Synopsis of the movie UNDAMMA BOTTU PEDATHA (1968)

'ఉండమ్మా బొట్టుపెడతా' కథాంశం:

భూమిని నమ్ముకుని కాయకష్టం చేసి శ్రమించే దశరథరామయ్య (నాగయ్య) కుటుంబం ఒక సంవత్సరం పంటలు పుష్కలంగా పండించింది. అది గుర్తించిన ప్రభుత్వం ఆయనను 'కృషి పండిట్' బిదురుతో సత్కరించాలనుకుంది. ఆ బిరుదుకు తను అర్హుణ్ణి కాననీ, తన మనవరాలు లక్ష్మి అని చెబుతూ ఆయన తన కుటుంబ గాథను వివరిస్తాడు. ఆ కథ ప్రకారం...
దశరథరామయ్యకు నలుగురు కొడుకులు. పెద్ద కొడుకు శ్రీనివాసులు (నాగభూషణం) పేకాట మినహా మరో వ్యాపకంలేని వ్యక్తి. అతని భార్య తులశమ్మ (జానకి) మూఢభక్తి శిఖామణి. పత్రీ పుష్పాలతో దేవుణ్ణి కొలవడం తప్ప ఇల్లూ వాకిలీ చక్కదిద్దుకోవడం ఎరుగని ఇల్లాలు. రెండో కొడుకు వెంకటేశ్వర్లు (అర్జా జనార్దనరావు) కండబలంతో రౌడీగా బతుకుతూ, నిత్యం సారా మైకంతో భార్య శేషు (సూర్యకళ)పై పిడిగుద్దులు కురిపిస్తుంటాడు. పగలంతా మొగుడితో కీచులాటలాడి, తన్నులుతిని అదే ఊళ్లోని పుట్టింటికి పోవడం, రాత్రయ్యేసరికల్లా సింగారించుకుని మొగుడి పక్కలో చేరడం శేషు దినచర్య.
మూడో కొడుకు ఆంజనేయులు (చలం) మోజుపడి ఇంగ్లీష్ చదివిన అమ్మాయిని భార్యగా చేసుకొని, ఆమెకు బెడ్ కాఫీ అందిస్తూ వంటవాడిగా తయారైన మనిషి. ఆ భార్య సుమతి (మీనాకుమారి) అచ్చంగా కుమతి. మొగుణ్ణి వాజమ్మను చేసి దర్జా, దర్పం వెలిగిస్తూ ఉంటుంది. ఇక నాలుగో కొడుకు కృష్ణ (కృష్ణ) అవివాహితుడు. తన భాగానికొచ్చిన పొలాన్ని నమ్ముకొని తండ్రికి అండగా ఉన్న మంచివాడు.
బాధ్యత తెలీని కొడుకులూ, కోడళ్లతో అరాచకత్వం తాండవిస్తున్న ఇంటిని చూసి దశరథరామయ్య కుమిలిపోతుంటాడు. ఆ ఊళ్లోనే ఓ హరిదాసు (ధూళిపాళ) కుటుంబం ఉంటోంది. ఆయనకు ఒకే ఒక్క కూతురు లక్ష్మి (జమున). 'అడుగడుగున గుడివుంది, అందరిలో గుడివుంది' అని నమ్మిన యువతి. శుచి, శుభ్రం ఉన్న ఇంట్లోనే శ్రీ మహాలక్ష్మి కొలువుంటుందని ఆమె నమ్మకం.
హరిదాసు రోజూ ఊళ్లో భిక్షాటన చేసి, ఆ వచ్చిన బియ్యాన్ని పాపాయమ్మకు అమ్ముకుని, ఆ డబ్బు ఆమె వద్దే కూడబెడుతుంటాడు. ఆ డబ్బుతో కూతురికి మంచి సంబంధం తెచ్చి పెళ్లి చేయాలనేది ఆయన సంకల్పం. పాపాయమ్మ (సూర్యకాంతం) పేరుకు తగినట్లే పాపాలపుట్ట. కాఫీ ఇడ్లీల దగ్గర్నుంచి 'రూపాయి సోడా' (సారా) దాకా ఆమె దగ్గర దొరుకుతాయి. ఎవరింట్లోనన్నా ఏ వస్తువైనా కనిపించలేదంటే అది పాపాయమ్మ ఇంట్లో తాకట్టుకు చేరివుంటుందని చెప్పుకుంటారు. లక్ష్మికి సంబంధం ఖాయం చేసుకున్న హరిదాసు తన డబ్బు కోసం పాపాయమ్మ దగ్గరకు వచ్చి అడుగుతాడు. ఆ డబ్బు ఇవ్వకపోగా హరిదాసే తన డబ్బు కాజేయడానికి తనను కొట్టాడంటూ పోలీసులకు ఫిర్యాదు చేసి, ఆయనను అరెస్ట్ చేయిస్తుంది పాపాయమ్మ.
పీటలమీద పెళ్లి చెదిరిపోవడం, తన తండ్రి అపనిందకు గురికావడం భరించలేని లక్ష్మి ఆత్మహత్యకు పూనుకుంటుంది. ఆమెను కృష్ణ కాపాడతాడు. అదే ముహూర్తానికి లక్ష్మిని తనయింటి కోడలిగా చేసుకుంటాడు దశరథరామయ్య. ముష్టివాడి కూతుర్ని ఆ ఇంటి కోడల్ని చేసినందుకు పెద్ద కోడళ్లు ఈసడిస్తారు. అడుగడుగునా అవమానిస్తారు. తోడికోడళ్లు ఎలా ప్రవర్తించినా, ఆ ఇంటికి దీపంగా, భర్తకు నీడగా ఉంటూ వస్తుంది లక్ష్మి.
అరాచకత్వం, అపరిశుభ్రం తాండవిస్తున్న ఆ ఇంటినుండి శ్రీ మహాలక్ష్మి వెళ్లిపోతుండగా, ఆమెను అక్కడ నిలిపేందుకు ఆత్మత్యాగం చేసిన లక్ష్మి పేరంటాలై వెలుస్తుంది. ఆమె ఆత్మత్యాగంతో కళ్లు తెరిచిన ఆ కుటుంబం ఏకమై, అందరూ కష్టించి పనిచేసి, ఆ ఇంటిని సిరులతో కళకళలాడిస్తారు.

