ఫోకస్: 2010 ముగింపైనా సంతోషాన్నిస్తుందా? (చివరి భాగం)

భయపెట్టనున్న 'చంద్రముఖి-2'
డిసెంబరులో రాబోతోన్న మరో సీనియర్ టాప్ హీరో సినిమా 'నాగవల్లి'. వెంకటేశ్ కథానాయకుడు. 'చంద్రముఖి-2'గా ప్రచారం పొందుతోన్న ఈ సినిమా కన్నడ హిట్ ఫిల్మ్ 'ఆప్త రక్షక'కి రీమేక్. ఆ సినిమాని డైరెక్ట్ చేసిన సీనియర్ తమిళ డైరెక్టర్ పి. వాసు తెలుగు చిత్రాన్నీ రూపొందిస్తున్నారు. బెల్లంకొండ సురేశ్ నిర్మిస్తోన్న ఈ చిత్రంలో అనుష్క, రిచా గంగోపాధ్యాయ్, కమలినీ ముఖర్జీ, శ్రద్ధాదాస్ వంటి తారలు కనిపించనుండటం విశేషం. వెంకటేశ్ మునుపటి చిత్రాలు 'నమో వెంకటేశ', 'ఈనాడు' ప్రేక్షకుల్ని అలరించడంలో విఫలమైన నేపథ్యంలో 'నాగవల్లి' సినిమా ఫలితంపై ఆసక్తి నెలకొంది. సస్పెన్స్, మిస్టరీకి వినోదాన్ని జోడించిన ఈ చిత్రం డిసెంబర్ తొలివారంలో విడుదలయ్యే అవకాశాలు కనిపిస్తున్నాయి.

'రక్త చరిత్ర-2' వస్తోంది
'రక్త చరిత్ర' ఘన విజయం సాధించడంతో ఇప్పుడు అందరి దృష్టీ దాని సీక్వెల్ 'రక్త చరిత్ర-2' మీదపడుతోంది. తొలి సినిమా విడుదలైన నెలరోజుల్లోపలే నవంబర్ 26న ఈ సినిమాని విడుదల చేస్తున్నట్లు వర్మ ప్రకటించడం క్యూరియాసిటీని మరింత పెంచింది. తొలి భాగంలో కనిపించని మద్దెలచెరువు సూరి పాత్ర రెండో భాగంలో కనిపించనుండటం, ఆ పాత్రని తమిళ స్టార్ నటుడు సూర్య చేయడం ఆ సినిమా విలువని అమాంతం పెంచేసింది. సూర్య భార్య పాత్రలో ప్రియమణి నటించిన ఈ సినిమాలో పరిటాల రవి, మద్దెలచెరువు సూరి మధ్య ఘర్షణ ప్రధానం. రవి పాత్రలో ఇప్పటికే వివేక్ ఓబరాయ్ అందరి ప్రశంసలూ పొందిన సంగతి తెలిసిందే. తొలి భాగంకంటే ఈ రెండో భాగం మరింత విజయాన్ని సాధించే అవకాశాలు ప్రస్ఫుటంగా కనిపిస్తున్నాయి. అదే జరిగితే సీక్వెల్స్ నిర్మాణం వేగం పుంజుకోవడం ఖాయం.

