న్యూస్: ఐశ్వర్య వల్లే 'హీరోయిన్' ఆగింది

ఐశ్వర్యారాయ్ ఇప్పుడు గర్భవతి. ఎంతోమందికి, ముఖ్యంగా అమితాబ్ బచ్చన్ కుటుంబానికి ఇది సంతోషకరమైన వార్త. పెళ్లయి చాలా కాలమవుతున్నా, ఐశ్వర్య ఇంకా గర్భం దాల్చలేదేమిటనేది కూడా వార్తయిన సందర్భంలో తన కోడలు ఐదు నెలల గర్భవతి అనే సంగతి ప్రపంచానికి మొదటగా అమితాబే తెలిపాడు. అయితే ఈ వార్త కొంతమందికి అశనిపాతమైంది. అది 'హీరోయిన్' సినిమా యూనిట్‌కి. ఆమె గర్భవతి అనే సంగతి తమందరికీ దిగ్భ్రాంతి కలిగించిందని ఆ సినిమా దర్శకుడు మధుర్ భండార్కర్ వాపోతున్నాడు. ఆమె వల్ల 'హీరోయిన్' సినిమా ఆగిపోయింది. అందులో ఆమే హీరోయిన్. ఆమె గర్భవతి అని తెలిసి కొద్ది రోజులైనా ఇప్పటివరకు మౌనంగా ఉన్న మధుర్ ఇప్పుడు నోరు విప్పాడు. "ఇది నా డ్రీమ్ ప్రాజెక్టు. ఒకటిన్నర సంవత్సరం నుంచీ ఈ ప్రాజెక్టు కోసం నా నెత్తురు ధారపోస్తూ వచ్చా. మాతృత్వం అనేది ఏ స్త్రీకైనా పరిపూర్ణత్వాన్నిస్తుందని నాకు తెలుసు. మాతృమూర్తి కాబోతున్న స్త్రీకి ఆరోగ్య పరిరక్షణ ఎంతో ముఖ్యం. ఆమెని ఇబ్బందికర స్థితికి గురిచెయ్యాలని నేననుకోను. 'హీరోయిన్' మామూలు సినిమా కాదు. 40 లొకేషన్లలో, భారీ జనం మధ్య క్లిష్టమైన సన్నివేశాలతో తీయాల్సిన సినిమా. నా కథలో హీరోయిన్ని జనం చుట్టుముట్టి ఇబ్బంది పెట్టే సీన్లు, శరీరాన్ని కష్టపెట్టే సీన్లు, అడల్ట్ కంటెంట్ వంటివి ఉన్నాయి. నా హీరోయిన్ తెరమీద సిగరెట్ తాగుతుంది. ఒకవేళ ఆమె తాగకపోయినా, అదే సీన్లో మిగతా నటులు సిగరెట్లు తాగుతుంటారు. ఇది గర్భవతికి మంచిది కాదు. 'హీరోయిన్' తీస్తున్నట్లు కేన్స్ ఫిల్మ్ ఫెస్టివల్ సందర్భంగా మే 13న ప్రకటించాం. జూన్ 7న షూటింగ్ ప్రారంభించాం. ఈ మధ్యలో 24 రోజుల వ్యవధి ఉంది. కానీ ఐశ్వర్య ఎప్పుడూ తను గర్భవతిననే సంగతి మాకెవరికీ చెప్పలేదు. అందరితో పాటే మేం కూడా న్యూస్ చానల్స్ ద్వారానే తెలుసుకున్నాం. అప్పటికి ఎనిమిది రోజుల షూటింగ్ కూడా జరిగింది. విషయం వినగానే మేమంతా షాక్‌కి గురయ్యాం. తప్పనిసరి స్థితిలో ఆ సినిమాని ఆపేశాం'' అని అతను వివరించాడు.

న్యూస్: రాజశేఖర్‌కి మంచిరోజులు వచ్చేనా?

అదేంటో గానీ రాజశేఖర్ ఏం చేయాలనుకున్నా పరిస్థితులు ఎదురు తిరుగుతున్నాయి. గడచిన పదేళ్లలో అతని సినిమాలు రెండంటే రెండే హిట్టయ్యాయి. అవి 'సింహరాశి', 'గోరింటాకు'. ఈ రెండింటి నిర్మాత ఒక్కరే. ఆయన మెగా సూపర్‌గుడ్ ఫిలింస్ అధినేత ఆర్.బి. చౌదరి. 'ఎవడైతే నాకేంటి'ని కూడా రాజశేఖర్, జీవిత హిట్టు కింద జమ చేస్తారు కానీ, దానికి పెట్టిన డబ్బు వసూలు కాలేదు. అప్పులు తీరలేదు. హీరో పాత్రలు తప్ప ఇతర ప్రధాన పాత్రలు చేయనని మునగదీసుకు కూర్చోవడంతో తాను ఎంత నష్టపోతున్నదీ ఆయన గ్రహించడం లేదు. పరిస్థితులకు తగ్గట్లు మారినందునే హీరో పాత్రలకంటే ఇతర పాత్రల ద్వారానే శ్రీహరి ఎక్కువ సొమ్ము చేసుకో గలుగుతున్నాడు. సరే. అసలే 'లేట్ లతీఫ్' అనే బిరుదు సంపాదించుకున్న రాజశేఖర్‌తో సినిమా తీయాలంటేనే నిర్మాతలు భయపడే పరిస్థితులు నెలకొన్నాయి. ఇప్పుడు దర్శకులు కూడా ఆయనతో సినిమా అంటే ఠారెత్తుతున్నారు. ఎక్కడ మధ్యలో తమని తీసేసి జీవితనే డైరెక్టర్ అనేస్తాడేమోనని సందేహిస్తున్నారు. ఆయన తాజా సినిమా 'మహంకాళి' విషయంలో అదే జరిగింది. కార్తికేయ అనే ఓ కొత్త డైరెక్టర్ ఈ సినిమాని ప్రారంభించాడు. మధ్యలో అతని పనితనం నచ్చలేదనే వంకతో అతన్ని తొలగించి జీవితే ఈ సినిమాని డైరెక్ట్ చేస్తోంది. ఇటీవల చెన్నైలో ఓ ఫైట్ సీన్ తీస్తుంటే పైనుండి కిందపడి బాగా గాయపడ్డాడు రాజశేఖర్. నాలుగైదు రోజుల్లో షూటింగంతా అయిపోతుందని అనుకునేంతలో ఇలా జరగడంతో నిర్మాతలు యేలూరు సురేందర్‌రెడ్డి, పరంధామరెడ్డి బాధ వర్ణనాతీతం. 50 యేళ్లకు దగ్గరవుతున్నా ఇంకా 20 యేళ్ల కుర్రాడిలా ఊహించుకుని రిస్క్ సీన్లు చేయడమెందుకు? ఇలా దెబ్బలు తినడమెందుకు? నిర్మాతల్ని ఇబ్బంది పెట్టడమెందుకు? ఇంతకీ 'మహంకాళి'తో అయినా ఈ భార్యాభర్తల జోడీ విజయాన్ని సాధిస్తుందా? డౌటే!

