న్యూస్: 'రామాచారి' నవ్విస్తాడా?

'మాయగాడు' సినిమా గురించి వేణు ఎంత గొప్పగా చెప్పాడో అందులో రవ్వంతైనా అది జనాల్ని మెప్పించలేకపోయింది. లాయర్ లీలాకృష్ణ లీలలు వారికి బోర్ కొట్టించాయి. ఛార్మి అందాల ప్రదర్శన కూడా వృథా అయ్యింది. దాంతో 'రామాచారి' మీద దృష్టి సారించాడు వేణు. ఈ సినిమాని ఆయన సొంత బేనర్‌లాంటి ఎస్.పి. ఎంటర్‌టైన్‌మెంట్స్ నిర్మిస్తోంది. 'సిద్ధు ఫ్రం సికాకుళం', 'సీతారామ కల్యాణం.. లంకలో' ఫేం జి. ఈశ్వర్ దర్శకుడు. రెండు పాటలు తప్ప మిగతా షూటింగ్ అయిపోయిన ఈ సినిమాని ఆగస్టులోనే విడుదల చేయాలని ప్లాన్ చేస్తున్నారు. దిలీప్, భావన జంటగా నటించిన మలయాళ హిట్ ఫిల్మ్ 'సిఐడి మూస'కి ఇది రీమేక్. 'గోపి గోపిక గోదావరి' వంటి మ్యూజికల్ హిట్ తర్వాత వేణు, కమలినీ ముఖర్జీ జంటగా నటిస్తున్న సినిమా ఇది. ఆ సినిమాలో తమ మధ్య మంచి కెమిస్ట్రీ వర్కవుట్ అయ్యిందనీ, 'రామాచారి'కీ అది ఎస్సెట్ అవుతుందనీ వేణు ఆశిస్తున్నాడు. మంచి కామెడీ ఎంటర్‌టైనర్ అయిన ఈ సినిమాకి మణిశర్మ మ్యూజిక్ డైరెక్టర్. అన్నీ బాగానే ఉన్నా 'రామాచారి' అనే టైటిలే ఇంటరెస్టింగ్‌గా లేదని సినీ వర్గాలు భావిస్తున్నాయి. అయితే కథకి ఆ టైటిలే సరైనదని నిర్మాత, దర్శకుడితో పాటు వేణు సైతం భావిస్తున్నాడు. ఈ సినిమా అయినా హిట్టయ్యి, తనకి లైఫ్‌నిస్తుందని అతను ఆశిస్తున్నాడు.

న్యూస్: 'రంగం' తర్వాత 'రౌద్రం'!

మెగా సూపర్‌గుడ్ మూవీస్ అధినేత ఆర్.బి. చౌదరి కుమారుడు జీవా తమిళంలో నటించిన సూపర్‌హిట్ ఫిల్మ్ 'కో' తెలుగులో 'రంగం' పేరుతో విడుదలై ఇక్కడ కూడా ఘన విజయాన్ని సాధించిన సంగతి తెలిసిందే. 75 కేంద్రాల్లో 75 రోజులు ఆడిన ఈ సినిమా ఆగస్ట్ 20వ తేదీతో 100 రోజులు పూర్తి చేసుకోబోతోంది. ఆర్.బి. చౌదరి ప్రకారం ఇది 20 సెంటర్లలో శత దినోత్సవం జరుపుకోబోతోంది. ఇందులో ఫొటో జర్నలిస్ట్ అశ్విన్‌గా జీవా నటన అందర్నీ ఆకట్టుకుంది. ఈ విజయం ఇచ్చిన స్ఫూర్తితో జీవా తాజా చిత్రం 'రౌథిరం'ని 'రౌద్రం' పేరుతో అనువదిస్తున్నారు చౌదరి. రెండు భాషల్లో ఒకేసారి ఈ సినిమాని విడుదల చేయడానికి సన్నాహాలు చేస్తున్నారు. అందాల తార శ్రియ హీరోయిన్‌గా నటించిన ఈ సినిమా ద్వారా డైరెక్టర్‌గా గోకుల్ పరిచయమవుతున్నాడు. ప్రీతి జంగియాని, ప్రకాశ్‌రాజ్, జయప్రకాశ్‌రెడ్డి ప్రధాన పాత్రధారులైన ఈ సినిమా ఆగస్టులోనే ఆడియన్స్ ముందుకు రాబోతోంది. చౌదరి పెద్ద కుమారుడు రమేశ్ హీరోగా నిలదొక్కుకోక పోయినా చిన్న కుమారుడు జీవా ఆ లోటును తీరుస్తుండటం గమనార్హం. తమిళంలో మంచి హీరోగా రాణిస్తున్న అతను ఇప్పుడు 'రంగం'తో తెలుగు ప్రేక్షకుల హృదయాల్లోనూ చోటు పొందాడు. 'రౌద్రం'తో అతను మరింతగా తెలుగువాళ్లని అలరిస్తాడేమో చూడాలి.

న్యూస్: నాగార్జున, శివప్రసాదరెడ్డి కాంబినేషన్‌లో 11వ సినిమా!

