Showing posts with label D Ramanaidu. Show all posts
Showing posts with label D Ramanaidu. Show all posts

Tuesday, December 8, 2015

Synopsis of the movie BOMMALU CHEPPINA KATHA (1969)

'బొమ్మలు చెప్పిన కథ' (1969) చిత్ర కథాంశం


అమరావతీ నగర మహారాజు (ధూళిపాళ) బావమరిది వీరసేనుడి (ప్రభాకరరెడ్డి) ఇద్దరు కుమార్తెల్లో ఒకరు మరొకరి మరణానికి కారకులవుతారని బొమ్మలు చెపుతాయి. ఇది విన్న వీరసేనుడు చిన్న కూతుర్ని కాళీ ఆలయంలో వదిలేసి వెళ్తాడు. ఆ అమ్మాయి చంప (విజయనిర్మల) పేరుతో ఓ గొర్రెల కాపరి వద్ద పెరుగుతుంది. పెద్దమ్మాయి సుజాత (విజయలలిత) రాజ ప్రసాదంలో పెరిగి యువరాజు ప్రతాప్ (కాంతారావు)పై మనసు పడుతుంది.
రాజ్యంలో బందిపోట్ల అరాచకాల్ని అణచాలని అడవికి వెళ్లిన ప్రతాప్ బందిపోట్ల చేతుల్లో దెబ్బలుతిని అక్కడ చంప ఆశ్రయంలో తేరుకొంటాడు. ఆమెను ప్రేమించి పెళ్లాడి అంతఃపురానికి తెస్తాడు. తను ప్రేమించినవాణ్ణి వలలో వేసుకొని పెళ్లి చేసుకుందనే కక్షతో చంపను ఏడిపిస్తూ ఉంటుంది సుజాత. విషమిచ్చి చంపటానికి సైతం ప్రయత్నిస్తుంది. అది విఫలం కావడంతో పగతో రగిలిపోతూ ఉంటుంది. ఈలోగా బందిపోటు మంగు (కృష్ణ) అనుచరుణ్ణి యువరాజు పట్టుకొని ఉరితీయించాడనే వార్త బందిపోటు దొంగల్లో కలవరం కలిగిస్తుంది. ప్రతాప్‌ను చంపడానికి అర్ధరాత్రి అంతఃపురానికి వెళ్లిన మంగూను తన అన్నగా గుర్తిస్తుంది చంప.
ఇంతలో యువరాజు మేల్కొని వెన్నంటి తరమగా గాయపడిన మంగు కాళికాలయం చేరి, అక్కడ బొమ్మలు చెప్పిన మరో కథ వింటాడు. చంప శ్రీమంతం నాటి రాత్రి ఒక కాలనాగు యువరాజును కాటువేస్తుంది. ఈలోగా చంప తన భర్త గుండెల్లో గాయంచేసి ఆ రక్తంతో నుదుట తిలకం దిద్దుకుంటే యువరాజు బతుకుతాడు. ఈ రహస్యం ఆమె బయటపెడితే భర్త శిలగా మారిపోతాడు. ఈ కథ వినడంతో యువరాజు రక్షణకు సిద్ధమవుతాడు  మంగు. అదును కోసం వేచిచూస్తున్న సుజాత, ఇదే సమయమని మంగూ చంపలకు రంకు అంటగట్టి యువరాజును హత్యచేయడానికి ప్రయత్నించిందని చంపపై అభియోగం మోపుతుంది. విచారణలో చంపకు నిజం చెప్పక తప్పలేదు. ఫలితంగా యువరాజు శిలైపోతాడు. చంపను మాయలమారిగా నిర్ణయించి శిక్ష విధిస్తారు. అప్పుడే రాజును బంధించి సింహాసం ఆక్రమిస్తాడు మంత్రి.
ఈ చిక్కును విడదీసే ఉపాయాన్ని సైతం బొమ్మలే చెబుతాయి. మంగు సాహసంతో, సుజాత ఆత్మ పరిత్యాగంతో కథ నిర్ణీత ప్రకారం సుఖాంతమవుతుంది. మంగు  ఎవరో కాదు, వీరసేనుడి కుమారుడేనని తేలుతుంది.

తారాగణం: కాంతారావు, కృష్ణ, విజయనిర్మల, విజయలలిత, సంధ్యారాణి, గీతాంజలి, ధూళిపాళ, ప్రభాకరరెడ్డి, సత్యనారాయణ, మిక్కిలినేని, రాజబాబు
సంగీతం: మాస్టర్ వేణు
నిర్మాత: డి. రామానాయుడు
దర్శకుడు: జి. విశ్వనాథం
బేనర్: సురేశ్ మూవీస్
విడుదల తేదీ: 4 ఏప్రిల్

Saturday, December 1, 2012

అగ్నిపూలు (1981) - సమీక్ష


అత్యంత ప్రజాదరణ పొందిన యద్దనపూడి సులోచనారాణి నవల 'అగ్నిపూలు' ఆధారంగా అదే పేరుతో డి. రామానాయుడు నిర్మించిన సినిమాలో కృష్ణంరాజు, జయసుధ, జయప్రద ప్రధాన పాత్రలు పోషించారు. కె. బాపయ్య దర్శకుడు. 'అగ్నిపూలు' కథలో భిన్న దృక్పథాలు, భిన్న వ్యక్తిత్వాలు ఉన్న పాత్రలెన్నో ఉన్నాయి. అన్ని పాత్రలకీ ప్రాముఖ్యం ఉంది. ఏ ఒక్క పాత్ర ఔచిత్యం దెబ్బతినకుండా రెండున్నర గంటల సినిమాగా దీన్ని తీర్చిదిద్దడంలో ఎంతో నేర్పు ప్రదర్శించాడు బాపయ్య.
రాజులు, రాజ్యాలు పోయినా దర్పం వదలని జమీందారు గోవింద వల్లభరాజా. ఆయన కుమారుడు శివప్రసాద్ అమెరికాలో ఉంటూ అక్కడే మేరీ అనే అమ్మాయిని పెళ్లి చేసుకుంటాడు. వారికి జానీ, బాబీ అనే ఇద్దరు పిల్లలు. భార్యా పిల్లలతో కలిసి తన ఇంటికి కొడుకు వస్తున్నాడని తెలిసి ఉగ్రుడైన వల్లభరాజా అతడికీ, తనకీ ఎలాంటి సంబంధం లేదని ప్రకటిస్తాడు. ఆయన ఆస్తి మీద కన్నేసిన అల్లుడు విరూపాక్షి రాజా, కూతురు రాజేశ్వరి అగ్నికి ఆజ్యం పోస్తారు. ఇంటికి వచ్చిన శివప్రసాద్, మేరీలను ఔట్‌హౌస్‌లో ఉంచి అవమానిస్తారు. వల్లభరాజా చనిపోతే అతని మృతదేహాన్ని చూసేందుకు కూడా అనుమతించరు.
కాలం గడిచి, విరూపాక్షి రాజా కూడా చనిపోతాడు. అతని కొడుకు కృష్ణ చైతన్య జమీందారీకి అధిపతి అవుతాడు. రుక్మిణి అనే అందాల భామను పెళ్లాడతాడు. ఒక ప్రమాదంలో రుక్మిణి అవిటిదవుతుంది. వల్లభరాజా భార్య అన్నపూర్ణ అభ్యర్థనపై శివప్రసాద్ పిల్లలు జానీ, బాబీలను ఇంటికి తీసుకొస్తారు. తన తల్లిదండ్రుల దారుణ మరణానికి కారకులైన విరూపాక్షి రాజా కుటుంబం మీద, ముఖ్యంగా కృష్ణ చైతన్య మీద పగ తీర్చుకోవాలని చూస్తుంది జానీ. ఆమె చేష్టలు శాంత స్వభావుడైన కృష్ణ చైతన్యకు అర్థం కావు. జానీ దాచుకున్న డైరీ అతడికి దొరుకుతుంది. ఆ తర్వాత ఏం జరిగిందన్నది పతాక సన్నివేశాల్లో తెలుస్తుంది.
భిన్న దృక్పథాలు కలిగిని విరూపాక్షి రాజా, కృష్ణ చైతన్య పాత్రలు రెండింటినీ కృష్ణంరాజు ప్రశంసనీయంగా పోషించారు. ముఖ్యంగా విరూపాక్షి రాజాగా ఆయన నటన బాగా ఆకట్టుకుంటుంది. పగతో రగిలిపోయే జానీ పాత్రలో జయసుధ మరోసారి తన నటనా ప్రతిభను ప్రదర్శించింది. అవిటిదైన రుక్మిణిగా జయప్రద సమర్థవంతంగా నటించింది. ఆమె చేసిన సర్ప నృత్యం సినిమాకే హైలైట్. రాజేశ్వరిగా జయంతి పాత్ర పరిధి మేరకు బాగా చేసింది. సుధాకర్, నిర్మల, శ్రీధర్, గుమ్మడి, సత్యనారాయణ, సుమలత, సుభాషిణి, దిల్‌జిత్ వీర్ ఇతర పాత్రలు పోషించారు. శరత్‌బాబుకు మరికొన్ని డైలాగులు పెడితే బాగుండేది. అల్లు రామలింగయ్యపై చిత్రీకరించిన సన్నివేశాల ప్రయోజనం స్వల్పం.
జంధ్యాల మాటలు, ఆత్రేయ పాటలు, మహదేవన్ సంగీతం, వెంకట్ ఛాయాగ్రహణం సినిమాకి నిండుదనం తెచ్చాయి. మైసూరు లలితమహల్‌ను దర్శకుడు బాపయ్య చక్కగా వినియోగించుకున్నాడు. మొత్తానికి చక్కని నవలా చిత్రాన్ని చూసిన భావన ప్రేక్షకులకు కలుగుతుంది.

