Synopsis of the movie VAGDANAM (1961)

'వాగ్దానం' (1961) చిత్ర కథాంశం

జమీందారు విశ్వనాథం, దివాన్ రంగనాథం (గుమ్మడి), పరిస్థితుల వల్ల తాగుబోతుగా మారిన జగన్నాథం బాల్య మిత్రులు. జగన్నాథాన్ని విశ్వనాథం ప్రాణంగా చూసుకుంటుంటే, రంగనాథం దురాలోచన, దూరాలోచనతో జగన్నాథాన్ని ద్వేషిస్తుంటాదు. కులంలేని స్త్రీని పెళ్లి చేసుకున్నాడని వెలివేయబడిన జగన్నాథం కొడుకు సూర్యానికి విదేశాల్లో డాక్టర్ కోర్సు చెప్పించడమే కాకుండా తన కూతుర్ని అతనికిచ్చి పెళ్లి చేయాలనుకుంటాడు విశ్వనాథం. ఆయన ఏకైక పుత్రిక విజయను తన కొడుకు చంద్రం (చలం)కు ఇచ్చి పెళ్లిచేసి జమీందారు ఆస్తిని కాజేయాలని చూస్తుంటాడు రంగనాథం. ఇంతలో జగన్నాథం చనిపోవడంతో, విశ్వనాథం కూడా సానుభూతితో మరణిస్తాడు.
చదువు పూర్తిచేసుకొని పల్లెకు వచ్చిన సూర్యం (అక్కినేని నాగేశ్వరరావు) డాక్టరుగా మంచి పేరు తెచ్చుకుంటాడు. సునాయాసంగా విజయ (కృష్ణకుమారి) ప్రేమను  పొందుతాడు. కానీ రంగనాథం చెడుబుర్ర కారణాన అనేక అవాంతరాలొస్తాయి. వాటిని తొలగించడంలో సూర్యం సఫలమవడంతో విజయ అతనికే దక్కుతుంది. జగన్నాథానికి విశ్వనాథం ఇచ్చిన వాగ్దానం నిలబడుతుంది.

తారాగణం: అక్కినేని నాగేశ్వరరావు, కృష్ణకుమారి, గుమ్మడి, రేలంగి, చలం, సూర్యకాంతం, గిరిజ, పద్మనాభం, కె. వెంకటేశ్వరరావు, మల్లాది, మద్దాలి, సురభి కమలాబాయి
సంగీతం: పెండ్యాల నాగేశ్వరరావు
నిర్మాతలు: కె. సత్యనారాయణ, డి. శ్రీరామమూర్తి
దర్శకత్వం: ఆత్రేయ
బేనర్: కవితా చిత్ర
విడుదల తేదీ: 5 అక్టోబర్ 1961

Tribute to writer Ganesh Patro

- ఆంధ్రజ్యోతి డైలీ, 6 జనవరి 2015.

అగ్నిపూలు (1981) - సమీక్ష

అత్యంత ప్రజాదరణ పొందిన యద్దనపూడి సులోచనారాణి నవల 'అగ్నిపూలు' ఆధారంగా అదే పేరుతో డి. రామానాయుడు నిర్మించిన సినిమాలో కృష్ణంరాజు, జయసుధ, జయప్రద ప్రధాన పాత్రలు పోషించారు. కె. బాపయ్య దర్శకుడు. 'అగ్నిపూలు' కథలో భిన్న దృక్పథాలు, భిన్న వ్యక్తిత్వాలు ఉన్న పాత్రలెన్నో ఉన్నాయి. అన్ని పాత్రలకీ ప్రాముఖ్యం ఉంది. ఏ ఒక్క పాత్ర ఔచిత్యం దెబ్బతినకుండా రెండున్నర గంటల సినిమాగా దీన్ని తీర్చిదిద్దడంలో ఎంతో నేర్పు ప్రదర్శించాడు బాపయ్య.
రాజులు, రాజ్యాలు పోయినా దర్పం వదలని జమీందారు గోవింద వల్లభరాజా. ఆయన కుమారుడు శివప్రసాద్ అమెరికాలో ఉంటూ అక్కడే మేరీ అనే అమ్మాయిని పెళ్లి చేసుకుంటాడు. వారికి జానీ, బాబీ అనే ఇద్దరు పిల్లలు. భార్యా పిల్లలతో కలిసి తన ఇంటికి కొడుకు వస్తున్నాడని తెలిసి ఉగ్రుడైన వల్లభరాజా అతడికీ, తనకీ ఎలాంటి సంబంధం లేదని ప్రకటిస్తాడు. ఆయన ఆస్తి మీద కన్నేసిన అల్లుడు విరూపాక్షి రాజా, కూతురు రాజేశ్వరి అగ్నికి ఆజ్యం పోస్తారు. ఇంటికి వచ్చిన శివప్రసాద్, మేరీలను ఔట్‌హౌస్‌లో ఉంచి అవమానిస్తారు. వల్లభరాజా చనిపోతే అతని మృతదేహాన్ని చూసేందుకు కూడా అనుమతించరు.
కాలం గడిచి, విరూపాక్షి రాజా కూడా చనిపోతాడు. అతని కొడుకు కృష్ణ చైతన్య జమీందారీకి అధిపతి అవుతాడు. రుక్మిణి అనే అందాల భామను పెళ్లాడతాడు. ఒక ప్రమాదంలో రుక్మిణి అవిటిదవుతుంది. వల్లభరాజా భార్య అన్నపూర్ణ అభ్యర్థనపై శివప్రసాద్ పిల్లలు జానీ, బాబీలను ఇంటికి తీసుకొస్తారు. తన తల్లిదండ్రుల దారుణ మరణానికి కారకులైన విరూపాక్షి రాజా కుటుంబం మీద, ముఖ్యంగా కృష్ణ చైతన్య మీద పగ తీర్చుకోవాలని చూస్తుంది జానీ. ఆమె చేష్టలు శాంత స్వభావుడైన కృష్ణ చైతన్యకు అర్థం కావు. జానీ దాచుకున్న డైరీ అతడికి దొరుకుతుంది. ఆ తర్వాత ఏం జరిగిందన్నది పతాక సన్నివేశాల్లో తెలుస్తుంది.
భిన్న దృక్పథాలు కలిగిని విరూపాక్షి రాజా, కృష్ణ చైతన్య పాత్రలు రెండింటినీ కృష్ణంరాజు ప్రశంసనీయంగా పోషించారు. ముఖ్యంగా విరూపాక్షి రాజాగా ఆయన నటన బాగా ఆకట్టుకుంటుంది. పగతో రగిలిపోయే జానీ పాత్రలో జయసుధ మరోసారి తన నటనా ప్రతిభను ప్రదర్శించింది. అవిటిదైన రుక్మిణిగా జయప్రద సమర్థవంతంగా నటించింది. ఆమె చేసిన సర్ప నృత్యం సినిమాకే హైలైట్. రాజేశ్వరిగా జయంతి పాత్ర పరిధి మేరకు బాగా చేసింది. సుధాకర్, నిర్మల, శ్రీధర్, గుమ్మడి, సత్యనారాయణ, సుమలత, సుభాషిణి, దిల్‌జిత్ వీర్ ఇతర పాత్రలు పోషించారు. శరత్‌బాబుకు మరికొన్ని డైలాగులు పెడితే బాగుండేది. అల్లు రామలింగయ్యపై చిత్రీకరించిన సన్నివేశాల ప్రయోజనం స్వల్పం.
జంధ్యాల మాటలు, ఆత్రేయ పాటలు, మహదేవన్ సంగీతం, వెంకట్ ఛాయాగ్రహణం సినిమాకి నిండుదనం తెచ్చాయి. మైసూరు లలితమహల్‌ను దర్శకుడు బాపయ్య చక్కగా వినియోగించుకున్నాడు. మొత్తానికి చక్కని నవలా చిత్రాన్ని చూసిన భావన ప్రేక్షకులకు కలుగుతుంది.

