Interview of actress Samantha

అతనెవరో నేనే చెబుతా!

‘త్వరలోనే సమంత పెళ్లంట. పేరు చెప్పకపోయినా ఓ తెలుగు హీరోను పెళ్లి చేసుకోబోతోందట’.. కొద్ది రోజులుగా సినీ ప్రేమికుల మధ్య నలుగుతున్న మాటలివి. ‘ఎవరా హీరో?’ అనే దానిపై ఎవరికి తోచినట్లు వాళ్లు నిర్ధారణకు వస్తున్నారు. పెళ్లి గురించి అడిగితే నవ్వుతూ తన ప్రతినిధి ఆ విషయం చెబుతారని దాటవేస్తోంది సమంత. అయితే పెళ్లి తర్వాత కూడా నటిస్తానని స్పష్టం చేస్తోంది. త్రివిక్రమ్‌ దర్శకత్వం వహించిన ‘అ ఆ’ చిత్రంలో నాయికగా నటించిన ఆమె.. తనను నడిపిస్తోంది తన అమ్మే అంటోంది. సమంత చెప్పిన ముచ్చట్లు ఆమె మాటల్లోనే..

ఈ వేసవికి విడుదలవుతున్న నా చివరి చిత్రం ‘అ ఆ’. నేను చేసిన ముఖ్యమైన సినిమాల్లో ఇదొకటి. ఇప్పటిదాకా సీరియస్‌ సినిమాలు, ఇంటెన్స్, రొమాన్స్ ఉన్న సినిమాలు చేశాను. కామెడీ చెయ్యలేదు. మొదటిసారి నేను కామెడీ చేసిన సినిమా ఇది. కమెడియ న్స్అంటే నాకు చాలా గౌరవం. కామెడీ పండించడం చాలా క్లిష్టమైన వ్యవహారం. ప్రేక్షకులకు నవ్వు రాలేదంటే, అది అపహాస్యమైనట్లే. ఆ రిస్క్‌ను నేను తీసుకున్నా. నాకు అలాంటి పాత్ర ఇచ్చినందుకు కచ్చితంగా త్రివిక్రమ్‌గారికి కృతజ్ఞతలు చెప్పుకుంటున్నా. వృత్తిపరంగానే కాక, వ్యక్తిగతంగానూ త్రివిక్రమ్‌గారి ప్రభావం నాపై ఉంది. ఆయన చాలా నాలెడ్జ్‌ ఉన్న వ్యక్తి. ఆయన్నుంచి ఎంతో నేర్చుకోవచ్చు. నాలోని కొన్ని అభద్రతాభావనలను ఆయన వల్ల అధిగమించాను. ఆయనకు సెన్సాఫ్‌ హ్యూమర్‌ ఎక్కువ. ఆయన నాకు పాత్ర గురించి చెబుతుంటే, ఆయనను నేను ఇమిటేట్‌ చేశానంతే. నేనేమిటో ఆయనకు బాగా తెలుసు. అందుకే అనసూయ పాత్రకు న్యాయం చేశానని నమ్ముతున్నా. ఈ సినిమాతో నటిగా మరింత ఎదిగాననుకుంటున్నా.

అప్పుడు జీరో కెమిస్ట్రీ

నేను వ్యక్తుల్ని బట్టి సినిమా చెయ్యను. స్క్రిప్టును బట్టే చేస్తాను. ఇప్పటివరకూ స్క్రిప్ట్ విని, కన్విన్స్ అయ్యాకే సినిమా చేస్తూ వచ్చా. ఏ స్క్రిప్టూ వినకుండా సంతకం చెయ్యలేదు. ఇప్పటి సినిమాల్లో హీరోయిన్‌కు తక్కువ ప్రాముఖ్యమే ఉంటోందన్నది నిజం. పది సినిమాల్లో ఒక్క సినిమాలోనే హీరోయిన్‌కు మంచి పాత్ర దొరుకుతోంది. ఇలాంటి రోజుల్లో ‘అ ఆ’ స్క్రిప్ట్ నాకు చాలా ముఖ్యమైంది. ఇందులో హీరో హీరోయిన్‌లకు సమాన ప్రాధాన్యం ఉంది. సినిమా మొత్తం హీరోయిన్‌ దృక్కోణంతో నడుస్తుంది. నిజ జీవితంలో నేనేమిటో ఆ పాత్ర కూడా అంతే. కొంచెం అల్లరి, వేగంగా నిర్ణయాలు తీసుకొనే తత్వం ఉన్న పాత్ర. నితిన్‌కూ, నాకూ, త్రివిక్రమ్‌గారికీ కూడా ఈ సినిమా ఓ మేకోవర్‌ లాంటిది. ఇప్పటివరకూ నితిన్‌ చేసిన ఉత్తమమైన అభినయాల్లో ఇందులోని ఆనంద్‌ విహారి పాత్ర ఒకటి. ఈ సినిమా చెయ్యకముందు నుంచీ నితిన్‌ నాకు మంచి ఫ్రెండ్‌. అందువల్ల ఈ సినిమా చేసేప్పుడు చాలా ఒత్తిడి ఫీలయ్యాను. మొదటి రెండు రోజులూ రొమాంటిక్‌ సీన్లు చేయడం చాలా కష్టమైపోయింది. సెట్స్‌పై మా ఇద్దరి మధ్య కెమిస్ట్రీ జీరో. ‘‘మీ ఇద్దర్ని పెట్టి నేను తప్పు చేశానా?’’ అని కూడా అనేశారు త్రివిక్రమ్‌. ఆ తర్వాత మేం కుదురుకున్నాం.

అందుకే డబ్బింగ్‌ చెప్పలేదు

‘ఇది చాలా కొత్త కథ.. ఇలాంటి ప్రేమకథ ఇంతదాకా రాలేదు..’ ఇలాంటి మాటలు ‘అ ఆ’ గురించి చెప్పను. సినిమా చూస్తున్నంతసేపూ మన ముఖాలపై చిన్న నవ్వు ఉంటుంది. నేను సినిమా చూశాను. ఆ మరుసటి రోజే నాకు మళ్లీ ఇంకోసారి చూడాలనిపించింది. చాలా రోజుల తర్వాత చాలా సింపుల్‌ సినిమా, అందమైన సినిమా వస్తోంది. ఇది హీరోయిన్ చెప్పే కథ అయినా, కథలో ప్రతి పాత్రకూ ప్రాధాన్యం ఉంటుంది. ఈ సినిమాకు నేను డబ్బింగ్‌ చెప్పే పనైతే ఈ ఏడాది జూన్‌కు కాకుండా, వచ్చే ఏడాది జూన్‌కు వస్తుందేమో. ఎందుకంటే ఈ సినిమాలో డైలాగులతో పాటు వాయిస్‌ ఓవర్‌ కూడా ఎక్కువే. దాన్ని నేను హ్యాండిల్‌ చెయ్యగలనని అనుకోలేదు. అందుకే డబ్బింగ్‌ చెప్పలేదు.

ఫ్లాప్‌కు బాధపడతా

నేను అబద్ధం చెప్పను. హిట్లు వస్తే సంతోషిస్తాను. ఫ్లాపులొస్తే బాధపడతాను. ‘బ్రహ్మోత్సవం’ విషయంలోనూ అంతే. జయాపజయాలనేవి ప్రేక్షకుల చేతుల్లో ఉన్నాయి. మనం చేసే ప్రతి సినిమా హిట్టవ్వాలని లేదు. ఒక్కోసారి స్క్రిప్టుపరంగా బాగా ఉందనుకున్నది తెరమీద అంత బాగా రాకపోవచ్చు. బ్యాడ్‌ ఫిల్మ్‌ చెయ్యాలని ఎవరూ కోరుకోరు. సినిమా విజయానికి అదృష్టం కూడా తోడవ్వాలి.

పెళ్లి తర్వాతా నటిస్తా

పొద్దున్నే నిద్రలేచి.. ‘ఈ రోజు బాగుంటుందిలే’ అనుకుంటే, ఏదో ఓ పేపర్‌లో ‘సమంతకు పెళ్లి.. ఎవరితో పెళ్లి?’ అంటూ ఎవరెవరివో ఐదు పేర్లు రాసేసిన న్యూస్‌ కనిపిస్తుంది. ‘అమ్మబాబోయ్‌.. ఇతనితో నేను మాట్లాడి రెండు సంవత్సరాలైపోయిందే.. అతనితో నాకు పెళ్లా?’ అని నవ్వుకుంటాను. నేనెవర్ని, ఎప్పుడు పెళ్లి చేసుకుంటాననే విషయం నేనే చెబుతాను. పెళ్లి తర్వాత కూడా సినిమాల్లో నటిస్తా.

వివక్షపై ఫిర్యాదు లేదు

ఓ స్త్రీగా నన్ను పురుషులతో పోల్చుకొని వివక్షకు గురైనట్లుగా నేనెప్పుడూ భావించుకోలేదు. జీవితమంటేనే పోరాటం. పోటీ అనేది పురుషులతో కావచ్చు, స్త్రీలతో కావచ్చు. లింగ వివక్షపై నాకెప్పుడూ దృఢమైన అభిప్రాయం లేదు. పురుషులతో పాటు స్త్రీలనూ సమానంగా చూడ్డం మొదలైంది. బాలీవుడ్‌లో ఇప్పటికే స్త్రీ ప్రధాన చిత్రాలు పెరుగుతున్నాయి. తెలుగులోనూ ఆ వాతావరణం వస్తుంది. నేనైతే ఈ విషయమై ఎవరిపైనా ఫిర్యాదు చెయ్యదలచుకోలేదు.

వీలైనంతమందికి గుండె ఆపరేషన్లు

మా ‘ప్రత్యూష సపోర్ట్‌’ ఫౌండేషన్ కోసం నిధుల సమీకరణ చేస్తున్నాను. దాని కోసమే జూలైలో అమెరికా వెళ్తున్నాను. అక్కడి ఓ ఫౌండేషన్ వాళ్లు ఆహ్వానించారు. ఇవాళ గుండె ఆపరేషన్ చేయించుకోవాలంటే చాలా ఖర్చవుతోంది. ఆ ఆపరేషన్ల కోసం మా వద్దకు చాలామంది వస్తున్నారు. వారిలో నిజంగా ఎవరికి ఆపరేషన్ అవసరమనేది మా బృందంలోని డాక్టర్‌ మంజుల చూసుకుంటారు. ఈ విషయంలో వీలైనంత మందికి సాయం చెయ్యాలనేది నా సంకల్పం. ఇప్పటివరకూ నిధుల సమీకరణకై ఎవరి సాయమూ తీసుకోలేదు.

అది తప్పంటాను

నిర్భయ తరహా దుర్ఘటనల వార్తలు విన్నప్పుడు చాలా బాధ కలుగుతుంది. ఇవాళ దేశంలోని చాలామంది మహిళలు ఎదుర్కొంటున్న దారుణమైన సమస్య అది. సో టెర్రిబుల్‌. ఈ ప్రపంచంలో మంచి విషయాలే జరగాలని కోరుకునే మనస్తత్వం నాది. ప్రభుత్వాలు చెయ్యాల్సిన పనులు చేస్తున్నాయి. ఇలాంటి దారుణాల్ని ఎలా ఆపాలో నాకు తెలీదు. కానీ ఏదైనా చెయ్యమంటే నా వంతుగా చెయ్యడానికి సిద్ధంగా ఉంటాను. నిర్భయ కేసులో నిందితులు రెండేళ్లలో విడుదలయ్యారు. మైనర్‌ అనే కారణంతో వాళ్లను విడుదల చేయడాన్ని నేనంగీకరించను. అది తప్పంటాను. వాళ్లను తిరిగి జైలులో పెట్టాలనేవాళ్లకు నేను మద్దతిస్తాను.

అమ్మ నన్ను కాపాడింది

మా కుటుంబంలోని అందరిలోకీ అమ్మతోటే ఎక్కువ అనుబంధం నాకు. నాన్న చాలా చాలా స్ట్రిక్టు. ఎవరితోనూ ఎక్కువగా మాట్లాడరు. చిన్నప్పట్నించీ నాతోనూ అంతే. అమ్మ గురించి ఒక్క మాటలో చెప్పాలంటే ‘షి సేవ్డ్‌ మి’ అంటాను. నా చిన్నతనంలో మా కుటుంబం ఆర్థికంగా చాలా కష్టాలు పడింది. ఆ టైమ్‌లో అమ్మే అందరికీ ధైర్యం చెబుతూ వచ్చింది. నాన్నకు కోపమెక్కువ. అమ్మకు ఓర్పెక్కువ. ఆ ఓర్పుతోటే కుటుంబాన్నీ, నన్నూ నడిపించింది. ఇప్పటికీ నా వెనకాల అమ్మ ఉందనే ధైర్యంతో కెరీర్‌లో ముందుకు వెళ్తున్నాను.

- ఆంధ్రజ్యోతి డైలీ, 31 మే 2016.

Interview with actress Samantha

- ఆంధ్రజ్యోతి డైలీ, 14 ఏప్రిల్ 2015

Can Trivikram break the flop sentiment?

'అత్తారింటికి దారేది' టైటిల్ మార్పు?