న్యూస్: నయనతార కెరీర్ ముగిసినట్లేనా?

కేరళ కుట్టి నయనతార నట జీవితం ఇక ముగిసినట్లేనా? ప్రస్తుతానికైతే అవుననే చెప్పాలి. ఆమె చివరి చిత్రాన్ని తెలుగులోనే చేసింది. అది 'శ్రీరామరాజ్యం'. ఇందులో ఆమె రామాయణ గాథలోని సీత పాత్ర చేసింది. ఒక పౌరాణిక సినిమాతో కెరీర్‌కి ఆమె ముగింపు పలుకుతుండటం విశేషమనే చెప్పాలి. అందుకే చివరి రోజు షూటింగులో ఆమె బాగా ఎమోషనల్ అయిపోయి కన్నీళ్లు పెట్టేసుకుంది కూడా. ఆఖరి రోజు ఆమె పాల్గొన్న చివరి సీను ముగియగానే అక్కడున్న యూనిట్ సభ్యులంతా ఆమెపై పూల వర్షాన్ని కురిపించారు. నిర్మాత సాయిబాబు స్వయంగా ఆమె మీద పూలు చల్లి రెండు చేతులతో నమస్కరించారు. అందరికీ దండం పెడుతూ, కళ్ల నుంచి చెంపలమీదికి నీళ్లు కారుతుండగా దర్శకుడు బాపు పాదాలకి నమస్కరించింది నయనతార. ఆయన ఆమెని ఆశీర్వదించారు. ఈ సినిమా యూనిట్‌ని వీడిపోతున్నానన్న బాధో, ఇదే చివరి సినిమా అనే ఆవేదనో కానీ ఆమె మొత్తానికి కన్నీళ్లు పెట్టుకుంది. ఈ సినిమాలో బాలకృష్ణ శ్రీరామునిగా నటిస్తున్న సంగతి తెలిసిందే. సీతారాములుగా ఆ ఇద్దరూ తెరమీద కనిపిస్తారనేది ఆసక్తికరం. ఇదివరకు 'లవకుశ'లో సీతారాములుగా అంజలీదేవి, ఎన్‌టీ రామారావు అమోఘంగా ప్రేక్షకుల్ని ఆకట్టుకున్నారు. ఇప్పుడు అదే కథతో తీసిన 'శ్రీరామరాజ్యం'లో బాలకృష్ణ, నయనతార ఆ పాత్రల్లో ఆకట్టుకునే అవకాశాలున్నాయి. 'సింహా'లో ఆ ఇద్దరూ ప్రేక్షకుల్ని మెప్పించిన సంగతి తెలిసిందే. మొదట 'శ్రీరామరాజ్యం'లో చేయడానికి నయన వెనుకాడింది. ప్రభుదేవాతో పెళ్లి నిర్ణయం జరిగాక సినిమాలకి గుడ్‌బై చెబుతున్నట్లు ఆమె ప్రకటించింది. అయితే బాలకృష్ణ ఆమెనే సీతగా కోరుకోవడం, దర్శకుడు బాపు కావడం వల్లే ఆమె చివరి నిమిషంలో సీతగా నటించేందుకు అంగీకారం తెలిపింది. యూనిట్ వర్గాల ప్రకారం ఆ పాత్రని ఆమె సమర్థంగా పోషించింది. అందుకే తృప్తికరంగా సినిమాలకు సెలవు చెప్పింది నయనతార. ఈ సినిమా తర్వాత ఆమె తెరమీద కనిపించే అవకాశాలు లేనట్లే.

న్యూస్: ఆర్తీ అగర్వాల్‌కి ఏం గతి పట్టింది?

