తెర వెనుక

Thursday, July 1, 2010

'Puli' Audio on 11 July and Movie on 12 Aug

పవన్ కల్యాణ్ హీరోగా ఎస్.జె. సూర్య డైరెక్ట్ చేస్తున్న 'పులి' సినిమా పోస్ట్ ప్రొడక్షన్ పనులు జరుగుతున్నాయి. ఈ సినిమా ఆడియో జూలై 11న రిలీజ్ కాబోతోంది. ఇక సినిమా ఎప్పుడు వస్తుందని అనుకుంటున్నారు? ఆగస్ట్ 12న. ఈ సినిమాకి ఎ.ఆర్. రెహమాన్ మ్యూజిక్ ఇస్తున్నాడు. శింగనమల రమేష్ నిర్మిస్తున్న ఈ సినిమా ద్వారా నికిషా పటేల్ హీరోయిన్‌గా పరిచయం కాబోతోంది. 'పులి' రిలీజ్ అవగానే పవన్ డైరీ ఖాళీ లేకుండా బిజీగా మారింది. 'లవ్ ఆజ్ కల్'కి రీమేక్‌గా తయారవుతున్న 'ఖుషీగా' సినిమా షూటింగ్‌తో అతను బిజీగా గడపనున్నాడు. ఈ సంగతిని పవన్ స్వయంగా ఇంతకుముందే ట్విట్టర్‌లో తెలిపాడు.

Gallery: Abhinay (Savitri's grandson)

Aditi Agarwal Re-entry!

ఆర్తీ అగర్వాల్ చెల్లెలు అదితి జ్ఞాపకముంది కదా.. తొలి సినిమాలోనే 'గంగోత్రి'గా ఘన విజయాన్ని అందుకున్న ఆమె కెరీర్ ఏమాత్రం ఎదగకపోవడం ఒకింత ఆశ్చర్యాన్ని కలిగించే అంశమే. చాలా కాలం తర్వాత ఆమె మొహానికి రంగేసుకుని 'లోకమే కొత్తగా' అనే సినిమాలో హీరోయిన్‌గా నటిస్తోంది. ఇందులో శివాజీ హీరో. నేహ మీడియా ప్రై. లిమిటెడ్ అనే సంస్థ నిర్మిస్తున్న ఈ చిత్రానికి భరత్ పారేపల్లి దర్శకుడు. ఇటీవలే అతను అదితి అక్క ఆర్తీతో 'నీలవేణి' అనే చిత్రాన్ని రూపొందించాడు. ఈ సినిమా ఇంకా విడుదల కావాల్సి ఉంది. ఇప్పుడు ఆమె చెల్లెలు అదితిని పెట్టి ఈ సినిమా తీస్తున్నాడు.

కన్నడంలో సక్సెస్ అయిన్ 'మొగ్గిన మనసు' అనే సినిమాకి ఇది రీమేక్. ఐదు ఫిలింఫేర్ అవార్డులు పొందిన ఆ సినిమాలో ప్రధానాంశం.. కాలేజీలోకి ప్రవేశించిన యువత మనసులు దారి తప్పుతుంటాయి. ఆ సమయంలో తల్లిదండ్రులు, అధ్యాపకులు వాళ్లని సరైన దారిలో పెట్టేందుకు ప్రయత్నించాలి. ఈ సినిమాలో అదితి కాలేజీ విద్యార్థినిగా కనిపించబోతోంది. నిజానికి 'గంగోత్రి' తర్వాత సరైన సినిమాల్ని ఎంచుకోనుంటే ఆమె సినీ కెరీర్ మెరుగ్గా ఉండేదే. ఆ సినిమా తర్వాత 'విద్యార్థి', 'కొడుకు' సినిమాలను ఆమె చేసింది. 'విద్యార్థి'లో హీరో ఆర్.బి. చౌదరి కొడుకు రమేష్ అయితే, 'కొడుకు'లో హీరో ఎమ్మెస్ నారాయణ కొడుకు విక్రం. అవి ఫెయిలవడంతో ఆమె కెరీర్ దాదాపు ఆగిపోయింది. అందుకే అమెరికా వెళ్లి సాఫ్ట్‌వేర్ కంపెనీలో జాబ్ చేసుకుంటోంది. ఇప్పడు మళ్లీ 'లోకమే కొత్తగా' అంటూ సినిమాల్లో రీఎంట్రీ ఇవ్వబోతోంది. ఈ ఎంట్రీ అయినా ఆమెకి కొత్త లోకాన్ని అందిస్తుందా?

