్తులో రిలీజవబోయే అతని సినిమా కోనేందుకు బయ్యర్లు పోటీపడడం ఖాయం. ఇక 'గజిని' సినిమాతో సూర్యకి తెలుగులో వొచ్చిన మార్కెట్ ఏ స్థాయిదో మనకు తెలిసిందే. అతని మునుపటి సినిమా 'ఘటికుడు' చెప్పుకోదగ్గ స్థాయిలో ఆడకపోయినా ఇటీవల వొచ్చిన 'యముడు' సినిమాకి మంచి ఓపెనింగ్స్ వొచ్చాయి. ఆ సినిమాలో హీరోయిన్ అనుష్క కావడం ప్లస్సయింది. అది వంద ప్రింట్లతో రాష్ట్రవ్యాప్తంగా విడుదలైంది. ఇక విక్రమ్, ఐశ్వర్యారాయ్ కాంబినేషనుతో మణిరత్నం తమిళంలో రూపొందించిన 'రావణన్' తెలుగు డబ్బింగ్ వెర్షన్ 'విలన్' భారీ స్థాయిలో 125 ప్రింట్లతో 215 థియేటర్లలో విడుదలైంది. అంటే అవి ఆడుతున్న సమయాల్లో థియేటర్లు లభించక స్ట్రయిట్ తెలుగు సినిమాల నిర్మాతలు కొంతమంది ఇబ్బందులు పడ్డారు.
నిఘా నిల్
ఒకవైపు తెలుగులోని క్రేజీ సినిమాల వల్ల థియేటర్ల కొరతని ఎదుర్కొంటున్న తెలుగులోని చిన్న (తక్కువ బడ్జెట్) సినిమాల నిర్మాతలు ఇప్పుడు ఈ బడా డబ్బింగ్ సినిమాల వల్ల మరింత అగచాట్లకు గురవుతున్నారు. థియేటర్లు సకాలంలో లభ్యంకాక విడుదల వాయిదా వేసుకుంటున్న సినిమాలెన్నో. ఆ తర్వాత విడుదల చేద్దామంటే వాటిని కొనేందుకు ఏ బయ్యరూ, ఏ డిస్ట్రిబ్యూటరూ ముందుకురాడు. అప్పటికే ఫైనాన్సుతో సినిమాని పూర్తి చేసిన నిర్మాతకు సొంతంగా రిలీజ్ చేసుకునే స్థోమత వుండదు. పబ్లిసిటీకీ, విడుదలకీ మళ్లా అప్పుచేసే ధైర్యం లేక చాలామంది నిర్మాతలు తమ సినిమాల్ని ల్యాబుల్లోనే మగ్గనిస్తున్నారు. అవెప్పుడు థియేటర్ల మొహం చూస్తాయో ఎవరూ చెప్పలేని స్థితి. ఈమధ్య కొంతమంది నిర్మాతలు తెలివిమీరి డబ్బింగ్ సినిమాలకి నాలుగైదు తెలుగు సీన్లు జోడించి, స్ట్రయిట్ సినిమాలంటూ విడుదల చేస్తున్నారు. తద్వారా డబ్బింగ్ సినిమాల మీద ప్రభుత్వం వేస్తున్న పన్నుని తప్పించుకుంటున్నారు. వీటిమీద సరైన నిఘా లేకపోవడంతో ఇలాంటి సినిమాలు తరచూ వస్తూనే ఉన్నాయి. ఈరకంగా డబ్బింగ్ సినిమాలు తెలుగు మార్కెట్ మీద దురాక్రమణ చేస్తున్నాయి. అష్టకష్టాలు పడి తెలుగులో సినిమాలు తీస్తున్న నిర్మాతల నడ్డి విరుస్తున్నాయి. కర్నాటక తరహాలో ఇక్కడ కూడా డబ్బింగ్ సినిమాల మీద ఆంక్షలు పెట్టుకుంటే తప్ప 'మన' నిర్మాతల కష్టాలు కొంతమేరకైనా తీరవు.