ఆర్తీ అగర్వాల్ టాప్ హీరోయిన్‌గా వెలుగొంది ఎంతకాలమైందనీ? అప్పుడే ఆమెకి ఇప్పటి స్థితి దాపురిస్తుందని ఎవరైనా అనుకున్నారా? ప్రస్తుతం ఆమె 'వనకన్య వండర్ వీరుడు' అనే సినిమాలో నటిస్తోంది. అందులో తప్పేముంది అనుకోవచ్చు. కానీ ఇప్పటివరకు నాసిరకం సినిమాలే తీస్తూ వచ్చిన శివనాగు దర్శకత్వం వహిస్తున్న సినిమా అది. అందులో ఆయన కుమారుడే హీరో. ఇప్పుడే ఆ కుర్రాడు టెంత్ క్లాస్‌కి వచ్చాడు. అతడి పేరు కూడా చిత్రంగా ఉంటుంది. 'మెగా సుప్రీం' అనేది అతడి పేరు. మొదట్లో 'సుప్రీం' అనే పెట్టాడు. తర్వాత 'మెగా'ని కూడా జోడించాడు. చిరంజీవిని మొదట్లో సుప్రీం హీరో అనీ, తర్వాత మెగా స్టార్ అనీ పిలిచారు కదా. అందుకని ఆ రెండు పేర్లనీ కలిపి మనవాడికి 'మెగా సుప్రీం' అని పెట్టేశాడు శివనాగు. కేవలం అది స్క్రీన్ నేం అనుకునేరు. సర్టిఫికెట్లలో ఉండే పేరు అదే. ఆ కుర్రాడు 'వండర్ వీరుడు' అయితే, ఆర్తీ అగర్వాల్ 'వనకన్య' అంట. భయపడక్కర్లేదు. ఆర్తీ ఆ కుర్రాడికి జోడీ కాదు. సినిమాలో ఆర్తీని అతను 'అక్క' అనే పిలుస్తాడంట. బతికిపోయాం. తెలిసిన విషయమేమంటే చిరంజీవి, శ్రీదేవి జంటగా నటించగా సూపర్ హిట్టయిన్ 'జగదేక వీరుడు అతిలోక సుందరి' సినిమానే కాస్త అటూ ఇటూ మార్చి ఈ సినిమాని శివనాగు రూపొందించాడు. మంచి అవకాశాలు ఆమడ దూరంలో ఉండటంతో చేసేది లేక, డబ్బుల కోసం ఏదో ఓ సినిమాని చేసేస్తున్నట్లుంది ఇప్పటికీ అందం చెదరని ఈ ముద్దుగుమ్మ. చేసుకున్న వాళ్లకి చేసుకున్నంత అని ఊరకే అనలేదు కదా. తొందర్లోనే 'వనకన్య వండర్ వీరుడు' ప్రేక్షకుల మధ్యకు రాబోతున్నారు. జాగ్రత్త!

న్యూస్: 'దడ'తో నాగచైతన్య మాస్ హీరో అవుతాడా?

తొలి సినిమా 'జోష్' ఫ్లాపయ్యాక నాగచైతన్య చేసిన రెండు సినిమాలు హిట్టయ్యాయి. ఆ రెండు సినిమాలు.. 'ఏ మాయ చేసావె', '100% లవ్'. వీటితో అతను లవర్ బాయ్ ఇమేజ్ తెచ్చుకున్నాడు. ఇక ఇప్పుడు యాక్షన్ సినిమా చేయడం మాస్ హీరో ఇమేజ్ తెచ్చుకోవాలనే యత్నంలో 'దడ' సినిమా చేస్తున్నాడు. నాగార్జునతో వరుసగా సినిమాలు చేస్తూ వస్తున్న ఆయన అభిమాని డి. శివప్రసాద్‌రెడ్డి ఈ సినిమాని నిర్మిస్తున్నారు.
దీని ద్వారా అజయ్ భుయాన్ డైరెక్టర్‌గా పరిచయమవుతున్నాడు. అజయ్ సాదాసీదా మనిషి కాడు. సినిమా మీద బాగా అధ్యయనం చేసిన యువకుడు. హై క్వాలిఫైడ్ పర్సన్. ఐఐటిలో డిగ్రీ, ఐఐఎం నుంచి ఎంబీఏ చేసిన అతను న్యూయార్క్ ఫిల్మ్ అకాడమీ నుంచి డిఎఫ్‌టి పట్టా తీసుకున్నాడు. నిజానికి 'దడ' అతని తొలి సినిమా కాదు. ఇదివరకే 'హౌస్‌ఫుల్' అనే సినిమాని డైరెక్ట్ చేశాడు. దీన్ని నిర్మించింది మరో డైరెక్టర్ అయిన చంద్రసిద్ధార్థ్. అయితే ఆర్థిక పరమైన కారణాలతో మూడేళ్ల క్రితమే తయారైన ఆ సినిమా ఇంతవరకు వెలుగు చూడలేదు.
ఏడాది క్రితం అతను చెప్పిన కథ నచ్చడంతో మాస్ హీరోగా జనం ముందుకు రావడానికి ఆ కథే సరైనదని నాగచైతన్యకు అనిపించింది. అలా 'దడ' మొదలైంది. ఇందులో అమెరికాలో నివసించే తెలుగు యువకుడిగా నాగచైతన్య కనిపించబోతున్నాడు. అంటే అమెరికా నేపథ్యంలోనే ఈ కథ నడుస్తుంది. అతనికి జోడీగా అందాల తార కాజల్ అగర్వాల్ నటిస్తోంది. ఇంకో ఆసక్తికరమైన సంగతేమంటే నాగచైతన్య అన్నగా హీరో శ్రీరాం నటించడం. ఈ సినిమాలో ఆరు పాటలు, ఆరు ఫైట్లు ఉన్నాయి. పాటలకి దేవిశ్రీ ప్రసాద్ మ్యూజిక్ ఇస్తుంటే, ఫైట్లని బ్యాంకాక్‌కు చెందిన ప్రడిట్ సీలుయెం కంపోజ్ చేశాడు. ఈ నెల 20 లేదా 21న ఆడియో రిలీజ్ అవుతుండగా ఆగస్ట్ 11న ఆర్.ఆర్. ఫిల్మ్ డిస్ట్రిబ్యూషన్ ద్వారా సినిమా విడుదలవనున్నది. మరి 'దడ'తో నాగచైతన్య మాస్ హీరో అనిపించుకుంటాడో, లేదో చూడాలి.