ఆకలి రాజ్యం (1981) - సమీక్ష

దేశంలో నిరుద్యోగం తాండవిస్తున్న కాలంలో కె. బాలచందర్ రూపొందించిన గొప్ప చిత్రం 'ఆకలి రాజ్యం'. ఆనాటి యువతరం ఈ సినిమాని తమ సొంతం చేసుకుంది. కథలోకి వస్తే - రంగా తన కాళ్ల మీద తను నిల్చోవాలనుకునే ఆదర్శ యువకుడు. ఆత్మాభిమాని. ఆవేశపరుడు. అందుకే ఉద్యోగం కోసం ఎక్కడకు వెళ్లినా నిరాశే ఎదురవుతుంది. ఆ నిరాశ ఆవేశంగా మారి శ్రీశ్రీ మాటల్ని ఉటంకిస్తుంటాడు. అతడికి నాటకాలు వేసే దేవి పరిచయమవుతుంది. క్లైమాక్స్‌లో రంగా క్షౌరశాలలో పనిచేస్తుండగా అతడి తండ్రి గడ్డం గీయించుకోడానికి వస్తాడు. తనని చూసి దిగ్భ్రాంతికి గురైన తండ్రికి ఆత్మ గౌరవంతో చేసే ఏ పనయినా మంచిదేననీ, దేశంలో నిరుద్యోగం పోవాలంటే అదొక్కటే మార్గమనీ చెబుతాడు రంగా. ఈ సన్నివేశం హృదయాల్ని కదిల్చి వేస్తుంది. ఈ కథను దర్శకుడు చెప్పిన తీరు, మధ్య మధ్య రంగా బృందం చేష్టలు, రంగా, దేవి మధ్య డ్యూయెట్లు ప్రేక్షకుల్ని సమ్మోహితుల్ని చేస్తాయి. 'హ్యాట్స్ ఆఫ్ టు బాలచందర్' అనిపిస్తాయి. రంగా పాత్రలో కమల్ జీవించాడు. దేవిగా శ్రీదేవి ఉత్తమ నటన ప్రదర్శించింది. గణేశ్ పాత్రో సంభాషణలు సినిమాకి ఆయువుపట్టు. అవి అడుగడుగునా ఆలోచింపజేస్తాయి. ఎమ్మెస్ విశ్వనాథన్ బాణీలు వినసొంపుగా ఉండి, పాటల్ని మళ్లీ మళ్లీ వినాలనిపించేట్లు చేస్తాయి. ఆత్రేయ, శ్రీశ్రీ అందించిన సాహిత్యానికి అందులో ప్రధాన భాగముంది. లోకనాథన్ సినిమాటోగ్రఫీ దర్శకుడి అంతరంగాన్ని అర్థం చేసుకుని పనిచేసింది.