త్రివిక్రం ఎదుట సవాలు

దర్శకుడిగా హ్యాట్రిక్ హిట్స్ కొట్టి నాలుగో సినిమాతో బోల్తాపడ్డ త్రివిక్రం ఐదో సినిమాతో సవాలును ఎదుర్కొంటున్నాడు. అతను డైరెక్ట్ చేసిన 'నువ్వే నువ్వే', 'అతడు', 'జల్సా' సినిమాలు ఒకదాన్ని మించి మరొకటి హిట్టయిన సంగతి తెలిసిందే. అదివరకు రచయితగా టాప్ రేంజ్ పొందిన త్రివిక్రం ఈ మూడు సినిమాలతో డైరెక్టర్‌గానూ టాలీవుడ్ టాప్‌లీగ్‌లో చేరిపోయాడు. అయితే అతడి నాలుగో సినిమా తొలి ఫ్లాప్‌ని అతడి జాబితాలో చేర్చింది. ఆ సినిమా 'ఖలేజా'. మహేశ్ హీరోగా అతడు డైరెక్ట్ చేసిన రెండో సినిమా ఇది. 'మగధీర' స్ఫూర్తితో తీయడం వల్ల ఈ సినిమాలో ఒరిజినాలిటీ మిస్సయ్యిందనే అపవాదుతో పాటు మహేశ్, అనుష్క మధ్య కెమిస్ట్రీ వర్కవుట్ కాలేదనే విమర్శా వచ్చింది. కథలోనే దమ్ములేదనే మాట ఎలాగూ ఉంది. 
ఈ సినిమాతో దెబ్బతిన్న త్రివిక్రం ఇప్పుడు అల్లు అర్జున్‌ని డైరెక్ట్ చేయడంలో నిమగ్నమయ్యాడు. నవంబర్ 2న ప్రారంభమైన ఈ సినిమా షూటింగ్ ప్రస్తుతం హైదరాబాద్‌లో జరుగుతోంది. అర్జున్ సరసన ఇలియానా తొలిసారి హీరోయిన్‌గా నటిస్తున్న ఈ సినిమాతో బంపర్‌హిట్ కొట్టి తన సత్తా చాటాలని ఆశిస్తున్నాడు త్రివిక్రం. తొలి మూడు సినిమాలతో దర్శకుడిగా త్రివిక్రంలోని ప్రతిభ ఆవిరైందనీ, అందువల్లే 'ఖలేజా' లాంటి సబ్జెక్ట్ చేశాడనీ వచ్చిన విమర్శల్ని తాజా సినిమాతో తిప్పికొట్టాలని అతను భావిస్తున్నాడు. ఈ సవాలుని అతడు ఎలా అధిగమిస్తాడో చూడాల్సిందే.

'స్వయంవరం' శాపం!

హీరోగా నటించిన తొలి సినిమానే హిట్టయ్యిందంటే ఎవరికైనా ఎంత ఆనందం కలుగుతుంది? దాన్ని ఓ వరమనే అనుకుంటారు. కానీ ఓ హీరో మాత్రం దాన్ని వరమంటూనే, అదే శాపం కూడా అంటున్నాడు. ఆ హీరో వేణు! అవును. హీరోగా అతని తొలి సినిమా 'స్వయంవరం' మంచి సక్సెస్ అవడమే కాక యువతలో అతనికి క్రేజ్ కూడా తెచ్చింది. కానీ తర్వాత కాలంలో ఆ క్రేజ్‌ని అతను నిలుపుకోలేకపోయాడు. త్రివిక్రం స్క్రిప్టుతో కె. విజయభాస్కర్ డైరెక్ట్ చేసిన 'స్వయంవరం' సినిమా తర్వాత వేణుకి మళ్లీ ఇప్పటివరకు అంతకంటే మంచి స్క్రిప్ట్ తారసపడలేదు. అతను సోలో హీరోగా చేసిన వాటిలో 'చిరునవ్వుతో', 'గోపి గోపిక గోదావరి' మాత్రమే చెప్పుకోదగ్గ రీతిలో సక్సెస్ అయ్యాయి. అందుకే 'స్వయంవరం' తనకి వరం మాత్రమే కాదనీ, శాపం కూడాననీ అతను చెప్పుకున్నాడు. అతడికి ఎలాంటి పాత్ర చేయాలంటే ఇష్టమో తెలుసా? "యాక్షన్ హీరోతో పాటు నెగటివ్ షేడ్స్ ఉండే యాంటీ హీరో కేరక్టర్ చెయ్యాలంటే ఇష్టం. కానీ మన సినిమాల్లో హీరో అంటే కొన్ని పరిధులు గీసేసి, ఇలాగే ఉండాలంటారు. హిందీలో, తమిళంలో హీరోలు మంచి ప్రయోగాలు చేస్తుంటారు. మనవాళ్లకి హీరో చనిపోతే నచ్చదు. కానీ అలాంటి పాత్ర ఒకటి చెయ్యాలనేది నా కోరిక" అని తెలిపాడు వేణు.

బిగ్ స్టోరీ: హవా తగ్గిన పరభాషా దర్శకులు!

ఇంతకాలం తెలుగు సినిమాల్లో పరభాషా నాయికలు, పరభాషా విలన్లతో పాటు పరభాషా దర్శకుల హోరు ఎక్కువయ్యిందని వాపోతూ వచ్చాం. తెలుగు వాళ్లని పట్టించుకోవడం లేదని బెంగపడుతూ వచ్చాం. ఇప్పుడు ఆ బాధ దర్శకుల విషయంలో పడాల్సిన అవసరం లేదు. మళ్లీ మన దర్శకులకి రోజులొచ్చాయి. ఎస్.ఎస్. రాజమౌళి, పూరి జగన్నాథ్, వి.వి. వినాయక్, శ్రీను వైట్ల, త్రివిక్రం, సుకుమార్, సురేందర్‌రెడ్డి, సంపత్ నంది, శ్రీకాంత్ అడ్డాల వంటి దర్శకులు రాణిస్తుండటంతో ఇతర భాషల నుంచి వచ్చే దర్శకుల తాకిడి ఇటీవల తగ్గింది. కొంత కాలం క్రితం తెలుగు దర్శకులపై కంటే ఇతర భాషా దర్శకులపైనే మన హీరోలు, నిర్మాతలు నమ్మకం పెట్టుకున్నట్లు కనిపించింది. తమిళ కథలు, తమిళ దర్శకులే శరణ్యమన్నట్లు మన హీరోలు, నిర్మాతలు అప్పట్లో వ్యవహరించారు. ప్రస్తుతం టాప్ హీరోల్లో పవన్‌కల్యాణ్, ప్రభాస్ మాత్రమే తమిళ దర్శకులతో పనిచేస్తున్నారు. పవన్ కల్యాణ్‌తో విష్ణువర్థన్ 'పంజా' తీస్తుంటే, ప్రభాస్‌తో రాఘవ లారెన్స్ 'రెబల్' తీస్తున్నాడు.
ఇదివరలో తెలుగులో మంచి డిమాండ్ ఉన్న పి. వాసు, విక్రమన్, సురేశ్‌కృష్ణలను ఇప్పుడు తెలుగు హీరోలెవరూ పట్టించుకోవడం లేదు. 'ఏ మాయ చేసావె' హిట్ తర్వాత కూడా గౌతం మీనన్ వెంట మన వాళ్లెవరూ పడటం లేదు. 'ఆడవాళ్ల మాటలకు అర్థాలే వేరులే' హిట్ తర్వాత కూడా సెల్వరాఘవన్ మళ్లీ తెలుగు వైపు దృష్టిపెట్టలేదు. 'సత్యం'తో ధూంధాంగా తెలుగులోకి వచ్చిన మలయాళీ సూర్యకిరణ్‌ని ఎవరూ పట్టించుకోవడం లేదు. 'ప్రియమైన నీకు', 'అమ్మాయి బాగుంది' సినిమాల దర్శకుడు బాలశేఖరన్ ఏమయ్యాడో తెలీదు. 'నాని', 'పులి' సినిమాల ఫెయిల్యూర్‌తో ఎస్.జె. సూర్య పత్తాలేకుండా పోయాడు. తెలుగులోనే దర్శకత్వంలో ఓనమాలు దిద్దుకున్న బొమ్మరిల్లు భాస్కర్ తమిళుడైనా అతన్ని తెలుగువాడిగానే ట్రీట్ చేయాలి. తమిళం వైపు చూపు సారించకుండా తెలుగులోనే కెరీర్ వెదుక్కుంటున్న కరుణాకరన్‌కూ మినహాయింపు ఇవ్వొచ్చు.
ఓ వైపు హీరోయిన్లు, ఇంకోవైపు విలన్లు, సైడు విలన్లు, కేరక్టర్ ఆర్టిస్టులు, మరోవైపు రీమేక్‌లు తెలుగు సినీ పరిశ్రమపై ఆధిపత్యాన్ని ప్రదర్శిస్తుంటే సృజనాత్మక రంగమైన దర్శకత్వం కూడా దిగుమతికి గురికావడం తెలుగు సినీరంగంలోని భావ దారిద్ర్యాన్ని పట్టిస్తున్నదని నిన్నటిదాకా బాధపడినవాళ్లు ఇప్పుడు ఒకింత ఊపిరి పీల్చుకుంటున్నారు. నిన్నటి స్థితిపై "తెలుగు సినిమా చూస్తే ఏమున్నది గర్వకారణం... సమస్తం పరభాషా వాసనమయం" అంటూ శ్రీశ్రీని అనుకరిస్తూ మాట్లాడిన కవులు ఇప్పుడు తెలుగు దర్శకులకి మంచి రోజులు రావడంతో ఖుషీ అవుతున్నారు.
తెరముందు నాయకుడు హీరో కావచ్చు. తెరవెనుక నాయకుడు (కెప్టెన్) మాత్రం దర్శకుడే. అటువంటి నాయకత్వ స్థానంలో మనవాళ్లని కాకుండా ఇతర భాషలవాళ్లకి పెద్దపీట వేయడం ఏమంత న్యాయం? 'ప్రతిభ ఎవరిలో ఉన్నా ప్రోత్సహించాలి. అందుకు భాషా భేదం అడ్డుకాకూడదు' అంటారు కొంతమంది. నిజమే. అయితే అది కొంతవరకే. ఒకరిద్దర్ని అలా తీసుకు రావడంలో తప్పులేదు. అయితే అదేపనిగా ఒకరి తర్వాత మరొకర్ని దిగుమతి చేసుకుంటూ పోతుంటే మన దర్శకులు ఏం కావాలి? మనవాళ్లు తీసే సినిమాలన్నీ ఫెయిలయ్యి, పరాయి దర్శకుల సినిమాలు బ్రహ్మాండంగా ఆడుతుంటే.. సరేననుకోవచ్చు. అలా ఏమీ జరగడం లేదు. పొరుగింటి పుల్లకూర రుచి అన్న సామెతగా హీరోలు, నిర్మాతలు పర భాషా దర్శకులవైపు చూపు సారిస్తూ రావడం వల్లే వాళ్ల హవా నడిచింది. ఇప్పుడు వాళ్ల చేతుల్లో విజయాన్ని అందించే మంత్రదండమేదీ లేదని తెలియడంతో తిరిగి తెలుగు దర్శకులకి ప్రాధాన్యం ఇస్తూ వస్తున్నారు. ఈ ట్రెండు మనకి మంచిదే.

న్యూస్: రెండు ఛాన్సులు కొట్టేసిన ఇలియానా

ప్రస్తుతం తమిళంలో శంకర్ డైరెక్షన్‌లో 'నంబన్' ('3 ఇడియట్స్' రీమేక్)లో నటిస్తోన్న గోవా బ్యూటీ ఇలియానా ఎట్టకేలకు రెండు తెలుగు సినిమాల్లో బుక్కయ్యింది. తెలుగులో పూరి జగన్నాథ్ డైరెక్షన్‌లో 'నేను నా రాక్షసి' చేశాక మళ్లీ మరో సినిమాలో ఆమె దర్శనమివ్వలేదు. సాధారణంగా ఇలియానా స్టార్ హీరోయిన్ ఇమేజ్‌కి ఎలాంటి గ్యాప్ లేకుండా కనీసం రెండు మూడు సినిమాలు చేతిలో ఉండాలి. కానీ ఆ సినిమా పూర్తి చేసిన ఆర్నెల్ల వరకూ ఆమె మరో తెలుగు సినిమా సెట్స్ మీద కాలుపెట్టలేదు. కోటి దాటిన ఆమె రెమ్యూనరేషనే దీనికి కారణమని ప్రచారంలోకి వచ్చింది. అయితే ఇప్పుడు ఆమెకి ఇద్దరు డైరెక్టర్ ఫ్రెండ్స్ మళ్లీ అవకాశాలిచ్చారు. ఒకరు 'పోకిరి'తో ఆమెని స్టార్ హీరోయిన్‌ని చేసిన పూరి జగన్నాథ్ అయితే, మరొకరు ఆమెతో 'జల్సా' చేసిన త్రివిక్రం. రవితేజ హీరోగా జగన్ సంకల్పించిన 'ఇడియట్ 2'లో ఇలియానా హీరోయిన్‌గా ఎంపికైంది. ఇటు జగన్‌తో, అటు రవితేజతో ఆమెకి ఇది మూడో సినిమా కావడం విశేషం. అలాగే అల్లు అర్జున్ హీరోగా త్రివిక్రం డైరెక్ట్ చేసే సినిమాలోనూ హీరోయిన్‌గా ఇలియానా కన్‌ఫామయ్యింది. నిజానికి ఇందులో తనకి జోడీగా మిస్ బ్యూటిఫుల్ స్కిన్ సమంతా కావాలని అర్జున్ పట్టుబట్టగా, త్రివిక్రం ఇలియానాకి ఓటేసి, అర్జున్‌ని కన్విన్స్ చేశాడనీ ఫిలింనగర్ వాసులు చెప్పుకుంటున్నారు. ఏదేమైనా ఏవో అల్లాటప్పా చాన్సులు కాకుండా రెండు క్రేజీ ప్రాజెక్టుల్లో అవకాశాలు దొరకడంతో ఇలియానా ఆనందంతో తబ్బిబ్బవుతోంది.