న్యూస్: శ్రీకాంత్‌కి మళ్లీ నిరాశే

శ్రీకాంత్ ఆశలు మరోసారి వమ్మయ్యాయి. తప్పకుండా విజయం సాధించడంతో పాటు నటుడిగా తనకి పేరు ప్రఖ్యాతులు తీసుకొస్తుందని భావించిన 'విరోధి' సినిమాకి ప్రేక్షకులు కరువవడం అతణ్ణే కాదు సినీ వర్గాల్నే ఆశ్చర్యంలో ముంచెత్తుతోంది. ఎందుకటే ఆ సినిమాకి డైరెక్టర్ ప్రతిభావంతుడిగా పేరుపొందిన నీలకంఠ. కమర్షియల్‌గా పెద్ద హిట్టు కాకపోయినా క్లాస్ ఆడియెన్స్‌నీ, విమర్శకుల్నీ మెప్పిస్తుందని చాలామంది అనుకున్నారు. అయితే మేకా మీడియా బేనర్‌పై శ్రీకాంత్ తమ్ముడు అనిల్ నిర్మించిన ఈ సినిమా రెంటికీ చెడ్డ రేవడిలా తయారయ్యిందని చెప్పాలి. సగటు ప్రేక్షకుడినే కాక మల్టీప్లెక్స్ ఆడియెన్స్‌నీ ఈ సినిమా మెప్పించలేకపోతోంది. దాంతో దీనికి పెట్టిన పెట్టుబడి అంతా బూడిదలో పోసినట్లే. అంతే కాదు జర్నలిస్టుగా నటించిన శ్రీకాంత్ కంటే నక్సలైటుగా నటించిన అజయ్‌కే ఎక్కువ పేరొచ్చింది. కరెక్టుగా చెప్పాలంటే ఇది శ్రీకాంత్ సినిమా అని కాకుండా అజయ్ సినిమా అనే అంటున్నారు. ప్రధాన స్రవంతి సినిమా విధానంలో గాక కొత్త ధోరణిలో నీలకంఠ చేసిన ప్రయోగం ఎక్కువమందిని ఆకట్టుకోలేక పోతోంది. నక్సలిజం దారి తప్పిపోయిందని 'విరోధి'తో చెప్పాలని ఆయన యత్నించాడు. దానికి ఆయన ఎంచుకున్న స్క్రీన్‌ప్లే బోర్ కొట్టించింది. అందుకే ఈ సినిమా పట్ల ఎక్కువమంది ఆసక్తి కనపర్చడం లేదు.
2007లో 'ఆపరేషన్ దుర్యోధన', 'యమగోల.. మళ్లీ మొదలైంది' తర్వాత శ్రీకాంత్‌కి ఇంతవరకు మరో హిట్టు దక్కలేదు. 'మైఖేల్ మదన కామరాజు' నుంచి మొదలుకుని 'విరోధి' దాకా వరుసగా ఎనిమిది సినిమాలు అటకెక్కాయి. వీటిలో కృష్ణవంశీ డైరెక్షన్‌లో నటించిన 100వ సినిమా 'మహాత్మా' కూడా ఉంది. 'విరోధి' ఫ్లాపవడంతో శ్రీకాంత్ తన పాత్రల విషయంలో పునరాలోచించుకుంటే మంచిదని విశ్లేషకులు సూచిస్తున్నారు. శ్రీహరి తరహాలో ఓ వైపు హీరో పాత్రలు చేస్తూనే మరోవైపు నటనకు అవకాశమున్న ఇతర పాత్రల్ని చేసుకుంటే బెటర్ అనేది వారి అభిప్రాయం.

న్యూస్: 'కాంచన'గా ఆడ పాత్రలో లారెన్స్?

రాఘవ లారెన్స్ డైరెక్ట్ చేసిన 'కాంచన' తెలుగు, తమిళ భాషల్లో రాబోతోంది. దర్శకుడిగా ఇది లారెన్స్ ఐదో సినిమా. ఇదివరకు అతను మాస్, స్టైల్, డాన్, ముని సినిమాల్ని రూపొందించాడు. వీటిలో 'మాస్' ఒక్కటే పెద్ద హిట్. 'స్టైల్'తో 100 కోట్ల రూపాయల బిజినెస్ చేస్తానని ఆ సినిమా నిర్మాత లగడపాటి శ్రీధర్ చెప్పినవి కాకి కబుర్లేనని తేలిపోయింది. 'డాన్', 'ముని' సినిమాలు బాక్సాఫీసు వద్ద పర్వాలేదనిపించాయి.
హారర్, కామెడీ, సెంటిమెంట్ మేళవింపుతో అతను తీసిన 'ముని' ప్రేక్షకులకి కొత్త అనుభూతినిచ్చిందనేది నిజం. అందువల్లే దానికి సీక్వెల్ తీయాలని అతను భావించాడు. అలా ఇప్పుడు 'కాంచన'ని రూపొందించాడు. మొదట ఈ సినిమాలో 'కాంచన' పాత్రని అనుష్కతో చేయించాలని అతను తలచాడు. కానీ ఆమె స్థానంలో తనే స్వయంగా నటించాడు! అవును. అతను ఈ సినిమాలో లేడీ గెటప్పుతో విభిన్నంగా కనిపించి, ప్రేక్షకుల్ని సంభ్రమాశ్చర్యాలకు గురి చేయబోతున్నాడు. అలాగే ఇప్పటివరకు గ్లామరస్ గర్ల్‌గానే ముద్రపడ్డ లక్ష్మీరాయ్ ఈ సినిమాలో భిన్నమైన కేరక్టర్లో కనిపించనున్నది. తెలుగులో ఈ సినిమాని బెల్లంకొండ సురేశ్ విడుదల చేస్తుండటం గమనార్హం. ఆగస్టులో ఈ సినిమా ప్రేక్షకుల ముందుకు రానున్నది. కాగా తెలుగులో 'డాన్' తర్వాత 'రెబల్' సినిమాని డైరెక్ట్ చేస్తున్నాడు లారెన్స్. ఇందులో ప్రభాస్ హీరో కాగా; అనుష్క, దీక్షాసేథ్ హీరోయిన్లు.

