అసిన్ హ్యాట్రిక్ హిట్?

బాలీవుడ్‌లో రెండు వరుస హిట్లు సాధించిన అసిన్ హ్యాట్రిక్ హిట్ మీద కన్నేసింది. ఆమె హీరోయిన్‌గా నటించిన 'రెడీ', 'హౌస్‌ఫుల్ 2' ఒకదాన్ని మించి ఒకటి ఘన విజయం సాధించాయి. రానున్న 'బోల్ బచ్చన్' కూడా హిట్టయితే హ్యాట్రిక్ పూర్తవుతుందనేది ఆమె ఆశ. ఇవన్నీ కామెడీలు కావడం గమనించదగ్గ అంశం. "సల్మాన్‌ఖాన్, అక్షయ్‌కుమార్ వంటి స్టార్లు ఉండటం 'రెడీ', 'హౌస్‌ఫుల్ 2' సినిమాలకు బాగా ఉపయోగపడింది. 'బోల్ బచ్చన్'లో అజయ్ దేవగన్ ఉన్నాడు. అన్నిటికీ మించి ఇది సందర్భానుసారం నడిచే కామెడీ సినిమా. ఇలాంటి సినిమాలకి అసిన్ సరిగ్గా సరిపోతుంది'' అని తెలిపారు ఓ ట్రేడ్ విశ్లేషకుడు. అయితే ఇవి కామెడీ సినిమాలైనా ఒకదానికొకటి భిన్నమైనవి. 'హౌస్‌ఫుల్ 2'లో ఉన్నది స్లాప్‌స్టిక్ కామెడీ అయితే, 'బోల్ బచ్చన్' సిట్చువేషనల్ కామెడీ అనీ, ఈ రెండు సినిమాల్లో భిన్నమైన బాడీ లాంగ్వేజీతో నటించాననీ అసిన్ తెలిపింది. ఈ రెండు కామెడీలు ఒకదానికొకటి భిన్నమైనవైనప్పటికీ, బాక్సాఫీస్ వద్ద ఒకే విధమైన ఫలితాన్ని చూపిస్తాయని ఆమె నమ్ముతోంది. డైరెక్టర్ రోహిత్‌శెట్టితో అజయ్ దేవగన్ కాంబినేషన్ ఇప్పటివరకు సూపర్ సక్సెస్ అవడం కూడా ఈ సినిమాపై అసిన్ నమ్మకానికి ఓ కారణం.

షాహిద్ ప్రేయసి!

తెలుగులో రాంచరణ్ సరసన 'చిరుత'లోనూ, వరుణ్‌సందేశ్ జోడీగా 'కుర్రాడు'లోనూ కనిపించినప్పటికీ ప్రేక్షకుల్ని అలరించినలేకపోయిన నేహా శర్మ బాలీవుడ్‌లో తన అదృష్టాన్ని పరీక్షించుకుంటోంది. మొదట ఇమ్రాన్ హష్మి సరసన 'క్రూక్'లో కనిపించిన ఈ అందాల తార ఇప్పుడు 'తేరీ మేరీ కహాని'లో హీరో షాహిద్ కపూర్ ప్రేయసి పాత్రలో దర్శనమివ్వబోతోంది. "కునాల్ కోహ్లి డైరెక్ట్ చేస్తున్న 'తేరీ మేరీ కహాని'లో ఓ అతిథి పాత్ర చేస్తున్నా. ఆ సినిమా మూడు తరాల కథతో తయారవుతోంది. నేను షాహిద్ సరసన 2012 తరానికి చెందిన అమ్మాయిగా నటించా. కథానుసారం ఇద్దరమూ లండన్ యూనివర్శిటీలో చదువుకుంటాం. అక్కడ ఒకరిపట్ల ఒకరం ఆకర్షనలో పడతాం. అయితే ఆ తర్వాత ఎవరికి వాళ్లం వేరేవాళ్లతో ప్రేమలో పడతాం'' అని తెలిపింది నేహ. 2011 సెప్టెంబర్‌లో ఆమె పాల్గొన్న సన్నివేశాల్ని చిత్రీకరించారు. జూన్ 22న విడుదల కానున్న ఈ చిత్రంలో షాహిద్ సరసన ప్రధాన నాయికగా ప్రియాంకా చోప్రా నటించింది.

టర్నింగ్ పాయింట్: రమాప్రభ

నేను సినిమాల్లోకి వచ్చి 45 సంవత్సరాలు. మాది మధ్య తరగతి కుటుంబం. నేను ఊటీ, చెన్నైలో పెరిగాను. మా పిన్ని వాళ్లతో ఉండటం వల్ల వాళ్లతో పాటు తిరిగాను. దాంతో నా చదువు మధ్యలోనే ఆగిపోయింది. మా బాబాయి ఆకస్మిక మరణంతో మా కుటుంబం తీవ్ర ఆర్థిక ఇబ్బందుల్లో పడింది. దాంతో బతకడం కోసం నేను సినిమాల్లోకి వచ్చా. క్లాసికల్ డాన్సర్‌గా స్టేజీ మీద నేనిచ్చిన ఓ ప్రదర్శన చూసిన డైరెక్టర్ ప్రత్యగాత్మ తన 'చిలకా కోరింక' (1966) సినిమాలో హీరో కృష్ణంరాజు చెల్లెలిగా చేసే ఛాన్స్ ఇచ్చారు. 

అందులో నేను పద్మనాభం సరసన చేశా. అప్పటికే గొప్ప కమెడియన్ అయిన ఆయన నన్ను తన జోడీగా ఒప్పుకున్నందుకు కృతజ్ఞతలు చెప్పుకోకుండా ఉండలేను. అప్పట్లో ఆయనా, గీతాంజలి హిట్ పెయిర్‌గా పేరు తెచ్చుకున్నారు. నిజానికి పద్మనాభం నన్ను బాగా ప్రోత్సహించారు. ఆ తర్వాత నేనెక్కువగా రాజబాబు సరసన నటించాను. చలం, రమకృష్ణ, శోభన్ బాబు, కృష్ణ వంటి ఎంతోమంది హీరోల సినిమాల్లో చేసిన నేను ఒక్క రాజబాబుతోటే 100 సినిమాల దాకా చేశా. తను నాకు మంచి స్నేహితుడు.