ఇంటర్వ్యూ: గోపీమోహన్

'దూకుడు' సబ్జెక్ట్ ఎలా పుట్టింది?
'దూకుడు' సబ్జెక్టుకి పెద్ద కథే ఉంది. మహేశ్‌తో సినిమా చెయ్యాలనేది శ్రీను వైట్ల గారికి ఎప్పట్నించో ఉన్న కోరిక. 'ఖలేజా' షూటింగ్ జరుగుతున్న సమయంలో మహేశ్ గారు పిలిచి "మీరు స్క్రిప్ట్ వర్క్ మొదలుపెట్టండి. నా తర్వాతి సినిమా మీతోనే" అన్నారు. అప్పటిదాకా ఆయన తర్వాతి సినిమా ఏదో క్లారిటీ లేదు. రెండు మూడు పేర్లు వినపడుతూ ఉన్నాయి. మహేశ్ ఎప్పుడైతే తర్వాతి సినిమా మీదే అన్నారో శ్రీను ఆ బాధ్యతని ఎలా ఫీలయ్యారంటే ఈ సినిమాకి ఎట్టి పరిస్థితుల్లోనూ తప్పు చెయ్యకూడదు. కథ పరంగా, అన్ని విషయాల పరంగా జాగ్రత్తగా ఉండాలి - అనే ఆలోచనతో స్పాన్ ఉన్న హీరో కాబట్టి 'మగధీర'లాగా గ్రాండియర్‌గా వెళ్దామా అనుకున్నారు. తర్వాత అది ఈయన శైలికి దూరంగా ఉండే సినిమా, అందులో ఎంటర్‌టైన్‌మెంట్‌కి అంటే కామెడీకి పెద్దగా స్కోప్ కనిపించడం లేదు, హెవీ బ్యాక్‌గ్రౌండ్స్ అసలు సూటవుతాయా అనుకుంటూ దాన్నుంచి డ్రాప్ అయ్యాం. తర్వాత ఓ లవ్‌స్టోరీ అనుకున్నాం. దాని మీద చాలా కాలం కూర్చున్నాం. మహేశ్‌కి లైన్ చెబితే ఆయనకి నచ్చింది. తాను కూడా పూర్తి స్థాయి లవ్‌స్టోరీని అంతదాకా చెయ్యలేదనీ, చెయ్యమనీ చెప్పారు. మా ఉద్దేశంలో 'ఆనందం' తర్వాత శ్రీను గారు మళ్లీ ఆ తరహా సినిమా చెయ్యలేదు అనేది మా ఫీలింగ్. మహేశ్‌కి అలాంటి బ్యూటిఫుల్ రొమాంటిక్ లవ్‌స్టోరీని ఎంటర్‌టైన్‌మెంట్, కామెడీ పెట్టుకుని చేస్తే బాగుంటుందనుకుని మేం ప్లాన్ చేశాం. కానీ మహేశ్ అంటే యాక్షన్ కూడా కోరుకుంటున్నారు జనం. మా ప్రొడ్యూసర్లు కూడా కొంచెం పంచ్ ఉన్న సినిమా చేస్తే బాగుంటుంది కదా అనే ఫీలింగ్ వ్యక్తం చేశారు. రెండు మూడు నెలల డిస్కషన్ల తర్వాత ఆ లవ్‌స్టోరీని పక్కనపెట్టి ఎంతో తర్జనభర్జన తర్వాత ఓ అద్భుతమైన లైన్‌ని సెట్ చేశాం. 'ఇది తప్పు చెయ్యదు. జనాలకి ఇది బాగా నచ్చే అవకాశం 100% ఉంది. దీంట్లో అన్ని రకాల అంశాలూ ఉన్నాయి' అనుకుని దీన్ని హిలేరియస్ ఎంటర్‌టైన్‌మెంట్ చేయడం కోసం ఈ ఆర్నెల్లూ శ్రమించాం.
మహేశ్‌కి ఎన్ని వెర్షన్స్ వినిపించారు?
నిజానికి మహేశ్ ఒక మనిషిని నమ్మిన తర్వాత - అది శ్రీను వైట్ల కానివ్వండి, గుణశేఖర్ కానివ్వండి, త్రివిక్రం కానివ్వండి - లైన్ ఓకే చెప్పాక ఆయన ఇంక జోక్యం చేసుకోరు. ప్రతి విషయాన్నీ అదెలా వచ్చిందీ, ఇదెలా వచ్చిందీ అని అడగరు. ఫుల్ ఫ్రీడం ఇచ్చేస్తారు. "నా కెరీర్లో 'ఒక్కడు', 'పోకిరి' సినిమాల రేంజిలో నిలబడే అవకాశం ఉంది. నేను ఇంతకుముందు చేసిన సినిమాలకు ఇలా చెప్పలేదు. మీరెంత చేసుకుంటే అంత ఈ సినిమా పొటెన్షియాలిటీ ఉంటుంది. మీ మార్క్ మిస్ కాకుండా చెయ్యండి" అన్నారు. దాంతో దాన్ని మేమే ఓ ఛాలెంజిగా తీసుకుని ఫస్టాఫ్ ఆరేడు వెర్షన్లు చేశాం. మహేశ్‌కి ఫైనల్ వెర్షన్ వినిపించాం. షూటింగుకి వెళ్తున్న దశలో ఆయనకి మొత్తం కథ చెప్పాం. ఆయన 'గో ఎ హెడ్' అన్నారు. అప్పట్నించి ఇప్పటివరకు ఆయన నుంచి పూర్తి సహకారం. ఆయనకి యాక్షన్ మీద మంచి కమాండ్ ఉంది. వాటి మీద ఆయన చిన్న చిన్నవే అయినా మంచి డౌట్స్ అడిగారు. ఆ మార్పులు కూడా బాగా జరిగాయి. అలాగే స్క్రీన్‌ప్లేలో రెండు మూడు చిన్న సూచనలు చేశారు. కన్ఫ్యూజన్‌కి తావులేకుండా అవి బాగా హెల్ప్ అయ్యాయి. ఎడిటింగ్ తర్వాత చూసుకున్నాక వాటికి చాలా సంతోషపడ్డాం.
మహేశ్ కోసం ప్రత్యేకించి ఈ సబ్జెక్టులో ఏవైనా విశేషాల్ని ప్రవేశపెట్టారా?
మహేశ్‌బాబు అనగనే ప్రేక్షకులు క్లాస్, యాక్షన్ ఎక్స్‌పెక్ట్ చేస్తారు. అలాంటి ఆయన్ని కొంత మోతాదు తగ్గించి లోకల్‌గా చూపించారు 'పోకిరి'లో పూరి జగన్నాథ్ గారు. ఆ తర్వాత మేము బాగా లోకల్ టోన్ ఉన్న డైరెక్టర్ అండ్ రైటర్. మా స్క్రిప్ట్స్ అన్నిట్నీ మీరు గమనిస్తే మన ఇంటీరియర్ పీపుల్ హావభావాలకి దగ్గరగానే అవుతా ఉంటాం. ఈ సినిమాలోనూ అలాగే ఓపెన్ అయ్యి చూపిద్దాం అని ఫిక్సయి చేశాం.
మహేశ్ కేరక్టరైజేషన్ ఎలా ఉండబోతోంది?
మహేశ్ క్యారెక్టరైజేషన్ మంచి యాటిట్యూడ్‌తో ఉంటుంది. ఆ యాటిట్యూడ్ సినిమాలో చాలా హైలైట్‌గా అనిపిస్తుంది. అంటే ప్రతి ఒక్కరు కూడా ఆయన నిల్చునే స్టైల్ గానీ, ఆయన మాట్లాడే విధానం గానీ, ఆయన ఇగో ఫీలయ్యే విధానం గానీ, లేకపోతే ఆయన డైలాగ్ చెప్పే టోన్ గానీ ఇవన్నీ బయటివాళ్లు అనుకరించే స్థాయిలోనే ఉంటాయి.
'కింగ్‌'కి ఆర్నెల్లే టైం ఉండటం వల్ల కొన్ని తప్పులు సరిచేయలేకపోయామన్నారు. ఇప్పుడు 'దూకుడు'ని కూడా ఆర్నెల్లలోనే తీశారు...
కాదండీ. ఈ సినిమా వర్క్ మొదలై దాదాపు రెండేళ్లయ్యిందండీ. 'నమో వెంకటేశ' 2010 జనవరిలో రిలీజయ్యింది. అప్పట్నించీ మేం ఈ ప్రాజెక్టు మీదే స్ట్రగులవుతూ ఉన్నాం. సెకండాఫ్ మీదైతే ఏడెనిమిది నెలలు కూర్చున్నాం. షూటింగుకి వెళ్లేటప్పటికి ఫస్టాఫ్ పక్కాగా రెడీ అయ్యింది. సెకండాఫ్ మేమో వెర్షన్ అనుకుని చెప్పాం. కానీ మధ్యలో ఇండస్ట్రీ స్ట్రైక్ రావడం, అప్పుడు కూడా కాంప్రమైజ్ కాకుండా కంటిన్యూగా సిట్టింగ్స్ వేస్తూ వచ్చాం.
సంభాషణల రచయితగా కోన వెంకట్ పాత్రేమిటి?
ఎంటర్‌టైన్‌మెంట్ సబ్జెక్ట్ కాబట్టి ముందే ట్రీట్‌మెంట్ అనుకునేటప్పటికే 70% దాకా సంభాషణలు ఎలా ఉండాలనే దానిపై క్లారిటీ వచ్చేస్తుంది. డైలాగులు ఎలా ఉండాలో డైరెక్టర్ గారే చెబుతారు. 'వెంకీ' నుంచి మా అన్ని సినిమాలకి కోన గారే మాటల రచయిత. మాటల విషయంలో ఆయనకీ, మాకూ బ్రహ్మాండంగా సింకవుతుంది. ఈ సినిమాలో అద్భుతమైన మాటలు రాశారు. ఈ మాటల్లో శ్రీను వైట్ల గారి భాగస్వామ్యం కూడా ఉంది.
పంచ్ డైలాగుల గురించి చెప్పండి..
ఫ్రాంకుగా చెప్పాలంటే కొన్ని డైలాగులు నాకు శ్రీను గారు చెప్పేటప్పుడు "ఈ డైలాగుల్లో ఇంత పంచ్ ఉందా?" అనిపించింది. ఉదాహరణకి "మైండులో ఫిక్సయితే బ్లైండుగా వెళ్లిపోతాను' అనేది. ఆయన 'ఇది చూడండి. భలే ఉంటుంది' అనేవారు. డబ్బింగ్ అయిపోయి ట్రైలర్ వదిలినప్పుడు దానికొచ్చిన రియాక్షన్ చూసి నేనే షాకయ్యా 'ఇంత రియాక్షన్ ఉంటుందా' అని. ఇలాంటివి సినిమాలో చాలా ఉన్నాయి. ఆయన పర్టిక్యులర్‌గా ఫిక్సయి రాశారు. శ్రీను గారు చెబుతూ వచ్చారు - "ఇప్పటివరకు మనం సాఫ్ట్ సినిమాలు చేస్తూ వచ్చాం. కామెడీ సీన్లలో తప్ప పవర్‌ఫుల్ డైలాగ్స్ మీద మనం ఎక్కువ ఫోకస్ చెయ్యలేదు. ఈ సినిమా దానికి లాంచింగ్‌గా ఉండాలి. ఇక నుంచీ మనల్ని కూడా అలాంటి డైలాగ్స్ పెట్టమనేటట్లుండాలి" అని. ఇందులో డైలాగ్స్ ఎంటర్‌టైన్‌మెంట్ సైడ్ వచ్చేసరికి శ్రీను వైట్ల తరహాలోనే ఉంటాయి. యాక్షన్, పవర్‌ఫుల్ సైడ్ వచ్చేసరికి మహేశ్ తరహాకి మేం వెళ్లాం. ఆయన కూడా అదే స్టైల్‌కి మలుచుకుని చెప్పారు. ఇందులోని డైలాగుల్లో 'పోకిరి' షేడ్స్, 'రెడీ' షేడ్స్ రెండూ కనిపిస్తాయి. అయితే ప్రేక్షకులకి ఇది కావాలని చేసినట్లు ఏమాత్రం అనిపించదు. కథే బలంగా ఎలివేట్ అవుతూ వెళ్తుంది. మీరు చూసినప్పుడు కూడా అదే ఫీలవుతారు.
మీకు బాగా నచ్చిన డైలాగ్ ఒకటి చెబుతారా?
బేసిగ్గా నేను కృష్ణగారి అభిమానిని. కృష్ణగారు సాహసానికి మరో పేరని అంటుంటారు. ఈ సినిమాలో హీరో ఓ డైలాగ్ చెబుతాడు "మా నాన్నెప్పుడూ ఒకటంటుండేవాడు 'సాహసమే ఊపిరిగా బతికేవాడికి దారితో పనిలేదు దమ్ముతోనే పని' అని". ఈ డైలాగ్ మంచి సందర్భంలో వస్తుంది. దాన్ని అందరూ కృష్ణగారితో ఐడెంటిఫై చేసుకుంటారు.
'నమో వెంకటేశ' దాకా మీ సినిమాలన్నీ ఓకే పేటర్న్‌లో ఉన్నాయనే పేరొచ్చింది. 'దూకుడు' ఎలా ఉండబోతోంది?
ఆ పేటర్న్ లేకపోతే జనాలు చూడరేమో అనే ఫీలింగ్ ఉంటుండేది. కానీ అదే చేసుకుంటూ పోతే మొనాటనీ ఫీలయ్యే అవకాశం ఉంది. మీరు గమనిస్తే మేం ఎక్కువగా ఇళ్లల్లోనే సినిమా చేసుకుంటూ వస్తున్నాం. దాని వల్ల ఓ గ్రూప్ మధ్య కథ సెటిలవుతుంది. మంచి కమెడీకి ఆస్కారం కలుగుతుంది. బడ్జెట్ కూడా తగ్గుతుంది. ఈ పేటర్న్‌ని మరికొంత మంది కూడా ఫాలో అయ్యారు. ఇలా బోల్డన్ని సినిమాలు రావడంతో మేం కూడా రిపిటిషన్ చేసినట్లయ్యింది. అందుకే 'దూకుడు'కి పెద్ద స్పాన్ పెట్టుకున్నాం. టర్కీ లొకేషన్లకి వెళ్లాం. ఎమోషన్స్‌కి కూడా రకరకాలుగా డీల్ చేశాం. ఇదివరకు డీల్ చెయ్యని ఎమోషన్స్‌ని డీల్ చేశాం. ఇదివరకు ఏ సినిమాలో చెయ్యని రీతిలో ఇందులో శ్రీను హ్యూమన్ ఎమోషన్స్‌ని బాగా డీల్ చేశారు. ఓ పర్పస్ కోసం సినిమా జరుగుతుంటుంది. ఇదివరకు ఎందులోనూ లేని విధంగా ఇందులో ఆ పర్పస్‌ని చాలా స్ట్రాంగ్‌గా పెట్టాం. 'ఢీ', 'రెడీ'లో లవర్ కోసం చేసేదుంటుంది. ఇందులో లవర్ కోసమని కాకుండా స్ట్రాంగ్ హ్యూమన్ యాంగిల్ ఉంటుంది. అది సినిమాలో చూస్తేనే బాగుంటుంది. దసరా పండక్కి అందరూ ఎంజాయ్ చేసే రీతిలో 'దూకుడు' ఉంటుంది. 'రెడీ' తర్వాత అంత హిలేరియస్ ఎంటర్‌టైన్‌మెంట్. మొదట్నుంచీ చివరి దాకా మహేశ్ కేరక్టర్ ఎంటర్‌టైనింగ్‌గా ఉంటుంది. మా సినిమా అంటే ఎక్స్‌పెక్ట్ చేసే బ్రహ్మానందం గారికి 'ఢీ', 'రెడీ', 'కింగ్' కంటే మంచి కేరక్టర్ కుదిరింది. డెఫినెట్‌గా అది కొత్తగా ఉంటుంది. ఆయన ఎక్కడికి వెళ్లినా ఇందులోని పాత్ర పేరుతో పిలుస్తారు. బ్రహ్మానందం గారి లానే హాట్ ఫేవరేట్ ఎమ్మెస్ నారాయణ. మా ప్రతి సినిమాలో ఆయన ఓ సీను చేసినా అది పేలుతుంటుంది. ఇందులో ఆయన కేరక్టర్‌ని ఫుల్ ఫోకస్డ్‌గా రాశాం. ఆయన పాత్రకి థియేటర్లో వచ్చే రెస్పాన్స్ ఏమిటో మీరో చెప్పాలి. అంత బాగా ఎంజాయ్ చేస్తారు. 
తమన్ చాయిస్ ఎవరిది?
శ్రీను గారిదే. తమన్ నిజానికి ఫ్రెండ్. నల్లమలుపు బుజ్జి దగ్గర నేను 'లక్ష్యం' చేస్తున్నప్పుడు తమన్ ఓ ఆల్బం తీసుకువచ్చి పరిచయమయ్యాడు. అప్పుడతను మణిశర్మ వద్ద కీబోర్డు ప్లేయర్‌గా పనిచేస్తున్నాడు. 'రెడీ' అప్పుడు నా ద్వారా శ్రీనుకి ఓ ఆల్బం వినిపించాడు. అతని రిదం తీరు, ఇన్‌స్ట్రుమెంటైజేషన్ చూసి శ్రీను చిన్న షాక్‌కు గురయ్యారు. డిఫినెట్‌గా ఎంకరేజ్ చేస్తాననీ, ట్యూన్స్ మంచిగా పట్టుకోమనీ చెప్పారు. ప్రస్తుతం తను దేవిశ్రీ ప్రసాద్‌తో చేస్తున్నాను కాబట్టి వీలు చేసుకుని అవకాశమిస్తానన్నారు. ఈలోగా తమన్ 'కిక్', 'బృందావనం' వంటి హిట్లతో లైంలైట్‌లోకి వచ్చాడు. 'నమో వెంకటేశ' పాటలు క్లిక్ కాకపోవడంతో దేవికి తను సరిగా చెప్పలేకపోతున్నానా లేక దేవి నాకు చెప్పలేకపోతున్నాడా అని ఫీలయ్యారు శ్రీను. దాంతో ఈసారి మారుద్దాం అనుకుని తమన్‌తో చేయించారు. మంచి రెస్పాన్స్ వచ్చింది. వి ఆర్ వెరీ హ్యాపీ ఫర్ దట్.
గుహన్ పనితనం గురించి చెప్పండి.
ఈ సినిమాకి గుహన్ చాలా ప్లస్సవుతారు. అది కచ్చితంగా చెప్పగలను. ఇదివరకు మా సినిమాల్లో ఎన్నడూ లేనిరీతిలో సినిమాటోగ్రఫీ ఇందులో గొప్పగా ఉండబోతోంది. లొకేషన్లు ఎక్కువ ఉండటం, సెట్లు వైబ్రంట్‌గా ఉండటం వల్ల సినిమాటోగ్రఫీకి పాత్ర ఎక్కువ. విజువల్స్ అదరగొట్టారు. 'ఇటు రాయే ఇటు రాయే' పాటలో మహేశ్ స్టెప్స్ విరగదేశాడు. అలాగే 'చుల్‌బులీ', టైటిల్ సాంగ్ కూడా చాలా బాగుంటాయి.
ఈ సినిమాకి ఎంత బడ్జెట్ అనుకున్నారు?
బడ్జెట్ మాకు సంబంధం లేని మేటర్. మహేశ్ సినిమాల్లో కాస్ట్లీ సినిమా. సాంగ్స్, ఫైట్లకి ఎక్కువ టైం తీసుకున్నాం. ఒక్కో సాంగ్ 8 నుంచి 10 రోజుల పాటు చేశాం. శ్రీను వైట్ల సినిమాల్లో ఫైట్స్ అంటే మాగ్జిమం నాలుగు రోజులు ఉంటుంది. పాట అంటే మూడు లేదా నాలుగు రోజులు. ఈ సినిమాలో అలా లెక్కలేమీ వేసుకోలేదు. బాగా రావాలనే ఉద్దేశంతో నెంబర్ ఆఫ్ షాట్స్ చేశాం. 
అసెస్టెంట్ డైరెక్టర్‌గా కూడా చేశారు కదా. డైరెక్షన్ చేయబోతున్నారా?
ఇప్పుడు చాలామంది రైటర్లు డైరెక్టర్‌లుగా రాణిస్తారు. త్రివిక్రం, హరీశ్ శంకర్, వీరు పోట్ల సక్సెస్ అయ్యారు. రైటర్స్ డైరెక్టర్లు కావడానికి మంచి వాతావరణమే ఉంది. నేను కూడా వచ్చే యేడాది డైరెక్టర్ కాబోతున్నా. మళ్ల విజయప్రసాద్ గారికి సినిమా చేయబోతున్నా. 2012 మేలో అది మొదలు కావచ్చు. పెద్ద హీరోతోటే ఉంటుంది. ఆయన డేట్ల కోసం ఎదురు చూస్తున్నాం. ఈలోపల ఎన్టీఆర్, శ్రీను వైట్ల సినిమాకి పనిచేస్తా. 