వివాదాల 'కత్తి'
ఇటీవల 'కత్తి' టైటిల్ పై వివాదం చెలరేగడం గుర్తుండే వుంటుంది. 'కత్తి' అనే టైటిల్ని ఫిలింఛాంబర్ వద్ద డైరెక్టర్ గుణశేఖర్ రిజిస్టర్ చేయించాడు. రవితేజ హీరోగా ఆ పేరుతో సినిమా రూపొందించేందుకు ఆయన సంకల్పించాడు. ఈ టైటిల్ రిజిస్టర్ అయ్యింది మాత్రం వైవీఎస్ చౌదరికి చెందిన బొమ్మరిల్లు బ్యానరులో. అంటే ఈ సినిమాకి నిర్మాత చౌదరే. కానీ 'కత్తి' పేరుతో మరో రెండు సినిమాలు ఇప్పటికే నిర్మాణంలో ఉన్నాయి. వాటిలో ఒకటి అల్లరి నరేశ్ హీరోగా ఈవీవీ సత్యనారాయణ రూపొందిస్తోన్న 'కత్తి కాంతారావు' కాగా, మరొకటి 'కల్యాణ్ రామ్ కత్తి'. వీటిలో రెండో సినిమా టైటిల్ పైనే గుణశేఖర్ అభ్యంతరం వ్యక్తంచేశారు. కారణం టైటిలులో 'కల్యాణ్ రామ్' అన్న పేరుని ఇంగ్లీషులో చిన్న అక్షరాలతో ఉంచి, 'కత్తి'ని పెద్దక్షరాలతో డిజైన్ చేయించడం. గుణశేఖర్ అభ్యంతరాల్ని ఏమాత్రం ఖాతరుచేయని కల్యాణ్ రామ్ ఆ టైటిలునే ఖాయం చేసుకున్నాడు. సొంత బేనర్ యన్.టి.ఆర్. ఆర్ట్స్ పై మల్లికార్జున్ డైరెక్షనులో హీరోగా నటిస్తూ ఈ చిత్రాన్ని ఆయన నిర్మించాడు. సనాఖాన్ నాయికగా నటించిన ఈ చిత్రం నవంబర్ ప్రథమార్ధంలో ప్రేక్షకుల ముందుకు వస్తోంది. 'కత్తి' వివాదాన్ని ఇంకా జనం మరచిపోకముందే వస్తున్నందున ఈ సినిమా బాక్సాఫీసు వద్ద ఎలాంటి ఫలితాన్ని నమోదు చేస్తుందనే ఆసక్తి సినీ వర్గాల్లో నెలకొంది. పైగా 'అతనొక్కడే' తర్వాత కల్యాణ్ రామ్ కి చెప్పుకోదగ్గ సినిమా ఇంతదాకా రాలేదు. అందుకే ఎంతో కసితో అతను ఈ సినిమా చేశాడు.
'బ్రోకర్'పైనా ఆసక్తి
స్టార్ హీరోలు లేకపోయినా, స్టార్ డైరెక్టర్ తీయకపోయినా కుతూహలాన్ని రేపుతున్న మరో సినిమా 'బ్రోకర్'. నవంబర్ లేదా డిసెంబరులో రిలీజ్ కానున్న ఈ చిత్రంలో టైటిల్ పాత్రని సంగీత దర్శకుడు ఆర్పీ పట్నాయక్ పోషించాడు. అంతే కాదు, ఈ చిత్రానికి దర్శకుడు కూడా అతనే. నేటి సమాజంలో 'బ్రోకర్' అనేవాడు లేకుండా ఏ పనీ జరగడం లేదనే సంగతిని వ్యంగ్యంగా చిత్రిస్తూ రూపొందిస్తోన్న ఈ చిత్రంలో అర్పీ నెగటివ్ రోలులో కనిపించబోతున్నాడు. శ్రీహరి సైతం ఓ కీలక పాత్రలో నటించిన ఈ చిత్రాన్ని డైరెక్టర్స్ సినిమా పతాకంపై స్వయంగా  డైరెక్టర్ అయిన మద్దినేని రమేశ్ నిర్మిస్తున్నారు.
వీటితో పాటు మరికొన్ని సినిమాలు కూడా ఈ రెండు నెలల్లో రాబోతున్నాయి. వీటిలో మూడు నాలుగు సినిమాలైనా సక్సెసయితే 2010ని చిత్రసీమ హ్యాపీగా ముగించినట్లవుతుంది. అలా జరుగుతుందా? చూద్దాం.                          