నా పరిమితులేమిటో నాకు తెలుసు. నా ముఖం గానీ, నా ఫ్రేంవర్క్ గానీ గ్లామర్‌ని కురిపించలేవనీ, అందువల్ల హీరోయిన్‌గా నేను పనికిరాననీ తెలుసు. అందుకే కమెడియన్ల సరసనా, కేరక్టర్ ఆర్టిస్టుగా సెటిలయ్యా. దాంతో భిన్నమైన కేరక్టర్లు చేయగలిగా. ఇన్నేళ్లపాటు ఫీల్డులో ఉండగలిగా.

అలనాటి ఆణిముత్యం: మళ్లీ పెళ్లి (1939)

కథాంశం: బాల్య వివాహాల్ని నిరోధించే శారదా చట్టం అమల్లోకి వస్తుందేమోనని లాయర్ జగన్నాథరావు పంతులు భయపడుతుంటాడు. అతడి ఆరేళ్ల కూతురు లలితని ఓ పెద్దాయనకిచ్చి పెళ్లిచేస్తే, అతను కాస్తా హారీమన్నాడు. దాంతో లలిత బాల వితంతువుగా మారింది. తమ ప్రాంతంలో గట్టి పట్టువున్న పంతులుకి సంఘ సంస్కరణలంటే గిట్టదు.

సుందరరావనే నిరుద్యోగ గ్రాడ్యుయేట్ తన చెల్లెలు కమలతో కలిసి వాళ్ల ఎదురింట్లో ఉంటాడు. కమల, లలిత స్నేహితులవుతారు. సుందరరావు, లలిత మధ్య త్వరలోనే ప్రేమ చిగుర్లు వేస్తుంది. లలితను పెళ్లాడాలని అతను నిశ్చయిస్తాడు. జగన్నాథరావు దగ్గరి బంధువు వెంకటరావు, కమల కూడా ప్రేమించుకుంటారు. ఓసారి లలైత కోసం తన ఇంటికొచ్చిన కమలని బలాత్కరించబోతాడు జగన్నాథరావు. అతణ్ణి చావగొట్టి జైలుకి వెళ్తాడు సుందరరావు. 

లలిత గర్భవతి అయ్యిందనే పుకారు వ్యాపిస్తుంది. సుందరరావును కలిసి తనకే పాపమూ తెలీదని చెబుతుంది లలిత. అతను నమ్మడు. దాంతో చనిపోవాలని భావిస్తుంది లలిత. ఆ మరుసటి రోజే సుందరరావు జైలునుంచి విడుదలవుతాడు. రోడ్డుపక్క పడిపోయి ఉన్న లలితను చూస్తాడు. ఆమెను ఆసుపత్రికి తీసుకుపోతాడు. ఆమెని పరీక్షించిన డాక్టర్ ఆమె గర్భవతి కాదనీ, కానీ కడుపులో బల్ల ఉందనీ చెబుతాడు. సుందరరావు పశ్చాత్తాపపడతాడు. చివరకు జగన్నాథరావు కూడా తన తప్పు తెలుసుకుంటాడు. తన చేతుల మీదుగా లలిత - సుందరరావు, కమల - వెంకటరావు పెళ్లి చేస్తాడు.

తారాగణం: వై.వి. రావు (సుందరరావు), కాంచనమాల (లలిత), బలిజేపల్లి లక్ష్మీకాంత కవి (జగన్నాథరావు), బెజవాడ రాజారత్నం (కమల), కొచ్చర్లకోట సత్యనారాయణ (వెంకటరావు), రంగస్వామి, ఆదినారాయణయ్య, నటేశ అయ్యర్, మాణిక్యమ్మ, రాజలక్ష్మమ్మ, సి. కృష్ణవేణి.

మాటలు, పాటలు: బలిజేపల్లి లక్ష్మీకాంత కవి

సంగీతం: ఓగిరాల రామచంద్రరావు

ఛాయాగ్రహణం: జితేన్ బెనర్జీ

నిర్మాత, దర్శకుడు: వై.వి. రావు

బేనర్: జగదీశ్ ఫిలిమ్స్

విశేషాలు: ఈ సినిమా ద్వారా ఓగిరాల రామచంద్రరావు సంగీత దర్శకునిగా పరిచయమయ్యారు. ఈ చిత్రంలోని 'నా సుందరరూపా' అనే పాట తెలుగులో ఓ గాయకుడు పాడిన తొలి పాటగా చరిత్రకెక్కింది. ఆ పాటని కాంచనమాల, వై.వి. రావుపై డ్యూయెట్‌గా తీశారు. అప్పట్లో పాటల్ని ఎవరి మీద తీస్తే వారే పాడే సంప్రదాయం ఉంది. అయితే వై.వి. రావు పాడలేనందు వల్ల ఆ పాటని కాంచనమాలతో కలిసి ఓగిరాల పాడారు. కానీ గ్రామఫోన్ రికార్డు మీద గాయకుడిగా వై.వి. రావు పేరు వేశారు.

టర్నింగ్ పాయింట్: చంద్రమోహన్

తొలి సినిమాతోటే బ్రేక్ సంపాదించడం కొంతమందికే దక్కే అదృష్టం. అది నాకు దక్కింది. ఆ సినిమా 'రంగులరాట్నం'. దాని దర్శకుడు బి.ఎన్. రెడ్డి. 1967లో ఆ సినిమా రాష్ట్రంలో బంగారు నంది రావడమే గాక, ఉత్తమ ప్రాంతీయ చిత్రంగా జాతీయ అవార్డూ గెలుచుకొంది. అదో గొప్ప అనుభూతి. కొత్తవాళ్లని పరిచయం చేయడమనే ట్రెండ్ అప్పుడే మొదలైంది. అప్పుడు నా వయసు 21 సంవత్సరాలు. 

బీకాం పూర్తి చేసిన నేను ఉద్యోగం కోసం ప్రయత్నిస్తున్నా. నా ఆసక్తి అంతా డబ్బు లెక్కపెట్టడం, ఎకౌంటన్సీ, బ్యాలెన్స్ మెయిన్‌టైన్ చెయ్యడం వంటివాటి మీద ఉండేది. బ్యాక్‌లో పనిచేసిన నా క్లాస్‌మేట్ లాగే నేనూ బ్యాకులో పనిచేసినట్లయితే ఏజీఎం ర్యాంకులో రిటైరయి, మంచి పెన్షన్ వస్తూ ఉండేది. 

చిత్రసీమలో ప్రవేశించిన మొదట్లో నేను మంచి పేరు తెచ్చుకున్నా, ఆదాయం ఆంతంత మాత్రంగానే ఉండేవి. కామన్ మ్యాన్ లాగా సాధారణ, క్రమశిక్షణతో కూడిన జీవితాన్ని నేను మిస్సయ్యాను. 