బిగ్ స్టోరీ: కేవలం టైటిల్‌తో విజయం సాధ్యమా?

ప్రేక్షకుల్ని ఆకట్టుకోడానికి టైటిల్ బాగా దోహదం చేస్తుందని సినిమా రంగంలోని చాలామంది నమ్ముతారు. టైటిల్ అనేది సినిమా విడుదలయ్యాక ప్రేక్షకుల్ని థియేటర్ వరకు రప్పిస్తుంది కానీ, విజయానికి మొత్తంగా అదే దోహదం చేయదనీ, సినిమా కథలో పస లేకపోతే టైటిల్ ఎంత బాగున్నా, వింతగా వున్నా ఆ సినిమా నడవదనీ విశ్లేషకులు అనే దాంట్లో తప్పు కొంచెం కూడా లేదు. అయినప్పటికీ మన దర్శకులు తమ సినిమా టైటిళ్లను విభిన్నంగా పెట్టడానికే ప్రయత్నిస్తుంటారు.
ఎవరన్నా కాస్త డబ్బులు ఖర్చు పెడుతూ సరదా చేసుకునే వాణ్ణి చూసి మనం 'వాడికేంటిరా జల్సా పురుషుడు' అంటుంటాం. అందులోని 'జల్సా'ని టైటిల్‌గా పెట్టి సక్సెస్ సాధించారు పవన్ కల్యాణ్, త్రివిక్రమ్ శ్రీనివాస్‌లు. రెండక్షరాలతో చాలా సినిమాలే వచ్చాయి కానీ అన్నీ విజయం సాధించలేక పోయాయి. ఈ మధ్య కాలంలో చూసుకుంటే యోగి, టాస్, ఆట, లక్ష్యం, మున్నా, మంత్ర, డాన్, కృష్ణ, వాన, గమ్యం, జల్సా, కంత్రి, రెడీ, శౌర్యం, కింగ్, మస్కా, ద్రోణ, మేస్త్రి, బిల్లా, కిక్, డైరీ, రైడ్, బోణి, ఓయ్!, జోష్, శంఖం, బాణం, కథ, కేడి, సింహా, వేదం, శక్తి వచ్చాయి. లక్ష్యం, మంత్ర, కృష్ణ, గమ్యం, జల్సా, రెడీ, శౌర్యం, కింగ్, కిక్, రైడ్, సింహా, వేదం విజయం సాధించగా; ఆట, డాన్, మస్కా, మేస్త్రి, బిల్లా, వేదం బాక్సాఫీసు వద్ద యావరేజ్ ముద్రను వేసుకున్నాయి. యోగి, టాస్, మున్నా, వాన, కంత్రి, ద్రోణ, డైరీ, బోణి, ఓయ్!, జోష్, శంఖం, బాణం, కథ, కేడి, శక్తి సినిమాలు విఫలమయ్యాయి. ఆగస్ట్ 11న 'దడ' రిలీజ్ కాబోతోంది. తేజ తొలి చిత్రం 'చిత్రం' హిట్టవడంతో రెండక్షరాల టైటిల్‌కి గిరాకీ ఏర్పడింది. 'ఖుషి', 'ఆది' చిత్రాలు ఆ బాటలో మంచి హిట్టవగా తేజ స్వయంగా రూపొందించిన మరో రెండక్షరాల సినిమా 'జయం', చిరంజీవి కథానాయకుడిగా వచ్చిన 'ఇంద్ర' బ్లాక్ బస్టర్ సినిమాలుగా నిలిచాయి.
టాప్ డైరెక్టర్లలో ఒకడైన పూరీ జగన్నాథ్ టైటిల్‌ని విభిన్నంగా పెట్టడానికి ప్రాధాన్యం ఇస్తున్నాడు. ఇట్లు.. శ్రావణీ సుబ్రహ్మణ్యం, ఇడియట్, అమ్మ నాన్న ఒక తమిళ అమ్మాయి, శివమణి 9848022338 అంటూ అతడు వెరైటీగా పెట్టిన టైటిళ్లతో వచ్చిన సినిమాలు మంచి విజయం సాధించాయి. తిట్టుపదాలు ఇడియట్, పోకిరి, దేశముదురు టైటిళ్లతో బంపర్‌హిట్ సినిమాలు తీయడం అతడికే చెల్లింది. ఆ కోవలోనే ఎన్టీఆర్ హీరోగా పూరీ శిష్యుడు మెహర్ రమేష్ రూపొందించిన 'కంత్రి', నాగార్జున నటించిన 'కేడి' బాక్సాఫీసుని గెలవలేకపోయాయి. ప్రభాస్ హీరోగా తను రూపొందించిన సినిమాకు 'బుజ్జిగాడు.. మేడిన్ చెన్నై' అనే వెరైటీ టైటిల్ పెట్టాడు పూరీ. కానీ అది వర్కవుట్ కాలేదు.
తెలుగు సినిమాలకీ, యముడికీ మంచి అవినాభావ సంబంధం వుంది. 'యమజాతకుడు' వంటి ఒకట్రెండు సినిమాలు మినహాయిస్తే 'యమ' శబ్దంతో వచ్చిన సినిమాల్లో ఎక్కువగా విజయం సాధించినవే. 'యమగోల', 'యముడికి మొగుడు', 'అత్తకు యముడు అమ్మాయికి మొగుడు', 'యమలీల' వంటివి అందుకు ఉదాహరణలు. ఈ మధ్య వచ్చిన ఎన్టీఆర్ సినిమా 'యమదొంగ', శ్రీకాంత్, వేణుల సినిమా 'యమగోల.. మళ్లీ మొదలైంది' సినిమాలు రెండూ విజయాన్ని చవిచూశాయి. ఆఖరికి రాజేంద్రప్రసాద్, శివాజీ, జయప్రకాశ్‌రెడ్డి కాంబినేషన్‌లో వచ్చిన 'బ్రహ్మలోకం టు యమలోకం వయా భూలోకం' సైతం బాగానే ఆడింది. అంటే యముడు బాక్సాఫీసు మంత్రమన్నమాట.
ఆహ్లాదకరమైన పేర్లు పెడితే ఫ్యామిలీ ప్రేక్షకులు థియేటర్లకు పొలోమని వస్తారనేది చాలామంది భావన. కానీ ఆ తరహా టైటిల్స్‌తో వచ్చిన సినిమాల్లో అత్యధికం ప్రేక్షకుల తిరస్కారానికి గురవడం విచారకరం. టైటిల్‌లో వున్న ఆహ్లాదం సినిమాలో లేకపోవడమే దానికి కారణం. ఆర్పీ పట్నాయక్ దర్శకత్వం వహించిన తొలి చిత్రం 'అందమైన మనసులో', పదిహేనేళ్ల తర్వాత గిరిబాబు రూపొందించిన 'నే సుఖమే నే కోరుతున్నా', అపురూప చిత్రాల దర్శకుడు బాపు గీచిన 'సుందరకాండ', తరుణ్ సెకండ్ ఇన్నింగ్స్ మొదలుపెట్టిన 'నవ వసంతం', స్వాతి హీరోయిన్‌గా నటించిన 'కలవరమాయె మదిలో', నితిన్, హన్సిక జంటగా నటించిన 'సీతారాముల కల్యాణం.. లంకలో', శివాజీ సినిమా 'తాజ్‌మహల్', మనోజ్ హీరోగా కె. రాఘవేంద్రరావు రూపొందించిన 'ఝుమ్మంది నాదం', వంశీ సినిమా 'సరదాగా కాసేపు', రవిబాబు డైరెక్ట్ చేసిన 'మనసారా', వరుణ్ సందేశ్ సినిమా 'కుదిరితే కప్పు కాఫీ' వంటివి తుస్సుమన్నాయి.
కొన్ని సినిమాలు టైటిళ్లకు విరుద్ధమైన ఫలితాల్ని పొంది నిర్మాతలు, డిస్ట్రిబ్యూటర్లకు కంటి మీద కునుకు లేకుండా చేయడం గమనించదగ్గ అంశం. 'వాన' ఎమ్మెస్ రాజుకు బాక్సాఫీసు వానను కురిపించలేక పోయింది. రాజా నటించిన 'వేడుక' నిర్మాత పాలిట పీడకల అయ్యింది. శ్రీహరి 'శ్రీ మహాలక్ష్మి' సిరులు కురిపించలేక పోయింది. 'లక్షీపుత్రుడు', 'లక్ష్మీ కల్యాణం'లదీ అదే దారి. ఎస్వీ కృష్ణారెడ్డి 'బహుమతి' నిర్మాత జేబుల్ని ఖాళీ చేయించింది. నాగబాబు హీరోగా నటించిన 'ఆపద మొక్కులవాడు' నిర్మాతల్ని పుట్టిముంచాడు. నాగచైతన్య హీరోగా పరిచయమైన 'జోష్', నారా రోహిత్ హీరోగా పరిచయమైన 'బాణం' బాక్సాఫీసు వద్ద వ్యతిరేక ఫలితాన్నిచ్చాయి. కల్యాణ్‌రాం 'జయీభవ'కి ప్రేక్షకులు అపజయాన్ని కలిగించారు. పవన్ కల్యాణ్ సినిమా 'పులి' బాక్సాఫీసు వద్ద పిల్లి అయ్యింది. మహేశ్ 'ఖలేజా' చూపించలేక పోయాడు.ఎన్టీఆర్ 'శక్తి' నిర్మాత అశ్వనీదత్‌కి శక్తికోల్పోయేలా చేసింది. పవన్ కల్యాణ్ 'తీన్ మార్' అనలేకపోయాడు. 'హ్యాపీ డేస్' మాత్రం శేఖర్ కమ్ములకూ, ఆ సినిమాని డిస్ట్రిబ్యూట్ చేసిన దిల్ రాజుకూ నిజంగానే హ్యాపీ డేస్‌ను తెచ్చింది.
హిట్టయిన పాత సినిమాల టైటిల్స్‌తో వచ్చిన సినిమాలేవీ ఇటీవలి కాలంలో ప్రేక్షకుల్ని మెప్పించలేక పోయాయి. ఉదయ్‌కిరణ్, శ్రీహరిల 'వియ్యాలవారి కయ్యాలు', వేణుమాధవ్ నటించగా దాసరి కథను అందించిన 'ప్రేమాభిషేకం', తరుణ్, ఇలియానాల 'భలే దొంగలు', తరుణ్ మరో సినిమా 'నవ వసంతం', శ్రీకాంత్, ప్రభుదేవా, సునీల్ ప్రధాన పాత్రలు పోషించిన 'మైఖేల్ మదన కామరాజు', ముమైత్‌ఖాన్ 'పున్నమి నాగు', కమల్‌హాసన్, వెంకటేశ్ సినిమా 'ఈనాడు', శివాజీ 'తాజ్‌మహల్', ఎన్టీఆర్ 'శక్తి' వంటివి అందుకు ఉదాహరణలు.
అంటే చిత్ర విజయానికి టైటిల్ అనేది ఒక ప్లస్ పాయింట్‌గా మాత్రమే వుంటుందనీ, కేవలం టైటిల్ వల్లే సినిమా హిట్టు కాదనీ స్పష్టమవుతుంది. మంచి కథతో సినిమాని రూపొందించి, దానికి జస్టిఫై అయ్యే టైటిల్‌ని పెడితే ఆ సినిమా తప్పనిసరిగా ఆడుతందనడంలో సందేహ లేదు. అందుచేత కథకులూ, దర్శకులూ టైటిల్ కంటే ముందు కథకీ, స్క్రీన్‌ప్లేకీ ప్రాధాన్యతనిచ్చి వాటిమీద శ్రద్ధ చూపి, ఆ తర్వాత టైటిల్ గురించి ఆలోచించడం బెటరు.