కామాక్షి ఎంటర్‌ప్రైజెస్ అధినేత డి. శివప్రసాద్‌రెడ్డితో మరో సినిమా చేసేందుకు రెడీ అవుతున్నారు అక్కినేని నాగార్జున. 'రగడ' వంటి హిట్ తర్వాత ఈ సినిమా తయారు కాబోతోంది. ఇప్పటివరకు ఆ ఇద్దరి కాంబినేషన్‌లో పది సినిమాలొచ్చాయి. వాటిలో విక్కీ దాదా, అల్లరి అల్లుడు, సీతారామరాజు, నేనున్నాను, కింగ్, రగడ హిట్టయ్యాయి. ఆటో డ్రైవర్, ఎదురులేని మనిషి, బాస్, కేడి ఫ్లాపయ్యాయి. అయితే హిట్లు, ఫ్లాపులతో నిమిత్తం లేకుండా వారి అనుబంధం కొనసాగుతుండటం విశేషమనే చెప్పాలి. ఒకప్పుడు అక్కినేని నాగేశ్వరరావు - దుక్కిపాటి మధుసూదనరావు, కృష్ణ-డూండీ కాంబినేషన్ తరహాలో వీరి కాంబినేషన్ తయారయ్యింది. స్టార్లు యేడాదికి ఒకటి, రెండు సినిమాలు కంటే ఎక్కువ చేయని ఈ రోజుల్లో ఒక హీరో ఒకే నిర్మాతతో పది సినిమాలు చేయడం వారి అనుబంధానికి నిదర్శనం. 1988లో 'విక్కీ దాదా'తో ప్రారంభమైన వీరి అనుబంధం 23 సంవత్సరాలుగా అప్రతిహతంగా కొనసాగుతోంది. 'ఆటో డ్రైవర్' ఫ్లాపయ్యాక శివప్రసాద్‌రెడ్డి బాగా డిప్రెస్ అయ్యారు. "ఫైనాన్షియల్‌గా, మెంటల్‌గా నేను పూర్తి నిరాశలో ఉన్న టైంలో నన్ను పిలిచి సినిమా ప్లాన్ చేసుకోండని చెప్పారు నాగార్జున. అలా 'సీతారామరాజు' వచ్చి మళ్లీ నన్ను నిలబెట్టింది. ఫ్లాప్ ఇచ్చినప్పుడు కూడా నన్ను తన నిర్మాతగా భావించిన నాగార్జున సంస్కారం వల్లే మా కాంబినేషన్‌కు ఇంత గుర్తింపు వచ్చింది" అని చెప్పారు శివప్రసాద్‌రెడ్డి. అలాంటి ఈ హీరో, నిర్మాతల 11వ సినిమా 2012 జనవరిలో ప్రారంభం కాబోతోంది. దీని డైరెక్టర్ ఎవరనే సంగతి కొద్ది రోజుల్లో వెల్లడి కానున్నది.

న్యూస్: మంచి సినిమాలకే నందులు!