నా జీవితమంతా ప్రయాణాలతోటీ, వచ్చిన పాత్రలు చేయడంతోటీ గడిచిపోయింది. ఆ పాత్రలు చేయకపోతే పోటీలో లేకుండా పోతానేమోననే ఆలోచనతోటే వచ్చిన పాత్రనల్లా చేసుకుంటూ వచ్చా. నా భార్యా పిల్లలతో ఆదివారం పూట సరదాగా గడిపిన రోజులేవీ నాకు జ్ఞాపకం లేవు. సినిమాకి 45 సంవత్సరాల సేవ చేసిన నేను తిరిగి చూసుకుంటే ఇప్పటికీ కొత్తలో మాదిరిగా జీవిక కోసం కష్టపడుతూనే ఉన్నా.

అలనాటి ఆణిముత్యం: వర విక్రయం (1939)

నటిగా భానుమతి పరిచయమైన చిత్రం 'వర విక్రయం'. కవితా కళానిధిగా ప్రసిద్ధులైన బలిజేపల్లి లక్ష్మీకాంత కవి నటునిగా తెరపై కనిపించిన తొలి సినిమా కూడా ఇదే. అంతే కాదు అనంతర కాలంలో గొప్ప కమెడియన్‌గా రాణించిన కస్తూరి శివరావు ఓ చిన్నపాత్ర ద్వారా ఈ సినిమాతోటే తెరంగేట్రం చేశారు.'చింతామణి', 'మధుసేవ' వంటి గొప్ప నాటకాల్ని రాసిన కాళ్లకూరి నారాయణరావు కలం నుంచి జాలువారిన మరో గొప్ప నాటకం 'వర విక్రయం'. వరకట్న పిశాచానికి వ్యతిరేకంగా రాసిన ఈ నాటకం ఆధారంగానే అదే పేరుతో ఈ సినిమా రూపొందింది. 

ఇందులోని కాళింది పాత్రకు బాగా పాడగల నటికోసం దర్శకుడు సి. పుల్లయ్య అన్వేషిస్తున్నప్పుడు భానుమతి గురించి ఆయనకు తెలిపారు గోవిందరాజుల సుబ్బారావు. భానుమతి తండ్రి బొమ్మరాజు వెంకటశేషయ్య, గోవిందరాజుల మంచి స్నేహితులు. స్క్రీన్ టెస్ట్ ద్వారా భానుమతిని తీసుకున్నారు పుల్లయ్య. అయితే తన కూతుర్ని ఏ పురుష నటుడూ స్పృశించకూడదనే నిబంధనతో ఇందులో భానుమతి నటించేందుకు శేషయ్య అంగీకరించారు. అలా ఓ గొప్ప నటి ఈ సినిమా ద్వారా తెలుగులోకి అడుగుపెట్టింది.

కథాంశం: రెవెన్యూ ఇన్‌స్పెక్టర్ అయిన పుణ్యమూర్తుల పురుషోత్తమరావు (దైతా గోపాలం) గాంధేయవాది. ఆయన భార్య భ్రమరాంబ (సీనియర్ శ్రీరంజని), కూతుళ్లు కాళింది (భానుమతి), కమల (పుష్పవల్లి). వరకట్నానికి పురుషోత్తమరావు వ్యతిరేకి. కానీ తన పెద్ద కూతురు కాళిందిని సింగరాజు లింగరాజు (బలిజేపల్లి లక్ష్మీకాంత కవి) దత్తపుత్రుడు బసవరాజు (కొచ్చర్లకోట సత్యనారాయణ)కు ఇచ్చి పెళ్లి చేయడానికి వరకట్నం నిమిత్తం తన పదెకరాల వరిపొలాన్ని అమ్మక తప్పని స్థితి ఎదురయింది. లింగరాజు పక్షం వహించిన పెళ్లిళ్ల పేరయ్య (పేరి రామచంద్రమూర్తి), వివాహాల వీరయ్య (జె. సత్యనారాయణ) వల్ల పెళ్లికాక ముందే కట్నం ఇచ్చేస్తాడు పురుషోత్తమరావు. తన పెళ్లి కారణంగా తల్లిదండ్రులు దరిద్రులై పోతున్నారని ఆవేదన చెందిన కాళింది నూతిలో దూకి ఆత్మహత్య చేసుకుంటుంది.

పెళ్లి జరగకపోయినా కట్నం సొమ్ము ఇవ్వడానికి నిరాకరిస్తాడు లింగరాజు. దాంతో అతనికి గుణపాఠం చెప్పాలని నిర్ణయించుకుంటుంది కమల. తన తండ్రి అభిమతానికి విరుద్ధంగా బసవరాజుతో పెళ్లికి ఒప్పుకుంటుంది. పెళ్లయ్యాక అత్తగారింటికి వెళ్లేందుకు నిరాకరించిన కమల తాను కట్నమిచ్చి వరుణ్ణి కొనుక్కున్నాననీ, అందువల్ల బసవరాజే తమ ఇంటికి రావాలని డిమాండ్ చేస్తుంది. కొడుకు పేరుతో కమలని కోర్టుకు లాగుతాడు లింగరాజు. జడ్జి కమలకి అనుకూలంగా తీర్పు చెబుతాడు. తండ్రి చేష్టలకి విసుగెత్తిపోయిన బసవరాజు భార్యతో కలిసి జీవిస్తానంటాడు. తన తప్పు తెలుసుకున్న లింగరాజు క్షమించాల్సిందిగా పురుషోత్తమరావును అర్థిస్తాడు.