తారాగణం: కృష్ణ, జమున, గుమ్మడి, షావుకారు జానకి, ధూళిపాళ, సూర్యకాంతం, అంజలీదేవి, చలం, నాగభూషణం, నాగయ్య, అర్జా జనార్దనరావు, మీనాకుమారి, సూర్యకళ
సంగీతం: కె.వి. మహదేవన్
సమర్పణ: ఆదుర్తి సుబ్బారావు
నిర్మాత: సి. సుందరం
దర్శకత్వం: కె. విశ్వనాథ్
బేనర్: బాబూ మూవీస్
విడుదల తేది: 28 సెప్టెంబర్ 1968

జ్ఞాపకాలు: షావుకారు జానకి

మూడు నెలల పసిపాపను ఎత్తుకుని 17 ఏళ్ల వయసులో ఉన్న అమ్మాయి సినిమా ఛాన్సుల కోసం తిరగడాన్ని ఎలా ఊహించాలి? ఇదేదో ఇప్పటి సంఘటన కాదు. 1940ల కాలంలో జరిగింది. ఆ 17 ఏళ్ల యువతి ఎవరో కాదు, షావుకారు జానకి! అంతే కాదు, సినిమాలు చూడ్డమే తప్పనుకునే కుటుంబం నుంచి వచ్చిన ఆమె ఏకంగా 385 సినిమాల్లో నటించడం కూడా అసాధారణం. తన కెరీర్‌లో ఎన్టీఆర్, ఏఎన్నార్, ఎంజీఆర్, రాజ్‌కుమార్, శివాజీ గణేశన్ వంటి గొప్ప నటులతో నటించిన జానకి సినిమాల్లో చేరడం అంత ఈజీగా జరగలేదు.
జానకి తండ్రి ఓ పేపర్ తయారీదారుడు. వ్యాపారం కారణంగా తరచూ ఊళ్లు మారుతుండే ఆయన వల్ల ఆమె చదువు సరిగా సాగలేదు. 15 ఏళ్ల వయసులో ఆల్ ఇండియా రేడియోలో తెలుగు నాటకాలు ఆడుతున్నప్పుడు ఆమె గొంతు విని, ఆమెని చూడాలనుకున్నారు ప్రఖ్యాత దర్శకుడు బి.ఎన్. రెడ్డి. ఆమెని చూసి సినిమా ఆఫర్ ఇచ్చారు. సంతోషంతో ఈ సంగతిని చెప్పడానికి ఇంటికెళ్లిన జానకికి నిరాశ ఎదురైంది. ఆమె తల్లి, సోదరులు మరో మాటలేకుండా ఆ అవకాశాన్ని తిరస్కరించారు. ఆల్ ఇండియా రేడియోకే ఆమెని పంపడం పెద్ద తప్పయ్యిందని భావించిన వాళ్లు అప్పటికప్పుడు సంబంధం చూసి 1947లో పెళ్లి చేసేశారు. పెళ్లయిన రెండేళ్లకి మరో ఉద్యోగం కోసం ఉన్న ఉద్యోగాన్ని వదిలేశాడు ఆమె భర్త. అప్పుడు జానకి గర్భవతి. అప్పుడామె గతంలో తనకొచ్చిన సినిమా అవకాశం గురించి చెప్పి, సినిమాల్లో నటించడానికి అనుమతి కోరింది. భర్త వెంటనే ఒప్పుకున్నాడు. బిడ్డని కన్నాక ఆ పాపతో పాటే వెళ్లి బి.ఎన్. రెడ్డిని కలిసింది జానకి. ఆ సమయంలో ఆయన చేతిలో సినిమాలేవీ లేవు. తన ఆర్థిక పరిస్థితి వివరించి సినిమాలే తనకి దిక్కని ఆయనకు చెప్పింది జానకి. దాంతో ఆయన ఆడిషన్ కోసం తన తమ్ముడు నాగిరెడ్డి వద్దకు పంపాడు. నెల రోజుల మానసిక వేదన తర్వాత 'షావుకారు'లో హీరోయిన్‌గా తీసుకుంటున్నట్లు ఆమెకి కబురొచ్చింది. అంతే! ఇటు విమర్శకుల, అటు ప్రేక్షకుల ప్రశంసలు పొందిన ఆ సినిమాతో 'షావుకారు' ఆమె ఇంటిపేరుగా మారిపోయింది.