న్యూస్: ఆచితూచి అడుగేస్తున్న 'మొగుడు'

హీరోగా గోపీచంద్ రెండో ఇన్నింగ్స్ 'యజ్ఞం'తో సజావుగానే మొదలైంది. ఆంధ్రుడు, రణం, లక్ష్యం, శౌర్యం వంటి హిట్ సినిమాల్ని అతను అందించగలిగాడు. 'శౌర్యం' తర్వాత త్రిష జంటగా అతను చేసిన 'శంఖం' ఫ్లాపవగా, పూరి జగన్నాథ్ డైరెక్షన్లో చేసిన 'గోలీమార్' ఫర్వాలేదనిపించుకుంది. దాని తర్వాత ఎంతో నమ్మకంతో బీవీఎస్ రవి అనే రచయితని డైరెక్టర్‌గా పరిచయం చేస్తూ అతను నటించిన 'వాంటెడ్' అట్టర్‌ఫ్లాపయ్యింది. ఇలా ఓ సినిమా హిట్టయి, రెండు సినిమాలు ఫ్లాపవుతూ రావడం గోపీచంద్‌కి ఏమాత్రమూ ఇష్టం లేదు. అందుకే ఇక నుంచీ సినిమాల ఎంపికలో మరింత శ్రద్ధ పెట్టాలని అతను నిర్ణయించుకున్నాడు. అందుకు తగ్గట్లే తొలిసారి కృష్ణవంశీ డైరెక్షన్‌లో చేస్తున్నాడు. ఆ ఇద్దరి కాంబినేషన్లో తయారవుతున్న ఆ సినిమా 'మొగుడు'. ఇందులో అందాలరాశి తాప్సీ నాయిక. ఇప్పటివరకు చేయని పాత్రని ఈ సినిమాలో గోపీచంద్ చేస్తున్నట్లు యూనిట్ వర్గాలు చెబుతున్నాయి. ఇంతదాకా హీరోగా అతను చేసినవన్నీ పెళ్లికాని బ్రహ్మచారి పాత్రలే. తొలిసారి పెళ్లయిన యువకుడి పాత్రను 'మొగుడు'లో చేస్తున్నాడు. ఈ సినిమా తనకి సరికొత్త ఇమేజ్‌ని ఇవ్వడమే కాక, నటుడిగా తనని మరో మెట్టు పైకెక్కిస్తునంది నమ్ముతున్నాడు గోపీచంద్. అతడి ఆశ నెరవేరుతుందో, లేదో చూడాలి.

న్యూస్: ఆదిత్యకు అగ్ని పరీక్ష 'ముగ్గురు'

దర్శకుడు వి.ఎన్. ఆదిత్య ఆశలన్నీ 'ముగ్గురు' మీదే ఉన్నాయి. 'ముగ్గురు' అనేది ఆయన డైరెక్ట్ చేస్తున్న కొత్త సినిమా. డి. రామానాయుడు ఈ సినిమా నిర్మాత. టైటిల్ రోల్స్‌ని నవదీప్, 'హ్యాపీడేస్' ఫేం రాహుల్, అవసరాల శ్రీనివాస్ పోషిస్తున్నారు. రీమాసేన్, శ్రద్ధాదాస్, సంజన, సౌమ్య హీరోయిన్లు. మొదట ఈ సినిమాకి '3 ఇడియట్స్' అనే టైటిల్ పెట్టి తర్వాత ఎందుకనో 'ముగ్గురు'గా మార్చారు. జంధ్యాల దర్శకత్వంలో ఒకప్పుడు రామానాయుడు నిర్మించిన సూపర్ హిట్ మూవీ 'అహ నా పెళ్లంట'కు ఇది సీక్వెల్ అని వినికిడి. దానికీ, దీనికీ తేడా... ఆ సినిమాలో హీరో రాజేంద్రప్రసాద్ ఒక్కరే అయితే ఇందులో ముగ్గురు హీరోలు. దర్శకుడిగా ఆదిత్యకు ఈ సినిమా అగ్ని పరీక్ష. 'మనసంతా నువ్వే', 'నేనున్నాను' సినిమాల తర్వాత ఆయనకు మళ్లీ హిట్టు లేదు. నాగార్జునతో చేసిన రెండో సినిమా 'బాస్' నుంచి ఇటీవల సుమంత్‌తో చేసిన 'రాజ్' దాకా అన్నీ బాక్సాఫీసు వద్ద బోల్తా కొట్టినవే. అందుకే ఈసారి మినిమం గ్యారంటీ ఉండే కామెడీ సబ్జెక్టుని ఎంచుకున్నాడు ఆదిత్య. కామెడీ ఆఫ్ ఎర్రర్స్‌తో నడిచే 'ముగ్గురు' కచ్చితంగా హిట్టయి, తన కెరీర్‌కి ఊపిరి పోస్తుందని ఆయన గట్టిగా నమ్ముతున్నాడు.