గతంలో రెగ్యులర్ కమర్షియల్ సినిమాలకే ఎక్కువ అవార్డుల్ని కట్టబెడుతూ వచ్చిన నంది అవార్డుల జ్యూరీ గత యేడాది నుంచీ అర్థవంతమైన, మంచి చిత్రాలకు అవార్డులనిస్తూ 'నంది'కి గౌరవాన్ని కల్పిస్తోంది. 2010 సంవత్సరానికి దర్శకుడు ఎన్. శంకర్ ఆధ్వర్యంలోని జ్యూరీ ప్రకటించిన అవార్డులు ఈ సంగతిని స్పష్టం చేశాయి. ఈసారి ఉత్తమ అవార్డులు మూడూ విమర్శకుల ప్రశంసల్ని పొందిన సినిమాలకే రావడం గమనార్హం. అల్లు అర్జున్, మంచు మనోజ్, అనుష్క ప్రధాన పాత్రలు పోషించగా క్రిష్ డైరెక్ట్ చేసిన 'వేదం' ఉత్తమ చిత్రంగా బంగారు నందిని గెలుగుకోగా, 2009 సంవత్సరంలో ఉత్తమ చిత్రంగా బంగారు నందిని పొందిన 'సొంత ఊరు' దర్శకుడు పి. సునీల్‌కుమార్‌రెడ్డి మత్స్యకారుల దయనీయ జీవితాన్ని ఆవిష్కరించిన 'గంగపుత్రులు' ద్వితీయ ఉత్తమ చిత్రంగా ఎంపికైంది. సునీల్‌కుమార్‌రెడ్డికే ఉత్తమ దర్శకుడి అవార్డు దక్కడం గమనార్హం. ఇక తృతీయ ఉత్తమ చిత్రంగా సాయికుమార్, శర్వానంద్, సందీప్ నటించగా దేవా కట్టా డైరెక్ట్ చేసిన 'ప్రస్థానం' నిలిచింది. ప్రజాదరణ పొందిన చిత్రంగా నిజంగా ప్రేక్షకుల ఆదరణ పొందిన రాజమౌళి చిత్రం 'మర్యాద రామన్న'ని జ్యూరీ ఎంపిక చేసింది. గతంలో ఈ కేటగిరీలో చాలా చోట్ల అసలు రిలీజే కాని 'పెళ్లాం పిచ్చోడు' అనే రాజేంద్రప్రసాద్ సినిమాని ఎంపిక చేసిన సంగతి జ్ఞాపకం చేసుకుంటే జ్యూరీ ఈసారి ఎంత వాస్తవికంగా పనిచేసిందో అర్థమవుతుంది. అలాగే సకుటుంబంగా చూడదగ్గ ఉత్తమ చిత్రం అవార్డుని చంద్రసిద్ధార్ట్ డైరెక్ట్ చేసిన 'అందరి బంధువయ'కు ప్రకటించారు. సమాజంలో నైతికత, మానవత్వం ముఖ్యమని చెప్పిన ఈ సినిమాని విమర్శకులు ఎంతగానో అభిమానించారు. ఇక జాతీయ సమగ్రతా చిత్రంగా బాలకృష్ణ హీరోగా దాసరి నారాయణరావు రూపొందించిన 'పరమవీరచక్ర'కు ఇచ్చారు.
వ్యక్తిగత అవార్డుల విషయానికొస్తే ఉత్తమ నటుడి అవార్డు బాలకృష్ణకు దక్కింది. 2001 సంవత్సరంలో తెలుగుదేశం ప్రభుత్వ హయాంలో 'నరసింహనాయుడు' పాత్ర పోషణకు గాను ఉత్తమ నటుడి అవార్డును అందుకున్న ఆయన మళ్లీ ఇప్పుడు కాంగ్రెస్ హయాంలో ఆ అవార్డును పొందడం విశేషమే. 'పరమవీరచక్ర'కు కాకుండా, చాలా కాలం తర్వాత ప్రేక్షకాభిమానాన్ని పొందిన 'సింహా'లో చేసిన రెండు పాత్రలకు గాను ఈ అవార్డు ఆయనకు లభించడం గమనార్హం. 2011 సంక్రాంతికి విడుదలైనా, 2010లోనే సెన్సార్ సర్టిఫికెట్ పొందిన 'అలా మొదలైంది'లో అద్భుతంగా అభినయించిన నిత్యమీనన్ ఉత్తమ నటిగా ఎంపికవగా, ఆ చిత్రాన్ని జన రంజకంగా మలిచిన నందినీరెడ్డి ఉత్తమ తొలిచిత్ర దర్శకురాలిగా నిలిచింది. 'సింహా"కి చక్కని సంగీతాన్నిచ్చిన చక్రి ఉత్తమ సంగీత దర్శకుడిగా ఎంపికయ్యారు. తొలి చిత్రమే అయినా 'మర్యాద రామన్న'లో విశేషంగా రాణించిన నాగినీడు ఉత్తమ విలన్‌గా అవార్డును అందుకోనున్నారు. ఇలా అనేక అవార్డులు పారదర్శకంగా ఇచ్చినట్లు స్పష్టమవుతోంది.

న్యూస్: అక్కినేనిగారూ ఇది సభ్యతేనా?

అక్కినేని నాగేశ్వరరావు దేశం గర్వించే మహానటుడు. 'దేవదాసు' పాత్రని ఆయన పోషించినట్లుగా ఇంకెవ్వరూ పోషించలేదనే కీర్తి పొందినవారు. ఆరున్నర దశాబ్దాలుగా అలుపన్నది లేకుండా ఇంకా నటిస్తూనే ఉన్నారు. చివరి శ్వాస వరకూ నటిస్తూనే ఉంటానని తన అంకిత భావాన్ని ప్రదర్శించే అసలు సిసలు కళాకారుడు. ప్రస్తుతం నిర్మాణంలో ఉన్న బాపు 'శ్రీరామరాజ్యం'లో వాల్మీకిగా నటిస్తున్నారు. అలాంటి ఆయన అదుపుతప్పి, అసభ్యకర రీతిలో మాట్లాడటమేమిటా అని అందరూ ఆశ్చర్యచకితులవుతున్నారు. మీడియా అంతా పాల్గొన్న ఓ ఆడియో వేడుకలో, టెలివిజన్‌లో ప్రత్యక్షప్రసారమవుతున్న ఆ కార్యక్రమంలో ఆయన ఆడవారి వక్షస్థలం గురించి కొద్దిసేపు అలాగే మాట్లాడటం అందర్నీ బిత్తరపోయేలా చేసింది. కొంతమంది ఆయన మాటల్ని ఎంజాయ్ చేసినా ఎక్కువమంది అంత పెద్దవారు, అందరూ గౌరవించే స్థాయిలో ఉన్నవారు అలా మాట్లాడవచ్చునా? అని పెదవి విరిచారు. గురువారం (ఆగస్ట్ 4) రాత్రి ప్రసాద్ ల్యాబ్ ప్రివ్యూ థియేటర్‌లో జరిగిన 'దగ్గరగా.. దూరంగా...' ఆడియో వేడుకలో ఈ సందర్భం చోటు చేసుకుంది. ఇందులో అందరికంటే చివరగా సుదీర్ఘంగా మాట్లాడిన ఆయన మధ్యలో అకస్మాత్తుగా 'అమాయకురాలు' సినిమా సంగతి ప్రస్తావిస్తూ అందులో నాయిక కాంచనని తను హత్తుకునే సన్నివేశం గురించి చెప్పుకొచ్చారు. "ఆ సమయంలో నిర్మాత మధుసూదనరావు గారు లేరు. నేను, కాంచన ఒకరినొకరం తన్మయత్వంతో గట్టిగా హత్తుకోవాలి. ఆ సీనులో ఆమె 'బ్రెస్ట్స్' కదిలాయి. ఈ సంగతి నాకెలా తెలుస్తుంది? రషెస్ చూసిన మధుసూదనరావు గారు నన్ను పిలిచారు. 'నీకు బుద్ధుందా? అంత గట్టిగా వత్తుకోవాలా? ఆ బ్రెస్ట్స్ చూడు ఎలా కదిలాయో. చూసుకోవద్దా?' అనరిచారు. అప్పట్లో అసభ్యతకు తావు లేకుండా అంత జాగ్రత్త తీసుకునేవారు. ఇప్పుడు అలాంటివేమీ లేవు. అయినా ఇప్పుటి హీరోయిన్లవి కదులుతున్నా అవి నిజమైనవో, కాదో.. ఇప్పుడు కృత్రిమమైనవేవో తొడుక్కుంటున్నారుగా" అని చెప్పుకొచ్చారు. ఆయన ఈ మాటలు చెప్పేప్పుడు ఆయన పక్కనే ఆ సినిమా హీరోయిన్ వేదిక ఉంది. వేడుకకి వచ్చిన వాళ్లలో ఆడవాళ్లు ఉన్నారు. ఆయన ఇలా సినిమాల్లో అసభ్యత గురించి మాట్లాడుతూ, తనే అసభ్యంగా మాట్లాడటం వాళ్లని తలలు దించుకునేలా చేసింది. "ఆడవాళ్ల వక్షస్థలం గురించి అది మాట్లాడే సందర్భమేనా? ముసలాయనకి ఎప్పుడు ఏం మాట్లాడాలో తెలీకుండా పోతోంది" అనే కామెంట్లు వినిపించాయి.