Wednesday, June 30, 2010

'Komaram Bheem' is coming to cinema halls

ఆదిలాబాద్ ప్రాంతంలోని గిరిజనుల హక్కుల కోసం చావుకు తెగించి పోరాడిన గోండు యోధుడు కొమరం భీం కథ ఎంతో ఉత్తేజభరితం, మరెంతో ఉద్వేగభరితం. ఆయన కథతో సుమారు 20 యేళ్ల క్రితం రూపొందిన 'కొమరం భీం' సినిమా ఇన్నాళ్లకి జూలై 2న థియేటర్లలో రిలీజ్ కాబోతోంది. నవలా రచయితా అప్పుడప్పుడే పాపులర్ అవుతున్న అల్లాణి శ్రీధర్‌కి డైరెక్టర్‌గా ఇదే తొలి సినిమా. 'మాభూమి' చిత్రానికి ఉత్తమ రచయితగా నంది అవార్డు పొందిన సినీ నవలా రచయిత ఎస్.ఎం. ప్రాణ్‌రావు ఈ చిత్రానికి రచన చేసి, సంభాషణలు సమకూర్చారు. ఈ సినిమా స్క్రిప్ట్ కోసం ఆయనా, శ్రీధర్ కలిసి ఆదిలాబాద్ అడవుల్లో మూడు నెలలు గోండులతో కలిసి గడిపి వారి ఆచారాలు, సంప్రదాయాలు, శుభ, అశుభ కార్యక్రమాలను అధ్యయనం చేశారు. "కొమరం భీం భార్య ఎక్కడ ఉన్నారో కనుగొని, ఆమెని కలిశాం. అప్పుడామె దయనీయ స్థితిలో ఉన్నారు. భీం గురించి ఆమె చాలా విషయాలు చెప్పారు" అని తెలిపారు ప్రాణ్‌రావు. కొమరం భీం పాత్రని రంగస్థల నటుడు, రచయిత అయిన భూపాల్‌రెడ్డి పోషించారు. "కొమరం భీం ఇలాగే ఉంటాడేమో అన్నట్లుగా ఆ పాత్ర పోషణ చేశారు భూపాల్" అని ప్రాణ్‌రావు, శ్రీధర్ ఇద్దరూ ప్రశంసించారు.

విశేషమేమంటే ఈ చిత్రంలోని పాటల్ని భూపల్ స్వయంగా రాశారు. అంతకంటే విశేషం, ఆ పాటలకి అవార్డు చిత్రాల దర్శకుడు గౌతం ఘోష్ సంగీతం సమకూర్చడం. అప్పట్లోనే నంది అవార్డుల్లో ఈ చిత్రానికి ఉత్తమ తొలి చిత్ర దర్శకుడు, ఉత్తమ జాతీయ సమైక్యతా చిత్రం అవార్డులు లభించాయి. అయితే "దర్శకుడిగా నంది అవార్డును తీసుకున్నా నాకు తృప్తిలేదు. నాకు కావలసింది నంది కాదు, ఈ సినిమాకి వచ్చిన ప్రేక్షకుడి చేతిలోని టిక్కెట్టు. ఈ సినిమా ఇన్నాళ్లకి విడుదలవబోతోందంటే ఎంతో భావోద్వేగంగా ఉంది" అని సహజంగీనే స్పందించారు శ్రీధర్.

ఈ సినిమా షూటింగ్ అంతా ఆదిలాబాద్ అడవుల్లో జరిగింది. ఎండకి ఎండుతూ, వానకి తడుస్తూ ఈ సినిమా కోసం పనిచేశారు. "ఈ సినిమా రూపకల్పన విషయంలో ఆదిలాబాద్ గిరిజనుల సహకారం మరవలేనిది. ఇది తెలంగాణ కథ. ఇందులోనివి తెలంగాణ మాటలు, పాటలు. అడవిలోనే మొత్తం షూటింగ్. నాతో సహా అందరూ నేలమీదే పడుకుని, నదిలో స్నానం చేసేవాళ్లు షూటింగ్ జరుగుతున్నంత కాలం" అని అప్పటి రోజుల్ని భూపాల్ జ్ఞప్తి చేసుకున్నారు. ఆదివాసి చిత్ర (ఐటిడిఎ, ఉట్నూరు), ఫిల్మీడియా ప్రొడక్షన్స్ సంయుక్తంగా నిర్మించిన ఈ చిత్రంలో భీం భార్యగా మౌనిక నటించగా, శ్రీధర్ మిత్రుడు కె. భవానీశంకర్ సినిమాటోగ్రఫీని అందించారు. గిరిజన సంక్షేమశాఖ సహకారంతో ఎఫ్.డి.సి., కొమరం భీం ఫౌండేషన్ ద్వారా జూన్ తొలి వారంలో ఈ చిత్రాన్ని విడుదల చేయబోతున్నారు. ఒక అల్లూరి సీతారామరాజు లాగా, ఒక భగత్‌సింగ్ లాగా, జనం హృదయాల్లో నిలిచిన పోరాట యోధుడు 'కొమరం భీం' జీవితాన్ని తెరమీద చూసే అవకాశం ఇన్నాళ్లకైనా కలుగుతుండటం హర్షణీయం.