అయితే వ్యక్తిగత జీవితంలో ఆమె కష్టాలు తీరలేదు. ఆ సినిమా షూటింగ్ జరిగేప్పుడు ఇంటికొచ్చి ఎన్టీఆర్‌తో తను చేసిన సీన్లు చెప్పినప్పుడు ఆమె భర్త అసూయతో రగిలిపోయేవాడు. మాటలతో వేధించాడు కూడా. కానీ తనని నమ్మమని ఆమె అతన్ని అర్థించింది. ఎలాగైతేనేం... నటిగా ఆమె అందరి హృదయాల్ని చూరగొంది. మొహంలో గ్లామర్ లేకపోయినా తన డైలాగ్ డెలివరీ, హావభావాలతోటే ఆమె తెరపై రాణించింది. 1950, 60లలో చక్కటి పాత్రలతో తనదైన ముద్రని వేసిందామె. ఆమె తెలుగులోకంటే తమిళంలో మరింత పేరు తెచ్చుకోవడం విశేషం. బి.ఎస్. రంగా, బి.ఆర్. పంతులు వంటి డైరెక్టర్ల కారణంగా కన్నడంలోనూ ఆమె రాణించింది. రాజ్‌కుమార్‌తో ఆమె చేసిన సినిమాలు హిట్టయి, అక్కడా ఆమెకి పేరు తెచ్చాయి.
కెరీర్‌లో ఉచ్ఛ స్థితిలో ఉండగా 1965 ప్రాంతంలో కె. బాలచందర్‌కి చెందిన నాటక సంస్థలో చేరి రంగస్థలంపైనా అడుగుపెట్టింది. అయితే వెండితెర జీవితంలో ఆమె సాధించిన విజయాలు వ్యక్తిగత జీవితంలోని ఆటుపోట్ల కారణంగా వెలుగుతగ్గాయి. ఆమె వైవాహిక జీవితం ఒడిదుడుకులకు గురయ్యింది. పిల్లల భవిష్యత్తు కోసం సగటు భారతీయ స్త్రీకు మల్లే కష్టాల్ని భరించింది. ఆమె ఓ భార్యగా విఫలమయి ఉండోచ్చు కానీ, ఓ తల్లిగా ఎప్పుడూ ఆమె విఫలం కాలేదు. 80 ఏళ్ల వయసులో బెంగళూరు శివార్లలో ప్రశాంత జీవితం గడుపుతున్న ఆమె ముని మనవలు, మనవరాండ్ర కోసం తరచూ చెన్నై వెళ్తుంటుంది.

Shavukaru Janaki (Actress)

Janaki has been entered in the film world with the movie 'Shavukaru'. Late Tekumalla Venkoji was her fater. Krishna Kumari, the well known actress, and Devaki are her younger sisters. She have another three brothers. She married Sankaramnchi Srinivasa Rao.
Filmography:
Shavukaru (1950)
Vaddante Dabbu (1954)
Rojulu Marayi (1955)
Cherapakura Chedevu (1955)
Jayasimha (1955)
Kanyasulkam (1955)
Anna Tammudu (1958)
Rechukka-Pagati Chukka (1959)
Kaadeddulu Ekaram Nela (1960)
Batasari (1961)
Manchi Manasulu (1962)
Pempudu Koothuru (1963)
Savati Koduku (1963)
Doctor Chakravarthi (1964)
Manchi Kutumbam (1965)
Chinnari Papalu (1968)
Akka Chellelu (1970)
Khaidi Babai (1974)
Ramarajyamlo Raktapatam (1976)
Vemulavada Bheema Kavi (1976)
Chal Mohana Ranga (1978)
Tayaramma Bangarayya (1979)
Rahasya Gudhachari (1981)
Geetanjali (1989)
Bavagaru Bagunnara (1998)
Pedda Manushulu (1999)
Devi (1999)