Saturday, September 24, 2011

మరపురాని చిత్రం: ప్రేమనగర్


రామానాయుడు సినీభవితవ్యాన్ని నిర్దేశించి, నిర్మాతగా ఆయన్ని నిలబెట్టిన 'ప్రేమనగర్' చిత్రం విడుదలై నేటికి సరిగ్గా నలభై ఏళ్లు. ఈ సందర్భంగా ఈ సినిమా విశేషాలు..
ప్రఖ్యాత నిర్మాత డి. రామానాయుడు ఈరోజున అత్యధిక చిత్రాల నిర్మాతగా చరిత్రలో స్థానం దక్కించుకున్నారంటే అందుకు మూలస్తంభం 'ప్రేమనగర్' చిత్రం. ఈ సినిమాకి ముందు ఆయన కె. బాపయ్యను డైరెక్టర్‌గా పరిచయం చేస్తూ 'ద్రోహి' చిత్రాన్ని నిర్మించారు. జగ్గయ్య, వాణిశ్రీ, నాగభూషణం కాంబినేషన్‌లో తయారైన ఈ సినిమా అట్టర్‌ఫ్లాపయ్యింది. దీనితో ఐదు లక్షల రూపాయల నష్టం చవిచూశారు రామానాయుడు. 40 ఏళ్ల క్రితం అది చాలా పెద్ద మొత్తం. అప్పుడాయనకు రెండే దార్లు మిగిలాయి. ఒకటి నిర్మాతగానే కొనసాగి, నష్టాన్ని పూడ్చుకోవడం, లేదంటే చెన్నై దగ్గరోని కోణంబాకంలో ఉన్న పొలాలతో వ్యవసాయం చేసుకోవడం. తాడో పేడో తేల్చుకుందామని చివరి ప్రయత్నంగా 'ప్రేమనగర్' ప్రాజెక్టుని ప్రారంభించారు.
కోడూరి కౌసల్యాదేవి అదే పేరుతో రాసిన నవల అప్పటికే పాపులర్ కావడంతో దాని హక్కుల్ని నిజామాబాద్‌కు చెందిన కొత్త నిర్మాత శ్రీధర్‌రెడ్డి కొన్నారు. అందులో నటించేందుకు అక్కినేని నాగేశ్వరరావు అంగీకరించారు. అయితే శ్రీధర్‌రెడ్డి ఎంతకీ ఆ సినిమా ప్రారంభించక పోవడంతో ఆయన నుంచి ఆ హక్కులు కొనుగోలు చేశారు రామానాయుడు. అప్పటికే తమ బేనర్‌లో 'స్త్రీజన్మ'ని తీసిన కె.ఎస్. ప్రకాశరావుని దర్శకునిగా తీసుకున్నారు. రచయిత ఆత్రేయతో కలిసి నవలలో చాలా మార్పులు చేశారు ప్రకాశరావు. సినిమా సెట్స్ మీదకు వెళ్లే ముందు రామానాయుడికి బౌండ్ స్క్రిప్ట్ అందించారు ఆత్రేయ.
రూ. 15 లక్షల ఖర్చు అంచనాతో ఈ సినిమా ప్రారంభించారు. అక్కినేని, వాణిశ్రీ, సత్యనారాయణ, రాజబాబు, రమాప్రభ, గుమ్మడి వంటి భారీ తారాగణంతో రామానాయుడు 'ప్రేమనగర్'ని మొదలు పెట్టారని తెలిసి సినీ వర్గాలు ఆశ్చర్యపోయాయి. అప్పటికే వాళ్లకి తెలుసు, రామానాయుడు నిండా మునిగిపోయి ఉన్నారని. కొంతమంది సన్నిహితులు రిస్క్ తీసుకోవద్దని వారించినా ఆయన లెక్కచెయ్యలేదు. 1971 జనవరి 20న చెన్నై వాహినీ స్టూడియోలో కొబ్బరికాయ కొట్టి షూటింగ్ ప్రారంభించారు అక్కినేని. పూజలకు అక్కినేని దూరమైనా రామానాయుడు అడిగేసరికి కాదనలేకపోయారు. ఆరు నెలల్లో సినిమా పూర్తయింది. 1971 సెప్టెంబర్ 24న 'ప్రేమనగర్' విడుదలైంది. అప్పుడే పెద్ద గాలివాన. రామానాయుడిని ఓవైపు ఆందోళన, మరోవైపు నమ్మకం కలిపి విచిత్రావస్థలోకి నెట్టాయి. అయితే ప్రేక్షకులు 'ప్రేమనగర్'కి బ్రహ్మరథం పట్టారు. ప్రేమ కథా చిత్రాల నాయకునిగా అక్కినేని ఇమేజ్‌ని మరింత పరిపుష్టం చేస్తూ అఖండ విజయం సాధించింది ఈ సినిమా.
హీరో కల్యాణ్‌వర్మ పాత్రకి జీవం పోశారు అక్కినేని. 'మనసు గతి ఇంతే', 'ఎవరి కోసం ఈ ప్రేమమందిరం' అంటూ ఆత్రేయ రాసిన అపూర్వ గీతాలని అంతే అపూర్వ స్థాయిలో అభినయించి వాటికి చిరస్థాయిని కల్పించడంలో తనవంతు పాత్ర పోషించారు. అలాగే నవలా నాయికగా వాణిశ్రీకి ఈ చిత్రం సరికొత్త ఇమేజ్ తెచ్చింది. ఆమె కట్టు, బొట్టు, కొప్పుని అనుకరించడానికి ఆ రోజుల్లో యువతులు పోటీపడ్డారు. అక్కినేని, వాణిశ్రీపై చిత్రీకరించిన డ్యూయెట్లు యువతని ఎంతగా రంజింపచేశాయో చెప్పనక్కర్లేదు. ఈ సినిమాలో సత్యనారాయణ చిన్నప్పటి పాత్రలో వెంకటేశ్ నటించడం విశేషం.
తెలుగు సినిమా సాధించిన అమోఘమైన విజయంతో దీన్ని తమిళంలోనూ నిర్మించాలనుకున్నారు రామానాయుడు. శివాజీ గణేశన్, వాణిశ్రీ జంటగా 'వసంత మాళిగై' పేరుతో రీమేక్ చేశారు. అక్కడా ఆ సినిమా దిగ్విజయం సాధించి, తమిళనాడులో రామానాయుడికి 'వసంత మాళిగై రామానాయుడు'గా పేరు తెచ్చింది. ఇలా రెండు భాషల్లో ఈ సినిమా సూపర్‌హిట్టయ్యాక ఆయన కన్ను బాలీవుడ్ మీద పడింది. హిందీ 'ప్రేంనగర్'కు రూపకల్పన జరిగింది. అందులో నటించేందుకు అప్పటి హిందీ రొమాంటిక్ హీరో రాజేశ్‌ఖన్నా, డ్రీం గర్ల్ హీమమాలిని సరేనన్నారు. అక్కడా ఈ సినిమా విజయకేతనం ఎగురవేసింది. రామానాయుడి బాలీవుడ్ ప్రవేశం ఘనంగా మొదలైంది. ఈ మూడు భాషల్లోనూ దర్శకుడు ప్రకాశరావే. ఇలా ఈ సినిమా విజయ విహారం చేయడంతో రామానాయుడు ఎక్కడికీ కదలాల్సిన అవసరం లేకపోయింది.

Thursday, August 18, 2011

న్యూస్: 'ఇట్స్ మై లవ్‌స్టోరీ'తో ఆశ నెరవేరుతుందా?