Tuesday, June 29, 2010

Gallery: Gadde Sindhura

Mahesh movie launched

మహేశ్ హీరోగా నటించే కొత్త సినిమా లాంచనంగా సోమవారం మొదలయ్యింది. శ్రీను వైట్ల ఈ సినిమాకి డైరెక్టర్. ఇదివరకు వెంకటేశ్, శ్రీను వైట్ల కాంబినేషన్‌లో 'నమో వెంకటేశ' ఫిలింని తీసిన 16 రీల్స్ ఎంటర్‌టైన్‌మెంట్ సంస్థ ఈ సినిమాని నిర్మిస్తోంది. మహేశ్ అన్న రమేశ్‌బాబు నిర్మాతగా వ్యవహరించే శ్రీ కృష్ణా ప్రొడక్షన్స్ (ప్రై.) లిమిటెడ్ ఈ సినిమాని సమర్పిస్తోంది. సోమవారం (జూన్ 28) ఉదయం 7.20 గంటలకు రామానాయుడు స్టూడియోస్‌లో పూజా కార్యక్రమాలు జరిగాయి. ఈ సినిమాలో మహేశ్ సరసన 'ఏ మాయ చేసావె' ఫేం సమంత హీరోయిన్‌గా నటిస్తోంది. జూలై 15 నుంచి రెగ్యులర్ షూటింగ్ జరుగుతుంది. లవ్, యాక్షన్, సెంటిమెంట్, ఎంటర్‌టైన్‌మెంట్ అంశాలతో ఈ సినిమాని రూపొందిస్తున్నానని డైరెక్టర్ శ్రీను వైట్ల తెలిపారు. ఈ సినిమాకి రాం ఆచంట, గోపీచంద్ ఆచంట, అనిల్ సుంకర నిర్మాతలు. తొలిసారి మహేశ్, వైట్ల కాంబినేషన్‌లో వస్తున్న ఈ సినిమా సెన్సేషన్ క్రియేట్ చేస్తుందా?

Monday, June 28, 2010

Good Days for Uday Kiran?

రెండో ఇన్నింగ్స్‌తో ఎలాగైనా మునుపటి ప్రాభవాన్ని పొందాలని తపిస్తున్న యంగ్ హీరో ఉదయ్ కిరణ్ ఇప్పుడు 'నువ్వెక్కడుంటే నేనక్కడుంటా' అంటున్నాడు, టీనేజ్ గర్ల్ శ్వేతాబసు ప్రసాద్‌తో. తమిళుడైన సుభా సెల్వం ఈ సినిమాకి డైరెక్టర్. 'చిత్రం', 'నువ్వు నేను', 'మనసంతా నువ్వే' వంటి వరుస హిట్లతో యువతరం ఆరాధ్య నటుడిగా అవతరించిన ఉదయ్‌కి వాటి తర్వాత ఇప్పటివరకు మరో చెప్పుకోదగ్గ విజయమేదీ దక్కలేదు. ఐదేళ్ల క్రితం తన తొలి, మలి చిత్రాల దర్శకుడు తేజతో చేసిన 'ఔనన్నా కాదన్నా' సినిమా తర్వాత రెండేళ్ల విరామం తీసుకుని 'వియ్యాలవారి కయ్యాలు'తో రెండో ఇన్నింగ్స్ మొదలుపెట్టినా అతడికి నిరాశే ఎదురయ్యింది. ఆ తర్వాత మదన్ దర్శకత్వంలో వచ్చిన 'గుండె ఝల్లుమంది'పై అతడెన్నో ఆశలు పెట్టుకున్నాడు. ఆ సినిమా ఓ మాదిరిగా ఉందనిపించుకున్నా, కమర్షియల్‌గా ఉపయోగపడలేదు. రెండేళ్ల క్రితం వచ్చిన 'ఏక్‌లవ్యుడు' బాక్సాఫీసు వద్ద బోల్తా కొట్టింది. ఈ పరిస్థితుల్లో 'నువ్వెక్కడుంటే నేనక్కడుంటా' సినిమాని ఓ తపనతో, ఓ కసితో చేశాడు ఉదయ్. రొమాంటిక్ ఎమోషనల్ ఫ్యామిలీ ఎంటర్‌టైనర్‌గా ఈ సినిమాని శ్వేతాబసు అభివర్ణించింది. 'కొత్త బంగారు లోకం', 'రైడ్' చిత్రాలతో యువ ప్రేక్షకులకి సన్నిహితమైన శ్వేతబసు హీరోయిన్ కావడంతో ఈ సినిమాపై ట్రేడ్ వర్గాల్లో కొద్దిపాటి ఆసక్తి నెలకొంది. "ఉదయ్, శ్వేతాబసులది చూడ చక్కని జంట. ప్రేక్షకుల్ని ఈ జంట ఆకట్టుకోవడం ఖాయం" అని చెప్పారు డైరెక్టర్ సుభా సెల్వం. ఈ సినిమాకి ప్రధాన బలం కథేననీ, క్లైమాక్స్ అద్భుతంగా వచ్చిందనీ ఆయనన్నాడు. ఈ సినిమాతోనైనా ఉదయ్‌కి మంచి రోజులు వస్తాయేమో చూద్దాం.