ఇంటర్వ్యూ: పైడిశెట్టి రాం

''సీతాకోక చిలుకలు రెండు స్నేహం చేశాయి' (చంటిగాడు), 'ఆడదానికి ఆస్తులంటే పసుపు కుంకుమలమ్మా' (ఒక పెళ్లాం ముద్దు రెండో పెళ్లాం వద్దు), 'బ్రహ్మే ఎదురుగ వచ్చి ఒక వరమే కోరమంటే అమ్మేలేని నాకు బామ్మ ఒడి చాలంటాను' (గుండమ్మగారి మనవడు), 'ఎక్కడపడితే అక్కడ నువు కనపడుతూ ఉంటే' (జాజిమల్లి)... ఇలాంటి చక్కటి పాటల రచయిత పైడిశెట్టి రాం. సినీ రంగంలో కెరీర్ చూసుకోవాలనే విషయంలో అమ్మానాన్నలతో గొడవపడి, వాళ్ల అభీష్టానికి వ్యతిరేకంగా విజయనగరం నుంచి హైదరాబాద్‌లోని కృష్ణానగర్‌కు వచ్చి ఆర్థిక ఇబ్బందులు పడుతూనే నెమ్మదిగా ఒక్కో మెట్టూ పైకెక్కుతూ ప్రస్తుతం నందమూరి తారకరత్న సినిమా 'నందీశ్వరుడు'కు సింగిల్ కార్డ్ రాసే స్థికి ఎదిగిన పైడిశెట్టి రాం అంతరంగ భాషణ...
సినిమాల్లోకి ఎందుకు రావాలనుకున్నారు?
చిన్నప్పట్నించీ సినిమాలు బాగా చూసేవాణ్ణి. నటనంటే ఎక్కువ ఇష్టం. నటించాలని కోరికుండేది. మాది విజయనగరంలో ఓ వ్యవసాయ కుటుంబం. నిజం చెప్పాలంటే రాయిపని చేసుకు బతికేవాళ్లం. ఆర్థిక ఇబ్బందులు ఎక్కువ. అందుకే నేను కూడా ఆ పనిలో ఉంటే తమకి ఆసరా అవుతుందని నాన్న భావించారు. కానీ నా దృష్టంతా సినిమాల మీదుంది. ఎమ్మెస్సీ బోటనీ చేశాక సినిమాల్లో నటించాలనే తపనతో ఇంట్లోవాళ్లతో గొడవపడి మరీ కృష్ణానగర్‌కి వచ్చా. డిగ్రీ వరకు గురుకులాల్లోనే చదువుకోవడం వల్ల తెలుగు, సంస్కృత భాషలు బాగా వచ్చు. అప్పటికే సొంతంగా పాటలు రాయడం అలవాటు. వాటిని విన్నవాళ్లంతా నటనపై కంటే పాటలపై దృష్టి పెట్టమన్నారు.
తొలి అవకాశం ఎలా వచ్చింది?
హైదరాబాద్‌కి నాతో పాటు నా స్నేహితులు మరో ఇద్దరు కూడా వచ్చారు. వాళ్లు తలో ఇరవై వేలు తీసుకొస్తే, నేను తెచ్చుకుంది కేవలం ఇరవై రూపాయలే. ఇప్పుడు వాళ్లు లేరు. ఆ డబ్బులయిపోయాక మా ఊరికి వెళ్లిపోయారు. నేను వేషాల కోసం తిరుగుతూనే పాటలు పాడుకుంటూ ఉండేవాణ్ణి. దాంతో నా ఫ్రెండ్స్, మరికొంతమది వేషాల బదులు పాటల అవకాశాల కోసం ప్రయత్నిస్తే బాగుంటుందని సలహా ఇచ్చారు. అదీ బాగానే ఉందనిపించింది. సంగీత దర్శకులు వందేమాతరం శ్రీనివాస్‌గారు కొత్తవాళ్లకి అవకాశాలిస్తారని విని, ఆయన్ని కలుసుకోవాలని అన్నా ల్యాబ్స్‌కి వెళ్లా. అప్పుడే కారులోంచి దిగుతున్న ఆయన్ని పరిచయం చేసుకున్నా. ఓ పాట పాడమన్నారు. ల్యాబ్ బయటనే నేను రాసుకున్న ఓ పాట పాడా. అప్పుడే అక్కడకి 'చంటిగాడు' సినిమా మ్యూజిక్ సిట్టింగ్స్ కోసం వచ్చిన డైరెక్టర్ జయ బి. గారు కూడా నా పాట విన్నారు. నన్ను ఎల్లారెడ్డిగూడలోని తమ ఆఫీసుకి రమ్మన్నారు. అక్కడికి వెళితే దాదాపు 20 మంది రచయితలు కనిపించారు. అందరికీ క్లైమాక్స్ సందర్భం చెప్పి, నాలుగు రోజుల్లో పాట రాయమన్నారు. 'సీతాకోక చిలుకలు రెండు స్నేహం చేశాయి' అంటూ నేను రాసిన పాటని సెలక్ట్‌చేసి, దానికి అప్పటికప్పుడు రెమ్యూనరేషన్ కూడా ఇచ్చారు. ఆ పాటని ఎస్పీ బాలసుబ్రహ్మణ్యంగారి చేత పాడించడం నేను మర్చిపోలేని అనుభవం. ఆ పాటకి మంచి స్పదన వచ్చింది.
అప్పుడు బాలు గారిని కలిశారా? ఆ అనుభవం గురించి చెప్పండి..
నిజానికి అప్పుడు నేను ఇటు ఆనందాన్నీ, అటు బాధనీ రెండూ అనుభవించా. అదెట్లాగంటే.. ఆ పాట రికార్డింగ్‌కి ఉదయం 8 గంటలకి రికార్డింగ్ థియేటర్‌కి రమ్మని జయ మేడం చెప్పారు. నాకు అప్పటిదాకా అనుభవం లేకపోవడంతో తాపీగా 10 గంటలకి వెళ్లా. అప్పట్లో నాకు ఎలాంటి ఫోన్ సౌకర్యం లేదు. నా కోసమే ఎదురు చూస్తూ కనిపించారు జయ మేడం. నేను రాసిన పాటలో ఓ పదం తప్పుగా అనిపించింది బాలు గారికి. అది తప్పని చెప్పి, దాన్ని మారిస్తే కానీ పాట పాడనని ఆయన భీష్మించారు. దాంతో నాకోసం అంతా ఎదురు చూస్తున్నారు. నాకు చాలా సిగ్గనిపించింది. నేను రాసిన పదం గురించి చెప్పి, దాన్ని మార్చాలనీ లేకపోతే బాలుగారు పాడరనీ జయగారు చెప్పారు. నిజానికి నా తొలిపాటకి బాలుగారైతే బాగా న్యాయం చేస్తారనే అభిప్రాయంతో ఆయనతో పాడించమని జయగార్ని రిక్వెస్ట్ చేసింది నేనే. ఇప్పుడు సడన్‌గా ఓ పదం మార్చమని అడిగేసరికి నా మైండ్ బ్లాంకయిపోయింది. నాకేమీ తోచలేదు. ఆ స్థితిలో నాకు పాటా వద్దూ, ఏమీ వద్దనీ, దాన్ని కేన్సిల్ చేసుకొమ్మనీ దాదాపు ఏడుస్తున్నట్లే జయగారికి చెప్పా. ఆమె అధైర్యపడొద్దని, తనే ఆ పదం బదులు వేరే పదం పెట్టి, ఆ పాటని బాలుగారితో పాడించారు. బాలుగారు కూడా పాట చాలా బాగా రాశావంటూ భుజంతట్టి, నాతో ప్రత్యేకంగా ఫోటోలు దిగారు. అది మర్చిపోలేని అనుభవం.
ఇప్పటిదాకా ఎన్ని సినిమాలకి రాశారు?
ఇప్పటివరకు 47 సినిమాలకి పాటలు రాశా. పాటల సంఖ్య వంద చేరువలో ఉంది. బాలుగారు పాడిన నా తొలి పాటతో పాటు, 'ఒక పెళ్లాం ముద్దు రెండో పెళ్లాం వద్దు' చిత్రానికి నేను రాసిన రెండో పాట 'ఆడదానికి ఆస్తులంటే పసుపు కుంకుమలమ్మా' (జేసుదాస్‌గారు పాడింది) కూడా మంచి గుర్తింపునిచ్చింది. ఆ తర్వాత జయ గారు డైరెక్ట్ చేసిన 'గుండమ్మగారి మనవడు'లో నాలుగు పాటలు రాశా. వాటిలో 'బ్రహ్మే ఎదురుగ వచ్చి ఒక వరమే కోరమంటే అమ్మేలేని నాకు బామ్మ ఒడి చాలంటాను' అనే పాటకి మంచి ఆదరణ లభించింది. అలాగే 'జాజిమల్లి'లోని 'ఎక్కడపడితే అక్కడ నువు కనపడుతూ ఉంటే' పాట రింగ్‌టోన్‌గా బాగా ఆదరణ పొందింది. చెప్పాలంటే నేను రాసిన పాటలన్నీ నాకిష్టమే.
ఇప్పటివరకు పనిచేసిన సంగీత దర్శకుల్లో ఎవరు మీకు సౌకర్యంగా అనిపించారు?
అలా ఎవరో ఒకర్ని ప్రత్యేకించి చెప్పలేను. ఎందుకంటే అందరు సంగీత దర్శకులూ నన్ను ప్రోత్సహించినవాళ్లే. వందేమాతరం, చక్రి, ఆర్పీ పట్నాయక్, చిన్నా వంటి సంగీత దర్శకులతో పనిచేశా. అందరూ నాకు బాగా సపోర్ట్ చేశారు. అందరితోనూ సౌకర్యంగా ఫీలయ్యా. వాళ్లు మనకి ట్యూన్ ఇచ్చినా రాయడం వచ్చుండాలి, లేదా ట్యూన్ లేకపోయినా రాయడం తెలిసుండాలి. నేను రెండు రకాలుగా రాశా. 
లాబీయింగ్‌తో అవకాశాలు వస్తాయా?
ప్రతిభ ఉండాలే గానీ పోటీ ఎంతున్నా ముందుకెళ్తామనేది అనుభవపూర్వకంగా నేను తెలుసుకున్న వాస్తవం. ప్రతిభ లేకుండా ఎంత లాబీయింగ్ చేసినా ఉపయోగముండదు. సంగీత దర్శకులైనా, దర్శకులైనా ప్రతిభ ఉన్న వాళ్లనే ప్రోత్సహిస్తుంటారు. ఆల్రెడీ ప్రతిభ నిరూపించుకున్నవాళ్లకి ఎక్కువ అవకాశాలు రావడం సహజం. దానికి బాధపడ్డం నెగటివ్ థింకింగ్ అవుతుంది.
మీ రాబోతున్న సినిమాలేవి?
రాబోయే సినిమాల్లో తారకరత్న, జగపతిబాబు కలిసి నటిస్తున్న 'నందీశ్వరుడు'కి ఎనిమిది పాటలు సింగిల్ కార్డ్ రాశా. అలాగే రాజశేఖర్‌గారి సినిమా 'మహంకాళి'కీ, శ్రీకాంత్ సినిమాలు 'దేవరాయ', 'సేవకుడు'కీ, శ్రీహరి, సాయిరాం శంకర్ సినిమా 'యమహో యమః'కీ, 'దునియా'కీ రాశా. తెలుగు, తమిళ భాషల్లో వస్తున్న 'క్రేజీ కృష్ణ'కి సింగిల్ కార్డ్ రాశా.
మీ భాషని మెరుగుపర్చుకోడానికి ఎలాంటి కృషి చేస్తారు?
ప్రాచీన సాహిత్యమైన అష్టాదశ పురాణాలూ, రామయణ భారతాలను అధ్యయనం చేయడంతో పాటు తెలుగు చిత్రసీమలో ప్రసిద్ధులైన ఆనాటి గేయ రచయితల నుంచి ఈ నాటి రచయితల దాకా - వారి పాటల్ని అధ్యయనం చేశా. ఇప్పటికీ చేస్తూనే ఉన్నా. అలా నా భాషని నిరంతరం మెరుగు పరచుకుంటున్నా. ఎక్కువగా దేవులపల్లి కృష్ణశాస్త్రి, ఆత్రేయ, సీతారామశాస్త్రి, చంద్రబోస్ పాటలంటే ఇష్టం.
ఇప్పుడు మీ అమ్మానాన్నలు ఎలా ఫీలవుతున్నారు?
నేను పది సినిమాలకి పాటలు రాసేదాకా కూడా మా ఇంట్లో వ్యతిరేకత ఉండేది. ఉద్యోగం చేసుకోకుండా ఇక్కడికొచ్చి కష్టాలు పడటమెందుకనేది అమ్మానాన్నల అభిప్రాయం. ఇప్పుడు నా పురోగతి చూసి వాళ్లు ఆనందపడుతున్నారు. ప్రోత్సహిస్తున్నారు. దాంతో టెన్షన్ లేకుండా నా పని చేసుకోగలుగుతున్నా. అలాగే ఇండస్ట్రీ వ్యక్తులు చాలామంది నేను పాటలు బాగా రాస్తున్నానని ప్రోత్సహిస్తున్నారు. నెలకి సగటున రెండు పాటలు తక్కువ కాకుండా అవకాశాలు వస్తున్నాయి. ఇప్పుడు నేను అగ్ర హీరోలకు రాయాలని తపనపడ్తున్నా.