విశ్లేషణ: హీరో వెంకటేశ్ కెరీర్

సరికొత్త ఇమేజ్ కోసం తపన

ఇవాళ పెద్ద హీరోలకు ఒక్కో సినిమా ఒక్కో అగ్ని పరీక్ష. యువతరం హీరోలు పోటీగా విజయపథంలో దూసుకుపోతుంటే మరోవైపు హీరో స్థాయిని పట్టించుకోకుండా పెద్ద హీరోల సినిమాల్ని (బాగో లేకపోతే) తిప్పికొడుతున్నారు ప్రేక్షకులు. అందువల్ల చేసే ప్రతి సినిమాకూ ఆ హీరోలు చాలా జాగ్రత్తలు తీసుకోవాల్సి వస్తోంది. మిగతా సీనియర్ టాప్ హీరోలతో పోలిస్తే వెంకటేశ్‌ది కాస్త విభిన్న శైలి. ఇటీవలి కాలంలో ఏ పెద్ద హీరో చేయనన్ని వైవిధ్యమైన పాత్రలు పోషిస్తూ వస్తున్నారాయన. 'ఈనాడు', 'నమో వెంకటేశ', 'నాగవల్లి' సినిమాల్లో ఒకదానికొకటి పొంతనలేని పాత్రలు చేసిన ఆయన ఇప్పుడు ఆ మూడింటికీ భిన్నమైన 'బాడీగార్డ్' పాత్రని చేస్తున్నారు. సబ్జెక్టు విషయంలో ఆచితూచి వ్యవహరిస్తూ రావడం వల్ల పాతికేళ్ల సినీ జీవితంలో ఫెయిల్యూర్ల కంటే సక్సెస్సలనే పొందుతూ వచ్చారు.
విలక్షణ నటుడు
తొలి చిత్రం 'కలియుగ పాండవులు' (1986)తో పర్వాలేదనిపించిన వెంకటేశ్.. తమ పక్కింటి కుర్రాడిలా అనిపించేసరికి జనం ఆదరించారు. తండ్రి దగ్గుబాటి రామానాయుడు అప్పటికే పేరుపొందిన నిర్మాతే అయినా ఆయన ప్రభావం నుంచి అతి త్వరగా బయటపడి, హీరోగా తనకంటూ ఓ స్థాయిని ఏర్పరచుకోగలిగారు. హీరోగా జనానికీ, నటుడిగా విమర్శకులకూ ఎప్పుడూ ఫేవరేట్‌గానే ఉంటూ వస్తోన్న ఆయనకు స్వర్ణకమలం (1988), శత్రువు ('91), చంటి ('92), ధర్మచక్రం ('96), గణేశ్ ('98), నువ్వు నాకు నచ్చావ్ ('01), మల్లీశ్వరి ('04), ఆడవారి మాటలకు అర్థాలే వేరులే ('07) తదితర సినిమాలు బాగా పేరు తెచ్చిపెట్టాయి. టాప్ హీరోగా ఎదిగిన ఓ నటుడు నెగటివ్ షేడ్స్ ఉన్న పాత్ర చేయడం ఆయన తరానికి సంబంధించినంత వరకు ఓ ప్రయోగం, ఓ సాహసం. 'పవిత్రబంధం' (1996)తో ఆ సాహసం చేసి నటుడిగా మరో మెట్టు పైకెక్కారు. తనది గ్లామరస్ ఫేస్ కాకపోయినా ఎప్పుడూ చిలిపిగా నవ్వుతున్నట్లుండే ముఖంతో బొబ్బొలి రాజా, ప్రేమంటే ఇదేరా, కలిసుందాం రా, నువ్వు నాకు నచ్చావ్ చిత్రాల్లో లవర్ బాయ్‌గా మెప్పించారు. నిర్మాతగా తండ్రి సపోర్ట్ ఎంతగా ఉన్నా నటుడిగా అంచెలంచెలుగా ఎదిగి నిర్మాతలకు, బయ్యర్లకు హాట్ ఫేవరేట్ అయ్యారు. తను చేసిన ప్రయోగాల్లో అత్యధిక భాగం సొంత సంస్థలో చేసినవే. ఈ రకంగా తనలోని నటుణ్ణి తృప్తిపరచుకోవడంతో పాటు కమర్షియర్ ఎంటర్‌టైనర్స్ చేసి, బయ్యర్లను తృప్తిపరచడం అలవాటుగా చేసుకున్నారు. అందుకే తొలినాళ్లలో ప్రతి యేటా కనీసం ఓ సూపర్‌హిట్ సినిమాని ఆయన అందించారు. 1990లో వచ్చిన 'బొబ్బిలి రాజా' సినిమా ఆయనకు అమితమైన స్టార్‌డం తీసుకొచ్చింది. ఆ తర్వాత కూలీ నెం.1 ('91), చంటి ('92), సుందరకాండ ('92), అబ్బాయిగారు ('93) వంటి హిట్ సినిమాలు చేశారు. తిరిగి 1996 నుంచి వరుస హిట్లతో మిగతా టాప్ స్టార్లకు నిద్రలేకుండా చేశారు. ఇంట్లో ఇల్లాలు వంటింట్లో ప్రియురాలు, పవిత్రబంధం, పెళ్లి చేసుకుందాం, సూర్యవంశం, రాజా చిత్రాలు మహిళా ప్రేక్షకుల్ని విపరీతంగా ఆకట్టుకోగా ప్రేమించుకుందాం రా, ప్రేమంటే ఇదేరా, కలిసుందాం రా, నువ్వు నాకు నచ్చావ్, మల్లీశ్వరి సినిమాలతో యువతనూ ఆయన బాగా ఆకర్షించగలిగారు.
ఫ్యామిలీ సినిమాలకే ప్రాధాన్యం
మిగతా టాప్ హీరోలతో పోలిస్తే ఆయన కొన్నేళ్లుగా చేసిన సినిమాల్లో ఫ్యామిలీని టార్గెట్ చేసుకున్నవే ఎక్కువ. 'ఇంట్లో ఇల్లాలు వంటింట్లో ప్రియురాలు' నుంచి దీనిని మనం గమనించవచ్చు. గణేశ్, జయం మనదేరా, జెమిని, ఘర్షణ, లక్ష్మీ, తులసి వంటి కొద్ది సినిమాల్లోనే యాక్షన్ ఛాయలు కనిపిస్తాయి. మిగతావన్నీ ఫ్యామిలీ కోసం ఉద్దేశించిన ఫార్ములా సినిమాలే. అదే తొలి రోజుల్లో అయితే రక్త తిలకం, ధృవనక్షత్రం, బ్రహ్మపుత్రుడు, బొబ్బిలి రాజా, శత్రువు, చినరాయుడు, కొండపల్లి రాజా, ధర్మచక్రం వంటి యాక్షన్ ప్రధాన సినిమాలు చాలానే చేశారాయన. కొన్ని యాక్షన్ సినిమాలు బాక్సాఫీసు వద్ద ఫెయిలైతే అయివుండవచ్చు గాక.. యాక్షన్ సినిమాల వల్లనే ఆయన టాప్ హీరోగా ఎదిగారన్నది నిర్వివాదం. యాక్షన్ సినిమాల్లో చేయడం శరీరానికి ఎక్కువ శ్రమ. అందువల్లనో, ఏమో ఆయన లైటర్ వీన్ సినిమాల్నే ఎక్కువగా ప్రిఫర్ చేస్తూ వస్తున్నారు. ఆయన ఇటీవలి సినిమాలు 'చింతకాయల రవి', 'నమో వెంకటేశ' ఇదే కోవలో ఉండటం గమనార్హం. అలాగే రీమేక్ సినిమాలకూ ఆయన పెద్దపీట వేస్తున్నారు.
టూటౌన్ రౌడీ, చంటి, సుందరకాండ, అబ్బాయిగారు, రాజా, శీను, వాసు, జెమిని, వసంతం, ఘర్షణ, సంక్రాంతి, ఈనాడు, నాగవల్లితో పాటు ఇప్పుడు చేస్తున్న బాడీగార్డ్ కూడా రీమేక్ సినిమానే. దీనికి తోడు పరభాషా దర్శకులకు ఆయన చాలా అవకాశాలు ఇస్తున్నారు. విక్రమన్, ఉదయశంకర్, కరుణాకరన్, చరణ్, గౌతం మీనన్, సెల్వరాఘవన్, పి. వాసు తదితర తమిళ దర్శకులతో ఆయన చేశారు. అయితే యాక్షన్ సినిమాల సంఖ్య తగ్గించి, ఫ్యామిలీ సినిమాలు ఎక్కువ చేస్తూ రావడం వల్ల మాస్ ప్రేక్షకుల్లో ఆయన ఇమేజ్ తగ్గిందన్నది విశ్లేషకుల అభిప్రాయం. కన్నడంలో 'ఆప్త రక్షక' హిట్టవడానికీ, తెలుగులో 'నాగవల్లి' ఫ్లాపవడానికీ నేటివిటీ సమస్య ప్రధాన కారణం. రానున్న మలయాళ 'బాడీగార్డ్' రీమేక్ ఆయన ఇమేజ్‌ని ఏ మేరకు నిలుపుతుందో వేచి చూడాల్సిందే.