తారాగణం: బలిజేపల్లి లక్ష్మీకాంత కవి, దైతా గోపాలం, సీనియర్ శ్రీరంజని, భానుమతి, పుష్పవల్లి, కొచ్చర్లకోట సత్యనారాయణ, తుంగల చలపతిరావు, పేరి రామచంద్రమూర్తి, జె. సత్యనారాయణ, అడ్డాల నారాయణరావు, ఎ.వి. సుబ్బారావు, ఎల్. సత్యనారాయణ, రేలంగి వెంకట్రామయ్య, కోటిరత్నం, సుభద్ర, కస్తూరి శివరావు

కథ: కాళ్లకూరి నారాయణరావు

మాటలు: బలిజేపల్లి లక్ష్మీకాంత కవి

సంగీతం: ప్రభల సత్యనారాయణ

నేపథ్య సంగీతం: దుర్గాసేన్

ఛాయాగ్రహణం: బీరేన్ డే

సౌండ్: సి.ఎస్. నిగం

కూర్పు: ధరం వీర్

కళ: బాటూసేన్

మేకప్: ఈదు

దర్శకుడు: చిత్తజల్లు పుల్లయ్య

బేనర్: ఈస్ట్ ఇండియా ఫిల్మ్ కంపెనీ

దర్శకుడు బోయపాటి శ్రీను ఇంటర్వ్యూ

సింహా కంటే ఎక్కువ ఎమోషనల్‌గా దమ్ము తీశా

'సింహా' కంటే ఏ కోశానా ఎమోషన్స్‌ని తగ్గించడానికి ప్రయత్నించలేదనీ, ఇంకా ఓ పది శాతమన్నా ఎక్కువ ఎమోషనల్‌గా 'దమ్ము' తీశాననీ చెప్పారు బోయపాటి శ్రీను. ఎన్టీఆర్ కథానాయకుడిగా రూపొందిన 'దమ్ము' చిత్రానికి ఆయన దర్శకుడు. కె.ఎస్. రామారావు సమర్పణలో క్రియేటివ్ కమర్షియల్స్ అండ్ మీడియా ఎంటర్‌టైన్‌మెంట్స్ లిమిటెడ్ పతాకంపై కె.ఎ. వల్లభ నిర్మించిన ఈ చిత్రం శుక్రవారం (27న) విడుదలవుతోంది. ఆ సందర్భంగానూ, బుధవారం పుట్టినరోజు జరుపుకుంటున్న సందర్భంగానూ ప్రత్యేకంగా మాట్లాడారు బోయపాటి శ్రీను. ఆ విశేషాలు...
'దమ్ము' ఎలా వచ్చింది? మీ అంచనాలేమిటి?
నా అంచనాలు కాదు. గ్యారంటీగా ఓ మంచి సినిమా చెయ్యాలి అని ఓ మంచి ప్రయత్నం చేశాను. ఎందుకంటే బాలయ్యతో చేసిన 'సింహా' తర్వాత చేసిన సినిమా. అదీ ఓ నందమూరి హీరో నుంచి ఇంకో నందమూరి హీరోతో చేసిన సినిమా. కాబట్టి ఎనర్జిటిక్ ఎన్టీఆర్‌తో సినిమా చేసేప్పుడు కచ్చితంగా వంద శాతం ప్రిపేర్ అయే దిగుంటా. అందువల్ల ప్రేక్షకుల అంచనాలకు తగ్గట్లే ఉంటుంది సినిమా.
చాలా కాలం తర్వాత బాలకృష్ణకు 'సింహా' రూపంలో హిట్టిచ్చిన దర్శకుడిగా మీమీద అంచనాలు మామూలుగా లేవు. పైగా ఇప్పటివరకు మీరన్నీ హిట్లే ఇచ్చారు. ఆ బరువుని ఎలా మోశారు?
నేను 'సింహా'లో ఏం చేశానో చూశారు. మొదట్నించీ నేను కొన్ని ఎమోషన్స్ పట్టుకుంటాను. వాటి మీద కథ నడుపుకుంటూ వస్తాను. అలాగే 'దమ్ము'ని కూడా కొన్ని ఎమోషన్స్ ప్రధానంగా నడిపా. ముఖ్యంగా ఫ్యామిలీ ఎమోషన్. 'సింహా' కంటే ఏ కోశానా ఎమోషన్స్‌ని తగ్గించడానికి ప్రయత్నించలా. ఇంకా ఓ పది శాతమన్నా ఎక్కువ ఎమోషనల్‌గా 'దమ్ము' తీశా. గట్టి నమ్మకంతో చెబుతున్నా, ప్రేక్షకుడు ఏదైతే నమ్మకం పెట్టుకున్నాడో, దాన్ని మించే ఈ సినిమా ఉంటుంది. రెండు రోజుల్లో సినిమా విడుదలవుతుంది. చూడండి. అవునో కాదో నాకు చెప్పండి. 'ఎన్టీఆర్ అంటే మాస్ హీరో. యాక్షన్ బాగా చేస్తాడు. డాన్సులు బాగా చేస్తాడు. కమర్షియల్‌గా ఉంటుంది' అనుకోవద్దు. తప్పకుండా ఓ కొత్త ఎన్టీఆర్‌ని చూస్తారు. 'సింహా'లో బాలయ్యని ఎలా చూశారో, అలాగే 'దమ్ము'లో తారక్‌లోని ఓ కొత్త కోణాన్ని చూస్తారు.
ఎన్టీఆర్‌కి హైవోల్టేజ్ పర్ఫార్మర్ అనీ, రౌద్ర, వీర రసాల్ని బాగా పోషిస్తారనే పేరుంది. అయితే 'సింహాద్రి' తర్వాత అంత హై వోల్టేజ్ సినిమా ఆయన నుంచి రాలేదనే అభిప్రాయం ఉంది. ఈ నేపథ్యంలో 'దమ్ము' ఏ స్థాయి సినిమా అవుతుందని అనుకుంటున్నారు? 
ఏ స్థాయి సినిమా అవుతుందో నేను చెప్పలేను గానీ, ఓ మంచి సినిమా తీయడం వరకే నా బాధ్యత. అయితే ఒక్కటి మాత్రం చెప్పగలను. నా ముందు 'సింహా' ఉందని నాకు తెలుసు. దాన్ని దృష్టిలో పెట్టుకునే ఓ మంచి సినిమా తీశాను. 'సింహాద్రి' నుంచి ఎన్టీఆర్ ఏ సినిమాలైతే చేశారో, ఆ సినిమాలన్నింటినీ విశ్లేషించుకునే 'దమ్ము' తీశా. ఏ కోశానా పాత సినిమాలు ఛాయలు లేకుండా ఓ భిన్నమైన పాత్రలోనే ఆయన్ని చూపిస్తున్నా. సినిమా చూశాక 'ఎన్టీఆర్‌లో ఇలాంటి హీరో ఉన్నాడా' అని ఆశ్చర్యపోతారు.
ఎన్టీఆర్ ఎలా కనిపిస్తారు?
రాయల్‌గా కనిపిస్తారు. డిఫరెంట్ వేరియేషన్స్‌లో ఆల్‌రౌండర్‌గా కనిపిస్తారు. ఇందులో ఎన్టీఆర్ పాత్ర పేరు విజయ. ఇంకా పెద్ద పేరు గానీ, అందరూ 'విజయ' అనే చిన్నపేరుతో పిలుస్తుంటారు. 'అందరూ బావుండాలి. ఆ అందరిలో నేనుండాలి' అనేటటువంటి వ్యక్తిత్వం ఉన్న వ్యక్తి. సమాజానికి మంచి చేయకపోయినా ఫర్వాలేదు కానీ, చెడు చేయకూడదని నమ్మే వ్యక్తి. ఎవరైనా చెడు చేస్తే వెంటనే స్పందించే వ్యక్తి. ఇందులో నగర, గ్రామీణ నేపథ్యాలు రెండూ ఉంటాయి.
హైలైట్స్ ఏమని చెప్పుకోవచ్చు?
ఎన్టీఆర్ పర్ఫార్మెన్స్ హైలైట్. ఆయన నటన ఎలా ఉంటుందో ఓ దర్శకుడిగా నేను చూపించిన 'దమ్ము' ఇది. నన్ను నమ్మండి, చూడండి. కీరవాణి మ్యూజిక్ ఎలా ఉంటుందో ఇప్పటికే మీ ముందుకు వచ్చింది. సినిమాటోగ్రఫీ ఎలా ఉంటుందో, డైలాగ్స్ ఎలా ఉంటాయో, ఫైట్స్ ఎలా ఉంటాయో, నా డైరెక్షన్ ఎలా ఉంటుందో ఇప్పటికే ట్రైలర్స్‌లో చూపించాను. అన్ని శాఖల పనితనాన్ని చూపిస్తూ ఓ ట్రైలర్ ద్వారా మీ ముందుకు వదిలాను. అందులో ఓ పది నుంచి ఇరవై శాతం మాత్రమే చూపించా. మిగతా 80 నుంచి 90 శాతం సినిమాలో ఉంటుంది.
ఇద్దరు హీరోయిన్ల గురించి చెప్పండి.
త్రిష, కార్తీక మాత్రమే కాదు, ఇంకో ఇద్దరున్నారు. 'వాస్తు బాగుందే' పాటలో వాళ్లిద్దరు ఎంటరవుతారు. రచనా మౌర్య, మరియం జకారియా. వాళ్లకీ కథలో భాగముంది. విలన్ల విషయానికొస్తే... మెయిన్ విలన్‌గా నాజర్ కనిపిస్తే, సంపత్, కిశోర్, శ్రీధర్‌రెడ్డి వంటివాళ్లు మిగతా విలన్లుగా చేశారు.
నిర్మాణ విలువలు ఎలా ఉంటాయి?
ఈ సినిమాని కె.ఎస్. రామారావుగారి లాంటివాళ్లే చేయగలుగుతారు. వేరే వాళ్లు చేయలేరు. ఎందుకంటే హై బడ్జెట్ సినిమా. అందువల్ల దీన్ని ఎవరుపడితే వాళ్లు, ఎలా పడితే అలా చేయలేరు. కె.ఎస్. రామారావు గారి వల్లే 'దమ్ము'కి ఈ స్థాయి వచ్చింది.
-ఆంధ్రజ్యోతి డైలీ (25 ఏప్రిల్, 2012)

