సమాజం: యాసిడ్ దాడులు ఆపాలంటే?

సమాజంలో మహిళలపై హింస పెరుగుతూ ఉంది. ఇది ఎన్నో కొత్త రూపాలు తీసుకుంటూ ఉంది. అందులో ఈమధ్య పెరుగుతున్న యాసిడ్ దాడులు ఒకటి. వీటిని అరికట్టడానికి ప్రభుత్వం చట్టాన్ని కఠినతరం చేస్తూ సవరణలు తీసుకు వచ్చింది. హింసకు వ్యతిరేకంగా నిరసనలు వచ్చిన ప్రతి సందర్భంలో ఒక చట్టం రావడం, ఆ తర్వాత ఆందోళనలు ఆగిపోవడం పరిపాటి అయిపోయింది. ఈ సందర్భంగా కొన్ని ప్రశ్నలు వస్తాయి.
ఇప్పటికే ఉన్న శిక్షలు కఠినంగా లేకపోవడం వల్ల యాసిడ్ దాడులు జరుగుతున్నాయా? మహిళలపై హింసను నిరోధించడానికి ఇప్పటికే ఉద్దేశించిన చట్టాలు సక్రమంగా అమలవుతున్నాయా? వాటిని అమలు చేయడానికి కావాల్సిన బలమైన, సున్నితమైన, శిక్షణగల నేర న్యాయవ్యవస్థ మనకు ఉందా? లేనప్పుడు కఠినమైన చట్టాలు చేసినంత మాత్రాన పభుత్వం మహిళలపై హింసను నిరోధించడానికి కంకణం కట్టుకొని ఉన్నట్టు అర్థమొస్తుందా?
వాస్తవం ఏమిటంటే, చట్టాలు కఠినతరమయ్యే కొద్దీ నేర నిరూపణకు బలమైన, ప్రామాణికమైన సాక్ష్యాలు అవసరమవుతాయి. వాటిని తేలేకపోతే ఆ మేరకు శిక్షలు పడే అవకాశాలు తగ్గిపోతాయి. చట్టాన్ని న్యాయ దృష్టితో అమలు చేయడానికి కావాల్సిన యంత్రాంగాన్ని సిద్దం చేయకుండా, కఠినమైన చట్టాల్ని మాత్రం చేస్తే, అది ప్రజల్లో ప్రతీకార వాంఛకు విజ్ఞప్తి చేయడమే తప్ప, వాస్తవంలో ఫలితముండదు.
యాసిడ్ దాడి జరగగానే అన్ని సంఘాలు పెద్ద ఎత్తున ఉద్యమాలు చేస్తాయి. ఏదో ఒక చట్టం చేయగానే అన్ని ఆందోళనలు గప్చిప్ అయిపోతాయి. చట్టాలు అమలు చేయడానికి సరైన యంత్రాంగం లేదు. చట్టాలు కాదు, దాడులు జరగకుండా ఏం చేయాలి అనేది ప్రభుత్వం గుర్తించి ఆలోచించాలి. ప్రభుత్వానికి స్త్రీల సమస్యల మీద పని చేయాలనే సరైన ఉద్దేశం ఉంటే పని త్వరగా జరుగుతుంది.

Youth: Hyderabad's dissolute culture

యువత మీద నేడు అనేక ప్రభావాలు పడి వారిని పెడమార్గం పట్టిస్తున్నాయి. విలువలు క్షీణిస్తున్నాయి. విశృంఖలత్వం పెచ్చరిల్లుతున్నది. సిద్ధాంతాలు, విధానాలు తారుమారవుతున్నాయి. సెక్స్, హింస రాజ్యమేలుతున్నాయి. నేర ప్రవృత్తి పెరిగింది. ఈ నిజం మనకు నిత్యం బార్లు, పబ్బులు, స్టార్ హోటళ్లు, కార్పొరేట్ సంస్థల్లో కనిపిస్తోంది. యువత బలహీనతలను సొమ్ము చేసుకుంటూ వ్యాపారాలు మూడు పువ్వులు ఆరు కాయల్లా అభివృద్ధి చెందుతున్నాయి. ఢిల్లీ, ముంబై, లక్నో, పూణే, బెంగళూరును మించిపోతున్నాయి మన రాష్ట్రంలోని హైదరాబాద్, విశాఖపట్నం, విజయవాడ, రాజమండ్రి నగరాలు. హైదరాబాద్, రంగారెడ్డి జిల్లాల్లోనే దాదాపు వెయ్యి బార్లు, రెస్టారెంట్లు, క్లబ్బులు, పబ్బులు, స్టార్ హోటళ్లు, వైన్ షాపుల్లో మద్యం వరదలై ప్రవహిస్తోంది. మద్యం మత్తులో మునిగి తేలుతున్న వాళ్లలో 64 శాతం 18-26 ఏళ్ల మధ్య యువకులే. ప్రతి స్టార్ హోటల్, క్లబ్బు, పబ్బు, రిసార్టు రోజుకో ఈవెంట్ పేరిట అసభ్యతను, అశ్లీలాన్ని పెంచి పోషిస్తున్నాయి. ఇటీవల బయటపడిన డ్రగ్స్, సెక్స్ రాకెట్లు ఇందుకు మంచి ఉదాహరణ. టూరిజం ప్రోత్సాహం పేరిట అనేక చట్టవిరుద్ధ కారక్రమాలకు ప్రభుత్వం తెరలేపడంతో అశ్లీలతకు, అసభ్యతకు పట్టపగ్గాలు లేకుండా తయారయింది. ఆ పర్యవసానమే రాష్ట్రాన్ని ఎయిడ్స్ లో రెండో స్థానానికి తీసుకెళ్లింది. ఆందోళన కలిగించే సంగతేమంటే కార్పొరేట్, సాఫ్టువేర్ సంస్థల్లో ఉద్యోగాలు చేస్తున్న 20-30 ఏళ్ల మధ్య యువతీ యువకులు సాయంత్రమయ్యేసరికి పబ్బులు, క్లబ్బుల్లో చెట్టాపట్టాల్ వేసుకుని మందుకొట్టి మజా చేస్తుండటం. ఇదివరకు ఢిల్లీ, ముంబై, బెంగళూరు, బరోడా, లక్నో నగరాలకు పరిమితమైన ఈ విష సంస్కృతి నేడు హైదరాబాదుని కబళించివేయడం. ఇందుకు సమాజమే బాధ్యత వహించాలి. తల్లిదండ్రులే ఈ బరువు మోయాలి.