బాలకృష్ణ నాయనమ్మగా జయసుధ!

ఇప్పటివరకు హీరోలకు అమ్మగా కనిపిస్తూ వచ్చిన సహజనటి జయసుధ తొలిసారిగా ఓ హీరోకి నాయనమ్మగా కనిపించబోతున్నారు. అదీ తన సమవయస్కుడైన సీనియర్ హీరో బాలకృష్ణకు. 'అధినాయకుడు' సినిమాలో ఆమె నాయనమ్మ పాత్రని చేస్తున్నారు. పరుచూరి మురళి దర్శకత్వంలో ఎం.ఎల్. కుమార్‌చౌదరి నిర్మిస్తున్న ఈ సినిమాలో బాలకృష్ణ త్రిపాత్రాభినయం చేస్తున్న సంగతి తెలిసిందే. తొలిసారిగా ఆయన తాత, తండ్రి, మనవడిగా నటిస్తున్న సినిమా కూడా ఇదే. ఇందులో తాత పాత్ర సరసన జయసుధ నటిస్తున్నారు. "అంటే మేం జంటగా నటిస్తున్న తొలి సినిమా కూడా ఇదే. ఒకే సినిమాలో ఆయనకు భార్యగా, తల్లిగా, నాయనమ్మగా నటిస్తుండటం గమ్మత్తైన అనుభవం. 'శివరంజని'లోనే మేం జంటగా నటించాల్సింది తప్పిపోయింది" అని జయసుధ తెలిపారు. మిగతా ఇద్దరి పాత్రల సరసన లక్ష్మీరాయ్, సలోని నటిస్తున్నారు. ఇలాంటి విశేషాలున్న 'అధినాయకుడు' సంక్రాంతికి ప్రేక్షకుల ముందుకు రాబోతోంది.

న్యూస్: పరుచూరి మురళికి 'మహదేవనాయుడు'తో కలిసి వస్తుందా?

ఇదివరకు నితిన్, ఇలియానా జంటగా రూపొందించిన 'రెచ్చిపో' సినిమా బాక్సాఫీస్ వద్ద డిజాస్టర్ కావడంతో డైరెక్టర్ పరుచూరి మురళి ఆశలన్నీ 'మహదేవనాయుడు' సినిమాపైనే ఉన్నాయి. ఇందులో బాలకృష్ణ హీరో కావడంతో చాలా జాగ్రత్తగా సన్నివేశాల్ని చిత్రీకరిస్తున్నట్లు యూనిట్ వర్గాలు చెబుతున్నాయి. 'సింహా' వంటి ఇటు అవార్డులూ, రివార్డులూ పొందిన సినిమా తర్వాత బాలయ్య చేసిన 'పరమవీరచక్ర' అట్టర్‌ఫ్లాపైన సంగతి తెలిసిందే. అందుకే 'మహదేవనాయుడు' సినిమా హిట్టవ్వాల్సిన అవసరం హీరో, దర్శకుల ఇద్దరికీ ఉంది. కీర్తి క్రియేషన్స్ బేనర్‌పై ఎం.ఎల్. కుమార్‌చౌదరి నిర్మిస్తున్న ఈ సినిమాని నిర్మిస్తున్నారు. ఇదివరకు ఇదే బేనర్‌లో జగపతిబాబుతో 'పెదబాబు', గోపీచంద్‌తో 'ఆంధ్రుడు' సినిమాలు చేశాడు మురళి. ఆ రెండూ బాగానే ఆడాయి. కలిసి వచ్చిన బేనర్‌లో మురళి ఇప్పుడు ఎలాగైనా హిట్టు కొట్టాలనే తపనతో ఆచితూచి పనిచేస్తున్నాడు. అందుకే మొదట దసరాకి రిలీజవుతుందనుకున్న ఈ సినిమా తాజాగా సంక్రాంతికి పోస్ట్‌పోన్ అయినట్లు సమాచారం. ఇందులో బాలయ్య త్రిపాత్రాభినయం చేస్తుండగా, ఆయనతో ముగ్గురు తారలు జతకడుతున్నారు. వారిలో లక్ష్మీరాయ్, సలోని ఆయనతో తొలిసారి నటిస్తున్నారు. మరో హీరోయిన్ ఛార్మికి బాలయ్యతో ఇది రెండో సినిమా. ఇదివరకు ఆమె 'అల్లరి పిడుగు' సినిమాలో నటించింది. ఈ సినిమాతో బాలకృష్ణ-మురళి కాంబినేషన్ ఎలా వర్కవుట్ అవుతుందో చూడాలి.