న్యూస్: చిన్నికృష్ణ కథతో అల్లు అర్జున్ మరో సినిమా!

అల్లు అర్జున్ తొలి సినిమా 'గంగోత్రి', పదో సినిమా 'బద్రినాథ్'కు కథల్ని అందించిన చిన్నికృష్ణ త్వరలో అర్జున్ కోసం మరో కథని సిద్ధం చేయబోతున్నాడు. ఈ సంగతిని 'బద్రినాథ్' 50 రోజుల ప్రెస్‌మీట్‌లో నిర్మాత అల్లు అరవింద్ తెలిపారు. ఇది చిన్నికృష్ణకు తెగ సంతోషాన్ని కలిగించింది. అర్జున్ కోసం మరో గొప్ప కథని తయారు చేస్తానని అప్పటికప్పుడే ప్రకటించారు. ఇప్పటివరకు ఆయన కథని సమకూర్చిన చిత్రాల్లో 'నరసింహనాయుడు', 'ఇంద్ర', 'గంగోత్రి' పెద్ద విజయాల్ని సాధించాయి. వాటితో పాటు బాలకృష్ణ నటించిన డిజాస్టర్ మూవీ 'సీమ సింహం'కీ ఆయన కథని అందించారు. ఇప్పుడు ఆయన కథతో 'బద్రినాథ్' వచ్చింది. ఓంకార్ డైరెక్టర్‌గా పరిచయం కాబోతున్న 'జీనియస్' కథ కూడా ఆయనిదే. నిజానికి 'గంగోత్రి' తర్వాత తనే డైరెక్టర్ కావాలనే తలంపు కలిగింది చిన్నికృష్ణకి. అయితే అది వాస్తవ రూపం దాల్చలేదు. ఈలోపు రచయితగా ఆయనకు చాలా గ్యాప్ వచ్చింది. ఆయన డైరెక్షన్ అంటే పెద్ద హీరోలెవరూ ముందుకు రాకపోవడంతో చేసేది లేక మళ్లీ మనసు మార్చుకుని దర్శకత్వ ఆలోచనని విరమించుకున్నాడు. కథా రచయితగానే కొనసాగాలని నిర్ణయించుకున్నాడు. ఇప్పుడు 'బద్రినాథ్' కలెక్షన్లు పూర్తి స్థాయిలో సంతృప్తినివ్వకపోయినా చిన్నికృష్ణ కథ మీద అరవింద్ నమ్మకం సడలలేదు. అందుకే ఆయన కథతో అర్జున్ హీరోగా గీతా ఆర్ట్స్ బేనర్‌పై మరో సినిమా చేస్తానని ప్రకటించారు. చిన్నికృష్ణ కథ అంటేనే భారీతనం కావాలి కాబట్టి మరో 40 నుంచి 50 కోట్ల రూపాయల సినిమాకి తెరతీయబోతున్నారన్న మాట.