న్యూస్: ఆ ఇద్దరి కసి సెన్సేషన్ క్రియేట్ చేస్తుందా?

తెలుగులో, ఆ మాటకొస్తే దేశంలోనే హీరోలందరిలో నెంబర్‌వన్ డాన్సర్ అతను. సినిమా సినిమాకీ స్టైల్ మార్చే 'స్టైలిష్ స్టార్' అతను. అయినా అతనికి ఇటీవలి కాలంలో ఆశించిన హిట్లు దక్కడం లేదు. అతను అల్లు అర్జున్. రికార్డులు సృష్టిస్తుందనే నమ్మకంతో 40 కోట్ల రూపాయలు పైగా ఖర్చుపెట్టి అతని తండ్రి అల్లు అరవింద్ నిర్మించిన 'బద్రినాథ్' సినిమా ఓపెనింగ్స్‌ని బాగానే రాబట్టినా చివరికి ఫ్లాప్‌గా లెక్కతేలింది. తన పరిచయ చిత్రం 'గంగోత్రి'కి కథనందించిన చిన్నికృష్ణ, 'బన్నీ' వంటి హిట్‌ని డైరెక్ట్ చేసిన వి.వి. వినాయక్ కాంబినేషన్ కూడా అర్జున్‌కి కలిసిరాలేదు. ఆఖరుకి మిల్కీ బ్యూటీ తమన్నా అందచందాల ప్రదర్శనా వర్కవుట్ కాలేదు. తొలిసారిగా టాలీవుడ్‌లో బద్రినాథ్ దేవాలయాన్ని నేపథ్యంగా తీసుకున్నా ప్రయోజనం కలిగించలేదు. సరైన కథా కథనాలు లోపిస్తే ఎన్ని హంగులున్నా నిష్ప్రయోజనమేనని 'బద్రినాథ్' ఉదంతం మరోసారి తేటతెల్లం చేసింది. ఇక బన్నీ ఆశలన్నీ త్రివిక్రం మీదే ఉన్నాయి. ఇప్పుడు బన్నీ నటించబోతోంది అతని దర్శకత్వంలోనే. యూనివర్సల్ మీడియా బేనర్‌పై డీవీవీ దానయ్య ఈ సినిమా తీయబోతున్నారు. ఇప్పటికే ఈ సినిమా కోసం 'హనీ' అనే టైటిల్‌ని ఆయన రిజిస్టర్ చేశారు. హీరోయిన్ ఎంపికే సస్పెన్స్‌గా మారింది. ఒకసారి కాజల్ పేరు, ఇంకోసారి ఇలియానా పేరు వినిపించగా, లేటెస్ట్‌గా సమంతా పేరు తెరపైకి వచ్చింది. మొత్తానికి ఇలియానా, సమంతా.. వీరిలో ఒకరు ఖాయమయ్యే అవకాశముంది. సెప్టెంబరులో ఈ సినిమా సెట్స్‌మీదకు వెళ్లబోతోంది. 'మహేశ్ ఖలేజా' వంటి ఫ్లాప్‌తో త్రివిక్రం, 'బద్రినాథ్' వంటి ఫ్లాప్‌తో బన్నీ ఇప్పుడు మంచి కసి మీదున్నారు. ఆ కసి సెన్సేషనల్ మూవీని క్రియేట్ చేస్తుందా?

న్యూస్: హిట్టు కోసం తొమ్మిదేళ్లుగా నిరీక్షణ!

త్రివిక్రం దర్శకుడిగా పరిచయమైన 'నువ్వే నువ్వే'  (2002) తర్వాత హీరో తరుణ్‌కి ఇంతవరకు చెప్పుకోదగ్గ మరో హిట్ దక్కకపోవడం ట్రాజెడీ. తప్పకుండా హిట్టవుతాయనకున్న 'నవ వసంతం', 'భలే దొంగలు', 'శశిరేఖా పరిణయం' సినిమాలు కూడా అతనికి హేండిచ్చాయి. వీటిలో మొదటి దాన్ని ఆర్.బి. చౌదరి నిర్మిస్తే, రెండోది బాలీవుడ్ సూపర్ హిట్ 'బంటీ ఔర్ బబ్లీ'కి రీమేక్. ఇక మూడోదాన్ని డైరెక్ట్ చేసింది కృష్ణవంశీ. 'శశిరేఖా పరిణయం' వచ్చి రెండేళ్లయినా ఇంతవరకు తరుణ్ సినిమా ఏదీ రిలీజ్ కాలేదు. విమలా రామన్ జతగా అతను నటించిన 'చుక్కలాంటి అమ్మాయి చక్కనైన అబ్బాయి' చిత్రం 2010లోనే విడుదల కావాల్సి ఉండగా ఇప్పటికీ జనం మధ్యకు రాలేకపోయింది. 2011లోనూ రెండుసార్లు విడుదల తేదీ ప్రకటించినా ఆ పని చేయలేకపోయారు నిర్మాతలు. ఈ సినిమాకి ఇద్దరు నిర్మాతలు, వారిలో ఒకరు సుప్రీం మ్యూజిక్ అధినేత రాజు హర్వాణీ కాగా, మరొకరు సినీ జర్నలిస్టు అయిన గోగినేని శ్రీనివాస్. ఆరంభంలో ఈ సినిమా షూటింగ్ సవ్యంగా నడవలేదు. మొదట డైరెక్టర్‌గా పెట్టుకున్న వి.ఎన్. ఆదిత్య నిర్మాతలతో పొసగక ఈ ప్రాజెక్టు నుంచి తప్పుకున్నాడు. దాంతో తమిళుడైన కన్మణితో ఈ సినిమాని పూర్తి చేశారు నిర్మాతలు. చివరిగా మే 27న ఈ సినిమాని విడుదల చేస్తున్నట్లు వారు ప్రకటించారు. కానీ ఆ రోజున ఈ సినిమా రిలీజ్ కాలేదు. తిరిగి ఇప్పటివరకు ఈ సినిమా పరిస్థితి ఏంటో తెలీదు. ఇందులో తరుణ్, విమల హాట్ హాట్ బాత్ రూం సీన్‌లో నటించినట్లు నిర్మాతలు విడుదల చేసిన స్టిల్స్ వల్ల తెలుస్తోంది. తెరమీద ఆ సీన్లని తిలకించే అవకాశం ప్రేక్షకులకి ఎప్పుడొస్తుందో మరి. ఈ సినిమా సంగతి అలా ఉంచితే ప్రస్తుతం రెండు సినిమాల్లో నటిస్తున్నాడు తరుణ్. వాటిలో ఒకటి శ్రీకాంత్ కాంబినేషన్‌తో చేస్తున్న 'అనుచరుడు' కాగా, మరోటి శ్రీహరి కాంబినేషన్‌తో చేస్తున్న 'యుద్ధం'. ఈ సినిమాలైనా సకాలంలో విడుదలై, తరుణ్‌కి మంచి కెరీర్‌ని ఇస్తాయో, లేదో చూడాలి.

న్యూస్: మంచి కమర్షియల్ హిట్ కావాలి!

'పరుగు' తర్వాత అల్లు అర్జున్‌కి ఇంతవరకు సరైన్ హిట్ లభించలేదనే చెప్పాలి. తెలంగాణ గొడవలతో 'ఆర్య 2' నైజాంలో నష్టపోగా, 'వరుడు' డిజాస్టర్‌గా నిలిచింది. క్రిష్ డైరెక్ట్ చేసిన 'వేదం' నటుడిగా అతడికి మంచి పేరైతే తెచ్చింది కానీ కమర్షియల్‌గా వర్కవుట్ కాలేదు. ఇక 40 కోట్ల రూపాయల భారీ వ్యయంతో అల్లు అరవింద్ నిర్మించగా, వీవీ వినాయక్ రూపొందించిన 'బద్రీనాథ్' విపరీతమైన అంచనాలతో రిలీజై, బ్రహ్మాండమైన ఓపెనింగ్స్‌ని రాబట్టింది. కానీ నేల విడిచి సాము చేసిన కథ, నేటివిటీని మిస్సయిన కథాంశం, 'ఓవర్' అయిన సన్నివేశాలు ఈ సినిమాకి మైనస్సులుగా మారి, క్రమేణా ప్రేక్షకుల సంఖ్యని పలుచన చేశాయి. పబ్లిసిటీతో కొంతవరకే సినిమాని నిలబెట్టగలమే కానీ, అంతిమంగా సినిమా బాగుంటేనే లాంగ్ రన్ ఉంటుందని 'బద్రీనాథ్' ఉదంతం తెలియజేసింది. అర్జున్ చేసిన డాన్సులు, ఫైట్లకి అన్ని వర్గాల నుంచి గొప్ప రెస్పాన్స్ వచ్చింది కానీ సినిమాని వారు మెచ్చలేకపోయారు. ఈ నేపథ్యంలో ఓ మంచి సినిమా, అదీ కమర్షియల్‌గా పెద్ద హిట్టయ్యే సినిమా అర్జున్ ఖాతాలో జమ కావాలి. ఈ నెల్లోనే మొదలు కాబోతున్న కొత్త సినిమాపై అతడు ఆశలు పెట్టుకున్నాడు. ఈ సినిమాకి డైరెక్టర్ త్రివిక్రం. దాంతో సహజంగానే దీనిపై అంచనాలు మొదలయ్యాయి. ఇలియానా లేదా కాజల్ అగర్వాల్ నటించనున్న ఈ సినిమా అయినా అర్జున్ దాహాన్ని తీరుస్తుందా?