Movies: Balakrishna and Paruchuri Murali combo film launched

నందమూరి బాలకృష్ణ హీరోగా శ్రీ కీర్తి కంబైన్స్ పతాకంపై ఎం.ఎల్. పద్మకుమార్ చౌదరి నిర్మించే చిత్రం షూటింగ్ శుక్రవారం (ఆగస్టు 27) రామానాయుడు స్టూడియోలో ప్రారంభమైంది. పరుచూరి మురళి దర్శకుడు. బాలకృష్ణపై చిత్రీకరించిన ముహూర్తపు షాట్‌కు తెలుగుదేశం పార్టీ అధ్యక్షుడు నారా చంద్రబాబునాయుడు క్లాప్‌నివ్వగా, పారిశ్రామికవేత్త కె. రఘు కెమేరా స్విచ్ఆన్ చేశారు. దర్శకుడు కె. రాఘవేంద్రరావు తొలి షాట్‌కు గౌరవ దర్శకత్వం వహించారు.
నిర్మాత ఎం.ఎల్. కుమార్ చౌదరి మాట్లాడుతూ "ఇంతకుముందు కీర్తి క్రియేషన్స్ బేనరుపై ఎనిమిది చిత్రాలు నిర్మించాను. ప్రస్తుతం కీర్తి కంబైన్స్ పతాకంపై 'బావ', 'సరదాగా కాసేపు' చిత్రాల తర్వాత నిర్మిస్తున్న మూడో చిత్రమిది. దర్శకుడు మురళితో ఇంతకుముందు 'పెదబాబు', 'ఆంధ్రుడు' చిత్రాలు నిర్మించాను. రెండూ విజయవంతమయ్యాయి. బాలకృష్ణగారితో సినిమా తీయాలని రెండేళ్ల నుంచి అనుకుంటున్నాను. ఈ చిత్రకథని సింగిల్ సిట్టింగ్‌లో బాలకృష్ణ ఓ.కె. చేశారు. దమ్మున్న సబ్జెక్ట్ ఇది. అందుకే ఎక్కడా కాంప్రమైజ్ కాకుండా ఈ చిత్రాన్ని నిర్మిస్తాం. సెప్టెంబరు 25న రెగ్యులర్ షూటింగ్ ప్రారంభించి సమ్మర్‌లో విడుదల చేయాలనుకుంటున్నాను" అన్నారు.
దర్శకుడు మురళి మాట్లాడుతూ "తొలిసారిగా ఒక పెద్ద హీరోతో సినిమా చేస్తున్నందుకు ఆనందంగా ఉంది. ఈ అవకాశం కల్పించిన బాలకృష్ణగారికి రుణపడి ఉంటాను. ఆయన చేత ఓ.కె. అనిపించుకునే కథను తయారు చేయడం కోసం నేను, ఛాయాగ్రహకుడు విజయ కుమార్, సంగీత దర్శకుడు కళ్యాణిమాలిక్ ఆరునెలలు వర్క్ చేశాం. అన్ని అంశాలు సమపాళ్లలో కలగలిసిన కథ ఇది. ఊటీలో కానీ మౌంట్ ఆబులో కానీ చిత్రం షూటింగ్ ఉంటుంది" అన్నారు.
సంగీత దర్శకుడు కళ్యాణిమాలిక్ మాట్లాడుతూ "ఈ సినిమాకి పనిచేసే అవకాశం వచ్చిందని తెలియగానే వెయ్యి ఏనుగుల సవారి చేసిన అనుభూతి కలిగింది. అదరగొట్టే సంగీతాన్ని, అభిమానులు ఎగిరి గెంతులు వేసే పాటలను ఇస్తానని ప్రామిస్ చేస్తున్నాను" అన్నారు.
ఈ చిత్రానికి ఛాయాగ్రహణం: విజయ్ సి. కుమార్, ఎడిటింగ్: కోటగిరి వెంకటేశ్వరరావు, ఫైట్స్: రామ్-లక్ష్మణ్, సమర్పణ: సందీప్, కథ, స్క్రీన్‌ప్లే, దర్శకత్వం: పరుచూరి మురళి.