ఆనాటి వెండితెర వెలుగులు: వై.వి. రావు

యరగుడిపాటి వరదారావు (వై.వి. రావు) నెల్లూరులోని ఓ సంపన్న, సంప్రదాయ కుటుంబం నుంచి సినీ రంగానికి వచ్చారు. స్కూలు రోజుల్లోనే రంగస్థలం వైపు ఆకర్షితులయ్యారు. బొంబాయి, కొల్హాపూర్‌కి వెళ్లి ఓ రెండు మూకీ సినిమాల్లో నటించారు. దక్షిణాదిన మూకీ చిత్రాల ఆద్యుల్లో ఒకరైన ఆర్.ఎస్. ప్రకాశ్ ఆయన్ని మద్రాసుకు తీసుకువచ్చారు. అలా వై.వి. రావు మూకీ చిత్రాలైన 'భీష్మ ప్రతిజ్ఞ' (1921), 'గజేంద్ర మోక్షం', 'ఉషా స్వప్న' (1924), 'గరుడ గర్వభంగం' (1929)లో నటించారు. ఇవన్నీ స్టార్ ఆఫ్ ద ఈస్ట్ ఫిల్మ్ కంపెనీ నిర్మించినవే. అలాగే 'సారంగధర' (1930), 'పాండవ నిర్వాణ', 'పాండవ అజ్ఞాతవాసం' (1931) చిత్రాల్లో నటించి, వాటిని డైరెక్ట్ చేశారు. వీటిని జనరల్ పిక్చర్స్ కార్పొరేషన్ నిర్మించింది. ఆసక్తికర సంగతేమంటే కన్నడలో తొలి టాకీ సినిమా 'సతీ సులోచన' (1934) దర్శకుడు ఆయనే. తమిళ టాకీ 'చింతామణి' దర్శకుడిగా అందరి ప్రశంసలు పొందిన ఆయన అందులో భవానీ శంకర్ పాత్రని స్వయంగా పోషించి తమిళనాట మంచి పేరు ప్రఖ్యాతులు పొందారు. మరో తమిళ సినిమా 'లవంగి'లో హీరోగా నటించి, దర్శకత్వం వహించిన వై.వి. రావు అందులో హీరోయిన్‌గా నటించిన అప్పటి వర్థమాన తార రుక్మిణితో ప్రేమలోపడి, పెళ్లి చేసుకున్నారు. అయితే వారి వైవాహిక జీవితం ఎంతో కాలం సాగక, విడిపోయారు. నిన్నటి తరం అందాల నాయకి, నేటి సీనియర్ నటి లక్ష్మి వారి కూతురే. ఆ తర్వాత రుక్మిణి అప్పటి మరో గ్లామరస్ హీరో చదలవాడ నారాయణరావుతో సంసార జీవితం గడిపారు. తెలుగులో విధవా వివాహంపై ఆయన రూపొందించిన 'మళ్లీ పెళ్లి' (1939) అప్పట్లో సంచలనం సృష్టించింది. ఈ చిత్రంలో రావు, కాంచనమాల జంటగా నటించారు.

న్యూస్: ఆరేళ్ల తర్వాత హీరోగా మోహన్‌బాబు

ఆరేళ్ల గ్యాప్‌తో సీనియర్ నటుడు మోహన్‌బాబు సోలో హీరోగా తెర మీద కనిపించబోతున్నారు. చివరిసారి 2005లో 'పొలిటికల్ రౌడీ'గా ఆయన కనిపించారు. ఈ మధ్యలో 'గేం', 'యమదొంగ', 'బుజ్జిగాడు', 'పాండురంగడు', 'మేస్త్రి', 'రాజు మహరాజు', 'సలీం', 'ఝుమ్మంది నాదం' వంటి సినిమాల్లో ఆయన నటించారు. వీటిలో 'గేం', 'రాజు మహరాజు'లో ప్రధాన పాత్రలు చేయగా, మిగతావి కేరక్టర్ రోల్స్ కింద లెక్క. ఇన్నాళ్లకి సోలో హీరోగా మరోసారి నటించబోతున్నారు. ఆయన సొంత బేనర్ శ్రీ లక్ష్మీప్రసన్న పిక్చర్స్‌పై నిర్మాణమయ్యే ఈ సినిమాని ఎవరు డైరెక్ట్ చేస్తారో ప్రకటించలేదు కానీ కథని సమకూర్చిన ముగ్గురు రచయితల పేర్లను వెల్లడించారు. వారు.. కోన వెంకట్, గోపీమోహన్, బీవీఎస్ రవి. "ఈ ముగ్గుర్నీ కలిపి నేను 'కేజీబీ' అని పిలుస్తుంటా. ఫారిన్‌లో ఈ గ్రూప్‌కి ప్రత్యేకమైన పేరుంది. ఆ ముగ్గురు రచయితలు దాదాపు యేడాదిగా పనిచేసి అద్భుతమైన స్క్రిప్తును అందించారు" అని చెప్పారు మోహన్‌బాబు. విశేషమేమంటే ఇందులో ఆయన సరసన అయిదుగురు అమ్మాయిలు నటించబోతున్నారు. వాళ్లెవరనేది తర్వాత తెలియజేస్తారు. మొదట ఇందులో ఐదుగురు హీరోలు, ఐదుగురు హీరోయిన్లు ఉంటారని ప్రకటించి, తర్వాత హీరో మోహన్‌బాబు ఒక్కరేననీ, హీరోయిన్లు ఐదుగురనీ ప్రకటించడం గమనార్హం. ఈ సినిమాలో మోహన్‌బాబు పాత్రని ప్రత్యేకంగా డిజైన్ చేసినట్లు తెలుస్తోంది. ఆ పాత్ర బాగా నచ్చినందునే ఇంత కాలం తర్వాత హీరోగా నటించేందుకు ఆయన నిర్ణయించుకున్నారు. ఈ సినిమా ఫలితం హీరోగా ఆయన భవితవ్యాన్ని నిర్దేశించనున్నది.