సినిమా: ఎన్టీఆర్ పాత్రలో షాట్ గన్

షాట్‌గన్‌గా అభిమానులు పిలుచుకునే బాలీవుడ్ నటుడు శత్రుఘ్న సిన్హా తొలిసారి మీసం లేకుండా వెండి తెరపై కనిపించబోతున్నారు. అదీ రాంగోపాల్ వర్మ రూపొందించిన 'రక్త చరిత్ర' చిత్రంలో. ఈ సినిమాలో ఆయన ఆంధ్రప్రదేశ్ మాజీ ముఖ్యమంత్రి దివంగత ఎన్టీ రామారావు పాత్రని పోషించారు.
పరిటాల రవి జీవితం ఆధారంగా వర్మ రూపొందించిన ఈ సినిమా తన కెరీర్‌లోనే ఉత్తమ చిత్రమనీ, నటునిగా ఈ సినిమా తనకు చాలా మంచి పేరు తీసుకొస్తుందని సిన్హా అంటున్నారు. 'రక్త చరిత్ర' తెలుగు, తమిళ, హిందీ భాషల్లో ఏక కాలంలో ఈ నెల ద్వితీయార్థంలో విడుదలకు సిద్ధమవుతోంది.
ఇందులో పరిటాల రవిగా వివేక్ ఓబరాయ్, మద్దెలచెరువు సూరిగా సూర్య నటించారు. సిన్హా ఈ మూడు భాషల్లోనూ దర్శనమివ్వనున్నారు. దీనికోసం ఆయన తెలుగు, తమిళ భాషల్లో సంభాషణల్ని అర్థం చేసుకుని మరీ నటించారు. "ఈ సినిమా కోసం నిజంగా కష్టపడ్డా. నేను బాగా నటించిన సినిమాల్లో ఇదొకటి.
సినిమా మొత్తం చాలా గ్రిప్పింగ్‌గా ఉంటుంది. ఆర్.జి.వి. (వర్మ) చాలా బాగా ఈ సినిమాని రూపొందించారు'' అని చెప్పారు సిన్హా. ఎన్టీఆర్ పాత్ర కోసం మీసాలు తీయడానికి మొదట ఆయన వెనుకాడారు. అయితే స్క్రిప్టు డిమాండ్ చేయడం వల్లా, వర్మ విజ్ఞప్తి మేరకు ఆయన మీసం తీసి నటించారు. సిన్హా బి.జె.పి.కి చెందిన పార్లమెంట్ సభ్యులనే సంగతి తెలిసిందే.