మరపురాని చిత్రం: ప్రేమనగర్

రామానాయుడు సినీభవితవ్యాన్ని నిర్దేశించి, నిర్మాతగా ఆయన్ని నిలబెట్టిన 'ప్రేమనగర్' చిత్రం విడుదలై నేటికి సరిగ్గా నలభై ఏళ్లు. ఈ సందర్భంగా ఈ సినిమా విశేషాలు..
ప్రఖ్యాత నిర్మాత డి. రామానాయుడు ఈరోజున అత్యధిక చిత్రాల నిర్మాతగా చరిత్రలో స్థానం దక్కించుకున్నారంటే అందుకు మూలస్తంభం 'ప్రేమనగర్' చిత్రం. ఈ సినిమాకి ముందు ఆయన కె. బాపయ్యను డైరెక్టర్‌గా పరిచయం చేస్తూ 'ద్రోహి' చిత్రాన్ని నిర్మించారు. జగ్గయ్య, వాణిశ్రీ, నాగభూషణం కాంబినేషన్‌లో తయారైన ఈ సినిమా అట్టర్‌ఫ్లాపయ్యింది. దీనితో ఐదు లక్షల రూపాయల నష్టం చవిచూశారు రామానాయుడు. 40 ఏళ్ల క్రితం అది చాలా పెద్ద మొత్తం. అప్పుడాయనకు రెండే దార్లు మిగిలాయి. ఒకటి నిర్మాతగానే కొనసాగి, నష్టాన్ని పూడ్చుకోవడం, లేదంటే చెన్నై దగ్గరోని కోణంబాకంలో ఉన్న పొలాలతో వ్యవసాయం చేసుకోవడం. తాడో పేడో తేల్చుకుందామని చివరి ప్రయత్నంగా 'ప్రేమనగర్' ప్రాజెక్టుని ప్రారంభించారు.
కోడూరి కౌసల్యాదేవి అదే పేరుతో రాసిన నవల అప్పటికే పాపులర్ కావడంతో దాని హక్కుల్ని నిజామాబాద్‌కు చెందిన కొత్త నిర్మాత శ్రీధర్‌రెడ్డి కొన్నారు. అందులో నటించేందుకు అక్కినేని నాగేశ్వరరావు అంగీకరించారు. అయితే శ్రీధర్‌రెడ్డి ఎంతకీ ఆ సినిమా ప్రారంభించక పోవడంతో ఆయన నుంచి ఆ హక్కులు కొనుగోలు చేశారు రామానాయుడు. అప్పటికే తమ బేనర్‌లో 'స్త్రీజన్మ'ని తీసిన కె.ఎస్. ప్రకాశరావుని దర్శకునిగా తీసుకున్నారు. రచయిత ఆత్రేయతో కలిసి నవలలో చాలా మార్పులు చేశారు ప్రకాశరావు. సినిమా సెట్స్ మీదకు వెళ్లే ముందు రామానాయుడికి బౌండ్ స్క్రిప్ట్ అందించారు ఆత్రేయ.
రూ. 15 లక్షల ఖర్చు అంచనాతో ఈ సినిమా ప్రారంభించారు. అక్కినేని, వాణిశ్రీ, సత్యనారాయణ, రాజబాబు, రమాప్రభ, గుమ్మడి వంటి భారీ తారాగణంతో రామానాయుడు 'ప్రేమనగర్'ని మొదలు పెట్టారని తెలిసి సినీ వర్గాలు ఆశ్చర్యపోయాయి. అప్పటికే వాళ్లకి తెలుసు, రామానాయుడు నిండా మునిగిపోయి ఉన్నారని. కొంతమంది సన్నిహితులు రిస్క్ తీసుకోవద్దని వారించినా ఆయన లెక్కచెయ్యలేదు. 1971 జనవరి 20న చెన్నై వాహినీ స్టూడియోలో కొబ్బరికాయ కొట్టి షూటింగ్ ప్రారంభించారు అక్కినేని. పూజలకు అక్కినేని దూరమైనా రామానాయుడు అడిగేసరికి కాదనలేకపోయారు. ఆరు నెలల్లో సినిమా పూర్తయింది. 1971 సెప్టెంబర్ 24న 'ప్రేమనగర్' విడుదలైంది. అప్పుడే పెద్ద గాలివాన. రామానాయుడిని ఓవైపు ఆందోళన, మరోవైపు నమ్మకం కలిపి విచిత్రావస్థలోకి నెట్టాయి. అయితే ప్రేక్షకులు 'ప్రేమనగర్'కి బ్రహ్మరథం పట్టారు. ప్రేమ కథా చిత్రాల నాయకునిగా అక్కినేని ఇమేజ్‌ని మరింత పరిపుష్టం చేస్తూ అఖండ విజయం సాధించింది ఈ సినిమా.
హీరో కల్యాణ్‌వర్మ పాత్రకి జీవం పోశారు అక్కినేని. 'మనసు గతి ఇంతే', 'ఎవరి కోసం ఈ ప్రేమమందిరం' అంటూ ఆత్రేయ రాసిన అపూర్వ గీతాలని అంతే అపూర్వ స్థాయిలో అభినయించి వాటికి చిరస్థాయిని కల్పించడంలో తనవంతు పాత్ర పోషించారు. అలాగే నవలా నాయికగా వాణిశ్రీకి ఈ చిత్రం సరికొత్త ఇమేజ్ తెచ్చింది. ఆమె కట్టు, బొట్టు, కొప్పుని అనుకరించడానికి ఆ రోజుల్లో యువతులు పోటీపడ్డారు. అక్కినేని, వాణిశ్రీపై చిత్రీకరించిన డ్యూయెట్లు యువతని ఎంతగా రంజింపచేశాయో చెప్పనక్కర్లేదు. ఈ సినిమాలో సత్యనారాయణ చిన్నప్పటి పాత్రలో వెంకటేశ్ నటించడం విశేషం.
తెలుగు సినిమా సాధించిన అమోఘమైన విజయంతో దీన్ని తమిళంలోనూ నిర్మించాలనుకున్నారు రామానాయుడు. శివాజీ గణేశన్, వాణిశ్రీ జంటగా 'వసంత మాళిగై' పేరుతో రీమేక్ చేశారు. అక్కడా ఆ సినిమా దిగ్విజయం సాధించి, తమిళనాడులో రామానాయుడికి 'వసంత మాళిగై రామానాయుడు'గా పేరు తెచ్చింది. ఇలా రెండు భాషల్లో ఈ సినిమా సూపర్‌హిట్టయ్యాక ఆయన కన్ను బాలీవుడ్ మీద పడింది. హిందీ 'ప్రేంనగర్'కు రూపకల్పన జరిగింది. అందులో నటించేందుకు అప్పటి హిందీ రొమాంటిక్ హీరో రాజేశ్‌ఖన్నా, డ్రీం గర్ల్ హీమమాలిని సరేనన్నారు. అక్కడా ఈ సినిమా విజయకేతనం ఎగురవేసింది. రామానాయుడి బాలీవుడ్ ప్రవేశం ఘనంగా మొదలైంది. ఈ మూడు భాషల్లోనూ దర్శకుడు ప్రకాశరావే. ఇలా ఈ సినిమా విజయ విహారం చేయడంతో రామానాయుడు ఎక్కడికీ కదలాల్సిన అవసరం లేకపోయింది.