అలనాటి ఆణిముత్యం: మాలపిల్ల (1938)

తెలుగునాట సంచలన రచయిత గుడిపాటి వెంకటాచలం కథను అందించిన 'మాలపిల్ల' చిత్రాన్ని దేశోద్ధారక కాశీనాథుని నాగేశ్వరరావుకు అంకితమిచ్చారు. అప్పటిదాకా గ్రాంథిక భాషలో సాగిన సినిమా రచన ఈ సినిమాతో వ్యవహారిక భాషలోకి మారి, కొత్త మలుపుకు కారణమయ్యింది. ఈ సినిమాతో తెలుగులో తొలి స్టార్ హీరోయిన్‌గా అవతరించింది. నటునిగా డాక్టర్ గోవిందరాజుల సుబ్బారావుకు ఇది తొలి చిత్రం.

కథాంశం: సవర్ణుల అనాదరణకి హరిజనుల హృదయాలు అవమాన భారంతో కుంగిపోతున్నాయి. మహాశివరాత్రి ఉత్సవం సందర్భంగా దేవాలయ ప్రవేశానికి హరిజనులు వెళ్తారు. కరడుగట్టిన సనాతనుడైన ఆ గుడి ధర్మకర్త సుందర రామశాస్త్రి వారిని అడ్డుకున్నాడు. బి.ఏ. చదువుకుంటున్న ఆయన కొడుకు నాగరాజు మాలపిల్ల అయిన శంపాలతను తొలిచూపులోనే ప్రేమించాడు. ఆమె కూడా అతణ్ణి వలచింది. శంపాలతని పెళ్లాడాలని నాగరాజు నిశ్చయించుకున్నాడు. బ్రాహ్మలూ, కమ్మవారూ చేస్తున్న దాష్టీకాన్ని తట్టుకోలేక గత్యంతరం లేక హరిజనులు పనుల్లోకి పోకుండా సమ్మె చేశారు. కమ్మవాళ్లూ, రైతులూ తమ అన్యాయాన్ని గుర్తిస్తారు. బ్రాహ్మలలో కలవరం బయలుదేరుతుంది. సుందరరామశాస్త్రి ఒప్పుకోడు. ఊళ్లోని ఒక్క చెరువూ కట్టేస్తాడు. నీళ్లులేక మాలగూడెం అల్లాడుతుంది. శంపాలత, నాగరాజు మధ్య ప్రేమ బయట పడటంతో శంపని మాలగూడెం కట్టుదిట్టం చేస్తుంది.

గ్రామదేవత కొలుపుల సందర్భంగా హరిజనులంతా తాగి తందనాలాడుతుంటే నాగరాజూ, శంపాలతా, ఆమె స్నేహితురాలు అనసూయా కలకత్తాకి పారిపోయారు. ఇది నాగరాజు పనేనని హరిజనులు సుందర రామశాస్త్రి ఇంటిమీద పడతారు. రామశాస్త్రి మనసు మారడం మొదలవుతుంది. కలకత్తాలో పరిచయమైన బోసుబాబు ఫ్యాక్టరీలో నాగరాజు జనరల్ మేనేజర్ స్థాయికి చేరుకుంటాడు. ఇక్కడ ఇటు శంప ఇంట్లో, అటు నాగరాజు ఇంట్లో విచారానికి అంతం ఉండదు. ఏడుస్తూ శాస్త్రి భార్య సోమిదేవమ్మ కిరసనాయిలు బుడ్డి తిరగదోయడంతో ఇంటికి నిప్పంటుకుంటుంది. బ్రాహ్మలు ఎవరిల్లు వారు చూసుకుంటుంటే మాలలు తమ ప్రాణాలకు తెగించి శాస్త్రినీ, ఆయన భార్యనూ మంటల బారినుంచి రక్షిస్తారు. అప్పటికి మాలలు కూడా మనుషులేనని బోధపడుతుంది శాస్త్రికి. ఆ తర్వాత శంపాలత, నాగరాజు జీవితాలు ఏమయ్యాయనేది పతాక సన్నివేశం.