సినిమా: ఇక 'బెజవాడ రౌడీల' మీద రాంగోపాల్ వర్మ చూపు

ఏం చేసినా సంచలనం కోసమే చేస్తానని చెప్పే డైరెక్టర్ రాంగోపాల్ వర్మ మరోసారి అదే పని చేశారు. రాయలసీమ ఫ్యాక్షనిజాన్ని 'రక్త చరిత్ర'లో బంధించిన ఆయన ఇక 'బెజవాడ రౌడీలు' ఎలాంటి వాళ్లో, వాళ్లకి ఎంత భీకరమైన ఇమేజ్ ఉందో చెప్పడానికి ఉవ్విళ్లూరుతున్నారు. 'రక్త చరిత్ర' తర్వాత 'బెజవాడ రౌడీలు' సినిమా తీస్తానని ఆయన ప్రకటించగానే సంచలనం చెలరేగింది. విజయవాడకు చెందిన అనేకమంది రాజకీయ నాయకులు వర్మ ఆలోచనని ఖండించి, ఆయనపై తీవ్ర విమర్శలు చేశారు. 'అదుర్స్' నిర్మాత, తెలుగుదేశం పార్టీ నాయకుడు వల్లభనేని వంశీమోహన్ అయితే వర్మకి పిచ్చికుక్క కరిచి వుంటుందనీ, అందుకే ఇలాంటి సినిమాలు తీస్తానంటున్నాడనీ తీవ్రంగా విమర్శించారు. అయితే సాధారణ ప్రజానీకం నుంచి దీనిపై అంతగా స్పందన రాకపోవడం గమనార్హం.                        
తను తీసే ప్రతి సినిమాతోనూ వార్తల్లోకెక్కే వర్మ 'రక్త చరిత్ర'తో ఓవైపు సంచలనాన్ని సృష్టిస్తూనే, మరోవైపు వివాదాలకీ కేంద్ర బిందువయ్యారు. అనంతపురం జిల్లాకు చెందిన దివంగత తెలుగుదేశం నాయకుడు పరిటాల రవి జీవితం ఆధారంగా ఆయనకూ, మద్దెలచెరువు సూరికీ మధ్య జరిగిన ఆధిపత్య పోరును చిత్రిస్తూ ఆయన 'రక్త చరిత్ర' తీశారు. రవి పాత్రను బాలీవుడ్ నటుడు వివేక్ ఓబరాయ్ చేస్తే, సూరిగా తమిళ హీరో సూర్య నటించారు.
ఇటీవలే ఆడియో రిలీజైన ఈ సినిమా ఈ నెల 22న ప్రేక్షకుల ముందుకు రాబోతోంది. అనంతపురం ఫ్యాక్షన్ కక్షలకు అద్దంపట్టే ఈ సినిమా విడుదలకు ముందే సంచలనాన్ని సృష్టించడంతో పాటు వివాదాలకీ తెరతీసింది. ఆ సినిమాలో ఓబుల్ రెడ్డిని దుర్మార్గుడిగా చూపించారంటూ ఆయన వర్గీయులు ఆందోళన చేయడం, ఓబుల్ రెడ్డి స్వయంగా దెయ్యమై వచ్చినా తాను భయపడేది లేదని వర్మ ప్రకటించడం తెలిసిందే.
ఈ నేపథ్యంలో 'బెజవాడ రౌడీలు' తీయబోతున్నట్లు వర్మ ప్రకటించడం సంచలనం రేకెత్తించింది. బెజవాడ సిద్దార్థ ఇంజనీరింగ్ కాలేజీలో చదువుకునే రోజుల్లోనే అక్కడి రౌడీయిజాన్నీ, దాని వెనకాల కారణాల్నీ క్షుణ్ణంగా పరిశీలించేవాణ్ణనీ చెప్పుకున్న వర్మ తన తొలి చిత్రం 'శివ'లో చూపించిన రౌడీయిజం బెజవాడ రౌడీయిజంతో పోలిస్తే సముద్రంలో ఒక నీటి చుక్క మాత్రమేనని తేల్చారు. 'వేరెక్కడా లేని ఒక మహా ప్రత్యేకమైన ప్రత్యేకత బెజవాడ రౌడీకి ఉన్నద'ని చెప్పిన ఆయన తన మైండులో 30 యేళ్లుగా ఆ సినిమా స్క్రిప్టు నలుగుతున్నదన్నారు. ఇప్పటికి ఆ స్క్రిప్టు పూర్తికావచ్చిందనీ, 'వీలైనంత తొందరలో బెజవాడకి కెమెరాని తీసుకెళ్లి అక్కడి రౌడీలని దానిలో బంధించి 70 ఎంఎం స్టీరియోఫోనిక్ సౌండులో అందరికీ చూపెట్టడానికి శరవేగంతో సన్నాహాలు జరుగుతున్నాయి' అని చెప్పారు వర్మ.
ఒకప్పటి బెజవాడ రౌడీ రాజకీయాలు, రౌడీ గ్రూపుల మధ్య ఆధిపత్య పోరు సంగతి జగమంతా తెలిసిందే కాబట్టి ఎవర్ని ఎలా 'బెజవాడ రౌడీలు'లో వర్మ చూపించబోతున్నాడనేది ఆసక్తికరమైన అంశం. అదే ఇప్పుడు సంచలనాన్ని సృష్టిస్తోంది. రానున్న రోజుల్లో మరిన్ని వివాదాలకీ నెలవు కాబోతోంది.