నేటి పాట: ఇచ్చేశా నా హృదయం (ఈ తరం మనిషి)

చిత్రం: ఈ తరం మనిషి (1976)
రచన: ఆత్రేయ
సంగీతం: చక్రవర్తి
గానం: ఎస్పీ బాలసుబ్రహ్మణ్యం, పి. సుశీల

పల్లవి:
అతడు: ఇచ్చేశా నా హృదయం తీసుకో
ఎదలోపల పదిలంగా దాచుకో
అద్దంలా చూసుకో
ముద్దల్లే వాడుకో   ||ఇచ్చేశా||

చరణం 1:
అతడు: చిగురువంటి చినదానికి
చెంపలే సొంపులు
ఆమె: చిలిపి కళ్ల చినవాడితో
చెలిమిలోనే ఇంపులు
అతడు: చేసుకొనే బాసలు
చెరిగిపోని రాతలు
చెప్పలేని ఊహలు
చేయబోవు చేతలు   ||ఇచ్చేశా||

చరణం 2:
అతడు: మన మధ్యన గాలికూడ వుండనే వుండదు
మనమంటే కాలమైన పరుగిడనే పరుగిడదు
నువ్వు నా ఊపిరి
ఆమె: నేను నీ లాహిరి
ఇద్దరు: ఇద్దరమూ హిమగిరి   ||ఇచ్చేశా||

నేటి పాట: కళ్లలో వున్నదేదో (అంతులేని కథ)

చిత్రం: అంతులేని కథ (1976)
రచన: ఆత్రేయ
సంగీతం: ఎం.ఎస్. విశ్వనాథన్
గానం: ఎస్. జానకి

పల్లవి:
కళ్లలో వున్నదేదో కనులకే తెలుసు
రాళ్లలో వున్న నీరు కళ్లకెలా తెలుసు
నాలో వున్న మనసూ నాకుగాక ఇంకెవరికి తెలుసు

చరణం 1:
నీటిలో ఆరే నిప్పును కానూ
నిప్పున కాగే నీరైన కానూ
ఏదీ కానీ నాలో రగిలే
ఈ అనలాన్నీ ఆర్పేదెవరో   ||కళ్లలో||

చరణం 2:
తానే మంటై వెలుగిచ్చు దీపం
చెప్పదు తనలో చెలరేగు తాపం
నే వెళ్లు దారి ఓ ముళ్లదారి
రాలేరు యెవరూ నాతో చేరి   ||నాలో||

చరణం 3:
వేసవిలోనూ వానలు రావా
కోవెల శిలకు జీవం రాదా
జరిగేనాడే జరుగును అన్నీ
జరిగిననాడే తెలియును కొన్నీ   ||నాలో||

నేటి పాట: అవ్వా బువ్వా కావాలంటే (సోగ్గాడు)

చిత్రం: సోగ్గాడు (1975)
రచన: ఆత్రేయ
సంగీతం: కె.వి. మహదేవన్
గానం: ఎస్పీ బాలసుబ్రహ్మణ్యం, పి. సుశీల

