న్యూస్: 'మార్క్'ని ఆశీర్వదించడానికి మన హీరోలకు మనసు రాలేదు!

ఫైట్ మాస్టర్ విజయన్ పేరు వినని, తెలీని సినిమా ప్రియులు ఉండరు. అనేకమంది హీరోలు మాస్‌లో మంచి ఇమేజ్ సంపాదించుకోడానికి ఆయన సమకూర్చిన ఫైట్లు ఉపకరించాయి. నేటి పేరుపొందిన హీరోల్లో ఎక్కువమంది తొలి సినిమాలకి ఆయనే ఫైట్ మాస్టర్. ఆయన ఖ్యాతి అలాంటిది. 1975 నుంచీ అంటే 36 సంవత్సరాలుగా ఒకే వృత్తిలో అగ్ర స్థాయిలో కొనసాగడమంటే సాధారణ విషయం కాదు. విజయన్ అలాంటి అరుదైన వృత్తి నిపుణుడు. అవును. ఫైట్ మాస్టర్లలో ఇప్పటికీ ఆయనది అగ్ర స్థాయే. ఫైట్లలో ఎప్పటికప్పుడు వస్తున్న మార్పుల్ని గమనిస్తూ, తనని తాను అప్‌డేట్ చేసుకుండటమే ఆయన విజయ రహస్యం. ఇప్పుడాయన తన కుమారుడు శబరీశ్‌ని హీరోగా ప్రేక్షకుల ముందుకు తీసుకు వస్తున్నాడు. ఆ సినిమా పేరు 'మార్క్'. సోమవారమే (జూలై 25) ఆ సినిమా ఆడియో మార్కెట్లోకి వచ్చింది. ఈ సినిమాని మొదట తమిళంలో తన దర్శకత్వంలోనే ప్రారంభించాడు విజయన్. కొంత షూటింగ్ జరిపాక ఇందులో ఓ కీలక పాత్రకి శ్రీహరిని సంప్రదించాడు. చేయడానికి వెంటనే ఒప్పుకున్న శ్రీహరి తెలుగులోనూ ఈ సినిమాని తీసుకు వస్తే బాగుంటుందని సలహా ఇచ్చాడు. నిర్మాతగా నట్టి కుమార్ పేరునూ సూచించాడు. అలా తమిళ, తెలుగు భాషల్లో 'మార్క్' రూపొందింది. ఈ సినిమాలో శ్రీహరి మినహా మరో తెలుగు నటుడు కనిపించడు. హీరోయిన్‌గా బ్యాంకాక్‌కు చెందిన పింకీ నటించింది. మంచి పొడగరి అయిన శబరీశ్ ఈ సినిమాలో ఫైట్స్‌ని గొప్పగా ఛేశాడంటున్నారు. క్లైమాక్స్‌లో చేసిన రిస్కీ షాట్లో మొహం ఎడమవైపు కాలిపోవడంతో చాలా రోజులు ఈ సినిమా షూటింగ్ ఆగింది. శబరీశ్‌కి నయమయ్యాక ఈ సినిమాని పూర్తి చేశాడు విజయన్. అయితే జూలై 25న ఏర్పాటు చేసిన ఆడియో ఫంక్షన్ సందర్భంగా విజయన్ మాస్టర్ కొంత భావోద్వేగానికి గురయ్యాడు. కారణం, ఈ వేడుక కోసం ఆయన ఆహ్వానించిన వారిలో చాలామంది రాకపోవడం. అలా మొహం చాటేసిన వారిలో ఎక్కువమంది హీరోలే. చిరంజీవి, పవన్ కల్యాణ్, మహేశ్ వంటి హీరోల్ని ఆయన ఆహ్వానించాడు. వారంతా వస్తామని చెప్పి కూడా డుమ్మా కొట్టారు. ఇప్పుడే కాదు, 'మార్క్' ఓపెనింగ్‌కీ వారు ఇలాగే ఆయనకు ఝలక్ ఇచ్చారు. ఆయన సమకూర్చిన ఫైట్లతో యాక్షన్ హీరోలుగా పేరు తెచ్చుకున్న మన హీరోలకు ఆయన కుమారుణ్ణి ఆశీర్వదించడానికి మాత్రం మనసు రాలేదు. సినీ'మాయా'రంగమని మరి ఊరికే అన్నారా? ఏమైనా మనసున్నవారే ఈ ఫంక్షన్‌కి వచ్చి శబరీశ్‌ని ఆశీర్వదించారు.

సినిమా: విజయన్ కుమారుడి సినిమా బడ్జెట్ 12 కోట్లు

సీనియర్ ఫైట్ మాస్టర్ విజయన్ కుమారుడు శబరీష్ ఓ తెలుగు సినిమాతో హీరోగా పరిచయం కాబోతున్నాడు. దాన్ని విజయన్ స్వయంగా డైరెక్ట్ చేయబోతున్నాడు. బుధవారం (15న) ఈ సినిమా రామానాయుడు స్టూడియోస్ లో ప్రారంభం కాబోతోంది. విశేషమేమంటే ప్రారంభోత్సవానికి సూపర్ స్టార్లు మహేశ్, పవన్ కల్యాణ్ అతిథులుగా వస్తుండటం. విజయన్ మీదున్న గౌరవాభిమానాలతో అతని కొడుకు హీరోగా పరిచయం అవుతున్నందున విజయన్ అడగగానే రావడానికి వాళ్లు ఒప్పుకున్నారు.
కేవలం క్లాప్, కెమెరా స్విచ్చాన్ చేసి వెళ్లడం కాకుండా మీడియా సమావేశంలో పాల్గొని శబరీశ్ కి 'ఆల్ ద బెస్ట్' చెప్పనున్నారు. మార్షల్ ఆర్ట్స్ పధానంగా రూపొందే ఈ సినిమాలో యాక్షన్ హీరో శ్రీహరి ఓ కీలక పాత్ర చేస్తున్నాడు. విశాఖ టాకీస్ బ్యానరుపై 'మా అన్నయ్య బంగారం', 'భైరవ' సినిమాలు నిర్మించిన నట్టి కుమార్ ఈ సినిమాని నిర్మిస్తున్నారు. ఈ సినిమా బడ్జెట్ ఎంతో తెలుసా? 12 కోట్ల రూపాయలు. ఒక కొత్త హీరోపై, అదీ ఒక ఫైట్ మాస్టర్ కొడుకు పరిచయం అవుతున్న సినిమాపై ఇంత డబ్బు ఖర్చు చేయబోవడం పెద్ద సాహసమే. చూద్దాం ఏమవుతుందో..