Gallery: Gadde Sindhura (Killer)

Sunday, June 27, 2010

KOTHIMOOKA: Fourth Trial for AVS

దర్శకుడిగా నిలదొక్కుకోవాలని తపిస్తున్న నటుడు ఏవీయస్, ఆ దిశగా నాలుగో యత్నం చేస్తున్నారు. భారీకాయుడు కృష్ణుడు హీరోగా, బ్యూటీ గర్ల్ శ్రద్ధా ఆర్య హీరోయిన్‌గా ఆయన 'కోతిమూక' డైరెక్ట్ చేశారు. తులసి పూజిత ఫిలిమ్స్ బ్యానర్‌పై వెంకట్ జగదీష్ అనే నూతన నిర్మాత ఈ ఫిలింని నిర్మిస్తున్నారు.

కమెడియన్‌గా తనకంటూ ప్రత్యేక ఇమేజ్ పొందిన ఏవీయస్ 'సూపర్ హీరోస్'తో డైరెక్టర్‌గా తన జర్నీ ప్రారంభించారు. ఆ సినిమాలో బ్రహ్మానందం, ఆయనా టైటిల్ రోల్స్ చేశారు. రామానాయుడు నిర్మించిన ఆ సినిమా కమర్షియల్‌గా సక్సెస్ సాధించలేదు. ఆ తర్వాత తనే సొంతంగా 'ఓరి నీప్రేమ బంగారం గానూ' అనే సినిమాని ఆయన తీశారు. సూపర్ హిట్ ఫిల్మ్ 'నిన్నే పెళ్లాదతా'లో 'ఎటో వెళ్లిపోయింది మనసు' పాటతో పాపులర్ అయిన సింగర్ రాజేశ్‌ని ఈ సినిమాతో ఆయన హీరోగా పరిచయం చేశారు. కానీ ఆ సినిమా కూడా ఆయనకు కమర్షియల్‌గా అసంతృప్తినే మిగిల్చింది. ఈసారి నలుగురు మిత్రుల కథకి కాస్త సందేశాన్ని మేళవించి 'రూంమేట్స్' సినిమాని డైరెక్ట్ చేశారు ఏవీయస్. కొన్ని వర్గాల నుంచి ప్రశంసలు పొందినప్పటికీ ఈసారీ సక్సెస్ రుచి చూడలేకపోయారు. దాంతో తనలోని దర్శకుడికి మూడున్నరేళ్లు విరామం ఇచ్చిన ఆయన ఇప్పుడు 'కోతిమూక'తో మరోసారి పరీక్షకి సిద్ధమయ్యారు.

'వినాయకుడు', 'విలేజ్‌లో వినాయకుడు' సినిమాలతో కొత్త తరహా హీరోగా స్థూలకాయుడైన కృష్ణుడు సక్సెస్ కావడంతో అతణ్ణే హీరోగా పెట్టి 'కోతిమూక' రూపొందించారు ఏవీయస్. "కోతి అంటూ హేళనగా చూస్తారు కానీ, ఆ కోతులే లంకకు వారధి కట్టాయనీ, శ్రీరామునికి ఘనవిజయం చేకూర్చి పెట్టాయనీ రామాయణం చెబుతుంది. అలాగే మా చిత్రంలోని కోతిమూక కూడా ఇతరులకు ఉపయోగపడే పనులు చేస్తుంది" అని తెలిపారు ఏవీయస్. అందుగు తగ్గట్లే టైటిల్‌కి 'నాట్ ఓన్లీ కామెడీ' అనే ట్యాగ్ లైన్‌ని ఉపయోగించారు. ఈ సినిమాతో డైరెక్టర్‌గా ఏవీయస్ విజయాన్ని సాధించడం ఖాయమని స్టార్ కమెడియన్ బ్రహ్మానందం సహా ఆ సినిమాకి పనిచేసిన వాళ్లంతా గట్టి నమ్మకాన్ని వ్యక్తం చేస్తున్నారు. రెట్టించిన బలంతో, గట్టి పట్టుదలతో ఏవీయస్ చేసిన ఈ ప్రయత్నం ఫలించే అవకాశాలు ఎక్కువగా కనిపిస్తున్నాయి. జూలై 9న 'కోతిమూక' మనముందుకు వస్తోంది.