ఆమె: అవ్వా బువ్వా కావాలంటే అయ్యేదేనా అబ్బాయి
అతడు: అయ్యేదాకా ఆగావంటే, అవ్వైపోతావ్ అమ్మాయి
ఆమె: అయ్యో పాపం అత్తకొడుకని అడిగిన దిస్తానన్నాను
అతడు: వరుసా వావీ వుందికదా అని నేనూ ముద్దే అడిగాను
ఆమె: నాకూ యిద్దామని వుంది
అతడు: కానీ అడ్డేం వచ్చింది?
ఆమె: అంతటితో నువ్వాగుతావని నమ్మకమేముంది?
అతడు: బస్తీకెళ్లే మరదలుపిల్లా తిరిగొస్తావా మళ్లీ ఈలా
ఆమె: ఇంతకన్నా ఎన్నో ఎన్నో సొగసులు ఎదిగి వస్తాను
అతడు: ముడుపు కట్టుకుని తెస్తావా
ఆమె: మడి కట్టుకు నువ్వుంటావా
అతడు: ఈనగాచి నక్కలపాలు కాదని మాటిస్తావా?
ఆమె: పల్లెటూరి బావకోసం - పట్టా పుచ్చుకు వస్తాను
అతడు: పచ్చపచ్చని బ్రతుకే నీకు పట్టా రాసి యిస్తాను
ఆమె: కమతానికి నువ్వొస్తావా
అతడు: కామందుగ నువ్వుంటావా
ఆమె: శిస్తులేని, సేద్యం చేస్తానంటావా   ||అవ్వా||

నేటి పాట: ఎన్నెన్ని వంపులు ఎన్నెన్ని సొంపులు (బాబు)

చిత్రం: బాబు (1975)
రచన: ఆత్రేయ
సంగీతం: చక్రవర్తి
గానం: ఎస్పీ బాలసుబ్రహ్మణ్యం, పి. సుశీల

ఆమె: ఏయ్ బాబూ నిన్నే బాగుందా?
అతడు: అబ్బ - ఎంత బాగుంది -
ఆమె: ఎంత..?
అతడు:ఎంతో..
ఆమె: ఎంతో అంటే..?
అతడు: ఊ - యింత -

అతడు: ఎన్నెన్ని వంపులు ఎన్నెన్ని సొంపులు - నా
కున్నవేమో రెండే కన్నులు - ఎలా చూపేదీ - ఏది చూసేదీ
ఆమె: చాలకుంటే కావాలంటే - నావికూడా తీసుకో - నీ
తనివితీరా చూసుకో -
అతడు: యీ ఎరుపు బాగుందా - తెలుపు కుదిరిందా?
ఎరుపులో నీ వయసుంది - తెలుపులో నీ మనసుంది
ఆమె: ఎరుపు తెలుపులు నన్ను నిలువున
నలుపుతున్నాయి - అమ్మమ్మో - ఎదలో సలుపుతున్నాయి
అతడు: పంతులమ్మ - పంతులమ్మ -కొత్తచదువు నేర్పుతావా
ఆమె: దర్జీదొరా -దర్జీదొరా - వలపు కొలత తీస్తావా?
అతడు: నింగి నేల నిండు మనసు - నీకూ నాకూ వలపు కొలత
ఆమె: కొలతలన్ని చెరిపివేసే - చెలిమిలోనే కొత్తచదువు   ||ఎన్నెన్ని||

అతడు: నీ చిలిపి కన్నుల్లో - చిగురు పెదవుల్లో
నువ్వు నువ్వై నిలవాలి - నువ్వు నేనై కలవాలి
కనులు పెదవులు కలిసి మెలిసి కౌగిలించాలి -
అమ్మమ్మో కరిగిపోవాలి -    ||ఎన్నెన్ని||

నేటి పాట: ఓ కుర్రవాడా వెర్రివాడా (పిచ్చిమారాజు)

చిత్రం: పిచ్చిమారాజు (1975)
రచన: ఆత్రేయ
సంగీతం: కె.వి. మహదేవన్
గానం: పి. సుశీల, ఎస్పీ బాలసుబ్రహ్మణ్యం

ఆమె: ఓ కుర్రవాడా - వెర్రివాడా
ఎందుకిలా - నువ్వెందుకిలా
నన్నొదిలి యిలా పారిపోతావు

అతడు: ఓ కుర్రదానా - వెర్రిదానా
ఎందుకిలా -నువ్వెందుకిలా
నన్నొదలకిలా తరుముకొస్తావూ -

అతడు: నేలకి నింగికి కలవదమ్మా
నీకు నాకు పొత్తెపుడు కుదరదమ్మా

ఆమె: నింగిలోని వెన్నెలంత నేలకే సొంతము
నీకూ నాకూ ఉన్నది అదే బంధము   ||ఓ||

అతడు: చల్లగాలి ఊరుకోదు - పిల్లమనసు ఓర్చుకోదు
ఓర్చుకోనీ పిల్లదాన్ని ఓపలేను ఆపలేను

ఆమె: ఏం చేయమంటావు నన్ను
నన్నెలా వదలమంటావు నిన్ను    ||ఓ||

అతడు: అందాలతో నాకు బంధాలు వేయకు
పిచ్చివాణ్ణి మరీమరీ రెచ్చగొట్టకు

ఆమె: రెచ్చితే పిచ్చి ఎంతో ముచ్చటగ ఉంటుంది
ముచ్చటైన కౌగిట్లో పిచ్చి కుదిరిపోతుంది   ||ఓ||

నేటి పాట: గోవిందా గోవిందా (మంచివాడు)

చిత్రం: జేబుదొంగ (1975)
రచన: ఆత్రేయ
సంగీతం: చక్రవర్తి
గానం: ఎస్.పి. బాలసుబ్రహ్మణ్యం, ఎస్. జానకి

అతడు: గోవిందా గోవిందా గుట్టుకాస్తా గోవిందా
లడ్డులాంటి పడుచుపిల్ల అర్ధరాత్రి దొరికిందంటే
అంతకన్నా షోకుందా ఇంతకన్నా ఛాన్సుందా

ఆమె: గోవిందో గోవిందా కుర్రవాడూ గోవిందా
పిల్లగాలికి గుబులురేగి పిచ్చిపిచ్చి వేషాలేస్తే
గూబ గుయ్యిమంటుందోయి జలుబు వదిలిపోతుందోయి

అతడు: దాచేస్తే దాగేదికాదు అందం
మార్చేస్తే మారేదికాదు రూపం
దోచుకోను దొరికేదికాదు అందం
మెచ్చుకుంటే లొంగేదికాదు రూపం
ఆడపిల్ల లింతేలే అడుగుతుంటే బెట్టేలే
మెల్లంగ మెత్తబడి పోతారులే

ఆమె: కొంటె కుర్రాళ్లింతేలే వెంటబడి వస్తార్లే
సై అంటే వెర్రిముఖం వేస్తారులే
ఆయ్ ఒక్కసారి సయ్యని చూదు - గోవిందా
ఆహ వచ్చాడయ్యా మొనగాడు గోవిందా    ||గోవిందా||

ఆమె: ఇమ్మంటే ఇచ్చేదికాదు మనసు
రమ్మంటే వచ్చేదికాదు వయసు
వద్దంటే ఉరికింది నాలో వయసు
వదలొద్దు అంటుంది నిన్నే మనసు

అతడు: చల్లగాలి వేస్తుంది చలి ముంచుకొస్తుంది
వేడెక్కి పోతుంది లోలోన
లోపలున్న చలిచలికి పైనవున్న వేడికి
జత కుదిరిపోతుంది మనలోన
ఇంతకన్నా ఏం చెప్పేది - గోవిందా
అహ ఎందుకింక నే నాగేది - గోవిందా    ||గోవిందో||