న్యూస్: 'నాన్న' ఓడాడు.. 'కాంచన' గెలిచింది!

తెలుగు బాక్సాఫీసు వద్ద తలపడ్డ రెండు డబ్బింగ్ సినిమాల్లో 'కాంచన' గెలవగా, 'నాన్న' ఓటమి పాలయ్యాడు. మానసిక వికలాంగుడిగా విక్రం గొప్పగా నటించిన 'నాన్న'కి విమర్శకుల నుంచి అభినందనలు వెల్లువెత్తాయి. ఇంకా చెప్పాలంటే 'నాన్న' కూతురిగా నటించిన బేబీ సారాకి మరింత పేరు వచ్చింది. కానీ బాక్సాఫీసు వద్ద ఈ ప్రశంసలేవీ పనిచేయలేదు. మళ్ల విజయప్రసాద్, సురేశ్ కొండేటి సంయుక్తంగా ఈ చిత్రాన్ని తెలుగులో విడుదల చేశారు. ఈ సినిమా హక్కుల్ని వారు రూ. 4 కోట్లకు కొనుగోలు చేశారు. అందులో ఒప్పందం ప్రకారం విజయప్రసాద్‌కు రూ. 1.4 కోట్లు శాటిలైట్ హక్కుల రూపంలో అందాయి. మరోవైపు వెస్ట్ గోదావరిలో 'నాన్న'ని సొంతంగా రిలీజ్ చేసిన సురేశ్ మిగతా అన్ని ఏరియాలకు సినిమాని అమ్మేశాడు. అందువల్ల అతను సేఫ్. నష్టమంతా విజయప్రసాద్ మీదే పడిందనేది సమాచారం. మరోవైపు లారెన్స్, శరత్‌కుమార్ ఇద్దరూ కలిసి నటించిన 'కాంచన' టాలీవుడ్ బాక్సాఫీస్‌పై విజయ బావుటా ఎగురవేసింది. హిజ్రాలూ అందరులాగే మనుషులేననే విషయాన్ని హారర్, కామెడీ మేలవింపుతో డైరెక్టర్ లారెన్స్ చెప్పిన తీరు అటు తమిళ, ఇటు తెలుగు ప్రేక్షకులనిద్దర్నీ మెప్పించింది. అందుకే ఈ సినిమాని తెలుగులో రిలీజ్ చేసిన బెల్లంకొండ సురేశ్ మంచి లాభాలు ఆర్జించాడు. ఆయన ప్రకారం ఇప్పటికే తెలుగు 'కాంచన' రజనీకాంత్ సూపర్‌హిట్ సినిమా 'చంద్రముఖి' కలెక్షన్లని అధిగమించింది. అలాగే రజనీ బిగ్గెస్ట్ తెలుగు ఫిల్మ్ 'శివాజీ'ని సైతం కొన్ని సెంటర్లలో అధిగమించింది. అందులో నిజమెంతున్నా గానీ 'కాంచన' పెద్ద హిట్టయ్యిందనే విషయంలో సందేహం లేదు. నిన్న 'రంగం', నేడు 'కాంచన' హిట్లతో డబ్బింగ్ సినిమాలే తెలుగు నేలమీద రాజ్యం చేస్తున్నట్లయ్యింది. దీన్ని ఓ గుణపాఠంగా తీసుకుని మనవాళ్లు ఇకనైనా క్వాలిటీ సినిమాలు తీయాల్సిన అవసరముంది.

న్యూస్: డైరెక్షన్ వదిలేయాలనుకున్న వినాయక్!

టాలీవుడ్ టాప్ డైరెక్టర్లలో ఒకడైన వి.వి. వినాయక్ డైరెక్షన్ వదిలేయాలని అనుకున్నాడు. ఎప్పుడు? 'బద్రినాథ్' సినిమా విడుదలై డివైడ్ టాక్ వచ్చినప్పుడు. ఈ సంగతిని వినాయక్ స్వయంగా చెప్పాడు. 'బద్రినాథ్' 187 సెంటర్లలో (!) 50 రోజులు పూర్తి చేసుకున్న సందర్భంగా జూలై 29 జరిగిన మీడియా సమావేశంలో మాట్లాడిన ఆయన ఈ సంగతి చెప్పాడు. "ఇంత బాగా తీసిన సినిమాకి కూడా డివైడ్ టాక్ రావడమేమిటా అని ఎంతో బాధపడ్డా. డిప్రెషన్‌లోకి వెళ్లిపోయా. అసలు డైరెక్షన్‌ని వదిలేసి పోవాలని అనుకున్నా. అయితే సినిమా విడుదలైన మూడు రోజుల తర్వాత పాజిటివ్ టాక్ మొదలై కలెక్షన్లు స్టడీ అయ్యాయి. అప్పుడు కానీ కుదుటపడలేకపోయా" అని చెప్పాడు వినాయక్. ఇదే మీటింగ్‌లో పాల్గొన్న చిన్నికృష్ణ అయితే తనదైన స్టయిల్లో మాట్లాడుతూ ఈ సినిమాకి దిష్టి తగలడం వల్లే మొదటి వారం రోజులు టాక్ అలా వచ్చిందనీ, వారం తర్వాత దిష్టి పోయిందనీ, అందుకే సినిమా ఇంత పెద్ద హిట్టయ్యిందనీ చెప్పాడు. అయితే 'బద్రినాథ్' 187 సెంటర్లలో 50 రోజులు నడిచిందంటే జనానికి నమ్మ శక్యం కావడం లేదు. దానికి బలమైన హేతువు హైదరాబాద్‌లో 50వ రోజుకు అది కేవలం 4 థియేటర్లలోనే ఆడుతుండటం. ఏదేమైనా ఈ సినిమా 'ఫ్లాపయ్యిందనుకుని' దర్శకత్వం వదిలేద్దామనుకున్న వినాయక్ అది 'హిట్టవడం'తో మళ్లీ మనసు మార్చుకున్నాడన్న మాట.