లగడపాటి శ్రీధర్ నిర్మించిన 'స్నేహ గీతం'తో దర్శకుడిగా పరిచయమైన 'మధుర' శ్రీధర్‌రెడ్డి త్వరలో 'ఇట్స్ మై లవ్‌స్టోరీ' అంటూ ప్రేక్షకుల ముందుకు రాబోతున్నాడు. కొత్త తారలతో అతను రూపొందించిన 'స్నేహ గీతం' పబ్లిసిటీ ఇచ్చిన స్థాయిలో ఆడకపోయినా డైరెక్టర్‌గా శ్రీధర్‌రెడ్డి ఫర్వాలేదనిపించాడు. ఆ సినిమా తర్వాత పెద్ద హీరోలతో కాకపోయినా ఓ మాదిరి హీరోల నుంచైనా తనకి కాల్స్ వస్తాయని అతను ఊహించాడు. అలాగే నిర్మాతల నుంచి ఆఫర్లు వస్తాయనుకున్నాడు. అవేవీ జరగకపోవడంతో తిరిగి కొత్త తారలతోటే సినిమా తీయడానికి సిద్ధమైపోయాడు. నిర్మాతగా ఓ ఎన్నారైని దొరకబుచ్చుకున్నాడు. అలా 'ఇట్స్ మై లవ్‌స్టోరీ'ని తీశాడు. ఈ సినిమా ద్వారా అరవింద్‌కృష్ణ హీరోగా పరిచయమవుతున్నాడు. అతను ఈ సినిమాకి ముందు డి. రామానాయుడు నిర్మించిన ఫ్లాప్ ఫిల్మ్ 'ఆలస్యం అమృతం'లో నటించాడు (హీరోగా కాదు). ఇక హీరోయిన్ నిఖితకు ఇదే తొలి చిత్రం. ప్రస్తుతం పోస్ట్ ప్రొడక్షన్ స్టేజ్‌లో ఉన్న 'ఇట్స్ మై లవ్‌స్టోరీ' సెప్టెంబరులో రిలీజ్ కానున్నది. చాలా కాలం తర్వాత వెటరన్ యాక్టర్లు జయసుధ, శరత్‌బాబు కలిసి ఇందులో నటించారు. ఇందులో జయసుధ హీరో తల్లిగా, శరత్‌బాబు హీరోయిన్ తండ్రిగా నటించారు. హైదరాబాద్‌కు చెందిన ఓ గేం డిజైనర్ (అరవింద్‌కృష్ణ)కీ, వైజాగ్‌కి చెందిన ఓ ఫ్యాషన్ డిజైనర్ (నిఖిత)కీ మధ్య చిగురించే ప్రేమకథ ఎలాంటి మలుపులు తిరిగిందీ, చివరికి ఎలా సుఖాంతమయ్యిందీ అన్నది ఈ సినిమా కథ. ఈ లవ్‌స్టోరీతో డైరెక్టర్‌గా తనకి మరింత పేరు వస్తుందనీ, తద్వారా క్రేజీ ఆఫర్లు రావడం ఖాయమనీ శ్రీధర్‌రెడ్డి ఆశిస్తున్నాడు. అతని ఆశ నెరవేరుతుందా?

Monday, August 15, 2011

న్యూస్: వెంకటేశ్, ఆదిత్య కాంబినేషన్ కుదిరేనా?

వెంకటేశ్‌ని వి.ఎన్. ఆదిత్య డైరెక్ట్ చేయబోతున్నాడా? సీనియర్ నిర్మాత డి. రామానాయుడు మాటల్ని బట్టి ఈ కాంబినేషన్ కుదిరే అవకాశం కనిపిస్తోంది. ఆదిత్య దర్శకత్వంలో రామానాయుడు నిర్మించిన 'ముగ్గురు' సినిమా ఈ నెల (ఆగస్ట్) 19న రిలీజ్ కాబోతోంది. ఇందులో నవదీప్, రాహుల్, అవసరాల శ్రీనివాస్ హీరోలుగా నటిస్తే, వారికి జోడీలుగా శ్రద్ధాదాస్, సంజన, సౌమ్య నటించారు. రీమాసేన్ మరో మెయిన్ రోల్ చేసింది. ఈ సినిమా సెట్స్ మీద ఆదిత్య పనితీరు పట్ల రామానాయుడు బాగా ఇంప్రెస్ అయ్యారు. అందుకే అతని దర్శకత్వంలో మరో సినిమా చెయ్యాలని ఆయన భావిస్తున్నారు. ఇప్పటికే భూపతిరాజా చెప్పిన కథ ఆయనకి బాగా నచ్చింది. "వెంకటేశ్‌కి ఆ కథ బాగుంటుంది. వాడు సరేనంటే ఈ సినిమాని ఆదిత్య డైరెక్షన్‌లో తీస్తాను' అని ఆయన చెప్పారు. అంటే వెంకటేశ్ ఈ ప్రాజెక్టుకి ఇంకా గ్రీన్ సిగ్నల్ ఇవ్వలేదు. ఇంకో సంగతేమంటే ఈ ప్రాజెక్ట్ విషయం ఆదిత్యకి ఇంకా తెలీకపోవడం. గతంలో నాగార్జున వంటి టాప్ హీరోతో రెండు సినిమాలు - 'నేనున్నాను', 'బాస్' చేసిన ఆదిత్య వాటి తర్వాత మరో పెద్ద హీరోని డైరెక్ట్ చేయలేదు. ఇప్పుడు వెంకటేశ్‌తో ప్రాజెక్ట్ కుదిరితే అతను ఏమేరకు ఆ అవకాశాన్ని సద్వినియోగం చేసుకుంటాడో చూడాలి. ఇక్కడ ఇంకో కిటుకు కూడా ఉంది. 19న రాబోతున్న 'ముగ్గురు' పెద్ద హిట్టు కాకపోయినా ఆదిత్య బాగా చేశాడనే పేరు వస్తేనే అతనితో చేసేందుకు వెంకటేశ్ ఒప్పుకునే వీలుంది. లేదంటే... అంతే సంగతులు.

Thursday, August 11, 2011

ఇంటర్వ్యూ: దగ్గుబాటి రామానాయుడు

"నిజానికి ఇతర భాషల్లో సినిమాలు తీసి ఆర్థికంగా పోగొట్టుకున్నానే కానీ లాభపడలేదు. ఈ విషయంలో నా ఇద్దరు కొడుకులూ నన్నెప్పుడూ తప్పు పట్టలేదు. ఆ విషయంలో నేను అదృష్టవంతుణ్ణి'' అని ఒకింత ఉద్వేగంగా చెప్పారు సీనియర్ ప్రొడ్యూసర్ డాక్టర్ దగ్గుబాటి రామానాయుడు. నవదీప్, అవసరాల శ్రీనివాస్, రాహుల్ హీరోలుగా; రీమాసేన్, శ్రద్ధాదాస్, సంజన, సౌమ్య హీరోయిన్లుగా సురేశ్ ప్రొడక్షన్స్ పతాకంపై తాజాగా ఆయన నిర్మించిన చిత్రం 'ముగ్గురు'. వి.ఎన్. ఆదిత్య దర్శకత్వం వహించిన ఈ చిత్రం చిత్రం ఈ నెల 19న విడుదలవుతున్న సందర్భంగా ప్రత్యేకంగా సంభాషించారు రామానాయుడు. ఆ విశేషాలు ఆయన మాటల్లోనే...