సినిమా: మాంగల్యం (1960)

తారాగణం: కాంతారావు, రామకృష్ణ, దేవిక, రాజనాల, బాలకృష్ణ (అంజి), రాజశ్రీ, హేమలత
రచన: ఆత్రేయ
నిర్మాత: ఎం.ఎ. వేణు
దర్శకుడు: బి.ఎస్. నారాయణ
బేనర్: ఎం.ఎ.వి. పిక్చర్స్
విడుదల తేది: అక్టోబర్ 13
కథ: ఎంబీబీయస్ డాక్టర్ కుమార్ (కాంతారావు) పనిపిల్ల సరళ (దేవిక)ను గాఢంగా ప్రేమించి పెద్దలకు తెలీకుండా గాంధర్వ వివాహం చేసుకుంటాడు. కాని అతడి తల్లి (హేమలత) కక్షతో ఇద్దరినీ విడదీస్తుంది. అమాయక సరళ చిమ్మ చీకటిలో దోవతప్పి ఎక్కడికో వెళ్లిపోతుంది. ఒక నాటక కంపెనీలో చేరి, డాక్టరంత అంతస్థు సంపాదించి, డాక్టర్ అర్థాంగి కావడానికి అంతా సిద్ధం చేసుకుంటుంది. కాని కంపెనీ యజమాని (రాజనాల) రివాల్వర్ దెబ్బ ఆ ఆశను ఒక్క అడుగుదూరంలో అడుగంటింపజేస్తుంది. కుమార్ మాంగల్యం కట్టడం సరళ కడసారి కోర్కె అని ఎవరో చెప్పగా విన్న కుమార్ మాంగల్యం కడతాడు కానీ పెళ్లి పీటల మీదే పెళ్లి కూతురు వొరిగిపోతుంది. విడి, తిరిగి ముడివడిన జంట, చివరికి శాశ్వతంగా విడిపోతుంది.
విశేషాలు: దర్శకుడు బి.ఎస్. నారాయణకు ఇది తొలి చిత్రం.

నేటి పాట: కలువకు చంద్రుడు యెంతో దూరం (చిల్లర దేవుళ్లు)

చిత్రం: చిల్లర దేవుళ్లు (1975)
రచన: ఆత్రేయ
సంగీతం: కె.వి. మహదేవన్
గానం: ఎస్.పి. బాలసుబ్రహ్మణ్యం

పల్లవి:
కలువకు చంద్రుడు యెంతో దూరం
కమలానికి సూర్యుడు మరీ దూరం
దూరమైన కొలది పెరుగును అనురాగం
విరహంలోనే వున్నది అనుబంధం    ||కలువకు||

చరణం 1:
నవ్వు నవ్వుకు తేడా వుంటుంది
నవ్వే అదృష్టం ఎవరికుంటుంది
ఏ కన్నీరైనా వెచ్చగ వుంటుంది
అది కలిమిలేములను మరిపిస్తుంది   ||కలువకు||

చరణం 2:
వలపుకన్నా తలపే తీయన
కలయికకన్నా కలలే తీయన
చూపులకన్నా యెదురుచూపులే తీయనా
నేటికన్నా రేపే తీయనా    ||కలువకు||

చరణం 3:
మనసు మనిషిని మనిషిగ చేస్తుంది
వలపా మనసుకు అందాన్నిస్తుంది
ఈ రెండూ లేక జీవితమేముంది
ఆ దేవుడికీ మనిషికీ తేడా ఏముంది   ||కలువకు||

నేటి పాట: నవ్వులు రువ్వే పువ్వమ్మా (గాజుల కిష్టయ్య)

చిత్రం: గాజుల కిష్టయ్య (1975)
రచన: ఆత్రేయ
సంగీతం: కె.వి. మహదేవన్
గానం: ఎస్.పి. బాలసుబ్రహ్మణ్యం

పల్లవి:
నవ్వులు రువ్వే పువ్వమ్మా - నీ
నవ్వులు నాకు ఇవ్వమ్మా
ఉన్న నాలుగునాళ్లూ నీలా
ఉండిపోతే చాలమ్మా

చరణం 1:
ఆకుల పయ్యెదలో నీ ఆడతనాన్ని దాచావు
రేకుల కెంపులలో నీ రేపటి ఆశలు నింపావు
ఆ ముసుగుతీసిన ముద్దుముఖాన
మొగ్గ సొగసే వుందమ్మా   ||నవ్వులు||

చరణం 2:
ఈ తోటమొత్తము కమ్మినవి - నీ
దోరవయసు అందాలు - ఈ
గాలి మత్తులో వున్నవి - నీ
కన్నె మనసులో కైపులు
నువ్వొలకబోసే ఒంపు సొంపులకు
ఒడిని పడతానుండమ్మా   ||నవ్వులు||

చరణం 3:
ఏ కొమ్మకు పూచావో
ఏ కమ్మని తేనెలు తెచ్చావో
ఏ పాటకు మురిసేవో
ఏ తేటికి విందులు చేసేవో
పాటగానో తేటిగానో
పదినాళ్లున్నా చాలమ్మా   ||నవ్వులు||

నేటి పాట: కసిగావుంది కసికసిగావుంది (ఎదురులేని మనిషి)

చిత్రం: ఎదురులేని మనిషి (1975)
రచన: ఆత్రేయ
సంగీతం: కె.వి. మహదేవన్
గానం: ఎస్.పి. బాలసుబ్రహ్మణ్యం, పి. సుశీల

ఆమె: కసిగావుంది కసికసిగావుంది
          కలవక కలవక కలిసినందుకు కస్సుమంటుంది
          కసుక్కుమంటూ కాటేయ్ మంటుంది

అతడు: కసిగావుంది కసికసిగావుంది
           కలవక కలవక కలిసినందుకు కస్సుమంటుంది
           కసకస నిన్నూ నవిలేయ్ మంటుంది
                           
ఆమె: నీ ఛాతీ చూస్తే నిన్నరాతిరి గుర్తుకు వస్తూంది
          నీ కండలు చూస్తే గుండెనిండా గుబులే పుడుతూంది

అతడు: గుబులంతా నీ కళ్లల్లోనే గుబగుబమంటూంది
             అది కొత్త కొత్త కథలను రోజూ చెప్పక చెపుతూంది   ||కసిగా||

ఆమె: ఎంతకాలం నీకోసం ఎదురుచూస్తూ ఉండేది
          ఎదురు తిరిగే పరువాన్ని అదుపులోన ఉంచేది

అతడు: అదుపులోకి రానిదాన్ని వదులుకోవాలి
            వదులుకున్నా వదలనిదాన్ని అనుభవించాలి   ||కసిగా||

ఆమె: నీ అండలేక అందరికీ నే నలుసైపోయాను
          నువ్వుండగా ఏ మొనగాడు నా జోలికి రాలేడు

అతడు: అందుకేగా ఆడదానికో మగవాడుండాలి
            ఉంటే చాలదు అందుకు తగ్గ మగసిరి వుండాలి

నేటి పాట: నీవు లేని నేను లేను (మంచి మనుషులు)

చిత్రం: మంచి మనుషులు (1974)
రచన: ఆత్రేయ
సంగీతం: కె.వి. మహదేవన్
గానం: ఎస్.పి. బాలసుబ్రహ్మణ్యం, పి. సుశీల

అతడు: నీవు లేని నేను లేను
నేను లేక నీవు లేవు
నేనే నువ్వు - నువ్వే నేనూ
నేనూ నువ్వూ - నువ్వూ నేను లేనిచో
ఈ జగమే లేదు -

ఆమె: నీవు లేని నేను లేను
నేను లేక నీవు లేవు
నేనె నువ్వు - నువ్వే నేనూ
నేనూ నువ్వూ - నువ్వూ నేను లేనిచో
ఈ జగమే లేదు..