న్యూస్: తెలుగు తెరపై మరో యమధర్మరాజు

తెలుగు తెరమీద మరో యమధర్మరాజు కనిపించబోతున్నాడు. ప్రేక్షకుల మనసుల్లో యమధర్మరాజు అనగానే మొదట మెదిలే వ్యక్తి కైకాల సత్యనారాయణ. 'యమగోల' సినిమా నుంచి ఆ పాత్రని సత్యనారాయాణే చేయాలనే అభిప్రాయం బలపడింది. అదివరకు 'సతీ సావిత్రి'లో యమునిగా ఎన్‌టీ రామారావు విశ్వరూపాన్ని మనం చూశాం. అయినా ఆయన ఎక్కువ సినిమాల్లో ఆ పాత్రపోషణ చేయలేదు. అందువల్ల సత్యనారాయణకు తెలుగుతెర యమునిగా కీర్తి దక్కింది. అయితే ఆయనకు వయసు మళ్లినందున ఇతరులకు ఆ పాత్ర చేసే అవకాశాలు కలుగుతున్నాయనుకోవాలి. 'యమదొంగ'లో మోహన్‌బాబుకు ఆ పాత్ర చేసే అవకాశం కల్పించాడు డైరెక్టర్ రాజమౌళి. అందుకు తగ్గట్లుగానే తన విలక్షణ నటనతో, డైలాగ్ డెలివరీతో యముని పాత్రను బాగా అభినయంచి చూపారు మోహన్‌బాబు.
ఆ తర్వాత 'యమగోల.. మళ్లీ మొదలైంది' సినిమాలో సీనియర్ యమునిగా సత్యనారాయణ నటిస్తే, కుర్ర యమునిగా శ్రీకాంత్ పర్వాలేదనిపించుకున్నాడు. ఈ మధ్యే 'బ్రహ్మలోకం టు యమలోకం వయా భూలోకం' సినిమాలో యముని పాత్రని వెటరన్ యాక్టర్ జయప్రకాశ్‌రెడ్డి తనదైన శైలిలో రక్తి కట్టించాడు.
ఇక ఇప్పుడు ఆ పాత్రని పోషించే అవకాశం శ్రీహరికి వచ్చింది. ఓవైపు హీరోగా, మరోవైపు కేరక్టర్ ఆర్టిస్టుగా రాణిస్తున్న ఆయన సాయిరాం శంకర్ హీరోగా నటించే ఓ సినిమాలో యమధర్మరాజు పాత్రని చేయబోతున్నాడు. ఇదివరకు 'వేడుక' అనే సినిమాని డైరెక్ట్ చేసిన జితేందర్ ఈ సినిమాకి దర్శకుడు. ముమైత్‌ఖాన్‌తో 'పున్నమినాగు'ని నిర్మించిన జి. విజయకుమార్ గౌడ్ ఈ సినిమాకి నిర్మాత. అమెరికా నేపథ్యంలో కథ నడవడం ఈ సోషియో ఫాంటసీ ప్రత్యేకత. అంటే ఇప్పటివరకు మన తెలుగు నగరాల్లో, గ్రామాల్లో మాత్రమే హల్‌చల్ సృష్టించిన యమధర్మరాజు ఈ సినిమాలో అమెరికాలో ఆ పని చేయబోతున్నాడు. ఇంకో సంగతేమంటే చాలా గ్యాప్ తర్వాత ఎన్నారై బ్యూటీ పార్వతీ మెల్టన్ ఇందులో నాయికగా సాయిరాం సరసన నటించబోతోంది. ఇలాంటి ఆసక్తికరమైన అంశాలతో వస్తున్న ఈ సినిమా షూటింగ్ సెప్టెంబర్‌లో మొదలు కాబోతోంది. ఇందులో యమునిగా శ్రీహరి ఏవిధంగా రాణిస్తాడో చూడాల్సిందే.