వైవిధ్యమైన కథతో రూపొందించిన వినోదాత్మక చిత్రం 'ముగ్గురు'. 2 గంటల 7 నిమిషాల సేపు ఆద్యంతం ఉత్కంఠభరితంగా సినిమా నడుస్తుంది. ఈమధ్య విడుదలైన ఆడియోకు వెరీగుడ్ రిపోర్ట్ వచ్చింది. ముఖ్యంగా టైటిల్ సాంగ్ చాలా బాగుందంటున్నారు. మొత్తం ఆరు పాటలు. ఇప్పటికే మా బేనర్‌లో చాలా సినిమాలు చేసిన కోటి ఈ సినిమాకీ మంచి మ్యూజిక్‌నిచ్చాడు. రచయితలు సాహిత్యం బాగా రాశారు. థియేటర్ ట్రైలర్స్‌కూ స్పందన బాగుంది. తమ పాత్రలకి ఆర్టిస్టులందరూ న్యాయం చేశారు. ముగ్గురు హీరోలు, హీరోయిన్లు హుషారుగా నటించారు. ఈ సినిమాని 37 రోజుల్లోనే పూర్తి చేశాం. అందులో 23 రోజులు మలేషియాలో షూటింగ్ చేశాం. నాలుగు రోజులు కారంచేడులో చిత్రీకరించాం.
ఆదిత్య బాగా తీశాడు
డైరెక్టర్ ఆదిత్య సినిమాని బాగా తెరకెక్కించాడు. అతను 'ప్రేమించుకుందాం రా'తో మరో రెండు మూడు సినిమాలకి మా బేనర్‌లో అసిస్టెంట్ డైరెక్టర్‌గా పనిచేశాడు. అతను సబ్జెక్ట్ చెప్పగానే బాగా నచ్చింది. చెప్పినదానికంటే బాగా తీశాడు. సాధారణంగా నా సినిమాని సెట్స్‌లో ఉండి గమనించడం అలవాటు కాబట్టి, ఆదిత్య ప్రతిభ ని సెట్స్ మీద చూశాను. వెరీగుడ్ డైరెక్టర్. నేను కథ బాగుంటేనే సినిమా తీస్తాను. ఇదివరకు కొన్ని సినిమాలు ఆడకపోవడానికి రకరకాల కారణాలున్నాయి. మునుపటి సినిమా 'ఆలస్యం అమృతం' కచ్చితంగా వంద రోజులు ఆడుతుందని తొలి కాపీ చూసినవాళ్లంతా అభిప్రాయపడ్డారు. చంద్రమహేశ్‌కి కచ్చితంగా హిట్ వస్తుందని ఆశించా. అయితే రాంగ్ టైమ్‌లో రిలీజ్ చెయ్యడం వల్లే అది ఆడలేదు.
అది విత్తనం, ఇది చెట్టు
ఫెయిల్యూర్స్ వచ్చినప్పుడే ధైర్యంగా ఉండాలనీ, సక్సెస్ వచ్చినప్పుడు ఒదిగి ఉండాలనీ నేర్చుకున్నా కాబట్టి నేనెప్పుడూ ఫెయిల్యూర్స్‌కి భయపడలేదు. గతంలో 'ద్రోహి' ఫ్లాపయినప్పుడు ఆర్థికంగా కష్టాలు ఎదుర్కొన్నా. కె. బాపయ్యకి డైరెక్టర్‌గా అది తొలి చిత్రం. దానికి పెట్టిన పది లక్షలూ పోయాయి. ఆ తర్వాత అక్కినేని నాగేశ్వరరావు, వాణిశ్రీతో 'ప్రేమనగర్' ప్లాన్ చేశా. దానికి పదిహేను లక్షలు ఖర్చుపెట్టాం. ఆ సినిమా జీవన్మరణ సమస్య. అది ఆడితే మద్రాసులోనే ఉంటాననీ, లేదంటే కేళంబాక్కం వెళ్లిపోతాననీ చెప్పా. ఎందుకంటే కేళంబాక్కంలో అప్పట్లో పొలాలు కొన్నా. అక్కడే వ్యవసాయం చేసుకోవాలనేది ఆలోచన. కారంచేడుకు మాత్రం పోకూడదనుకున్నా. ఎందుకంటే 'రామానాయుడు సినిమాల్లో అంతా పోగొట్టుకుని వచ్చేశాడురా' అనే మాటలు సొంతూరు వాళ్లనుంచి వినకూడదని. అయితే 'ప్రేమనగర్' పెద్ద హిట్టవడంతో కేళంబాక్కంకి వెళ్లాల్సిన పనిలేకపోయింది. అందుకే అంటుంటాను - మా సురేశ్ ప్రొడక్షన్స్‌కి 'రాముడు-భీముడు' విత్తనమైతే, 'ప్రేమగనర్' చెట్టు అని. ఈ రెండో సినిమాతో సినీ ఫీల్డ్‌లో నిలబడిపోయా. దాని హిందీ రీమేక్ 'ప్రేమనగర్'తో బాలీవుడ్‌లో అడుగుపెట్టి, అక్కడా సక్సెసయ్యా. అదే సినిమాని తమిళంలో 'వసంత మాళిగై'గా తీసి అక్కడా హిట్టుకొట్టా. ఆ తర్వాత కెరీర్‌లో కొన్ని ఆటుపోట్లు ఎదురైనా నేను చలించలేదు. ముందుకు సాగుతూ వచ్చా.
ఈ ఏడాదే పంజాబీ సినిమా
ఇప్పటికి పన్నెండు భారతీయ భాషల్లో సినిమాలు తీశా. పంజాబీలో కూడా సినిమా తీస్తే, అన్ని భారతీయ భాషా సినిమాల్ని తీసిన నిర్మాతగా పేరు సంపాదించుకుంటా. ఈ ఏడాదే పంజాబీలో సినిమా తీయబోతున్నా. నిజానికి ఇతర భాషల్లో సినిమాలు తీసి ఆర్థికంగా పోగొట్టుకున్నానే కానీ లాభపడలేదు. సినిమా మీద తపనతోటే ఆ భాషల్లోనూ మంచి సినిమాలు తీయాలనుకుని తీశా. ఈ విషయంలో నా ఇద్దరు కొడుకులూ నన్నెప్పుడూ తప్పు పట్టలేదు. ఆ విషయంలో నేను అదృష్టవంతుణ్ణి. పైగా వైజాగ్ స్టూడియోని చూసుకోవడానికి అక్కడకి వెళ్తానన్నా వాళ్లు ఒప్పుకోవడం లేదు. అందరం కలిసి ఇక్కడే ఉండాలని పట్టుబడుతున్నారు.
అన్ని రకాలుగా హ్యాపీ
తదుపరి సినిమాని భూపతిరాజా కథతో చెయ్యాలని అనుకుంటున్నా. అన్నీ కుదిరితే వెంకటేశ్ హీరోగా, ఆదిత్య దర్శకత్వంలో దాన్ని తీస్తా. ఆ తర్వాత నా మనవడు నాగచైతన్య హీరోగా వచ్చే ఏడాది జనవరి నుంచి మరో సినిమా ఉంటుంది. రానా హిందీలో బిజీ అయ్యేటట్లున్నాడు. ఇప్పుడక్కడ రాంగోపాల్‌వర్మ తీస్తున్న 'డిపార్ట్‌మెంట్'లో నటిస్తున్నాడు. సురేశ్‌బాబు మరో కొడుకు అభిరామ్ కూడా నటించేందుకు రెడీ అంటున్నాడు. రెండేళ్ల తర్వాత అతనూ హీరో అవుతాడు. 'మొదట మన బేనర్‌లోనే చేస్తా తాతా' అంటున్నాడు. నేను, నా తర్వాత నా కొడుకులు, ఇప్పుడు నా మనవళ్లు ఈ రంగంలోనే సక్సెస్ సాధించి, ముందుకెళుతుండటం ఎంతో సంతోషంగా అనిపిస్తుంటుంది. సినిమా రంగానికి సంబంధించి అత్యున్నత పురస్కారమైన దాదాసాహెబ్ ఫాల్కే అందుకున్నా. ఇక ప్రత్యేకంగా నేను సాధించాల్సిందంటూ ఏమీ లేదు.

Tuesday, August 2, 2011

టర్నింగ్ పాయింట్: చంద్రబోస్

"నేను గాయకుణ్ణి కావాలనుకొని, సొంతంగా కొన్ని పాటలు రాసి వాటిని పాడుకునేవాణ్ణి. నా ఫ్రెండ్ ఒకతను వాటిని చూసి, అవి బాగున్నాయనీ, గేయ రచయితగా కెరీర్‌ని మలచుకుంటే బాగుంటుందనీ అభిప్రాయపడ్డాడు. అప్పుడు కొత్తగా సినిమాని ప్లాన్ చేసిన డైరెక్టర్ ముప్పలనేని శివను కలిశాం. ఆ తర్వాత ఆ సినిమాని నిర్మిస్తున్న గొప్ప నిర్మాత డి. రామానాయుడు గారినీ, దానికి సంగీత దర్శకురాలైన ఎం.ఎం. శ్రీలేఖనూ కలిశాం. ఆమె నాకో ట్యూన్ ఇచ్చింది. ఆ సినిమా శ్రీకాంత్ హీరోగా నటించిన 'తాజ్‌మహల్'. అప్పుడు నేను రాసిన పాట 'మంచుకొండల్లోన చంద్రమా చందనాలు చల్లిపో..'. ఆ అనుభవాన్ని మాటల్లో వర్ణించలేను. నా తొలి సినిమాలోనే సిరివెన్నెల సీతారామశాస్త్రి, భువనచంద్ర వంటి గేయ రచయితల సరసన నాకూ చోటు లభించిండం నాకు దక్కిన గొప్ప భాగ్యం. నేను బాగా అభిమానించే బాలు, చిత్ర నా పాటల్ని పాడారు. అదో గొప్ప అనుభవం.
ఆ తర్వాత నా జీవితంలో మరో టర్నింగ్ పాయింట్ చోటు చేసుకుంది. నేను రాసిన ఓ పాట షూటింగ్ సందర్భంగా సంజీవయ్య పార్క్‌కి వెళ్లా. అక్కడ కొరియోగ్రాఫర్ కంపోజ్ చేస్తున్న మూవ్‌మెంట్స్ నన్ను బాగా ఆకట్టుకున్నాయి. ఆమె పేరు సుచిత్ర. ఆ తర్వాత కొద్ది రోజులకే ఆమె నా భార్య అయ్యింది.
ఇప్పుడు గేయ రచయితగా నా కెరీర్‌లో 16వ యేడు నడుస్తోంది. ఈ కాలంలో చాలా అవార్డులే సంపాదించా. నా కెరీర్ ఎంతో సంతృప్తికరంగా, సంతోషకరంగా కొనసాగుతోంది. అయితే దాని వెనుక ఎంతో శ్రమ ఉన్నదనేది మరచిపోకూడదు."