అతడు: తీగల్లో నువ్వూ నేనే అల్లుకొనేది
పువ్వుల్లో నువ్వు నేనె మురిసి విరిసేది
ఆమె: తెమ్మెరలో మనమిద్దరమె పరిమళించేది
తేనెకు మన ముద్దులే తీపిని ఇచ్చేది   ||నీవు లేని||

అతడు: నువ్వులేక వసంతానికి యవ్వన మెక్కడిది
ఆమె: నువ్వులేక వానమబ్బుకు మెరుపే ఎక్కడిది
అతడు: సృష్టిలోని అణువు అణువులో ఉన్నామిద్దరము
ఆమె: జీవితాన నువ్వూ నేనై కలిశా మీదినము   ||నీవు లేని||

ఆమె: కొండల్లె నువ్వున్నావు నాకు అండగా
అతడు: మంచల్లె నువ్వున్నావు నాకు నిండుగా
ఆమె: ఎన్ని జన్మలైనా ఉందాము తోడు నీడగా
అతడు: నిన్నా నేడు రేపే లేని ప్రేమజంటగా   ||నీవు లేని||

నేటి పాట: స్నేహబంధము ఎంత మధురము (స్నేహబంధం)

చిత్రం: స్నేహబంధం (1973)
రచన: ఆత్రేయ
సంగీతం: సత్యం
గానం: పి. సుశీల, ఎస్.పి. బాలసుబ్రహ్మణ్యం, ఆనంద్

స్నేహబంధము - ఎంత మధురము
చెరిగిపోదు తరిగిపోదు - జీవితాంతము   ||స్నేహ||

ఆమె: ఓకే ఆత్మ వుంటుంది రెండు శరీరాలలో
ఒకే పాట పలుకుతుంది వేరువేరు గుండెల్లో                          
అతను: ఒక్కటే దొరుకుతుంది జీవితంలో - అది
ఆమె: ఓడిపోదు - వాడిపోదు కష్టసుఖాల్లో   ||స్నేహ||

అతను: మల్లెపూవు నల్లగా మాయవచ్చును
మంచుకూడ వేడిసెగలు ఎగయవచ్చును
ఆమె: పువ్వుబట్టి తేనె రుచి మారవచ్చును
చెక్కుచెదరంది స్నేహమని నమ్మవచ్చును   ||స్నేహ||

తల్లి కడుపు పేగైనా తెంచుకొని వస్తాము
పెళ్లినాటి ప్రమాణాలు సన్యసించి వెళ్తాము
చితిలో అన్నిటిని వదులుకొందుము - కడకు
మట్టిలోన మట్టి చేరునదే స్నేహము   ||స్నేహ||

నేటి పాట: ఏమంటున్నది యీ గాలీ (మేమూ మనుషులమే!)

చిత్రం: మేమూ మనుషులమే! (1973)
రచన: ఆత్రేయ
సంగీతం: ఎం.ఎస్. విశ్వనాథన్
గానం: ఎస్.పి. బాలసుబ్రహ్మణ్యం, పి. సుశీల

పల్లవి:
ఆమె: ఏమంటున్నది యీ గాలీ
అతడు: ఎగిరే పైటను అడగాలీ
ఆమె: ఎగిరే పైటను ఏం చెయ్యాలి
అతడు: ఇంకో కొంగును ముడివెయ్యాలి   ||ఏమంటున్నది||

చరణం 1:
అతడు: పైటకు తెలుసు చాటున పొంగే ప్రాయం రెపరెపలూ
ఆమె: గాలికి తెలుసూ విరిసీ విరియని పూవుల ఘుమఘుమలూ
అతడు: ఊగే నడుమూ సాగే జడతో వేసెను పంతాలూ
ఆమె: నీలో వుడుకూ నాలో దుడుకూ చేసెను నేస్తాలూ   ||ఏమంటున్నది||

చరణం 2:
అతడు: మబ్బు మబ్బుతో ఏకమైనది - సాయం సమయంలో
ఆమె: మనసు మనసుతో లీనమైనది - మమతల మైకంలో
అతడు: అల్లరి కళ్లూ వెన్నెల నవ్వూ పెట్టెను గిలిగింతలూ
ఆమె: వెచ్చని వొడిలో ఇచ్చిన చోటున ఇమిడెను జగమంతా   ||ఏమంటున్నది||                                                    

నేటి పాట: నవ్వుతూ బతకాలిరా (మాయదారి మల్లిగాడు)

చిత్రం: మాయదారి మల్లిగాడు (1973)
రచన: ఆత్రేయ
సంగీతం: కె.వి. మహదేవన్
గానం: ఎస్.పి. బాలసుబ్రహ్మణ్యం

పల్లవి:
నవ్వుతూ బతకాలిరా.. తమ్ముడూ
నవ్వుతూ చావాలిరా..
చచ్చినాక నవ్వలేవురా.. ఎందరేడ్చినా
బతికిరావురా.. తిరిగిరావురా.. అందుకే   ||నవ్వుతూ||                        
చరణం 1:
చంపేది ఎవడురా..
చచ్చేది ఎవడురా..
శివునాజ్ఞ లేకుండా చీమైనా కుట్టదురా
కుడితే సావాలని వరమడిగిన చీమ
కుట్టీ కుట్టకముందె సస్తోంది సూడరా.. అందుకే   ||నవ్వుతూ||
చరణం 2:
బతికుండగా నిన్ను ఏడిపించినోళ్లు
నువ్వు సస్తె ఏడుత్తారు దొంగనాయాళ్లు
అది నువ్వు సూసేదికాదు - నిను కాసేదికాదు
నువ్వు పోయినా నీ మంచి సచ్చిపోదురా..
ఒరె సన్నాసీ నవ్వరా.. అందుకే   ||నవ్వుతూ||
చరణం 3:
వున్నాడురా దేవుడు
వాడు ఒస్తాడురా తమ్ముడు..
ఎప్పుడు?
అన్నాయం జరిగినపుడు - అక్కరమం పెరిగినపుడు
వస్తాడురా.. సచ్చినట్టు వస్తాడురా.. అందుకే   ||నవ్వుతూ||