హిట్.. హిట్.. హుర్రే...!: నువ్వు నాకు నచ్చావ్

తారాగణం: వెంకటేశ్, ఆర్తీ అగర్వాల్, ప్రకాశ్‌రాజ్, చంద్రమోహన్, సుహాసిని, సుధ, ఎమ్మెస్ నారాయణ, హేమ, సునీల్, తనికెళ్ల భరణి, సిజ్జు, సుదీప, గణేశ్, ఆషా సైనీ, పృథ్వీ, బ్రహ్మానందం, బాబూమోహన్, మల్లికార్జునరావు, చిట్టిబాబు, కల్పనారాయ్
కథ, మాటలు: త్రివిక్రం
పాటలు: సీతారామశాస్త్రి, భువనచంద్ర
సంగీతం: కోటి
గానం: ఎస్పీ బాలు, కుమార్ సాను, చిత్ర, హరిణి, శ్రీరాం ప్రభు, టిప్పు
ఛాయాగ్రహణం: కె. రవీంద్రబాబు
కూర్పు: ఎ. శ్రీకరప్రసాద్
కళ: పేకేటి రంగా
నృత్యాలు: సుచిత్రా చంద్రబోస్, సరోజ్‌ఖాన్, రాజశేఖర్
సమర్పణ: సురేశ్ ప్రొడక్షన్స్
నిర్మాత: స్రవంతి రవికిశోర్
స్క్రీన్‌ప్లే, దర్శకత్వం: విజయభాస్కర్
బేనర్: శ్రీ స్రవంతి మూవీస్
విడుదల తేది: 6 సెప్టెంబర్ 2001

పదేళ్ల క్రితం అమెరికాలో ఉద్యోగమన్నా, అమెరికా అల్లుడన్నా మహా క్రేజ్. ఈ పరిణామం మన సమాజంలో తలెత్తడానికి కారణమైంది సాఫ్ట్‌వేర్ బూం. దాన్ని దృష్టిలో ఉంచుకుని 'అమెరికా' వెంపర్లాట కూడదనీ, ప్రేమానుబంధాలే ముఖ్యమనీ చెబుతూ వచ్చిన ఓ సినిమా తెలుగు ప్రేక్షకుల్ని అమితంగా ఆకట్టుకుని, అంతకుమించిన ఆహ్లాదాన్ని పంచి, బాక్సాఫీసు వద్ద విజయ బావుటా ఎగరేసింది. ఆ సినిమా 'నువ్వు నాకు నచ్చావ్'. ఇమేజ్‌ని పట్టించుకోకుండా ప్రతి చిత్రంలోనూ కొత్తదనం కోసం తపించే కథానాయకుడు వెంకటేశ్ ఒక్క ఫైటూలేని ఈ సినిమా చేసి, అందర్నీ ఆశ్చర్యపరచారు. విడుదలకు ముందు ఈ సినిమాకి అంచనాలెన్నో. కారణం కాంబినేషన్! దీనికి ముందు ఏడాది క్రితం కొత్త తారలు నటించగా వచ్చిన 'నువ్వే కావాలి' అనే సినిమా ఓ ప్రభంజనాన్నే సృష్టించిది. దానికి దర్శకుడు కె. విజయభాస్కర్, రచయిత త్రివిక్రం. ఆ ఇద్దరితో కలిసి వెంకటేశ్ చేసిన సినిమా కావడమే 'నువ్వు నాకు నచ్చావ్'కి క్రేజ్‌ని తీసుకొచ్చింది. పైగా 'నువ్వే కావాలి' ఫేం స్రవంతి రవికిశోర్ దీనికీ నిర్మాత. ఇది 3 గంటల 9 నిమిషాల నిడివి సినిమా. అందువల్ల ఓ అరగంట నిడివినైనా తగ్గించి, విడుదల చేయమని చాలామంది శ్రేయోభిలాషులు చెప్పారు. కానీ విజయభాస్కర్ తెరమీదకు తెచ్చిన సినిమా మీద సమర్పకుడు సురేశ్‌బాబు, నిర్మాత రవికిశోర్ పూర్తి నమ్మకాన్ని ఉంచారు. నిడివి తగ్గించకుండా రిలీజ్ చేశారు. విజయం సాధించారు. నిర్మాత నుంచి ఎగ్జిబిటర్ దాకా అందరికీ మంచి లాభాలు తీసుకొచ్చి 2001 సూపర్‌హిట్ సినిమాల్లో ఒకటిగా నిలిచింది 'నువ్వు నాకు నచ్చావ్'. సుమారు 7 కోట్ల రూపాయలతో నిర్మించిన ఈ సినిమా 16 కోట్ల రూపాయల్ని వసూలు చేసింది.  
అనంతర కాలంలో నెంబర్‌వన్ స్థాయికి ఎదిగిన ఆర్తీ అగర్వాల్ పరిచయమయ్యింది ఈ చిత్రంతోటే. వెంకటేశ్ సరసన రూపలావణ్యాలతోటే కాక, అభినయంతోనూ ఆర్తీ తెలుగు ప్రేక్షకుల హృదయాలకు గాలం వేసింది. "హీరోయిన్ నందిని పాత్రకి కొత్తమ్మాయిని పరిచయం చేయాలనుకున్నాం. సినిమాలో నందిని మాత్రమే కనిపించాలి కానీ, హీరోయిన్ కనిపించకూడదు. చాలామంది అమ్మాయిల్ని చూశాం. అప్పుడే బాలీవుడ్ సినిమా 'పాగల్‌పన్'లో హీరోయిన్‌గా కనిపించిన కొత్తమ్మాయి మా దృష్టికి వచ్చింది. న్యూజెర్సీలో తల్లిదండ్రులతో పాటు ఉంటున్న ఆమె ఆ సినిమా చేసి, మళ్లీ అక్కడకి వెళ్లిపోయిందని తెలిసింది. ఆమెని పిలిపించాం. ఇక నందిని ఆమే అని డిసైడ్ అయిపోయాం. అలా ఆర్తీ అగర్వాల్ తెలుగు సినిమాల్లోకి అడుగుపెట్టింది" అని చెప్పారు నిర్మాత రవికిశోర్.
సినిమాలో కీలకమైన నందిని తండ్రి మూర్తి పాత విషయంలో చెప్పుకోదగ్గ సంగతొకటుంది. ఆ పాత్రని ప్రకాశ్‌రాజ్‌తోటే చేయించాలని నిర్మాత, దర్శకుడు సంకల్పించారు. సరిగ్గా అదే టైంలో ప్రకాశ్‌రాజ్ మీద 'మా' (మూవీ ఆర్టిస్ట్స్ అసోసియేషన్) నిషేధం నడుస్తోంది. దాంతో అతని బదులు మరొకర్ని తీసుకోక తప్పని స్ఠితి. "మేం మాత్రం ఆయన కాకుండా మరొకర్ని మూర్తి పాత్రలో ఊహించలేకపోయాం. అందుకని ఆయన పాత్ర వచ్చే సీన్లు మినహా మిగతా సినిమా అంతా తీసేశాం. నిషేధం ఎత్తేశాక 17 రోజుల కాల్షీట్‌తో తన పోర్షన్ పూర్తిచేశాడు ప్రకాశ్‌రాజ్" అని అప్పటి విశేషాన్ని జ్ఞాపకం చేసుకున్నారు రవికిశోర్.
కేవలం ప్రేక్షకుల రివార్డులతోటే సరిపెట్టలేదు ఈ సినిమా. రాష్ట్ర ప్రభుత్వం నుంచి ఐదు నందులు ఈ సినిమా ఖాతాలో చేరాయి. కుటుంబ సమేతంగా చూడదగ్గ ఉత్తమ వినోదాత్మక చిత్రంతో పాటు సుచిత్రకు ఉత్తక కొరియోగ్రాఫర్‌గా, సుహాసినికి ఉత్తమ సపోర్టింగ్ ఆర్టిస్ట్‌గా, త్రివిక్రంకు ఉత్తమ సంభాషణల రచయితగా, సవితారెడ్డికి ఉత్తమ డబ్బింగ్ ఆర్టిస్టుగా నందులు దక్కాయి. సమకాలీన చిత్రాల్లో టీవీలో ఎక్కువసార్లు ప్రసారమయ్యిందీ, అత్యధిక శాతం వీక్షించిందీ ఈ సినిమానే అనడంలో అతిశయోక్తి లేదు. 'స్వీట్ అండ్ క్యూట్ ఫిల్మ్'గా పేర్కొనదగ్గ ఈ సినిమా ఎన్నిసార్లు చూసినా మనసుకి ఆహ్లాదమే ఆహ్లాదం.

కథా సంగ్రహం:
నందిని అలియాస్ నందు (ఆర్తీ అగర్వాల్)కి పెళ్ళి నిశ్చితార్థం ఏర్పాటు చేస్తాడు తండ్రి మూర్తి (ప్రకాశ్‌రాజ్). ఆ సమయంలోనే అక్కడకి ఆయన సన్నిహిత మిత్రుడైన శేఖరం (చంద్రమోహన్) కొడుకు వెంకటేశ్వర్లు అలియాస్ వెంకీ (వెంకటేశ్) ఉద్యోగార్థం వస్తాడు. ప్రసాద్ (సిజ్జు)తో నందు నిశ్చితార్థం జరుగుతుంది. రెండు నెలల తర్వాత పెళ్లని ముహూర్తం ఖాయం చేసుకుంటారు. మూర్తి వాళ్ల ఔట్‌హౌస్‌లో దిగుతాడు వెంకీ. అతనూ, నందూ ఒకర్నొకరు ఆటపట్టించుకుంటూ ఉంటారు. వెంకీకి ఉద్యోగం వస్తుంది. రోజులు గడుస్తున్న కొద్దీ నందు మనసులో వెంకీ చోటు చేసుకుంటాడు. ఓసారి ఇంట్లోని ఆడవాళ్లంతా గుడికి వెళ్తుంటే తోడుగా వెంకీ కూడా వెళతాడు. అక్కడ 'నువ్వంటే నాకిష్టం. నువ్వు నాకు నచ్చావ్' అని చెబుతుంది నందు. బిత్తరపోతాడు వెంకీ. ఇక్కడికి వచ్చేప్పుడు తండ్రి "వాడి స్నేహం పోతే భరించలేనురా. నువ్వక్కడకు వెళ్లి బాగుపడకపోయినా ఫర్వాలేదు. కానీ నీ వల్ల మా స్నేహం పాడవకుండా ఉంటే అంతే చాలు" అంటూ చెప్పిన మాటలు జ్ఞాపకమొస్తాయి. నందుకి దూరంగా ఉండటమే మంచిదనుకుని బ్యాగ్ సర్దుకుని వెళతాడు. రైల్వే స్టేషనులో మూర్తి ప్రత్యక్షమై అతణ్ని ఇంటికి తీసుకొస్తాడు.
ఊటీలో జరుగుతున్న నందు స్నేహితురాలు ఆషా (ఆషా సైనీ) పెళ్లికి వెంకీని తీసుకువెళ్తారు నందు, ఆమె బాబాయి కూతురు పింకీ. ఆషా పెళ్లవుతుంది. అక్కడ వాటర్ వరల్డ్ బాగుంటుందనీ, వెళ్లమనీ ఆషా చెబితే ముగ్గురూ వెళతారు. మధ్యలో కారు చెడిపోయిన బ్రహ్మానందం వాళ్ల కారెక్కుతాడు. వాటర్ వరల్డ్ దగ్గర చేయీ చేయీ కలిపి పట్టుకున్న వెంకీ నందూల ఫోటో తీస్తాడు బ్రహ్మానందం. నందుకి వెంకీ మరింత సన్నిహితమవుతాడు. నందు పెళ్లి దగ్గర పడుతుంది. మగపెళ్లివారు వచ్చేస్తారు. వెంకీ గదిలోకి వస్తుంది నందు. అతను ఆశ్చర్యపోతే "వెంకీ.. నేననే నీకిష్టమా, కాదా? నిజం చెప్పు" అనడుగుతుంది. "నీకు ప్రేమ కావాలి. మీ నాన్నకి పరువు కావాలి. మా నాన్నకి మీరు కావాలి. అంటే ఈ పెళ్లి జరగాలి. నువ్వెళ్లిపోవాలి. నన్ను మర్చిపోవాలి" అంటాడు వెంకీ.
మగపెళ్లివారి చేతుల్లో వెంకీ, నందూ కలిసి ఉన్న ఫోటో పడుతుంది. అది ఊటీలో బ్రహ్మానందం తీసిన ఫోటో. అది చూసి ఈ పెళ్లి చేసుకోనంటాడు ప్రసాద్. అయితే ఇది మంచి సంబంధమనీ, దీన్నడ్డం పెట్టుకుని ఇంకో కోటి రూపాయలు మూర్తి నుంచి వసూలు చేసుకోవచ్చనీ చెబుతాడు తండ్రి (తనికెళ్ల భరణి). అతని బంధువులు ఆ ఫోటోని మూర్తి చేతిలో పెడతారు. వాళ్లని తిడతాడు మూర్తి. దాంతో వారు వెళ్లిపోతారు. సంగతి తెలిసి రైల్వే స్టేషన్‌కి వెళ్లి ఆ ఫోటో అబద్ధమనీ, తనకీ నందూకీ ఏ సంబంధమూ లేదనీ చెబుతాడు వెంకీ. నందూ దేవత అనీ, ఈ పెళ్లిని జరిపించనీ వాళ్ల కాళ్లు పట్టుకోబోతాడు.
"ఈ పెళ్లే కాదు. దానికసలు పెళ్లే జరగదు. జరగనివ్వను. అదొక మహా పతివ్రత" అంటా ప్రసాద్ తండ్రి అతణ్ని నెట్టేస్తాడు. పెళ్లివారి ప్రవర్తననీ, వెంకీ వాళ్లని బతిమలాడటాన్ని చూసిన మూర్తి వెంకీని ఆగమంటాడు. పెళ్లికొడుకుని తన ఇంటి వాచ్‌మన్‌గా కూడా పనికిరాడంటూ వాళ్లని పొమ్మంటాడు. "ఐ యాం ఎ ఫూల్. నా అల్లుడు అమెరికాలో ఉన్నాడో, లేదోనని చూశాను కానీ, నా కూతురి మనసులో ఉన్నాడా, లేదా అని చూడలేదు. ఇలాంటివాణ్ని పక్కనపెట్టుకుని ఎక్కడెక్కడో వెతికా. ఐయాం సారీ వెంకీ" అని అతణ్ని కావలించుకుంటాడు. వెంకీ, నందూ ఒక్కటవుతారు.