Monday, July 18, 2011

న్యూస్: రానాని ప్రేక్షకులు ఇష్టపడతారా?

తొలి రెండు సినిమాలు బాక్సాఫీసు వద్ద పెద్దగా ప్రభావం చూపలేకపోవడంతో మూడో సినిమా మీద ప్రాణమే పెడుతున్నాడు రానా దగ్గుబాటి. శేఖర్ కమ్ముల రూపొందించిన 'లీడర్'లో ముఖ్యమంత్రిగా నటించి బాగానే చేశాడనిపించుకున్న ఈ రామానాయుడి మనవడు, సురేశ్‌బాబు కుమారుడు పూరి జగన్నాథ్ సినిమా 'నేను నా రాక్షసి' కచ్చితంగా తనకి కమర్షియల్ బ్రేక్ ఇస్తుందని ఆశించాడు. కానైతే ఆ సినిమా ఫ్లాప్ అనిపించుకుంది. పైగా ఆ సినిమా వల్ల అతని కంటే ఎక్కువగా ఇలియానాకే పేరు వచ్చింది. ఈ నేపథ్యంలో 'నా ఇష్టం' అనే సినిమా చేస్తున్నాడు రానా. ఇందులో అతని జోడీగా 'బొమ్మరిల్లు' బ్యూటీ జెనీలియా నటిస్తుండటం విశేషం. 'సింహా'తో హిట్టు కొట్టిన పరుచూరి కిరీటి నిర్మిస్తున్న ఈ సినిమా ద్వారా ప్రకాశ్ తోలేటి డైరెక్టర్‌గా పరిచయమవుతున్నాడు. పర్సనాలిటీ పరంగా సీరియస్ కేరక్టర్స్‌కి పనికి వస్తాడనిపించే రానా 'నా ఇష్టం'లో రఫ్ రోల్ చేస్తున్నాడు. ఈ సినిమాతోనైనా ప్రేక్షకులు తనని ఇష్టపడేలా చేసుకోవాలని తపిస్తున్నాడు. అతని ఆశ నెరవేరుతుందా?

Sunday, July 3, 2011

న్యూస్: ఆదిత్యకు అగ్ని పరీక్ష 'ముగ్గురు'

దర్శకుడు వి.ఎన్. ఆదిత్య ఆశలన్నీ 'ముగ్గురు' మీదే ఉన్నాయి. 'ముగ్గురు' అనేది ఆయన డైరెక్ట్ చేస్తున్న కొత్త సినిమా. డి. రామానాయుడు ఈ సినిమా నిర్మాత. టైటిల్ రోల్స్‌ని నవదీప్, 'హ్యాపీడేస్' ఫేం రాహుల్, అవసరాల శ్రీనివాస్ పోషిస్తున్నారు. రీమాసేన్, శ్రద్ధాదాస్, సంజన, సౌమ్య హీరోయిన్లు. మొదట ఈ సినిమాకి '3 ఇడియట్స్' అనే టైటిల్ పెట్టి తర్వాత ఎందుకనో 'ముగ్గురు'గా మార్చారు. జంధ్యాల దర్శకత్వంలో ఒకప్పుడు రామానాయుడు నిర్మించిన సూపర్ హిట్ మూవీ 'అహ నా పెళ్లంట'కు ఇది సీక్వెల్ అని వినికిడి. దానికీ, దీనికీ తేడా... ఆ సినిమాలో హీరో రాజేంద్రప్రసాద్ ఒక్కరే అయితే ఇందులో ముగ్గురు హీరోలు. దర్శకుడిగా ఆదిత్యకు ఈ సినిమా అగ్ని పరీక్ష. 'మనసంతా నువ్వే', 'నేనున్నాను' సినిమాల తర్వాత ఆయనకు మళ్లీ హిట్టు లేదు. నాగార్జునతో చేసిన రెండో సినిమా 'బాస్' నుంచి ఇటీవల సుమంత్‌తో చేసిన 'రాజ్' దాకా అన్నీ బాక్సాఫీసు వద్ద బోల్తా కొట్టినవే. అందుకే ఈసారి మినిమం గ్యారంటీ ఉండే కామెడీ సబ్జెక్టుని ఎంచుకున్నాడు ఆదిత్య. కామెడీ ఆఫ్ ఎర్రర్స్‌తో నడిచే 'ముగ్గురు' కచ్చితంగా హిట్టయి, తన కెరీర్‌కి ఊపిరి పోస్తుందని ఆయన గట్టిగా నమ్ముతున్నాడు.