న్యూస్: 'శిరిడి సాయి'గా నాగార్జున మెప్పించగలరా?

తెలంగాణ పోరాట యోధుడు 'రాజన్న'గా నటిస్తున్న అక్కినేని నాగార్జున మరో చారిత్రక పురుషుని పాత్ర పోషించడానికి సిద్ధమవుతున్నారు. అది షిర్డీసాయి పాత్ర. సినిమాకి మాత్రం 'శిరిడి సాయి' అనే పేరు పెట్టారు. నిరాడంబరత్వాన్నీ, ప్రేమ తత్త్వాన్నీ, శాంతి తత్త్వాన్నీ ప్రపంచానికి బోధించిన షిర్డీసాయిగా నాగార్జున నటించబోతున్నారనే సంగతి ఎవరినీ పెద్దగా ఆశ్చర్యపరచ లేదు. కారణం, అలాంటి పాత్రల వైపు మొగ్గు చూపుతున్న అగ్ర కథానాయకుడు ఆయనే కాబట్టి. ఇప్పటికే 'అన్నమయ్య', 'శ్రీరామదాసు' పాత్రల పోషణతో నటునిగా ఆయన ఎంతో ఎత్తుకు ఎదిగారు. తోటి హీరోలతో పోలిస్తే ఆయన్ను ప్రత్యేకంగా నిలిపే పాత్రలవి. భవిష్యత్తులోనూ నిలిచిపోయే పాత్రలవి. ఇప్పుడు 'రాజన్న', 'శిర్దిడి సాయి' పాత్రలతో ఆయన తనని తానే అధిగమించుకునే యత్నంలో ఉన్నారు. కొన్నేళ్లుగా భక్తిరస చిత్రాలకే ప్రాధాన్యమిస్తున్న సీనియర్ డైరెక్టర్ కె. రాఘవేంద్రరావు ఈ చిత్రానికీ దర్శకుడు. కాకపోతే రచయిత మారాడు. ఇదివరకు 'అన్నమయ్య', 'శ్రీరామదాసు'కు జె.కె. భారవి రచన చేస్తే, 'శిరిడి సాయి'కి పరుచూరి బ్రదర్స్ రచన చేస్తున్నారు. ఎప్పటిలా ఎం.ఎం. కీరవాణి సంగీతాన్ని సమకూరుస్తున్నారు. షిర్డీలోనే వారం రోజుల పాటు జరిపిన సిట్టింగ్స్‌లో మూడు పాటల్ని కంపోజ్ చేశారు. నవంబర్ నాటికి పాటల రికార్డింగ్‌ని పూర్తి చేయాలనేది సంకల్పమని నిర్మాత ఎ. మహేశ్‌రెడ్డి తెలిపారు.
ఇప్పటికే తెలుగులో షిర్డీసాయిపై ఎన్నో సినిమాలు వచ్చాయి. వాటన్నింటిలోనూ 1986లో వచ్చిన 'శ్రీ షిర్డీ సాయిబాబా మహత్యం' ఎక్కువ జనాదరణ పొందింది. షిర్డీసాయి పాత్రలో విజయచందర్ బాగా రాణించారు. ఇప్పటివరకు మరొకరినెవర్నీ ప్రేక్షకులు ఆ పాత్రలో ఆమోదించలేదు. ఇప్పుడు 'శిరిడి సాయి'కి జనామోదం లభించాలంటే విజయచందర్‌ని నాగార్జున మరిపించ గలగాలి. దాన్ని ఆయన సాధించగలరా?