ఆ రెండు పాయింట్లతో ఈ సినిమా తీశాం
-స్రవంతి రవికిశోర్
కథ ఎక్కువగా ఒక ఇంట్లోనే జరుగుతుంది. అందువల్ల ఔట్‌డోర్‌లోనూ కొంత కథ జరిగేటట్లు చూస్తే బాగుంటుందని సురేశ్‌బాబు సూచించారు. అప్పుడు ఊటీ ఎపిసోడ్ వచ్చి చేరింది. ఆషాసైనీ పెళ్లి తతంగం, బ్రహ్మానందం ఎపిసోడ్ అలా వచ్చి చేరాయి. న్యూజిలాండ్‌లో పాటలు తీసేప్పుడు 104 డిగ్రీల జ్వరంలో ఉండికూడా స్టెప్పులేశారు వెంకటేశ్. అలాగే క్లైమాక్స్ సీన్ చేసేప్పుడు ఆర్తీకి కూడా బాగా జ్వరం. అయినా ఎంతో నిబద్ధతతో పనిచేసింది. సినిమాకి కోటి మ్యూజిక్ ఎస్సెట్. పాటలన్నీ హిట్టే. రీరికార్డింగ్‌కి 26 రోజుల టైం తీసుకున్నారు కోటి. టీవీలో ఎన్ని వందలసార్లు వచ్చినా ఇంకా ఎంజాయ్ చేస్తున్నారంటే, ఆ సినిమా ఇచ్చే ఆహ్లాదం వల్లనే.
ప్రధానంగా రెండు పాయింట్ల మీద ఈ సినిమా చేశాం. అప్పట్లో అమెరికా క్రేజ్ బాగా ఎక్కువ. దాన్ని దృష్టిలో ఉంచుకుని అమ్మాయికి అమెరికా సంబంధం తేవడం కంటే, మనసుకి నచ్చినవాణ్ని తీసుకొస్తే ఆమె సుఖపడుతుందని చెప్పడం ఒక పాయింటైతే, తల్లిదండ్రులకు దూరంగా ఉండంటం కంటే సొంతూళ్లో ఏదో ఒక పని చేసుకుంటూ వాళ్లవద్ద ఉండటమే ఆనందకరమని చెప్పడం రెండో పాయింట్.
త్రివిక్రం, విజయభాస్కర్ కాంబినేషన్ గొప్పగా వర్కవుట్ అయిన సినిమాల్లో ఇదొకటి. సన్నివేశాల చిత్రణలో విజయభాస్కర్ టైమింగ్‌ని తక్కువ చెయ్యలేం. దానికి మేకింగ్ వాల్యూస్ తోడయ్యాయి.
'ఈ నీలి గగనాన' పాటను భువనచంద్ర రాస్తే, మిగతా అన్ని పాటల్నీ సీతారామశాస్త్రి రాశారు. 'ఒక్కసారి చెప్పలేవా' పాటను ఆయన రాసిన తీరు అమోఘం. అందులో ఎంత అర్థముంది! ఏ పాటనైనా అలవోకగా రాసే ఆయన ఆ ఒక్కపాటకు ఆరు రాత్రులు కష్టపడ్డారు. ఇప్పటి రచయితల్లో కథని ఆయన జీర్ణించుకున్నట్లు ఎవరూ జీర్ణించుకోరు. ఆయన పాటలు కథతో ట్రావెల్ చేస్తాయి. ఆయనతో పనిచేయడమన్నది గ్రేట్ ఎక్స్‌పీరియెన్స్.
(వచ్చే వారం 'నువ్వు నాకు నచ్చావ్' విజయానికి దోహదం చేసిన అంశాలు) 

సినిమా: మూడు క్రేజీ సినిమాలు - ఒక వాస్తవం (చివరి భాగం)

'ఖలేజా' కనిపిస్తున్నదెక్కడ?
మూడేళ్ల విరామంతో మహేశ్ సినిమా వస్తున్నదనేసరికి ఆయన అభిమానుల్లోనే కాక, సాధారణ ప్రేక్షకుల్లోనూ ఎంత ఆసక్తి! బాక్సాఫీసు చరిత్రని 'మహేశ్ ఖలేజా' తిరగరాస్తుందనే చాలామంది ఆశించారు, నమ్మారు. తీరా థియేటర్లలో సినిమా విడుదలయ్యాక చూస్తే.. 'ఈ సినిమా కోసమా మహేశ్ మూడేళ్లు ఆగింది' అనే వ్యాఖ్యలే, విమర్శలే. కథని కాక, కేవలం కాంబినేషన్ ని నమ్ముకుని సినిమా తీస్తే ఫలితం ఎలా ఉంటుందో చెప్పిన సినిమా 'ఖలేజా'. ఈ సినిమా కంటే ముందు వేరే దర్శకులతో వేరే సినిమాలు చేస్తానని మహేశ్ నుంచి ప్రకటనలు వచ్చాయి. కానీ అవన్నీ పక్కకి వెళ్లిపోయి, త్రివిక్రమ్ సినిమా ముందుకొచ్చింది. మహేశ్, త్రివిక్రమ్ కాంబినేషనులో అదివరకు వచ్చిన 'అతడు' హిట్టవడం, అప్పుడే త్రివిక్రమ్ డైరెక్ట్ చేసిన 'జల్సా' విజయం సాధించడం దీనికి కారణం. హీరోయిన్ విషయంలోనూ ఇదే స్థితి. మొదట ఎంపిక చేసిన పార్వతీ మెల్టన్ ని కాదని 'అరుంధతి' సూపర్ హిట్టవడంతో అనుష్కని హీరోయినుగా తీసుకున్నారు. సూపర్ హీరో, సూపర్ హీరోయిన్, సూపర్ డైరెక్టర్ కాంబినేషన్ బ్రహ్మాండంగా సక్సెస్ అవుతుందని నిర్మాత ఎన్నో ఆశలు పెట్టుకున్నారు. 'పులి' కథని కానీ, 'ఖలేజా' కథని కానీ ముందుగా ఆయన వినలేదు. కాంబినేషన్స్ ని కుదుర్చుకుని, పెట్టుబడి పెట్టారంతే. ఒకప్పటి నిర్మాతలకీ, ఈ కాంబినేషన్ నిర్మాతలకీ అదే తేడా.
'ఖలేజా'లో ప్రారంభం నుంచి చివరిదాకా రీజనింగ్ కి అందని సన్నివేశాలెన్నో. హీరో ఇంట్రడక్షన్ సీనులో ఎడారిలో మనుషుల్ని మహేశ్ కత్తులతో కుత్తుకలు కోస్తుంటే, వాళ్లు అతనికి ఏం అన్యాయం చేశారో, ఎంతటి దుర్మార్గాలు చేశారో.. అనుకుంటాం. కానీ వాళ్లని అతను చంపింది 'నీళ్ల' కోసం! ఆ ఓపెనింగ్ ఫైట్ తోటే హీరో పాత్ర ఔచిత్యం దెబ్బతినిపోయింది. విషపు నీటివల్ల ఐదొందల పైచిలుకు జనాభా ఉన్న ఓ ఊరు వల్లకాడవుతుంటే, వాళ్లని 'దేవుడు'గా మహేశ్ ఎలా కాపాడాడనేది ఈ సినిమా ప్రధానాంశం. 'స్టఫ్' అంటూ లేని ఈ కథలోని 95 శాతం సన్నివేశాల్లో అంతా తానై కనిపిస్తాడు మహేశ్. అంటే ప్రధాన పాత్ర మీదే ధ్యాసంతా పెట్టిన దర్శకుడు మిగతా పాత్రల పట్ల చిన్నచూపు చూశాడు. తనవరకు విభిన్నమైన డైలాగ్ డిక్షనుతో, నటనతో మహేశ్ ఎంతగా చెలరేగిపోయినా, బిగువైన కథనం లేకపోవడమే 'ఖలేజా'కి ప్రతికూలంగా పరిణమించింది. ప్రపంచవ్యాప్తంగా తొలివారం బాక్సాఫీసు వద్ద భారీగా 21 కోట్ల రూపాయల షేరుని వసూలుచేసిన ఈ సినిమా కలెక్షన్లు రెండో వారం బాగా నెమ్మదించాయి. దాదాపు 40 కోట్ల రూపాయల (అంచనా) వ్యయమైన ఈ సినిమాకి పెట్టుబడి రావడం చాలా కష్టమనేది ట్రేడ్ వర్గాల మాట.

'బృందావనం' అందరిదయ్యేనా?
'బృందావనం' బాగుంది.. ఎక్కడికెళ్లినా ఇదే మాట. ఎన్టీఆర్ కథానాయకుడిగా; కాజల్ అగర్వాల్, సమంతా నాయికలుగా నటించిన ఈ సినిమాకి పాజిటివ్ టాక్ రావడంతో సినిమా విడుదలైన తొలిరోజు నిర్మాత రాజు, దర్శకుడు వంశీ పైడిపల్లి ముఖాలు సంతోషంతో వెలిగిపోయాయి. 'బృందావనం' సూపర్ డూపర్ హిట్టయి, బాక్సాఫీసు వద్ద రారాజుగా వెలిగిపోతున్న 'రోబో'ని నిలువరించడం ఖాయమనే ట్రేడ్ వర్గాలు భావించాయి. అయితే టాక్ కీ, కలెక్షన్లకీ కనిపిస్తున్న దూరం బయ్యర్లని ఆందోళన పరుస్తోంది. పైరసీ కారణంగానే ఈ సినిమాకి ఆశించిన రీతిలో వసూళ్లు రావడం లేదనేది ఓ వాదన. అదే నిజమైతే 'రోబో' కలెక్షన్లు ఇంకా నిలకడగా ఎందుకున్నాయనేది ప్రశ్న. ఇంతవరకు చేయని కొత్త తరహా పాత్రలో ఎన్టీఆర్ నటన అందరి ప్రశంసలూ పొందుతున్నప్పటికీ స్త్రీల హక్కులు, సమానత్వం మీద ఎంతో చైతన్యం కనిపిస్తున్న ఈ రోజుల్లోనూ 'ఒక పురుషుడికి ఇద్దరు స్త్రీలు' పాయింట్ ఎలా మెప్పు పొందుతుందనే అభిప్రాయం వ్యక్తమవుతోంది. 30 కోట్ల రూపాయలకు మించి వ్యయమైన ఈ సినిమాకి పెట్టుబడి రావాలంటే మరో రెండు వారాల పాటు కలెక్షన్లు బలంగా ఉండాలి. అయితే 'రోబో' స్థాయిలో ఈ సినిమా పట్ల ప్రేక్షకులు ఆసక్తి కనపర్చడం లేదనేది కనిపిస్తున్న వాస్తవం. మాస్ హీరో అయిన ఎన్టీఆర్ సినిమాకి 'బృందావనం' వంటి సాఫ్ట్ టైటిల్ పెట్టడం వల్లే ఓపెనింగ్స్ లో ఉధృతి కనిపించ లేదనేది ట్రేడ్ విశ్లేషకుల భావన.
డబ్బింగ్ సినిమాల వల్ల తెలుగు సినిమాలకు థియేటర్లు కరువవుతున్నాయని ఇప్పటిదాకా చిన్న సినిమాల నిర్మాతలు ఆవేదన చెందుతూ వచ్చారు. ఇప్పుడు ఆ డబ్బింగ్ సినిమాల వల్ల తమకూ ముప్పు ఏర్పడిందని పెద్ద సినిమాల నిర్మాతలు బాధపడే రోజులొచ్చాయి. కిం కర్తవ్యం? కాంబినేషన్ల మీదకంటే కథాకథనాల మీద శ్రద్ధ ఎక్కువగా పెట్టడమే.                          

సినిమా: మహేశ్ 'ఖలేజా' చూపిస్తాడా?

'రోబో' తర్వాత ప్రేక్షకుల ముందుకు వస్తున్న పెద్ద సినిమా 'మహేశ్ ఖలేజా'. ఈ సినిమా ఈ నెల 7న విడుదలవుతోంది. 'పులి'ని నిర్మించిన కనకరత్నా మూవీస్ సంస్థే ఈ సినిమానీ నిర్మించింది. 'పులి' డిజాస్టర్ కావడంతో 'ఖలేజా' మీదే నిర్మాతల ఆశలన్నీ వున్నాయి. తెలుగులో అత్యధిక పారితోషికం తీసుకుంటున్న నటుడు మహేశ్ నుంచి మూడేళ్ల విరామంతో వస్తుండటంతో ఆయన అభిమానులతో పాటు, సాధారణ ప్రేక్షకులూ ఎంతో ఆసక్తితో ఈ సినిమా కోసం ఎదురుచూస్తున్నారు. తెలుగులో 'పులి' మాదిరిగానే అత్యంత భారీ వ్యయంతో 'ఖలేజా' తయారయ్యింది.
అనధికార సమాచారం ప్రకారం ఆ బడ్జెట్ సుమారు 40 కోట్ల రూపాయలు. నేటి అగ్ర దర్శకుల్లో ఒకడిగా గుర్తింపు పొందిన త్రివిక్రమ్ ఈ సినిమాకి దర్శకుడు. 'అతడు' వంటి స్టైలిష్ మూవీ తర్వాత మహేశ్, త్రివిక్రమ్ కాంబినేషనులో వస్తున్న ఈ సినిమాలో అగ్రనటి అనుష్క నాయిక. ఒక సినిమాకి అమితమైన క్రేజ్ రావడానికి ఇంతకు మించిన కాంబినేషన్ ఇంకేం కావాలి! 2007 సెప్టెంబరులో 'అతిథి' వచ్చిన తర్వాత మహేశ్ ఏడాది పైగా సినిమా షూటింగులకు దూరంగా ఉండి, కమర్షియల్ యాడ్స్ చేస్తూ రావడం విమర్శలకు తావిచ్చింది.
'అతిథి'కి ముందు ఆయన వరుసగా సినిమాలు చేయబోతున్నారంటూ ఆరు సినిమాలకు సంబంధించిన వివరాలను ప్రకటించారు. కానీ 'అతిథి' తర్వాత వాటిలో ఒక్కటీ కార్యరూపం దాల్చలేదు. ఏడాదిన్నర తర్వాతనే త్రివిక్రమ్ సినిమా సెట్స్ మీదకు వచ్చింది. బాక్సాఫీసుని ప్రభావితం చేసే ఒక టాప్ హీరో ఇంతకాలం సినిమా షూటింగులకు దూరం కావడం విచారకరం. ఇప్పటికైనా 'మహేశ్ ఖలేజా'తో ఆయన తమ ముందుకు వస్తున్నందుకు అభిమానులు కొండంత సంబరంతో ఉన్నారు.
ఈ సినిమాలో మహేశ్ ఓ టాక్సీ డ్రైవర్ పాత్రలో తొలిసారి కనిపించనున్నాడు. విగ్రహాల దొంగతనం నేపథ్యంలో ఈ సినిమా కథ నడుస్తుందనేది తెలిసిన సమాచారం. మహేశ్ సినిమా అంటే గుర్తుకు వచ్చే సంగీత దర్శకుడు మణిశర్మ ఈ సినిమాకీ సంగీతాన్ని అందించాడు. ఆరు పాటల్లో కనీసం మూడు పాటలు బ్రహ్మాండంగా పాపులరయ్యాయి. ముఖ్యంగా 'సదాశివా', 'పిలిచే పెదవులపైన' పాటలు హైలైట్ అంటున్నారు. ఇక మహేశ్ సినిమాల్లో యాక్షన్ కి ఉండే ప్రాధాన్యత తెలిసిందే. రామ్-లక్ష్మణ్ సమకూర్చిన ఫైట్లు ఈ సినిమాకి మరో ఎస్సెట్. ఇప్పటికే సూపర్ హిట్ అంటున్న 'రోబో'నీ, 14న రాబోతున్న ఎన్టీఆర్ 'బృందావనం'నీ 'ఖలేజా' ఎలా ఎదుర్కొంటుందన్నది ఆసక్తికరం.                        