విశ్లేషణ: హీరో వెంకటేశ్ కెరీర్


సరికొత్త ఇమేజ్ కోసం తపన
ఇవాళ పెద్ద హీరోలకు ఒక్కో సినిమా ఒక్కో అగ్ని పరీక్ష. యువతరం హీరోలు పోటీగా విజయపథంలో దూసుకుపోతుంటే మరోవైపు హీరో స్థాయిని పట్టించుకోకుండా పెద్ద హీరోల సినిమాల్ని (బాగో లేకపోతే) తిప్పికొడుతున్నారు ప్రేక్షకులు. అందువల్ల చేసే ప్రతి సినిమాకూ ఆ హీరోలు చాలా జాగ్రత్తలు తీసుకోవాల్సి వస్తోంది. మిగతా సీనియర్ టాప్ హీరోలతో పోలిస్తే వెంకటేశ్‌ది కాస్త విభిన్న శైలి. ఇటీవలి కాలంలో ఏ పెద్ద హీరో చేయనన్ని వైవిధ్యమైన పాత్రలు పోషిస్తూ వస్తున్నారాయన. 'ఈనాడు', 'నమో వెంకటేశ', 'నాగవల్లి' సినిమాల్లో ఒకదానికొకటి పొంతనలేని పాత్రలు చేసిన ఆయన ఇప్పుడు ఆ మూడింటికీ భిన్నమైన 'బాడీగార్డ్' పాత్రని చేస్తున్నారు. సబ్జెక్టు విషయంలో ఆచితూచి వ్యవహరిస్తూ రావడం వల్ల పాతికేళ్ల సినీ జీవితంలో ఫెయిల్యూర్ల కంటే సక్సెస్సలనే పొందుతూ వచ్చారు.
విలక్షణ నటుడు
తొలి చిత్రం 'కలియుగ పాండవులు' (1986)తో పర్వాలేదనిపించిన వెంకటేశ్.. తమ పక్కింటి కుర్రాడిలా అనిపించేసరికి జనం ఆదరించారు. తండ్రి దగ్గుబాటి రామానాయుడు అప్పటికే పేరుపొందిన నిర్మాతే అయినా ఆయన ప్రభావం నుంచి అతి త్వరగా బయటపడి, హీరోగా తనకంటూ ఓ స్థాయిని ఏర్పరచుకోగలిగారు. హీరోగా జనానికీ, నటుడిగా విమర్శకులకూ ఎప్పుడూ ఫేవరేట్‌గానే ఉంటూ వస్తోన్న ఆయనకు స్వర్ణకమలం (1988), శత్రువు ('91), చంటి ('92), ధర్మచక్రం ('96), గణేశ్ ('98), నువ్వు నాకు నచ్చావ్ ('01), మల్లీశ్వరి ('04), ఆడవారి మాటలకు అర్థాలే వేరులే ('07) తదితర సినిమాలు బాగా పేరు తెచ్చిపెట్టాయి. టాప్ హీరోగా ఎదిగిన ఓ నటుడు నెగటివ్ షేడ్స్ ఉన్న పాత్ర చేయడం ఆయన తరానికి సంబంధించినంత వరకు ఓ ప్రయోగం, ఓ సాహసం. 'పవిత్రబంధం' (1996)తో ఆ సాహసం చేసి నటుడిగా మరో మెట్టు పైకెక్కారు. తనది గ్లామరస్ ఫేస్ కాకపోయినా ఎప్పుడూ చిలిపిగా నవ్వుతున్నట్లుండే ముఖంతో బొబ్బొలి రాజా, ప్రేమంటే ఇదేరా, కలిసుందాం రా, నువ్వు నాకు నచ్చావ్ చిత్రాల్లో లవర్ బాయ్‌గా మెప్పించారు. నిర్మాతగా తండ్రి సపోర్ట్ ఎంతగా ఉన్నా నటుడిగా అంచెలంచెలుగా ఎదిగి నిర్మాతలకు, బయ్యర్లకు హాట్ ఫేవరేట్ అయ్యారు. తను చేసిన ప్రయోగాల్లో అత్యధిక భాగం సొంత సంస్థలో చేసినవే. ఈ రకంగా తనలోని నటుణ్ణి తృప్తిపరచుకోవడంతో పాటు కమర్షియర్ ఎంటర్‌టైనర్స్ చేసి, బయ్యర్లను తృప్తిపరచడం అలవాటుగా చేసుకున్నారు. అందుకే తొలినాళ్లలో ప్రతి యేటా కనీసం ఓ సూపర్‌హిట్ సినిమాని ఆయన అందించారు. 1990లో వచ్చిన 'బొబ్బిలి రాజా' సినిమా ఆయనకు అమితమైన స్టార్‌డం తీసుకొచ్చింది. ఆ తర్వాత కూలీ నెం.1 ('91), చంటి ('92), సుందరకాండ ('92), అబ్బాయిగారు ('93) వంటి హిట్ సినిమాలు చేశారు. తిరిగి 1996 నుంచి వరుస హిట్లతో మిగతా టాప్ స్టార్లకు నిద్రలేకుండా చేశారు. ఇంట్లో ఇల్లాలు వంటింట్లో ప్రియురాలు, పవిత్రబంధం, పెళ్లి చేసుకుందాం, సూర్యవంశం, రాజా చిత్రాలు మహిళా ప్రేక్షకుల్ని విపరీతంగా ఆకట్టుకోగా ప్రేమించుకుందాం రా, ప్రేమంటే ఇదేరా, కలిసుందాం రా, నువ్వు నాకు నచ్చావ్, మల్లీశ్వరి సినిమాలతో యువతనూ ఆయన బాగా ఆకర్షించగలిగారు.
ఫ్యామిలీ సినిమాలకే ప్రాధాన్యం
మిగతా టాప్ హీరోలతో పోలిస్తే ఆయన కొన్నేళ్లుగా చేసిన సినిమాల్లో ఫ్యామిలీని టార్గెట్ చేసుకున్నవే ఎక్కువ. 'ఇంట్లో ఇల్లాలు వంటింట్లో ప్రియురాలు' నుంచి దీనిని మనం గమనించవచ్చు. గణేశ్, జయం మనదేరా, జెమిని, ఘర్షణ, లక్ష్మీ, తులసి వంటి కొద్ది సినిమాల్లోనే యాక్షన్ ఛాయలు కనిపిస్తాయి. మిగతావన్నీ ఫ్యామిలీ కోసం ఉద్దేశించిన ఫార్ములా సినిమాలే. అదే తొలి రోజుల్లో అయితే రక్త తిలకం, ధృవనక్షత్రం, బ్రహ్మపుత్రుడు, బొబ్బిలి రాజా, శత్రువు, చినరాయుడు, కొండపల్లి రాజా, ధర్మచక్రం వంటి యాక్షన్ ప్రధాన సినిమాలు చాలానే చేశారాయన. కొన్ని యాక్షన్ సినిమాలు బాక్సాఫీసు వద్ద ఫెయిలైతే అయివుండవచ్చు గాక.. యాక్షన్ సినిమాల వల్లనే ఆయన టాప్ హీరోగా ఎదిగారన్నది నిర్వివాదం. యాక్షన్ సినిమాల్లో చేయడం శరీరానికి ఎక్కువ శ్రమ. అందువల్లనో, ఏమో ఆయన లైటర్ వీన్ సినిమాల్నే ఎక్కువగా ప్రిఫర్ చేస్తూ వస్తున్నారు. ఆయన ఇటీవలి సినిమాలు 'చింతకాయల రవి', 'నమో వెంకటేశ' ఇదే కోవలో ఉండటం గమనార్హం. అలాగే రీమేక్ సినిమాలకూ ఆయన పెద్దపీట వేస్తున్నారు.
టూటౌన్ రౌడీ, చంటి, సుందరకాండ, అబ్బాయిగారు, రాజా, శీను, వాసు, జెమిని, వసంతం, ఘర్షణ, సంక్రాంతి, ఈనాడు, నాగవల్లితో పాటు ఇప్పుడు చేస్తున్న బాడీగార్డ్ కూడా రీమేక్ సినిమానే. దీనికి తోడు పరభాషా దర్శకులకు ఆయన చాలా అవకాశాలు ఇస్తున్నారు. విక్రమన్, ఉదయశంకర్, కరుణాకరన్, చరణ్, గౌతం మీనన్, సెల్వరాఘవన్, పి. వాసు తదితర తమిళ దర్శకులతో ఆయన చేశారు. అయితే యాక్షన్ సినిమాల సంఖ్య తగ్గించి, ఫ్యామిలీ సినిమాలు ఎక్కువ చేస్తూ రావడం వల్ల మాస్ ప్రేక్షకుల్లో ఆయన ఇమేజ్ తగ్గిందన్నది విశ్లేషకుల అభిప్రాయం. కన్నడంలో 'ఆప్త రక్షక' హిట్టవడానికీ, తెలుగులో 'నాగవల్లి' ఫ్లాపవడానికీ నేటివిటీ సమస్య ప్రధాన కారణం. రానున్న మలయాళ 'బాడీగార్డ్' రీమేక్ ఆయన ఇమేజ్‌ని ఏ మేరకు నిలుపుతుందో వేచి చూడాల్సిందే.

Monday, June 6, 2011

వ్యక్తిత్వం: డి. రామానాయుడు

అవిశ్రాంత సినీ శ్రామికుడు
నిజం. ఆయన అవిశ్రాంత సినీ శ్రామికుడు. డెబ్భై ఐదేళ్ల నవ యవ్వనుడు. చిత్ర నిర్మాతగా ఎన్నడో గిన్నిస్ బుక్ ఆఫ్ వరల్డ్ రికార్డ్స్‌లో చోటు పొంది, నలభై ఎనిమిదేళ్లుగా సినిమాలు నిర్మిస్తూ, నేటి తెలుగు చిత్రసీమ మూలస్తంభాల్లో ఒకరుగా పేరుపొందిన మూవీ మొఘల్. ఆయనే దాదాసాహెబ్ ఫాల్కే అవార్డు గ్రహీత డాక్టర్ దగ్గుబాటి రామానాయుడు. నలభై ఏడేళ్ల క్రితం ఆయన నెలకొల్పిన సురేశ్ మూవీస్ తెలుగు చిత్ర నిర్మాణ సంస్థల్లో నేటికీ అగ్రగామిగా వెలుగొందుతుండటం అసాధారణం.
ప్రకాశం జిల్లా కారంచేడు నుంచి మద్రాసు వెళ్లి 'అనురాగం' చిత్రాన్ని భాగస్వామితో కలిసి నిర్మించడం ద్వారా 1963లో చిత్రసీమలో అడుగుపెట్టిన ఆయన ఆ మరుసటి ఏడాదే సోలోగా ఎన్టీఆర్‌తో 'రాముడు భీముడు' నిర్మించి, సంచలన నిర్మాతగా మారిన సంగతి ఓ చరిత్ర. ఆరేళ్ల తర్వాత కష్టాల కడలి ఈదుతూ ఇక సినిమాలకు 'రాం రాం' చెప్పక తప్పదనుకునే పరిస్థితిని ఎదుర్కొని, అక్కినేని-వాణిశ్రీ జంటగా నిర్మించిన 'ప్రేమనగర్'తో పడిలేచిన కెరటమైన ఆయన, ఇక వెనుతిరిగిందే లేదు. శ్రీకృష్ణ తులాభారం, చక్రవాకం, సోగ్గాడు, సెక్రటరీ, సావాసగాళ్లు, మండే గుండెలు, దేవత, ముందడుగు, ప్రతిధ్వని, అహ నా పెళ్లంట, ఇంద్రుడు చంద్రుడు, బొబ్బిలి రాజా, కలిసుందాం రా, మల్లీశ్వరి వంటి ఎన్నో సినిమాలు ఆయన నిర్మాణ దక్షతకు నిదర్శనాలు.
పెద్ద కుమారుడు సురేశ్‌ని తన వారసుడిగా నిర్మాతని చేసిన ఆయన చిన్న కుమారుడు వెంకటేశ్‌ని 'కలియుగ పాండవులు'తో హీరోని చేశారు. ఇవాళ ఆ ఇద్దరూ తమ తమ రంగాల్లో అగ్ర స్థాయిని ఆస్వాదిస్తుండటం తెలిసిందే.
ఓ నిర్మాతగా ఎంతోమంది తారల్నీ, సాంకేతిక నిపుణుల్నీ పరిచయం చేసిన ఆయన తన సేవల్ని నిర్మాణ రంగం బయట కూడా విస్తరింపజేశారు. సినిమా షూటింగుల కోసం రామానాయుడు స్టూడియోస్‌ని నెలకొల్పిన ఆయన అందులో సినిమా పోస్ట్ ప్రొడక్షన్ సౌకర్యాల్నీ ఏర్పాటు చేశారు. ఇక డిస్ట్రిబ్యూషన్, ఎగ్జిబిషన్ రంగంలోనూ ఆయన అగ్రగామిగా వెలుగొందుతున్నారు.