టర్నింగ్ పాయింట్: చంద్రబోస్

"నేను గాయకుణ్ణి కావాలనుకొని, సొంతంగా కొన్ని పాటలు రాసి వాటిని పాడుకునేవాణ్ణి. నా ఫ్రెండ్ ఒకతను వాటిని చూసి, అవి బాగున్నాయనీ, గేయ రచయితగా కెరీర్‌ని మలచుకుంటే బాగుంటుందనీ అభిప్రాయపడ్డాడు. అప్పుడు కొత్తగా సినిమాని ప్లాన్ చేసిన డైరెక్టర్ ముప్పలనేని శివను కలిశాం. ఆ తర్వాత ఆ సినిమాని నిర్మిస్తున్న గొప్ప నిర్మాత డి. రామానాయుడు గారినీ, దానికి సంగీత దర్శకురాలైన ఎం.ఎం. శ్రీలేఖనూ కలిశాం. ఆమె నాకో ట్యూన్ ఇచ్చింది. ఆ సినిమా శ్రీకాంత్ హీరోగా నటించిన 'తాజ్‌మహల్'. అప్పుడు నేను రాసిన పాట 'మంచుకొండల్లోన చంద్రమా చందనాలు చల్లిపో..'. ఆ అనుభవాన్ని మాటల్లో వర్ణించలేను. నా తొలి సినిమాలోనే సిరివెన్నెల సీతారామశాస్త్రి, భువనచంద్ర వంటి గేయ రచయితల సరసన నాకూ చోటు లభించిండం నాకు దక్కిన గొప్ప భాగ్యం. నేను బాగా అభిమానించే బాలు, చిత్ర నా పాటల్ని పాడారు. అదో గొప్ప అనుభవం.
ఆ తర్వాత నా జీవితంలో మరో టర్నింగ్ పాయింట్ చోటు చేసుకుంది. నేను రాసిన ఓ పాట షూటింగ్ సందర్భంగా సంజీవయ్య పార్క్‌కి వెళ్లా. అక్కడ కొరియోగ్రాఫర్ కంపోజ్ చేస్తున్న మూవ్‌మెంట్స్ నన్ను బాగా ఆకట్టుకున్నాయి. ఆమె పేరు సుచిత్ర. ఆ తర్వాత కొద్ది రోజులకే ఆమె నా భార్య అయ్యింది.
ఇప్పుడు గేయ రచయితగా నా కెరీర్‌లో 16వ యేడు నడుస్తోంది. ఈ కాలంలో చాలా అవార్డులే సంపాదించా. నా కెరీర్ ఎంతో సంతృప్తికరంగా, సంతోషకరంగా కొనసాగుతోంది. అయితే దాని వెనుక ఎంతో శ్రమ ఉన్నదనేది మరచిపోకూడదు."

న్యూస్: 'హీరో అజయ్' అనిపించుకుంటాడా?

విలన్ పాత్రలతో పాపులరై తర్వాత హీరోలుగా మారి, పేరు తెచ్చుకున్నవాళ్లు టాలీవుడ్‌లో చాలామందే ఉన్నారు. కృష్ణంరాజు, చిరంజీవి, మోహన్‌బాబు, గోపీచంద్ వంటివాళ్లు అందుకు మంచి ఉదాహరణ. ఆ కోవలోనే హీరో కావాలని తపిస్తున్న నటుడు అజయ్. 'హీరో అజయ్' అనే పేరును ఖాయం చేసుకోవాలనేది అతడి చిరకాల వాంఛ. అయితే ఇప్పటివరకు అతడి కల నెరవేరలేదు. విలన్ పాత్రలతో 'విక్రమార్కుడు' నుంచే ప్రేక్షకుల మెప్పు పొందిన అతడు హీరోగా 'ఆ ఒక్కడు', 'సారాయి వీర్రాజు', 'వైకుంఠపాళి' వంటి సినిమాలు రూపొందాయి. కానీ హీరోగా అతడికి బ్రేక్ రాలేదు. ఆ మూడు సినిమాలూ ప్రేక్షకుల్ని మెప్పించలేక పోవడమే దీనికి కారణం. 'ఆ ఒక్కడు'లో అతడికంటే హీరోయిన్ మధురిమ పాత్రకే ఎక్కువ ప్రాధాన్యం. 'సారాయి వీర్రాజు' పూర్తిగా అతడి పాత్రమీదే ఆధారపడిన సినిమా అయినా ఆ కథ మనవాళ్లకి నచ్చలేదు. ఇక 'వైకుంఠపాళి'లో ముగ్గురు హీరోల్లో అతను ఒకడు. మిగతా ఇద్దరు కృష్ణుడు, రణధీర్. ఆ ఇద్దరితో పోల్చితే అజయ్ పాత్రకే ప్రాధాన్యత ఎక్కువైనా ఈ థ్రిల్లర్ ఆడియన్స్‌ని థ్రిల్ చేయలేక పోయింది. అయితే అతడు హీరో కాకపోయినా హీరో కంటే ఎక్కువ ప్రశంసల్ని తెచ్చిన సినిమా 'విరోధి'. నీలకంఠ డైరెక్ట్ చేసిన ఈ సినిమాలో హీరో శ్రీకాంత్ కంటే ఎక్కువగా మావోయిస్ట్ రోల్‌లో గొప్పగా రాణించాదు అజయ్. కానీ ఏం లాభం. ఆ సినిమా బాక్సాఫీస్ వద్ద ఘోరంగా బోల్తాకొట్టింది. అతడి సినిమాలు ఇలా ఒక్కొక్కటే ఫ్లాపవతూ రావడంతో అతడితో సినిమాలు తియ్యాలని ప్లాన్ చేసుకున్న డైరెక్టర్లు, నిర్మాతలు ఇప్పుడు వెనుకంజ వేస్తున్నారు. ఇప్పటికిప్పుడు కాకపోయినా కొంత కాలం తర్వాతైనా అజయ్ హీరోగా నిలదొక్కుకుంటాడని అతని శ్రేయోభిలాషులు నమ్ముతున్నారు. వారి నమ్మకం నిజమవుతుందా?