Movies: 'Khaleja' song from Sept 4

మహేశ్ హీరోగా డైరెక్టర్ త్రివిక్రమ్ రూపొందిస్తున్న 'మహేశ్ ఖలేజా' సినిమా ఓ పాట మినహా పూర్తయ్యింది. అనుష్క హీరోయినుగా నటిస్తున్న ఈ సినిమాని కనకరత్న మూవీస్ బానరుపై శింగనమల రమేశ్, సి. కల్యాణ్ సంయుక్తంగా నిర్మిస్తున్న సంగతి తెలిసిందే. ఈ సినిమాలో మిగిలివున్న పాటని సెప్టెంబర్ 4 నుంచి మహేశ్, అనుష్కపై తీయనున్నారు. దీనికోసం అన్నపూర్ణ స్టూడియోలో సెట్స్ నిర్మిస్తున్నారు. సెప్టెంబర్ 10లోగా ఆడియో సీడీలను రిలీజ్ చేసి, సినిమాని నెలాఖరుకల్లా రిలీజ్ చేయాలని నిర్మాతలు ప్లాన్ చేస్తున్నారు. మరోవైపు 'కొమరం పులి' రీరికార్డింగ్ పెండింగులో పడిపోయింది. దీన్నిబట్టి 'కొమరం పులి' కంటే ముందుగా 'మహేశ్ ఖలేజా' రావడం దాదాపు ఖాయమైనట్లే.

Movies: Can KOMARAM PULI and MAHESH KHALEJA survive?

తెలుగు చిత్రసీమలో ఇవాళ రెండు సినిమాల మీద ఆకాశమంత అంచనాలు నెలకొన్నాయి. వాటి మీద వేడి వేడి చర్చా ఎక్కువే. కారణం - ఆ రెండు సినిమాలు క్రేజీ ప్రాజెక్టులు. అంతకుమించి అత్యంత ఖరీదైన సినిమాలు. ఈసరికి ఆ సినిమాలేమిటో మీరు ఊహించే ఉంటారు. నిజమే. వాటిలో ఒకటి ఈ ఆగస్టు నెలలోనే విడుదల కాబోతున్న పవన్ కల్యాణ్ సినిమా 'కొమరం పులి' అయితే, మరొకటి సెప్టెంబర్ నెలాఖరులోనో లేదంటే అక్టోబర్ మొదట్లోనో రాబోతున్న మహేశ్ సినిమా 'ఖలేజా'.
విశేషమేమంటే ఈ రెండు సినిమాలూ ఒకే బ్యానర్ కింద నిర్మాణమవుతున్నాయి. ఆ బ్యానర్ - కనకరత్నా మూవీస్. దాని అధినేత శింగనమల రమేశ్ బాబు. ఫైనాన్షియరుగా సినిమా ప్రపంచానికి చాలా కాలం నుంచి సన్నిహితమైన శింగనమల సత్యరామమూర్తి కుమారుడే రమేశ్ బాబు. ఈయనా తండ్రి బాటలోనే ఫైనాన్షియరుగా కొనసాగుతూ కొంత కాలం క్రితం రాజశేఖర్ హీరోగా 'విలన్' సినిమాని నిర్మించారు. ఆ తర్వాత ఆయన తెలుగులో సినిమాలు తీస్తున్నది ఇప్పుడే. ఈ మధ్యలో ఆయన తమిళంలోని టాప్ హీరోలతో సినిమాలు నిర్మించారు.
నిర్మాణవ్యయంపై వేడి వేడి చర్చ
తెలుగులో పవన్ కల్యాణ్, మహేశ్ లతో ఆయన సినిమాలు ప్రకటించినప్పుడు ఎవరూ ఆశ్చర్యపోలేదు. ఫైనాన్షియరుగా ఆయన శక్తేమిటో చిత్రసీమకు తెలుసు కాబట్టి. అయితే రోజులు గడుస్తున్న కొద్దీ ఆయన నిర్మిస్తున్న సినిమాల బడ్జెట్ గురించీ ఒక్కో సంగతే తెలుస్తుంటే ఆశ్చర్యపోక తప్పని స్థితి.
నిరుడు రాజమౌళి దర్శకత్వంలో రాంచరణ్ నటించిన 'మగధీర' సినిమా బడ్జెట్ చూసి అందరూ ముక్కుమీద వేలేసుకున్నవాళ్లే. తెలుగు సినిమా పరిధిని మించి ఆ సినిమాకి భారీగా ఖర్చు పెట్టారనే వ్యాఖ్యానాలే అంతటా. అయితే ఆ సినిమా అనూహ్యమైన విజయం సాధించింది కాబట్టీ, తెలుగు చలనచిత్ర చరిత్రలోనే కనీవినీ కలెక్షన్ల తుఫాను సృష్టించింది కాబట్టీ నిర్మాత అల్లు అరవింద్ లాభాలు డండుకున్నారు. 35 కోట్ల రూపాయల వ్యయమైన ఆ సినిమా 80 కోట్ల రూపాయల్ని మించి వసూలు చేయడం నిజంగా ఘన చరిత్రే. అదృష్టం బాగుండి ఈ సినిమా బంపర్ హిట్టయ్యింది కాబట్టి సరిపోయింది. లేకపోతే, పరిస్థితి తారుమారైతే, ఆ సినిమా మీద పెట్టిన డబ్బంతా ఏమైపోయేది? ఇప్పుడు ఆ సినిమాకి మించి 'కొమరం పులి', 'ఖలేజా' సినిమాలకి వ్యయం చేస్తుండటం వల్లే తెలుగు సినిమా బడ్జెట్ గురించిన చర్చ మళ్లీ చిత్రసీమలో ఊపందుకుంది. రోజురోజుకీ నిర్మాణ వ్యయం కొండలా పెరిగిపోతూ, అదే స్థాయిలో నష్టాలూ సంభవిస్తుంటే, బడ్జెట్టుని కంట్రోల్ చేసుకోవాలని నిర్మాతల మండలి ఒకవైపు తన సభ్యులందరికీ పాఠాలు బోదిస్తోంది. మరోవైపు ఆ పాఠాల్ని పట్టించుకోకుండా, గతంలో ఎంతోమంది నిర్మాతలకి ఎదురైన గుణపాఠాల్ని ఖాతరు చేయకుండా కొంతమంది నిర్మాతలు తమ సినిమాలకి గల్లాపెట్టెలు ఖాళీ అయ్యే స్థాయిలో కాసులు ధారాళంగా కుమ్మరిస్తూనే ఉన్నారు.
కాంబినేషన్స్ మీదే దృష్టి
'కొమరం పులి', 'ఖలేజా' సినిమాల నిర్మాణ పనులు దాదాపు రెండేళ్ల క్రితమే మొదలయ్యాయి. నిజం చెప్పాలంటే చిత్ర పరిశ్రమలో వీటిని 'కాంబినేషన్ సినిమాలు' అని పిలుస్తున్నారు. కథని నమ్ముకుని తీసే సినిమాలు ఒకరకమైతే, హీరో హీరోయిన్ల లేదా హీరో డైరెక్టర్ల కాంబినేషన్ని నమ్ముకుని తీసే సినిమాలు ఇంకో రకం. ఈ రెండో రకం సినిమాలనే 'కాంబినేషన్ సినిమాలు' అంటారు. 'ఖుషి'తో సంచలనం సృష్టించిన హీరో డైరెక్టర్ల ద్వయం పవన్ కల్యాణ్, ఎస్.జె. సూర్య కాంబినేషనుతో 'కొమరం పులి' తయారవుతుంటే, 'అతడు'తో హిట్ సాధించిన హీరో డైరెక్టర్లు మహేశ్, త్రివిక్రమ్ కాంబినేషనుతో 'మహేశ్ ఖలేజా' రూపొందుతోంది. 'అరుంధతి'తో సూపర్ హీరోయిన్ ఇమేజ్ పొందిన అనుష్క చేరికతో 'ఖలేజా' కాంబినేషనుకి మరింత క్రేజ్ వచ్చింది.
ఈ రెండు సినిమాల్లో మొదట 'కొమరం పులి' షూటింగ్ మొదలయ్యింది. ఆర్మీ ఆఫీసరుగా నటించిన పవన్ కల్యాణ్ సరసన నికిషా పటేల్ హీరోయినుగా పరిచయమవుతోంది. ఆమెది పోలీస్ ఆఫీసర్ పాత్ర. టెర్రరిస్టుల్ని ఏరిపారేసే బృంద నాయకుడిగా పవన్ కల్యాణ్ నటన ఈ సినిమాకి హైలైట్ అంటున్నారు. మెలితిప్పిన మీసంతో ఆయన ఆహార్యం ఇప్పటికే అందర్నీ ఆకట్టుకుంటోంది. ఈ సినిమాలో నిర్మాణ వ్యయాన్ని పెంచే హెలికాప్టర్లు ఉపయోగించారు. భారీ ఛేజింగ్ సన్నివేశాల్లో ఎన్నో కార్లు ధ్వంసం చేశారు. పవన్ సహా సినిమాలో మిగతా పాత్రలు ఉపయోగించిన గన్సుని దుబాయ్ నుంచి తెప్పించారని వినిపిస్తోంది. కాస్ట్యూమ్సుకీ, పాటల చిత్రీకరణకీ విపరీతంగా ఖర్చు చేశారు. గ్రాఫిక్సునీ ఎక్కువగానే ఉపయోగించుకున్నారు. ప్రతి సన్నివేశంలోనూ భారీతనం ఉట్టిపడేట్లు చర్యలు తీసుకున్నారు. క్లైమాక్స్ సన్నివేశాలకి చేతికి ఎముకలేనట్లు వ్యయం చేశారు. ఇక దేశంలోనే అత్యంత ఖరీదైన మ్యూజిక్ డైరెక్టర్ ఎ.ఆర్. రెహమాన్ ఈ సినిమాకి పనిచేశారు. ఈ రకంగా ఈ సినిమాకి విపరీతంగా డబ్బు ఖర్చుపెట్టారు. 'మగధీర'ని మించి ఈ సినిమాకి బడ్జెట్ ఎక్కువయ్యిందనేది చిత్రసీమలో ఇప్పుడు అందరూ చెబుతున్న మాట. అంటే ఏమిటి? 'మగధీర' స్థాయిలో విజయం సాధిస్తే తప్ప 'కొమరం పులి' మీద పెట్టుబడి పెట్టినవాళ్లు బయటపడే అవకాశం లేదు.
ఆవురావురుమంటున్న అభిమానులు
ఓవైపు 'కొమరం పులి' సెట్స్ మీదకు వెళ్లి కొద్ది రోజులైనా కాలేదు, 'ఖలేజా' మొదలైంది. మహేశ్ సరసన మొదట నాయికగా పార్వతీ మెల్టన్ ని తీసుకున్నారు. ఆ సమయంలోనే 'అరుంధతి' వచ్చి సూపర్ హిట్టయ్యింది. అంతే - పార్వతి స్థానంలో అనుష్క వచ్చి చేరింది. ఇది మహేశ్, అనుష్క తొలి కాంబినేషన్. గ్లామరులోనూ, ఒడ్డూ పొడుగుల్లోనూ ఒకరికి ఒకరు తీసిపోని జంట. దాంతో సహజంగానే ఈ సినిమా పట్ల ఆసక్తి పదింతలైంది. ఇటీవల 'ఖలేజా' టైటిల్ లోగోని 'ట్విట్టర్'లోని తన బ్లాగులో మహేశ్ బహిర్గతం చేసీ చేయగానే వచ్చిన స్పందన ఈ సినిమా మీద ప్రేక్షకుల్లో ఆసక్తి ఏ స్థాయిలో ఉందో తెలిసింది. 'అతిథి' వచ్చి మూడేళ్లవడంతో మహేశ్ సినిమా కోసం ఆయన అభిమానులు ఆవురావురుమంటూ ఎదురు చూస్తున్నారు. త్రివిక్రమ్ శైలిలో యాక్షన్ ఎంటర్టైనరుగా రూపొందుతోన్న ఈ సినిమాకీ మంచినీళ్ల ప్రాయంలా డబ్బు ఖర్చు పెడుతున్నారు. సాధారణంగా త్రివిక్రమ్ సినిమా అంటే ఎక్కువ పని దినాలు ఉంటాయనీ, నెగటివ్ ఎక్కువ ఖర్చవుతుందనీ పేరు. ఏదేమైనా ఒకేసారి రెండు మహా భారీ బడ్జెట్ సినిమాలు నిర్మించాల్సి రావడంతో శింగనమల రమేశ్ ఉక్కిరిబిక్కిరయ్యారు. అందుకే సీనియర్ నిర్మాత సి. కల్యాణ్ సాయం కోరారు. అలా ఈ సినిమాల ప్రొడక్షనులోకి అడుగుపెట్టారు కల్యాణ్. ఆయన పర్యవేక్షణ తర్వాతే ఈ సినిమాల షూటింగ్ వేగం అందుకుందన్నది బహిరంగ రహస్యం.
మొత్తానికి ఈ రెండు సినిమాల్లో 'కొమరం పులి' ప్రాజెక్టు పూర్తయ్యింది. కొద్ది రోజుల్లో ప్రేక్షకుల ముందుకు రాబోతోంది. 'ఖలేజా' షూటింగ్ కూడా దాదాపు అయిపోయినట్లే. పోస్ట్ ప్రొడక్షన్ పనులే మిగిలాయి. వాటిని కూడా పూర్తిచేసి, 'కొమరం పులి' విడుదలైన నెల రోజుల తర్వాత ప్రేక్షకుల ముందుకు తీసుకు రావాలని నిర్మాతలు భావిస్తున్నారు. అయితే ఈ సినిమాల నిర్మాణంలో పాలుపంచుకున్న డబ్బెంతో సుమారుగా తెలిసిన వాళ్లంతా ఆ డబ్బు ప్రేక్షకుల నుంచి రికవర్ అవుతుందా, లేదా - అనే చర్చల్లో మునిగి తేలుతున్నారు. ఇవి సూపర్ డూపర్ హిట్లయితే ఫర్వాలేదు, లేదంటే.. చూద్దాం ఏం జరుగుతుందో..

Gallery: Khaleja