హైదరాబాద్‌తో పాటు వైజాగ్‌నీ సినీ హబ్ చేయాలనే సంకల్పంలో భాగంగా పాతికెకరాల సువిశాల స్థలంలో సముద్రానికి అతి దగ్గరగా ఆయన నెలకొల్పిన రామానాయుడు స్టూడియోస్ ఇప్పుడు ఎంతోమంది నిర్మాతల్ని ఆకర్షిస్తోంది. నటుడిగానూ ఆయన కొన్ని సినిమాల్లో కనిపించారు. ఇటీవలి కాలంలోనే 'హోప్' అనే సినిమాలో ప్రధాన భూమిక ధరించి, ఉత్తమ నటనని ప్రదర్శించి, విమర్శకుల ప్రశంసల్పి సైతం అందుకున్న ప్రజ్ఞాశాలి రామానాయుడు. ప్రస్తుతం రాజకీయ రంగానికి దూరంగా ఉన్నప్పటికీ ఉన్న కొద్ది సంవత్సరాల్లో ఆ రంగంలోనూ తనదైన ముద్ర వేసిన సేవాతత్పురుడు. బాపట్ల పార్లమెంటు సభ్యునిగా పదవిలో ఉన్న కాలంలో ఆయన చేపట్టిన ప్రజా సేవా కార్యక్రమాలు నిరుపమానం. ఇందుకోసం ఆయన ఎంపీ నిధుల్నే కాక సొంత డబ్బునీ ఖర్చు చేసి తన సేవా నిరతిని చాటుకున్నారు.
అటువంటి ఆ నిరంతర సినీ పథికుడు ప్రస్తుతం మరో సినీ నిర్మాణంలో తలమునకలై ఉన్నారు. నవదీప్, శ్రీనివాస్ అవసరాల, రాహుల్ హీరోలుగా వి.ఎన్. ఆదిత్య దర్శకత్వం వహిస్తున్న ఈ చిత్రానికి సంబంధించిన అన్ని వ్యవహారాల్నీ చురుగ్గా దగ్గరుండి చూసుకుంటున్నారు. ఆద్యంతం వినోదభరితంగా తయారవుతున్న ఈ సినిమాతో నిర్మాతగా మరో విజయాన్ని సాధించేందుకు సిద్ధమవుతున్న రామానాయుడు సోమవారం తన 76వ పుట్టిన రోజును బ్యాంకాక్‌లో అదే సినిమా సెట్స్‌పై జరుపుకోబోతున్నారు. 
(నేడు డాక్టర్ రామానాయుడు పుట్టిన రోజు)

Thursday, September 9, 2010

సినిమా: రామానాయుడుకు దాదాసాహెబ్ ఫాల్కే అవార్డు


ప్రపంచంలోనే అత్యధిక సంఖ్యలో సినిమాలు నిర్మించిన వ్యక్తిగా గిన్నిస్ బుక్ ఆఫ్ వరల్డ్ రికార్డ్స్ లో చోటు సంపాదించిన డి. రామానాయుడు 2009 సంవత్సరానికి గాను ప్రతిష్ఠాత్మకమైన దాదాసాహెబ్ ఫాల్కే అవార్డును పొందారు. సినీ రంగానికి సంబంధించి భారత ప్రభుత్వం ఇచ్చే అత్యున్నత పురస్కారం ఇదే. 19 సంవత్సరాల తర్వాత ఈ అవార్డు మళ్లీ ఓ తెలుగు సినిమా వ్యక్తికి లభించింది. చివరిసారి 1991లో మహానటుడు అక్కినేని నాగేశ్వరరావు ఈ అవార్డును అందుకున్నారు.
అక్టోబరులో గోవాలో జరిగే ఇంటర్నేషనల్ ఫిల్మ్ ఫెస్టివల్ ఆఫ్ ఇండియాలో ఆయనకు ఈ అవార్డును ప్రదానం చేస్తారు. ఈ అవార్డు కింద స్వర్ణ కమలం, 10 లక్షల రూపాయల నగదు బహుమతి, శాలువాను రామానాయుడు అందుకుంటారు.
భారతదేశంలో ఎన్ని భాషల్లో సినిమాలు తయారవుతున్నాయో అన్ని భాషల్లోనూ సినిమాలు తీసిన నిర్మాతగా కూడా రామానాయుడు ఓ అరుదైన ఘనతని పొందారు. తెలుగులో 78 సినిమాలు, హిందీలో 20 సినిమాలు నిర్మించిన ఆయన బెంగాలీ, తమిళం, కన్నడ, మలయాళ, గుజరాతీ, మరాఠీ, భోజిపురి భాషల్లోనూ సినిమాలు తీశారు.
ఆయన నిర్మించిన చిత్రాల్లో తెలుగులో రాముడు-భీముడు, ప్రేమనగర్, దేవత, అహ నా పెళ్లంట, బొబ్బిలిరాజా, ప్రేమించు సినిమాలు; హిందీలో ప్రేమ్ నగర్, దిల్ దార్, తోఫా, హమ్ ఆప్కే దిల్ మే రహతే హై సినిమాలు; బెంగాలీలో 'ఆశుక్', తమిళంలో 'వసంత మాళిగై', 'మధుర గీతమ్' సినిమాలు; ఇటీవల భోజిపురిలో తీసిన 'శివ' ఆయనకు మంచి పేరు తెచ్చాయి.
ప్రకాశం జిల్లా (అప్పట్లో గుంటూరు జిల్లా) కారంచేడులో 1936 జూన్ 6న జన్మించిన రామానాయుడు 1962లో మద్రాసుకు వెళ్లి తెలుగు సినీరంగలో కాలుమోపారు. మొదట అనురూపా ఫిలిమ్స్ అనే నిర్మాణ సంస్థలో భాగస్వామి అయ్యి 'అనురాగం' సినిమా నిర్మాణంలో పాలు పంచుకున్నారు. కానీ టైటిల్స్ లో మాత్రం ఆయన పేరు వేయలేదు. తర్వాత పెద్ద కుమారుడు సురేశ్ పేటిట సురేశ్ ప్రొడక్షన్స్ అనే నిర్మాణ సంస్థని సొంతంగా స్థాపించిన రామానాయుడు తొలియత్నంలోనే ఎన్టీఆర్ ద్విపాత్రాభినయంలో 'రాముడు-భీముడు' (1964) చిత్రాన్ని నిర్మించి ఘనవిజయాన్ని అందుకున్నారు. 'శ్రీకృష్ణ తులాభారం' (1966) వంటి మరో విజయం తర్వాత వరుసగా ఐదు ఫ్లాపులు చవిచూసిన ఆయనను 1971లో అక్కినేని హీరోగా వచ్చిన 'ప్రేమనగర్' సినిమా నిలబెట్టింది. అది సూపర్ డూపర్ హిట్ కావడంతో రామానాయుడు మళ్లీ వెనుతిరిగి చూసుకోనవసరం లేకపోయింది.
తెలుగు చిత్రసీమ హైదరాబాదుకు తరలి వచ్చాక రామానాయుడు స్టూడియోస్ ని నిర్మించి, సినిమా షూటింగులకు కావాల్సిన ఫ్లోర్లతో పాటు పోస్ట్ ప్రోడక్షన్ కి అవసరమైన అన్ని సదుపాయల్నీ ఏర్పాటు చేశారు. ఈమధ్యే విశాఖపట్నంలో 25 ఎకరాల సువిశాల స్థలంలో స్టూడియోని నిర్మించి అక్కడ కూడా సినిమాలు నిర్మించే ఏర్పాట్లు చేశారు. రామానాయుడుకు దాదాసాహెబ్ ఫాల్కే అవార్డు రావడం పట్ల చిత్రసీమకు చెందిన పలువురు హర్షం వ్యక్తం చేశారు. వారిలో అక్కినేని, దాసరి, జమున, వాణిశ్రీ, వి.బి. రాజేంద్రప్రసాద్, కె. రాఘవేంద్రరావు, మోహన్ బాబు, సి. నారాయణరెడ్డి వంటి వాళ్లున్నారు.
అవార్డుకు ఆని విధాలా తగిన మనిషి: అక్కినేని
ఈ అవార్డుకు ఆని విధాలా తగిన మనిషి రామానాయుడు. ఆయన కేవలం నిర్మాత కాదు. బహుముఖ ప్రజ్ఞాశాలి. సినిమాకి సంబంధించిన అన్ని విషయాలలోనూ ఆయనకు అవగాహన ఉంది. ఏ వేషానికి ఎవరు సరిపోతారో ఆయనకు బాగా తెలుసు. సామాజిక స్పృహ ఉండి, ప్రేక్షకుల నాడి తెలిసిన నిర్మాత. ఆయన తీసినా సినిమాల్లో సామాజిక స్పృహ ఉంటుంది. 'ప్రేమనగర్' పైకి రొమాంటిక్ సినిమాగా కనిపిస్తుంది కానీ అందులో సామాజిక స్పృహ ఉంది. ఒక డబ్బున కురాడు తప్పుడు రీతిలో పెరిగితే ఎట్లా తయారవుతాడో అందులో నేను పోషించిన కల్యాణ్ పాత్ర చెబుతుంది. ఆయనకు దాదాసాహెబ్ ఫాల్కే అవార్డు రావడం నాకు చాలా ఆనందంగా ఉంది.
నన్ను 'సినీ సత్యభామ'ను చేసింది ఆయనే: జమున
నన్ను 'సినీ సత్యభామ'ని చేసింది నాయుడుగారే. ఆయన బేనరులో నిర్మించిన తొలి సినిమా 'రాముడు-భీముడు'లోనూ, మూడో సినిమా 'శ్రీకృష్ణ తులాభారం'లోనూ నాయికగా నటించే అవకాశం నాకు కలిగింది. రెందూ సూపర్ హిట్టయ్యాయి. నాకూ మంచి పేరొచ్చింది. ముఖ్యంగా 'శ్రీకృష్ణ తులాభారం'లో చేసిన సత్యభామ పాత్ర ఎంత పేరు తెచ్చిందో చెప్పలేను. ఆ సినిమా తర్వాత సత్యభామ పాత్రంటే జమునే వేయాలి అన్నంతగా జనంలో ముద్రపడిందంటే ఆ క్రెడిట్ నాయుడుగారిదే. ఆయనకు ఫాల్కే అవార్డు రావడం ఒక తెలుగు నటిగా నాకెంతో గర్వంగా ఉంది.