తారాగణం: గోవిందరాజుల సుబ్బారావు (సుందర రామశాస్త్రి), కాంచనమాల (శంపాలత), వెంకటేశ్వరరావు (నాగరాజు), సుందరమ్మ (అనసూయ), సూరిబాబు (చౌదరయ్య), వెంకటసుబ్బయ్య (మల్లికార్జున శర్మ), రాఘవన్ (మునెయ్య), హేమలతాదేవి (రాధాబాయమ్మ), గంగారత్నం, లక్ష్మీకాంతం

కథ: గుడిపాటి వెంకటాచలం

మాటలు: తాపీ ధర్మారావు

పాటలు: బసవరాజు అప్పారావు

సంగీతం: భీమవరపు నరసింహారావు

సినిమాటోగ్రఫీ: శైలేన్ బోస్

స్టిల్స్: సత్యం

నిర్మాతలు: చల్లపల్లి మహారాజా, గూడవల్లి రామబ్రహ్మం, యార్లగడ్డ శివరామప్రసాద్

దర్శకుడు: గూడవల్లి రామబ్రహ్మం

బేనర్: శ్రీ సారథి స్టూడియోస్

విడుదల తేది: 25 సెప్టెంబర్

తెలుగువాళ్లు ఎలా విడిపోయారు?

ముస్లిం పాలకులైన అసఫ్‌జాహీల ఏలుబడిలోని తెలుగు ప్రాంతాల్ని తెలంగాణా అన్నారు. అంటే తెలుగువాళ్లు ఉండే ప్రాంతమని. అప్పుడు ఇవాళ ఉన్న ఆంధ్రప్రదేశ్ అంతా తెలంగాణాయే. ఫ్రెంచి వారి రుణం తీర్చుకోవడం కోసం అసఫ్ జాహీ రాజు సలాబత్ జంగ్ 1753లో తెలంగాణాలోని 1. ముస్తఫానగర్, 2. రాజమహేంద్రవరం (రాజమండ్రి), 3. శ్రీకాకుళం జిల్లాలను ఫ్రెంచివాళ్లకు అప్పగించాడు.
అదే సలాబత్ తన రక్షణ కోసమని ఇంగ్లీష్ వాళ్లకు 1759లో తెలంగాణాలోని 1. నిజాంపట్నం, 2. మచిలీపట్నం, 3. కొండవీడు, 4. వల్కమనేరు అప్పగించాడు. ఫ్రెంచివాళ్లకు, బ్రిటీషువాళ్లకు సర్కారు (ప్రభుత్వం) నుంచి వచ్చిన జిల్లాలు కావటాన అవి సర్కారు జిల్లాలు అయ్యాయి.
బ్రిటీషువాళ్లు 1762లో సలాబత్‌ను గద్దె దించి నిజాం ఆలీని గద్దెనెక్కించారు. మహారాష్ట్రులు నిజాం అలీమీద దండెత్తి అతన్ని ఓడించినప్పుడు అతన్ని రక్షిస్తామన్నారు బ్రిటీషువాళ్లు. రక్షణ కోసం సైన్యాన్ని నియమించేందుకయ్యే ఖర్చుల కింద ఒప్పందం ప్రకారం 1800 సంవత్సరంలో 1. కంభం, 2. కర్నూలు, 3. ఆదోని, 4. రాయదుర్గ, 5. గుత్తి, 6. కడప, 7. గుర్రంకొండ, 8. బంగనపల్లి, 9. అనంతపురం, 10. బళ్లారి, 11. మదనపల్లి, 12. వాయల్పాడు జిల్లాల్ని బ్రిటీషువాళ్లకి ధారాదత్తం చేశాడు నిజాం అలీ. నిజాం వాటిని బ్రిటీషువాళ్లకి దత్తం చేసినందున వాటికి దత్త మండలాలు అనే పేరు వచ్చింది.
ఆ తర్వాత నిజాం రాజ్యంలో మిగిలిన తెలుగుప్రాంతం తెలంగాణాగా మిగిలిపోయింది. అంటే 250 ఏళ్ల క్రితం వరకు తెలుగువాళ్లంతా కలిసే ఉన్నారు.

ప్రివ్యూ: యమహో యమః

యమధర్మరాజుగా శ్రీహరి తొలిసారిగా నటిస్తున్న చిత్రం 'యమహో యమః'. సాయిరాం శంకర్, పార్వతీ మెల్టన్ హీరో హీరోయిన్లుగా నటిస్తున్నారు. జి.వి.కె. ఆర్ట్స్ బేనర్‌పై జి. విజయ్‌కుమార్ గౌడ్ నిర్మిస్తున్న ఈ సినిమాకి జితేందర్ వై. దర్శకుడు. 

"తొలిసారి యముడిగా బరువైన పాత్ర చేస్తున్నా. ఇది అసాధారణ స్క్రిప్ట్. బాగా నవ్వించే సినిమా. ఇదివరకు మహామహులు పోషించిన ఈ పాత్రని బాగా చేసి, నన్ను నేను నిరూపించుకోవడానికి కృషిచేస్తున్నా" అని శ్రీహరి చెప్పారు. ఈ సినిమాకు సంబంధించిన ఓ విశేషం దర్శకుడు పూరి జగన్నాథ్ ఓ గెస్ట్ కేరక్టర్ చేయడం.