న్యూస్: చిరంజీవి ఊగిసలాట

మెగాస్టార్ చిరంజీవి ఊగిసలాట ధోరణి మరోమారు స్పష్టమైంది. 149వ సినిమా 'శంకర్‌దాదా జినాదాబాద్' తర్వాత 150వ సినిమా చేస్తానని ఓసారి, చేయనని ఓసారి పలుమార్లు చెబుతూ వచ్చిన చిరంజీవి నాలుగు రోజుల తర్వాత ఇక సినిమాలకి పూర్తిగా గుడ్‌బై చెప్పి, రాజకీయాల్లోనే కొనసాగుతాననీ, సినిమాల సంగతి తన కుమారుడు రాంచరణ్ చూసుకుంటాడనీ తేల్చి చెప్పారు. కానీ జూన్ 30 రాత్రి ప్రసాద్ మల్టీప్లెక్స్‌లో ఏర్పాటైన 'బుడ్డా హోగా తేరా బాప్' ప్రీమియర్ షోలో పరిస్థితి మరోసారి మారింది. అందులో చిరంజీవి 149 సినిమాలతో ఆగిపోవడం ఏమీ బాగాలేదనీ, 150వ సినిమా చేస్తే బాగుంటుందనీ అమితాబ్ బచ్చన్ అనడం, రాంగోపాల్ వర్మ కూడా దానికి వంత పాడటం, ఆ సినిమాని తనే డైరెక్ట్ చేస్తానని పూరి జగన్నాథ్ చెప్పడంతో వెంటనే మనసు మార్చేసుకున్నారు. వర్మ పర్యవేక్షణలో, పూరి డైరెక్షన్లో, అమితాబ్ ఓ గెస్ట్ రోల్ చేస్తే తాను నటిస్తానని కమిటైపోయారు. చిరంజీవి 150వ సినిమా చేస్తే గనుక తాను గెస్ట్ రోల్ చేస్తానని అమితాబ్ అప్పటికప్పుడే చెప్పేశారు.
ఈ ప్రహసనమంతా చూసినవారు చిరంజీవి రెండు రోజుల్లోనే ఇలా తన మనసు మార్చుకోవడం చూసి ముక్కుమీద వేలేసుకున్నారు. మాటిమాటికీ ఇలా మాటలు మార్చేవాడు, కమిట్‌మెంట్ లేనివాడు ఎలా నాయకుడిగా రాణిస్తాడని విశ్లేషకులు పెదవి విరుస్తున్నారు. ఈ ఊగిసలాడే ధోరణి వల్లే రాజకీయాల్లో ఆయన సక్సెస్ కాలేకపోతున్నారని వారు అభిప్రాయపడుతున్నారు. తిరుపతిలో అత్యంత ఆర్భాటంగా ప్రజారాజ్యం పార్టీ పెట్టి, ఎన్నికల్లో నిల్చుని, 18 సీట్లలో మాత్రమే తన పార్టీని గెలిపించుకో గల్గిన చిరంజీవి పాలకొల్లులో స్వయంగా ఓడిపోవడం ఆయనతో సహా అందర్నీ దిగ్భ్రమగొల్పగా, పార్టీ పెట్టిన రెండేళ్లలోనే ఏ పార్టీమీద కోపంతో కొత్త పార్టీ పెట్టారో, అదే కాంగ్రెస్‌లోనే దాన్ని కలిపేయడం ఆయన చపల మనస్థత్వానికి గట్టి నిదర్శనమని విశ్లేషకులు చెబుతున్నారు. ఇప్పుడు సినిమా చేయాలా, వద్దా అనే విషయంలోనూ ఆయనలో స్పష్టత కొరవడిందనీ, ఒక్క మాట మీద నిల్చునే దృఢ సంకల్పం ఆయనలో లేదనీ దీనివల్ల స్పష్టమవుతున్నదనీ వాళ్లు తేల్చి చెబుతున్నారు. ఇక ''అన్నయ్య 150వ సినిమా చేస్తారు, దాన్ని చరణ్ నిర్మిస్తాడు'' అని నాగబాబు ప్రకటించడం కొసమెరుపు.

విశ్లేషణ: 'ఠాగూర్' ఎందుకంత హిట్టయ్యాడు? (రెండో భాగం)