Sunday, June 27, 2010

KOTHIMOOKA: Fourth Trial for AVS



దర్శకుడిగా నిలదొక్కుకోవాలని తపిస్తున్న నటుడు ఏవీయస్, ఆ దిశగా నాలుగో యత్నం చేస్తున్నారు. భారీకాయుడు కృష్ణుడు హీరోగా, బ్యూటీ గర్ల్ శ్రద్ధా ఆర్య హీరోయిన్‌గా ఆయన 'కోతిమూక' డైరెక్ట్ చేశారు. తులసి పూజిత ఫిలిమ్స్ బ్యానర్‌పై వెంకట్ జగదీష్ అనే నూతన నిర్మాత ఈ ఫిలింని నిర్మిస్తున్నారు.
కమెడియన్‌గా తనకంటూ ప్రత్యేక ఇమేజ్ పొందిన ఏవీయస్ 'సూపర్ హీరోస్'తో డైరెక్టర్‌గా తన జర్నీ ప్రారంభించారు. ఆ సినిమాలో బ్రహ్మానందం, ఆయనా టైటిల్ రోల్స్ చేశారు. రామానాయుడు నిర్మించిన ఆ సినిమా కమర్షియల్‌గా సక్సెస్ సాధించలేదు. ఆ తర్వాత తనే సొంతంగా 'ఓరి నీప్రేమ బంగారం గానూ' అనే సినిమాని ఆయన తీశారు. సూపర్ హిట్ ఫిల్మ్ 'నిన్నే పెళ్లాదతా'లో 'ఎటో వెళ్లిపోయింది మనసు' పాటతో పాపులర్ అయిన సింగర్ రాజేశ్‌ని ఈ సినిమాతో ఆయన హీరోగా పరిచయం చేశారు. కానీ ఆ సినిమా కూడా ఆయనకు కమర్షియల్‌గా అసంతృప్తినే మిగిల్చింది. ఈసారి నలుగురు మిత్రుల కథకి కాస్త సందేశాన్ని మేళవించి 'రూంమేట్స్' సినిమాని డైరెక్ట్ చేశారు ఏవీయస్. కొన్ని వర్గాల నుంచి ప్రశంసలు పొందినప్పటికీ ఈసారీ సక్సెస్ రుచి చూడలేకపోయారు. దాంతో తనలోని దర్శకుడికి మూడున్నరేళ్లు విరామం ఇచ్చిన ఆయన ఇప్పుడు 'కోతిమూక'తో మరోసారి పరీక్షకి సిద్ధమయ్యారు.
'వినాయకుడు', 'విలేజ్‌లో వినాయకుడు' సినిమాలతో కొత్త తరహా హీరోగా స్థూలకాయుడైన కృష్ణుడు సక్సెస్ కావడంతో అతణ్ణే హీరోగా పెట్టి 'కోతిమూక' రూపొందించారు ఏవీయస్. "కోతి అంటూ హేళనగా చూస్తారు కానీ, ఆ కోతులే లంకకు వారధి కట్టాయనీ, శ్రీరామునికి ఘనవిజయం చేకూర్చి పెట్టాయనీ రామాయణం చెబుతుంది. అలాగే మా చిత్రంలోని కోతిమూక కూడా ఇతరులకు ఉపయోగపడే పనులు చేస్తుంది" అని తెలిపారు ఏవీయస్. అందుగు తగ్గట్లే టైటిల్‌కి 'నాట్ ఓన్లీ కామెడీ' అనే ట్యాగ్ లైన్‌ని ఉపయోగించారు. ఈ సినిమాతో డైరెక్టర్‌గా ఏవీయస్ విజయాన్ని సాధించడం ఖాయమని స్టార్ కమెడియన్ బ్రహ్మానందం సహా ఆ సినిమాకి పనిచేసిన వాళ్లంతా గట్టి నమ్మకాన్ని వ్యక్తం చేస్తున్నారు. రెట్టించిన బలంతో, గట్టి పట్టుదలతో ఏవీయస్ చేసిన ఈ ప్రయత్నం ఫలించే అవకాశాలు ఎక్కువగా కనిపిస్తున్నాయి. జూలై 9న 'కోతిమూక' మనముందుకు వస్తోంది.

Monday, June 21, 2010

Memories of Ramanaidu

అప్పుడప్పుడు రామానయుడు గారితో ఆయన అఫీసులో కలిసి కూర్చొని సినిమా సంగతులు మాట్లాడుతుండటం మాకు అలవాటు. ఈమధ్య అలాగే కూర్చున్నప్పుడు తన తొలినాటి సినిమా సంగతులు చెప్పుకొచ్చారు. వాటిలోని ఒకట్రెండు ఇంటరెస్టింగ్ పాయింట్స్.
*నేను సినిమా తియ్యాలని మద్రాసు వెళ్లినప్పటికీ, ఇప్పటికీ చిత్రసీమలో ఎంతో మార్పు వచ్చింది. మొదటిసారి కొందరు మిత్రులతో కలిసి ఒక సినిమా తీశా. పెట్టుబడి ఎంతో తెలుసా? 20 వేలు. మీకో విషయం తెలుసా? నేను కూడా హీరో అవ్వాలనుకున్నా.
*మద్రాసు వెళ్ళిన కొత్తలో మా బావగారితో కలిసి జగ్గయ్య వద్దకు వెళ్లా. అప్పట్లో ఆయన చాలా పెద్ద హీరో. 'సినిమాల్లో చేరాలని ఉందండి' అని చెప్పా. 'మీరు చూసిన సినిమాలో ఒక సీన్ తీసుకోండి. అద్దం ముందు యాక్ట్ చెయ్యండి. ఇలా చేసి అనుభవం గడించి, ఏడాది తర్వాత రండి' అన్నారాయన. అంతకాలం ఏం ఆగుతాం? ప్రొడక్షన్ వైపు దిగా. అయితే శాంతకుమారి-నాకు తల్లిలాంటిది- 'నువ్వు హీరోలా ఉంటావురా. యాక్ట్ చెయ్యొచ్చు కదరా. హీరోయిన్లు అందరూ నిన్నే చూస్తున్నారు. రామారావు తప్పితే నీకన్నా అందగాడు ఎవరున్నారురా' అనేది. ఆవిడ కోసం ప్రతి సినిమాలోనూ ఏదో ఒక వేషం వేస్తూ ఉండేవాణ్ణి.
*నాకు శివాజీ గణేశన్, కమల్ హాసన్ బాగా ఇష్టమైన నటులు. శివాజీతో నేను 'వసంతమళై' అనే తమిళ్ సినిమా తీశా. పెద్ద హిట్ అది. ఈ సినిమాతో నాకు ఎంత పేరు వచ్చిందంటే.. మొన్న ఒకసారి మద్రాసు వెళ్లినప్పుడు 'వసంతమళై' తీసిన రామానాయుడేనా అని కొందరు పలకరించారు. నాకు చాలా ఆనందం వేసింది.