హీరో సాయిరాం మాట్లాడుతూ "యమునిగా శ్రీహరి చేస్తుండటంతో ఈ ప్రాజెక్టుకు మార్కెట్‌లో మంచి క్రేజ్ వచ్చింది. అమెరికా వెళ్లిన ఓ కుర్రాడికీ, అక్కడకు వచ్చిన యమునికీ మధ్య జరిగే కథ ఇది" అని చెప్పాడు. ఈ సినిమాతో తనకు కచ్చితంగా బ్రేక్ వస్తుందని అతను ఆశిస్తున్నాడు. పార్వతీ మెల్టన్ అమెరికాలో ఉండే తెలుగమ్మాయి పాత్రని చేస్తోంది. "ఇంతవరకు మన ప్రాంతంలోనే అలరిస్తూ వచ్చిన యముడు అమెరికాలో అడుగుపెడితే ఎలా ఉంటుందనే ఆలోచనతో అల్లిన కథ ఇది" అని దర్శకుడు జితేందర్ తెలిపాడు.

ఈ సినిమాతో మహతిగా పేరు మార్చుకున్న బొంబాయ్ భోలే సంగీతం సమకూరుస్తున్న ఈ సినిమాలో అలీ, భరత్, కోవై సరళ ప్రధాన తారాగణం. ఈ చిత్రానికి మాటలు: వెలిగొండ శ్రీనివాస్, పాటలు: చంద్రబోస్, భాస్కరభట్ల, చిర్రావూరి, సినిమాటోగ్రఫీ: భరణి కె. ధరన్, ఎడిటింగ్: మార్తాండ్ కె. వెంకటేశ్, ఫైట్స్: రాం-లక్ష్మణ్, కథ, స్క్రీన్‌ప్లే, దర్శకత్వం: జితేందర్ వై.

'అధినాయకుడు'లో ఆసక్తికర అంశాలు!

బాలకృష్ణ త్రిపాత్రాభినయం చేస్తున్న 'అధినాయకుడు' సినిమా రిపబ్లిక్ డే సందర్భంగా జనవరి 26న విడుదలకు సిద్ధమవుతోంది. పరుచూరి మురళి డైరెక్ట్ చేస్తున్న ఈ సినిమాని ఎం.ఎల్. కుమార్‌చౌదరి నిర్మిస్తున్నారు. నాలుగు రోజుల ప్యాచ్‌వర్క్ మినహా షూటింగ్ పూర్తయిన ఈ సినిమాలో బాలకృష్ణ తాత, తండ్రి, మనవడిగా మూడు పాత్రలు చేస్తున్న సంగతి తెలిసిందే. కాగా ఈ ముగ్గురి సరసన ఎవరెవరు నటిస్తున్నారనే సంగతి వెల్లడైంది. 

తాత సరసన జయసుధ, మనవడి సరసన లక్ష్మీరాయ్ నటిస్తున్నట్లు ఇదివరకే వార్తలు వచ్చాయి. మరి మధ్యలో తండ్రి సరసన ఎవరు చేసినట్లు? ఆ పాత్రని తమిళ నటి సుకన్య పోషించినట్లు యూనిట్ వర్గాలు తెలిపాయి. కాగా కథానుసారం ఈ మూడు పాత్రలు ఒకేసారి తెరపై కనిపించవు. కారణం మనవడు పుట్టిన రెండేళ్లకే తాత పాత్రధారి మరణిస్తాడు. ఫ్లాష్‌బ్యాక్‌లో వచ్చే ఆ పాత్రపై కర్నూలులో 40 వేలమంది జనం మధ్య చిత్రీకరించిన సన్నివేశాలు హైలైట్ అవుతాయని అంటున్నారు.

కాగా ఈ సినిమాలో బాలకృష్ణకు ఏక కాలంలో భార్యగా, తల్లిగా, నాయనమ్మగా తొలిసారి జయసుధ కనిపించనున్న సంగతి తెలిసిందే. అయితే మనవడి పాత్రధారి జయసుధను ఎక్కడా 'నాయనమ్మా' అని పిలవకుండా స్క్రిప్టులో జాగ్రత్తపడ్డారు. పోతే ఈ సినిమాలో సలోని కూడా నటిస్తోంది. ఆమెది ఓ సీనులో, మరో పాటలో మాత్రమే కనిపించే గెస్ట్ రోల్.

అలనాటి చిత్రం: సీతా కల్యాణం (1934)

సీత కథతో రూపొందిన తొలి తెలుగు సినిమా 'సీతా కల్యాణం'. మచిలీపట్నంలోని 'మినర్వా సినిమా' థియేటర్ యజమాని అయిన పినపాల వెంకటదాసు మద్రాసులో వేల్ పిక్చర్స్ బేనర్‌ని నెలకొల్పి దానిపై సినిమాలు నిర్మించారు. దక్షిణభారత సాంకేతిక నిపుణులతో తయారైన తొలి తెలుగు సినిమాగా 'సీతా కల్యాణం' పేరు తెచ్చుకొంది. 

కథ: లోక కల్యాణం కోసం విశ్వామిత్ర మహర్షి ఓ గొప్ప యాగాన్ని చేయ సంకల్పించి, అందరు ఋషులకూ ఆహ్వానం పంపాడు. ఆ యాగానికి రావణాసురుని అనుయాయులైన రాక్షసుల వల్ల ఎలాంటి ఇబ్బందులు ఏర్పడతాయో, యాగ రక్షణకు శ్రీరాముడు ఎలా తోడ్పడగలడో యోగదృష్టితో తెలుసుకొని రాముని కోసం అయోధ్యకు వెళ్లాడు. అదే సమయంలో రామునికి వివాహం చేయాలని దశరథుడు సంకల్పించాడు. యాగ రక్షణ నిమిత్తం రాముని తనతో పంపమని దశరథుని కోరాడు విశ్వామిత్రుడు. పుత్రుని మీద అతి ప్రేమతో దశరథుడు వెనుకాడుతుంటే వశిష్టుడు అభయమిచ్చాడు. దశరథుడు అంగీకరించక తప్పలేదు. రామునితో లక్ష్మణుడు కూడా విశ్వామిత్రుని వెంట వెళ్లాడు. మార్గ మధ్యమున వారికి అస్త్రశస్త్రాల్ని ఉపదేశించాడు విశ్వామిత్రుడు. ఆయన ఆజ్ఞతో సోదరులిరువురు రాక్షసి అయిన తాటకిని సంహరించారు. 

మరోవైపు మిథిలలో సీతకు యుక్తవయసు వచ్చిందని గ్రహించి ఆమెకు పెళ్లి చేయాలని నిర్ణయించుకున్నాడు జనక మహారాజు. బాల్యంలోనే శివ ధనువును సీత ఎత్తడంతో ఆ ధనస్సును వంచినవానికే ఆమెనిచ్చి వివాహం చేస్తానని స్వయంవరం చాటాడు. 

విశ్వామిత్రుడు యాగాన్ని ఆరంభించాడు. దానిని నాశనం చేయడానికి వచ్చిన మారీచ సుబాహులనే రాక్షసుల్ని సంహరించాడు రాముడు. యజ్ఞం నిర్విఘ్నంగా పూర్తవడంతో రామలక్ష్మణులను తీసుకొని మిథిలకు పయనమయ్యాడు విశ్వామిత్రుడు. మార్గమధ్యంలో రాముని పాదము సోకి రాయిలా పడివున్న అహల్యకు శాప విమోచనమయ్యింది. 

సీతా స్వయంవరానికి అనేకమంది రాజులు వచ్చారు. రావణుని సహా ఒక్కరూ శివ ధనస్సును ఎత్తలేకపోయారు. రాముడు సునాయాసంగా ధనువునెత్తి దాని విరిచి, సీతను పరిణయమాడాడు. విషయము తెలిసి అయోధ్యా నగర ప్రజ సీతారామ కల్యాణమును తిలకించుటకు మిథిలకు వెళ్లింది. రామ, లక్ష్మణ, భరత, శతృఘ్నులకు సీత, ఊర్మిళ, మాండవ, శ్రుతకీర్తులనిచ్చి వైభవంగా వివాహం చేశాడు జనకుడు.

తారాగణం: మాస్టర్ కల్యాణి (శ్రీరాముడు), రాజారత్నం (సీత), మాధవపెద్ది వెంకట్రామయ్య (విశ్వామిత్రుడు), నెల్లూరు నాగ రాజారావు (దశరథుడు), గోవిందరాజుల వెంకట్రామయ్య (జనకుడు), తీగల వెంకటేశ్వర్లు (రావణుడు), నాగేశ్వరరావు (లక్ష్మణుడు), కమలకుమారి (అహల్య), సూరిబాబు (గౌతముడు), కృత్తివెంటి వెంకట సుబ్బారావు (మారీచుడు), లంక కృష్ణమూర్తి (సుబాహుడు), శ్రీహరి (కౌసల్య), రామతిలకం (కైకేయి), కోకిలామణి (సుమిత్ర)

పాటలు, సంగీతం: గాలిపెంచల నరసింహారావు

సినిమాటోగ్రఫీ: కె. రామనాథ్

సెట్టింగ్స్ (ఆర్ట్): శేఖర్

నిర్మాత: పినపాల వెంకటదాసు

దర్శకుడు: చిత్రపు నరసింహారావు

బేనర్: వేల్ పిక్చర్స్ 

చూడాల్సిన సినిమా: అపోకలిప్స్ నౌ (1979)

1970వ దశకం ఫ్రాన్సిస్ ఫోర్డ్ కొప్పొలాది. ఆ దశాబ్దంలో వచ్చిన గొప్ప సినిమాల్లో ఆయన పాత్ర ఉంది. 'పేటన్' స్క్రీన్‌రైటర్, 'అమెరికన్ గ్రాఫిటి' నిర్మాత, 'గాడ్‌ఫాదర్' తొలి రెండు సినిమాలు, 'ద కన్వర్‌జేషన్' దర్శకుడు ఆయనే. ఆ తర్వాత 1979లో ఆయన దర్శకత్వం నుంచి వచ్చిన మరో ఆణిముత్యం 'అపోకలిప్స్ నౌ'. అది వియత్నాం అనుభవం నుంచి పుట్టిన గొప్ప సినిమా మాత్రమే కాదు, మన కాలపు క్రూరత్వం ఏ స్థాయిలో ఉందో తెలియజెప్పిన మాస్టర్‌పీస్ కూడా.

ప్రఖ్యాత కేన్స్ ఫిల్మ్ ఫెస్టివల్‌లో 'అపోకలిప్స్ నౌ' ప్రీమియర్ అయ్యాక జరిగిన ప్రెస్ కాన్‌ఫరెన్స్‌లో "నాది వియత్నాం గురించి తీసిన సినిమా కాదు. నా సినిమాయే వియత్నాం" అని చెప్పాడు కొప్పోలా. వలసవాద క్రూరత్వాన్ని అద్భుతంగా ఆవిష్కరించిన జోసఫ్ కాన్రాడ్ విశిష్ట నవల 'హార్ట్ ఆఫ్ డార్క్‌నెస్' ఆధారంగా ఆయన ఈ సినిమాని ఒళ్లు జలదరింపజేసే విధంగా సెల్యులాయిడ్‌పై చిత్రించాడు. అమెరికన్ ఆర్మీ స్పెషల్ ఆపరేషన్స్ ఆఫీసర్ కెప్టెన్ బెంజమిన్ విల్లార్డ్ పాత్ర చుట్టూ ఈ సినిమా కథ నడుస్తుంది. ఒకప్పుడు అమెరికన్ ఆర్మీ స్పెషల్ ఫోర్సెస్ సభ్యుడై, తర్వాత క్రూరుడిగా మారి సొంత సైన్యాన్ని ఏర్పాటు చేసుకుని కంబోడియాలో సమాంతర ప్రభుత్వాన్ని నడుపుతున్న కల్నల్ వాల్టర్‌ని పట్టుకునే పనిని చేపట్టిన విల్లార్డ్ అందులో విజయం సాధించాడా, లేదా అన్నది కథ. 

విల్లార్డ్‌గా మార్టిన్ షీన్, వాల్టర్‌గా మార్లన్ బ్రాండో పోటాపోటీగా నటించిన ఈ సినిమాలో లెఫ్ట్‌నెంట్ కల్నల్ బిల్ కిల్‌గోర్ పాత్రలో రాబర్ట్ డువాల్ అందరికంటే ఎక్కువ మార్కులు సంపాదించాడు. లారెన్స్ ఫిష్‌బర్న్, డెన్నిస్ హాపర్, హారిసన్ ఫోర్డ్, ఫ్రెడరిక్ ఫారెస్ట్, శాం బాటమ్స్ నటించిన ఈ సినిమా ఆ రోజుల్లోనే ప్రపంచవ్యాప్తంగా 150 మిలియన్ డాలర్లను ఆర్జించింది. 

ఆ యేడాది ఉత్తమ సినిమాటోగ్రఫీ, ఉత్తమ సౌండింగ్ అకాడమీ (ఆస్కార్) అవార్డుల్ని పొందిన ఈ సినిమా కేన్స్ ఫిల్మ్ ఫెస్టివల్లో ప్రతిష్ఠాత్మక పాం డీఓర్ అవార్డును చేజిక్కించుకుంది.